കുറച്ചുനാൾ മുമ്പു വരെ സൈക്കിൾ സവാരി നടത്തുകയെന്നത് പലർക്കും മടിയുള്ള കാര്യമായിരുന്നു. ഇന്നാണെങ്കിലോ സംഗതി വേറെ ലെവലിലാണ്. ലക്ഷ്വറി കാറുകൾ ഉള്ള വീടുകളിൽപ്പോലും ഇന്ന് ഒന്നും രണ്ടും സൈക്കിളുകൾ വരെയുണ്ട്. നല്ല ചുറുചുറുക്കും ഫിറ്റ്നസും ലഭിക്കാൻ യുവാക്കൾ സൈക്കിളോടിക്കുമ്പോൾ ആകർഷണീയമായ ശരീരഭംഗിയ്ക്കും ഫിറ്റ്നസിനും വേണ്ടി പെൺകുട്ടികളും സൈക്കിളോടിക്കുന്നത് സർവ്വസാധാരണമായിരിക്കുകയാണ്.

30 മിനിറ്റ് സൈക്കിളോടിക്കുമ്പോൾ കിട്ടുന്ന പ്രയോജനങ്ങളെപ്പറ്റി അറിഞ്ഞാൽ ഒരു പക്ഷേ നാളെ നിങ്ങളും സൈക്കിളോടിച്ചു തുടങ്ങും.

ദിവസവും 2 കിലോമീറ്റർ അല്ലെങ്കിൽ 30 മിനിറ്റ് വരെ സൈക്കിളോടിക്കുകയാണെങ്കിൽ ദീർഘകാലം ചെറുപ്പം നിലനിർത്താം. അതായത് രക്തയോട്ടം മികച്ച രീതിയിലാവുന്നതിനാലാണ് ദിവസം ചെല്ലും തോറും ഉത്സാഹവും ഉണർവ്വും ഉണ്ടാവുക.
അരമണിക്കൂർ നേരം സൈക്കിളോടിക്കുകയാണെങ്കിൽ ശരീരത്തിലെ എല്ലാ അവയവങ്ങളും ആക്ടീവാകും. ഇത് രാത്രിയിൽ മികച്ച ഉറക്കം നൽകും.
അരമണിക്കൂർ നേരം സൈക്കിളോടിക്കുക വഴി ശരീരത്തിലെ ഇമ്മ്യൂൺ സെല്ലുകൾ കൂടുതൽ ആക്ടീവാകും. അസുഖങ്ങൾ വരുന്നത് കുറയുകയും ചെയ്യും.
സൈക്കിളോടിക്കുന്നതിലൂടെ ശരീരത്തിലെ മുഴുവൻ മാംസപേശികളും നല്ല ബലമുള്ളതാകും. അത് കൂടുതൽ ആത്മവിശ്വാസം പകരും.
മറ്റൊന്ന് ബ്രെയിൻ ഹെൽത്ത് വർദ്ധിക്കുമെന്നതാണ്. നിരന്തരം സൈക്കിളോടിക്കുന്നവർക്ക് സാധാരണ ആളുകളെ അപേക്ഷിച്ച് വ്യക്‌തമായ തീരുമാനങ്ങൾ കൈകൊള്ളാനുള്ള ക്ഷമത കൂടുതലായിരിക്കും.
അരമണിക്കൂർ നേരം സൈക്കിളോടിക്കുന്നതിലൂടെ അമിത ഫാറ്റ് കുറയും വിധം കലോറി എരിച്ച് കളയും.
പതിവായി സൈക്കിളിംഗ് ചെയ്യുന്നതിലൂടെ ഇമ്മ്യൂൺ സിസ്റ്റം അടിയുറച്ചതാകും. യൂണിവേഴ്സിറ്റി ഓഫ് കരോലിനയിൽ നടത്തിയ ഒരു ഗവേഷണത്തിൽ പറയുന്നത് ആഴ്ചയിൽ കുറഞ്ഞത് 5 ദിവസം അരമണിക്കൂർ നേരം സൈക്കിളിംഗ് ചെയ്‌താൽ ആ വ്യക്‌തി രോഗിയാകാനുള്ള സാധ്യത 50 ശതമാനം വരെ കുറയുമെന്നാണ്. രോഗപ്രതിരോധം മെച്ചപ്പെടുത്തുന്നതിന് സൈക്കിളിംഗ് ഗുണകരമാണ്.
സൈക്കിളിംഗ് ചെയ്യുന്നതിലൂടെ ഹാർട്ട്റേറ്റ് വർദ്ധിക്കും. അത് രക്തസഞ്ചാരത്തെ മെച്ചപ്പെടുത്തും. ഒപ്പം ഹൃദയ സംബന്ധമായ പ്രശ്നങ്ങൾ ഉണ്ടാവുകയില്ല.
പതിവായി സൈക്കിളിംഗ് ചെയ്യുന്നവർ മറ്റുള്ളവരെ അപേക്ഷിച്ച് വിഷാദത്തിനും സംഘർഷങ്ങൾക്കും അടിപ്പെടുന്നത് കുറവായിരിക്കുമെന്നാണ് പല പഠനങ്ങളും ചൂണ്ടിക്കാട്ടുന്നത്.
സൈക്കിളിംഗ് ചെയ്യുന്നതിലൂടെ രക്‌തക്കുഴലുകളിലും ചർമ്മത്തിലും ഓക്സിജന്‍റെ അഭാവം നികത്തപ്പെടും. ചർമ്മം കൂടുതൽ തിളക്കമുള്ളതും ആരോഗ്യമുള്ളതുമാകും. സമപ്രായക്കാരെ അപേക്ഷിച്ച് കൂടുതൽ ചെറുപ്പമാകും. ചെറുപ്പമാകുമെന്ന് മാത്രമല്ല യഥാർത്ഥത്തിൽ കൂടുതൽ ചെറുപ്പമാകുമെന്ന് സാരം. ശരീരത്തിന് കൂടുതൽ സ്റ്റാമിനയും ഊർജ്ജവും വർധിച്ചതു പോലെ തോന്നും.
സൈക്കിളിംഗ് ഹോബിയാക്കിയവരുടെ കാലുകൾക്കും കാൽപ്പാദങ്ങൾക്കും നല്ല ഉറപ്പും ബലവുമുണ്ടാകും. മാത്രവുമല്ല കാലുകൾക്ക് നല്ല വ്യായാമവും ആയിരിക്കും. ഒപ്പം ശരീരത്തിന് പൂർണ്ണമായ വ്യായാമവും ലഭിക്കും.
ശരീരത്തിലെ എല്ലാ അവയവങ്ങൾക്കുമിടയിൽ മികച്ച രീതിയിലുള്ള കോർഡിനേഷൻ ഉണ്ടാകുമെന്നാണ് സൈക്കിളിംഗിന്‍റെ മറ്റൊരു വലിയ ഗുണം. കൈ, കാൽ, കണ്ണുകൾ എന്നിവയ്ക്കിടയിൽ മികച്ച കോർഡിനേഷൻ ഉണ്ടാകുന്നത് ശരീരത്തിന്‍റെ ഓവർ ഓൾ ബാലൻസിംഗിനെ മികച്ചതാക്കും.

ഇത് മാത്രമല്ല, ബൈക്ക് അല്ലെങ്കിൽ സ്ക്കൂട്ടി ഓടിക്കാൻ പഠിക്കണമെന്നുണ്ടെങ്കിൽ സൈക്കിളിംഗ് അറിഞ്ഞിരിക്കുന്നത് ഗുണം ചെയ്യും. സൈക്കിളിംഗ് കൊണ്ട് മറ്റൊരു ഗുണവും കൂടിയുണ്ട്. അത് അന്തരീക്ഷ മലിനീകരണം സൃഷ്ടിക്കുകയില്ലെന്നതാണ്. അത്തരമൊരു വാഹനം ഓടിക്കുക വഴി നമ്മൾ സ്വന്തം ഭൂമിയെ സ്നേഹിക്കുക കൂടിയാണ്.