അടുത്തയിടെ കൊച്ചിയിൽ മുടി മാറ്റിവയ്ക്കൽ ശസ്ത്രക്രിയ നടത്തിയ ഒരു യുവാവിന്‍റെ ദയനീയമായ അവസ്‌ഥ മാധ്യമങ്ങൾ വഴി പുറത്തു വന്നിരുന്നു. മരണത്തിന്‍റെ വക്കിൽ നിന്ന് ഏറെ പണിപ്പെട്ടാണ് ആ യുവാവ് പുറത്ത് കടന്നത്. ചില ഇടങ്ങളിൽ ഹെയർ ട്രാൻസ്‌പ്ലാന്‍റേഷൻ നടത്തി മരണംവരെ സംഭവിച്ചിട്ടുണ്ട്. അത്രയ്ക്കും അപകടകരമാണോ ഈ ശസ്ത്രക്രിയ?

മുടി കൊഴിച്ചിൽ, കഷണ്ടി, ദുർബലമായ മുടി എന്നീ പ്രശ്‌നങ്ങൾ ഇപ്പോൾ സർവ്വ സാധാരണമാണ്. പ്രത്യേകിച്ച് യുവാക്കൾക്കിടയിൽ ഈ പ്രശ്നം അതിവേഗം വർദ്ധിച്ചുവരികയാണ്. വർദ്ധിച്ചുവരുന്ന മലിനീകരണം, മോശം ജീവിതശൈലി, സമ്മർദ്ദം, ഉറക്കക്കുറവ്, ആരോഗ്യകരമായ ഭക്ഷണത്തിന്‍റെ അഭാവം, പാരമ്പര്യം, ജങ്ക് ഫുഡിനോടുള്ള ഇഷ്ട‌ം എന്നിങ്ങനെ നിരവധി കാരണങ്ങളുണ്ട്.

സോഷ്യൽ മീഡിയയിലെ “പെർഫെക്റ്റ് ലുക്ക്” എന്ന സമ്മർദ്ദം കാരണം യുവാക്കൾ കൂടുതൽ സൗന്ദ്യവർദ്ധക ചികിത്സകളിലേക്ക് ആകർഷിക്കപ്പെടുന്നു. അതിലൊന്നാണ് ഹെയർ ട്രാൻസ്പ്ലാന്‍റേഷൻ. ഇതിനെ മുടി പുനഃസ്‌ഥാപനം അല്ലെങ്കിൽ മുടി മാറ്റിവയ്ക്കൽ എന്നും വിളിക്കുന്നു.

മുടി മാറ്റിവയ്ക്കൽ ഒരു മേജർ ശസ്ത്രക്രിയയാണ്. ശരിയായ രീതിയിലും പരിചയസമ്പന്നനായ ഒരു ഡോക്ട‌റുടെ മേൽനോട്ടത്തിലും ചെയ്‌താൽ ഫലപ്രദമായേക്കാവുന്ന ഒരു ശസ്ത്രക്രിയ. എന്നാൽ ഇതിൽ ചെറിയ അശ്രദ്ധ ഗുരുതരമായ പ്രത്യാഘാതങ്ങൾ ഉണ്ടാക്കും. ഇത് മരണത്തിലേക്ക് പോലും നയിച്ചേക്കാം.

അടുത്തിടെ കാൺപൂരിൽ മുടി മാറ്റി വയ്ക്കൽ ശസ്ത്രക്രിയയ്ക്ക് വിധേയരായ രണ്ടുപേരുടെ മരണത്തിന് കാരണമായ സംഭവങ്ങൾ പുറത്തുവന്നു. ഈ പ്രക്രിയയെക്കുറിച്ച് അവബോധം പ്രചരിപ്പിക്കേണ്ടത് വളരെ പ്രധാനമാണ്. കഷണ്ടിയുടെ പേരിൽ വിഷമിക്കുന്നവർ ഇതൊന്നും ചെയ്യരുത് എന്നല്ല പറഞ്ഞു വരുന്നത്. സ്വന്തം വ്യക്തിത്വം മെച്ചപ്പെടുത്താൻ ഒരാൾക്ക് പൂർണ്ണ അവകാശമുണ്ട്. പക്ഷേ മുടി മാറ്റിവയ്ക്കുന്നതിന് മുമ്പ് ഇതുമായി ബന്ധപ്പെട്ട എല്ലാ വിവരങ്ങളും ശ്രദ്ധിക്കേണ്ടത് അതിലും പ്രധാനമാണ്.

മുടി മാറ്റിവയ്ക്കൽ എന്താണ്?

തലയുടെ ഏത് ഭാഗത്തുനിന്നും മുടിയുടെ വേരുകൾ (ഫോളിക്കിളുകൾ) എടുത്ത് കഷണ്ടിയുള്ളതോ നേർത്ത രോമമുള്ളതോ ആയ ഭാഗങ്ങളിൽ മാറ്റി വയ്ക്കുന്ന ഒരു ശസ്ത്രക്രിയയാണ് മുടി മാറ്റിവയ്ക്കൽ. മുടി കൊഴിച്ചിലും കഷണ്ടിയും കൊണ്ട് ബുദ്ധിമുട്ടുന്ന യുവാക്കൾ മുടി വളരാൻ എല്ലാ പ്രതിവിധികളും പരീക്ഷിച്ചു കഴിഞ്ഞാൽ അവസാനത്തേതും സ്‌ഥിരവുമായ ഓപ്ഷനായി മുടി മാറ്റിവയ്ക്കൽ ശസ്ത്രക്രിയയ്ക്ക് തയ്യാറാവുകയാണ്.

എത്രതരം മുടി മാറ്റിവയ്ക്കലുകൾ

ഫോളിക്കുലാർ യൂണിറ്റ് ട്രാൻസ്പ്ലാന്‍റേഷൻ (എഫ്‌റ്റി): ആയിരക്കണക്കിന് രോമകൂപങ്ങൾ അടങ്ങിയ തലയുടെ പിൻഭാഗത്ത് ഒരു മുറിവുണ്ടാക്കി ചർമ്മത്തിന്‍റെ നേർത്ത ഒരു സ്ട്രിപ്പ് നീക്കം ചെയ്യുന്നു. ആ സ്കിൻ സ്ട്രിപ്പ് ഒരു മൈ ക്രോസ്കോപ്പിന്‍റെ സഹായത്തോടെ നിരവധി ചെറിയ ഗ്രാഫ്റ്റുകളായി (ഫോളി കുലാർ യൂണിറ്റുകൾ) തിരിച്ചിരിക്കുന്നു. അതിൽ 1 മുതൽ 4 വരെ രോമവേരുകൾ അടങ്ങിയിരിക്കുന്നു. രോമം കുറവുള്ളതോ ഇല്ലാത്തതോ ആയ സ്‌ഥലങ്ങളിൽ ചെറിയ ദ്വാരങ്ങൾ ഉണ്ടാക്കിയാണ് ഈ സ്ക‌ിൻ ഗ്രാഫ്റ്റുകൾ പ്രയോഗിക്കുന്നത്. പിന്നീട് ചർമ്മം തുന്നിച്ചേർക്കുകയും ഏതാനും ആഴ്ചകൾക്കുള്ളിൽ അവിടെ രോമം വളരാൻ തുടങ്ങുകയും ചെയ്യുന്നു. എന്നാൽ തലയുടെ പിൻഭാഗത്തുള്ള നീളമുള്ള മുറിവ് സുഖപ്പെടാൻ സമയമെടുക്കും. തുന്നലുകൾ ഉണങ്ങി സുഖപ്പെടുന്നതുവരെ വ്യക്തിക്ക് ഉറക്കക്കുറവും അനുഭവപ്പെടുന്നു. മുറിവിന്‍റെ അടയാളവും വളരെക്കാലം ദൃശ്യമായി തുടരും.

ഫോളികുലാർ യൂണിറ്റ് എക്സ്‌ട്രാക്ഷൻ (എഫ്‌ഇ): ഇതിനായി ആദ്യം ആ ഭാഗം ട്രിം ചെയ്യുന്നു. അതായത് നീക്കം ചെയ്യേണ്ട മുടിയുടെ നീളം കുറയ്ക്കുന്നു. തുടർന്ന് ഒരു മൈക്രോ പഞ്ച് ടൂളിന്‍റെ സഹായത്തോടെ രോമ വേരുകൾ (ഫോളികുലാർ യൂണിറ്റുകൾ) നീക്കം ചെയ്യുന്നു. ഇതിൽ സർജിക്കൽ സ്ട്രിപ്പ് നീക്കം ചെയ്യുന്നില്ല. അതിനാൽ നീളമുള്ള മുറിവ് ഉണ്ടാക്കുന്നില്ല. ഇതിന്‍റെ മറ്റൊരു നല്ല കാര്യം തലയിൽ നിന്ന് മാത്രമല്ല താടി, നെഞ്ച്, വയർ, പ്യൂബിക് ഏരിയ തുടങ്ങിയ ശരീരത്തിന്‍റെ മറ്റ് ഭാഗങ്ങളിൽ നിന്നും രോമം എടുക്കാൻ കഴിയും എന്നതാണ്. മുടി എടുത്ത സ്‌ഥലത്ത് മുറിവ് സുഖപ്പെടുത്താൻ എടുക്കുന്ന സമയവും കുറവാണ്.

ഇനി ആണ് ആ ചോദ്യം ആർക്കൊക്കെ മുടി മാറ്റിവയ്ക്കാം?

മുടി വളർച്ചയ്ക്ക് മറ്റ് രീതികൾ പരീക്ഷിച്ചിട്ടും ഫലം ലഭിക്കാത്തവർ, തലയുടെ 50% വരെ മുടി കൊഴിഞ്ഞവർ സ്‌ഥിരമായി മുടി കൊഴിച്ചിൽ ഉള്ളവർ.

ആർക്ക് മുടി മാറ്റിവയ്ക്കൽ നടത്തരുത്?

പ്രമേഹ രോഗികളിൽ മുറിവ് ഉണക്കുന്ന പ്രക്രിയ മന്ദഗതിയിലാണ് ഇത് അണുബാധയ്ക്കുള്ള സാധ്യത വർദ്ധിപ്പിക്കുന്നു. ഹൃദയ രോഗികൾ ഒരു കാർഡിയോളജിസ്‌റ്റിന്‍റെ മേൽനോട്ടത്തിൽ ഈ ശസ്ത്രക്രിയയ്ക്ക് വിധേയരാകണം. കാരണം അനസ്തേഷ്യയോ ആന്‍റിബയോട്ടിക്കുകളോ അലർജിക്ക് കാരണമാകും. ശസ്ത്രക്രിയയ്ക്ക് മുമ്പ് നിങ്ങൾ എല്ലാ അലർജി പരിശോധകളും നടത്തേണ്ടത് പ്രധാനമാണ്. അലോപ്പീസിയ ഏരിയറ്റ പോലുള്ള തലയോട്ടി രോഗങ്ങളുള്ളവരിൽ മുടി മാറ്റിവയ്ക്കൽ വിജയകരമല്ല. ഇത് ശരീരത്തിൽ നിന്ന് മുഴുവൻ മുടി കൊഴിഞ്ഞുപോകാൻ തുടങ്ങുന്ന ഒരു ഓട്ടോഇമ്മ്യൂൺ രോഗമാണ്. അല്ലെങ്കിൽ ലൈക്കൺ പ്ലാനോ പിലാരിസ്. ദുർബലമായ രോഗപ്രതിരോധ സംവിധാനമുള്ള ആളുകൾക്കും ഈ നടപടിക്രമം ദോഷകരമാണ്. രക്തം കട്ടപിടിക്കൽ പോലുള്ള പ്രശ്‌നങ്ങൾ ഉള്ളവർ ട്രാൻസ്പ്ലാന്‍റിൽ നിന്ന് വിട്ടുനിൽക്കണം. 25 വയസ്സിന് താഴെയുള്ളവർ ട്രാൻ സ്പ്ലാന്‍റിൽ നിന്ന് വിട്ടുനിൽക്കണം.

ശസ്ത്രക്രിയയ്ക്ക് മുമ്പ് മുൻകരുതലുകൾ എടുക്കുക

പരിചയസമ്പന്നനും സാക്ഷ്യപ്പെടുത്തിയതുമായ ഒരു ഹെയർ ട്രാൻസ്പ്ലാന്‍റ് സർജനെ മാത്രം സമീപിക്കുക. ഡോക്ടറുടെ യോഗ്യത, അനുഭവം, മുൻരോഗികളുടെ അവലോകനങ്ങൾ എന്നിവ അറിയുക.

നിങ്ങളുടെ ആരോഗ്യസ്ഥിതി, അലർജികൾ, മരുന്നുകൾ എന്നിവയെക്കുറിച്ചുള്ള പൂർണ്ണ വിവരങ്ങൾ ഡോക്ട‌റെ അറിയിക്കുക. അനസ്തേഷ്യയ്‌ക്കോ മരുന്നുകൾക്കോ റിയാക്ഷൻ ഉണ്ടോ എന്നറിയാൻ അലർജി പരിശോധന നടത്തുന്നത് ഉറപ്പാക്കുക. ക്ലിനിക്കിൽ അടിയന്തര സൗകര്യങ്ങൾ, സ്‌റ്ററിലൈസേഷൻ, ഓക്‌സിജൻ എന്നിവ ലഭ്യമായിരിക്കണം. അനസ്തേഷ്യ സമയത്ത് ഒരു വിദഗ്ദ്ധൻ ഉണ്ടായിരിക്കണം. ശസ്ത്രക്രിയയ്ക്ക് മുമ്പ് ഒരു ടെക്നീഷ്യനോ കൗൺസിലറോ അല്ല ഡോക്ടർ തന്നെ ആയിരിക്കണം കാര്യങ്ങൾ എല്ലാം ഉറപ്പാക്കേണ്ടത്.

മുടി ട്രാൻസ്പ്ലാന്‍റിന് ശേഷം എപ്പോഴാണ് മുടി വളരുന്നത്?

3 മുതൽ 4 മാസത്തിനുള്ളിൽ 10-20% മുടി വളരുന്നു. 6 മാസത്തിനുള്ളിൽ 50% വരെ വളർച്ച സംഭവിക്കുന്നു. 8 മുതൽ 9 മാസത്തിനുള്ളിൽ ഏകദേശം 80% ഫലങ്ങൾ ദൃശ്യമാകും. മിക്ക കേസുകളിലും 12 മാസത്തിനു ള്ളിൽ 100% വളർച്ച കൈവരിക്കുന്നു. എന്നിരുന്നാലും ഈ സമയം ഓരോ വ്യക്തിയുടേയും ശരീരം, ചർമ്മം ഫോളിക്കിൾശേഷി എന്നിവയെ ആശ്രയിച്ചിരിക്കുന്നു.

ട്രാൻസ്‌പ്ലാന്‍റ് കഴിഞ്ഞ് എന്തൊക്കെ മുൻകരുതലുകൾ എടുക്കണം

ശസ്ത്രക്രിയയ്ക്ക് ശേഷം കുറച്ച് ദിവസത്തേക്ക് നിവർന്ന് കിടന്ന് ഉറങ്ങരുത്. വശം ചരിഞ്ഞ് കിടക്കുക. തല ഉയർത്തി വയ്ക്കുക. ശസ്ത്രക്രിയയ്ക്ക് മുമ്പ് ഹെന്ന പുരട്ടുകയോ മുടി ഡൈ ചെയ്യുകയോ ചെയ്യരുത്. തലയിൽ എണ്ണയോ ജെല്ലോ ഉപയോഗിച്ച് ശസ്ത്രക്രിയയ്ക്ക് പോകരുത്. ശസ്ത്രക്രിയയ്ക്ക് മുമ്പ് മുടിയും തലയോട്ടിയും വൃത്തിയായിരിക്കണം. ട്രാൻസ്പ്ലാന്‍റ് നടന്ന അതേ നഗരത്തിൽ 2-3 ദിവസം താമസിക്കുക.

ക്ലിനിക്കിൽ പോയി മാത്രം ആദ്യത്തെ ബാൻഡേജ് നീക്കം ചെയ്യുക. ഡോക്ടറുടെ മേൽ നോട്ടത്തിൽ ക്ലിനിക്കിൽ ആദ്യത്തെ ഹെയർ വാഷ് നടത്തുക. മുടിയിൽ സലൈൻ തളിക്കുക. തലയയിൽ സ്‌പർശിക്കുകയോ ചൊറിയുന്നതോ ഒഴിവാക്കുക. സൂര്യപ്രകാശത്തിൽ പുറത്തു പോകുന്നത് ഒഴിവാക്കുക. പുറത്തുപോകുമ്പോൾ ഒരു സർജിക്കൽ തൊപ്പി ധരിക്കുക. 10-15 ദിവസത്തിനുശേഷം ഹെൽമെറ്റ് അല്ലെങ്കിൽ സാധാരണ തൊപ്പി ധരിക്കുക. മുടി കഴുകാൻ ഷാംപൂ വെള്ളം ഒഴിക്കുക. തലയിൽ തടവരുത്. മുറിവ് ഉണങ്ങുന്നത് വരെ തല ഒരു സർജിക്കൽ തൊപ്പിയോ കോട്ടൺ തുണിയോ ഉപയോഗിച്ച് മൂടുക. ട്രാൻസ്‌പ്ലാന്‍റ് ചെയ്ത ഭാഗത്തു ഈച്ചകളേയും കൊതുകിനേയും ഇരിക്കാൻ അനുവദിക്കരുത്. കുറഞ്ഞത് 2 ആഴ്ച്ചയെങ്കിലും നീന്തുന്നത് ഒ ഴിവാക്കുക. ട്രാൻസ്‌പ്ലാന്‍റ് കഴിഞ്ഞ് കുറഞ്ഞത് 10 ദിവസമെങ്കിലും കനത്ത വ്യായാമത്തിൽ നിന്ന് വിട്ടുനിൽക്കുക. മദ്യവും സിഗരറ്റും കഴിക്കുന്നതിൽ നിന്ന് വിട്ടുനിൽക്കുന്നതാണ് നല്ലത്. ഡോക്ടർ നിങ്ങൾക്ക് നൽകുന്ന ആന്‍റിബയോട്ടിക്കുകൾ കൃത്യസമയത്ത് കഴിക്കുക. ശസ്ത്രക്രിയയ്ക്ക് 24 മണിക്കൂർ മുമ്പ് വരെ ഡോക്ട‌റോട് പറയാതെ ഒരു മരുന്നും കഴിക്കരുത്.

മുടി ട്രാൻസ്പ്ലാന്‍റിന്‍റെ പാർശ്വഫലങ്ങൾ

ട്രാൻസ്പ്ലാന്‍റ് നടപടിക്രമം പൊതുവെ സുരക്ഷിതമാണെന്ന് കണക്കാക്കപ്പെടുന്നു. പക്ഷേ ചില പാർശ്വഫലങ്ങളും ഉണ്ടാകാം. തലയോട്ടിയിലെ വരണ്ട വ്രണങ്ങൾ ചൊറിച്ചിൽ, പൊള്ളൽ, മരവിപ്പ്, ഇക്കിളി നേരിയ തലവേദനയോ അസ്വസ്‌ഥതയോ നീർവീക്കം തുടങ്ങിയ ലക്ഷണങ്ങൾ കണ്ടേക്കാം. സാധാരണയായി ഏതാനും ആഴ്ചകൾക്കുള്ളിൽ ഇതെല്ലാം പരിഹരിക്കപ്പെടും. എന്നാൽ ആ കാലയളവിന് ശേഷവും അവസ്‌ഥ മെച്ചപ്പെട്ടില്ലെങ്കിൽ ഉടൻ തന്നെ ഡോക്ടറെ ബന്ധപ്പെടേണ്ടത് പ്രധാനമാണ്.

മുടി മാറ്റിവയ്ക്കൽ എത്രത്തോളം അപകടകരമാണ്?

ഒരു പഠനമനുസരിച്ച് മുടി മാറ്റി വയ്ക്കൽ കേസുകളിൽ 4.7 ശതമാനം കേസുകളിലും നെഗറ്റീവ് ഫലങ്ങൾ കണ്ടു. എണ്ണം കുറവാണെങ്കിലും മാരകമായേക്കാവുന്ന അവസ്‌ഥ അണുബാധ തുടങ്ങിയ കേസുകളും ഇതിൽ ഉൾപ്പെടുന്നു. ആവശ്യമായ വൈദ്യപരിശോധനയും മുൻകരുതലുകളും ഇല്ലാതെ നടത്തുന്ന മുടി മാറ്റിവയ്ക്കൽ ശസ്ത്രക്രിയ ജീവന് ഭീഷണിയാകുമെന്നതിന്‍റെ ഒരു ഉദാഹരണമാണ് കാൺപൂർ സംഭവം. ഈ സാഹചര്യത്തിൽ ഓഫർ കണ്ട് മാത്രം തിടുക്കത്തിൽ നടപടികൾ സ്വീകരിക്കരുത്.

മുടി മാറ്റിവയ്ക്കൽ ഇന്നത്തെ കാലത്ത് ഒരു സാധാരണ സൗന്ദര്യവർദ്ധക ശസ്ത്രക്രിയയായി മാറിയിരിക്കുന്നു. എന്നാൽ അതിന്‍റെ സങ്കീർണതകൾ സാധാരണമാണെന്ന് കണക്കാക്കുന്നത് ശരിയല്ല.

അതിനാൽ അത് ചെയ്യുന്നതിന് മുമ്പ് ഓരോ വ്യക്തിയും തന്‍റെ ആരോഗ്യസ്ഥിതിയും നടപടിക്രമത്തിന്‍റെ വിശദാംശങ്ങളും ഡോക്‌ടറുടെ യോഗ്യതയും ക്ലിനിക്കിന്‍റെ വിശ്വാസ്യതയും സമഗ്രമായി അന്വേഷിക്കണം. മുടിയോടുള്ള ആഗ്രഹത്തിൽ തിടുക്കമോ അശ്രദ്ധയോ ഉണ്ടായാൽ അത് മാരകമായേക്കാം. നാം ജാഗ്രത പാലിക്കുകയും ശരിയായ വിവരങ്ങൾ ശേഖരിക്കുകയും ആവശ്യമെങ്കിൽ ബദൽ രീതികൾ സ്വീകരിക്കുകയും ചെയ്യേണ്ടത് പ്രധാനമാണ്. മുടിയേക്കാൾ പ്രധാനമാണ് ജീവിതം. അതിനാൽ വിവേകത്തോടെ തീരുമാനമെടുക്കുക.