അമ്മ വേഷം ചെയ്യുക എന്നാൽ അത്ര എളുപ്പമുള്ള കാര്യമല്ല. അതും താരതമ്യേന സ്വന്തം പ്രായമുള്ളതോ തന്നേക്കാൾ പ്രായമുള്ളവരോ ആയ നായകന്മാരുടെ അമ്മ വേഷം. മലയാള സിനിമയിൽ അമ്മറോളിൽ തിളങ്ങിയ നിരവധി നടിമാരുണ്ട്. അടുത്ത കാലത്ത് ന്യൂജെൻ താരങ്ങളുടെ അമ്മ വേഷങ്ങളിൽ പകർന്നാടി നിറഞ്ഞ കയ്യടി നേടിയ ചില ന്യൂജെൻ അമ്മ നായികമാർ…
മാലാ പാർവ്വതി
ടൊവിനോ, പൃഥ്വിരാജ്, ഫഹദ്, ഷെയ്ൻ, ദുൽഖർ, കുഞ്ചാക്കോ ബോബൻ, ഐശ്വര്യ ലക്ഷ്മി ഇങ്ങനെ പുതുതലമുറ നായികാനായകന്മാരിൽ മിക്കവരുടെയും അമ്മയാകാൻ ഭാഗ്യം ലഭിച്ചിട്ടുണ്ട് മാലാ പാർവ്വതിക്ക്. “ചുരുങ്ങിയ കാലം കൊണ്ട് 50 ലേറെ ചിത്രങ്ങൾ. കുറേ പേരുടെ അമ്മയായി അഭിനയിച്ചു. എല്ലാ അമ്മമാരും ഒന്നിനൊന്നു വ്യത്യസ്തമാണ്.” ഏറ്റവും അടുത്ത് ചെയ്തത് ഇഷ്കിലെ രാധമ്മയാണ്.
ആങ്കർ, ജേണലിസ്റ്റ് എന്നീ നിലകളിൽ അറിയപ്പെട്ടിരുന്ന സമയത്ത് സുരേഷ്ഗോപിയെ ഒരു ചാനലിനു വേണ്ടി ഇന്‍റർവ്യൂ ചെയ്‌തപ്പോഴാണ്, അദ്ദേഹം ഒരു ഓഫർ മുന്നോട്ടു വച്ചത്. പത്മപ്രിയയുടെ അമ്മയുടെ റോൾ ആണ്. മേരി റോയ്, അരുന്ധതി റോയ് എന്നിവരെ സെക്ച്ച് ചെയ്തുള്ള അമ്മയും മകളുമായതിനാൽ ആക്ടിവിസ്റ്റ് എന്ന നിലയിൽ ഒരു പുതിയ മുഖം തേടുകയായിരുന്നു.
“എന്തായാലും അതിലാണ് തുടക്കം. അത് ഭംഗിയായി ചെയ്തോ എന്നു ചോദിച്ചാൽ ഇല്ല എന്നുറപ്പാണ്. കോൺഫിഡൻസ് ഉണ്ടായില്ല. പിന്നെ 2009 ൽ നീലത്താമര ചെയ്യാൻ എംടി സാർ വിളിച്ചു. ആ സമയത്താണ് ഇത് സീരിയസായി ചെയ്യാനുള്ള തോന്നലുണ്ടായത്. അഭിനയ നാടക സംഘത്തിൽ ചേർന്ന് ആക്ടിംഗ് വർക്ക്ഷോപ്പ് അറ്റന്‍റ് ചെയ്‌തു. അങ്ങനെയങ്ങനെ പിന്നീട് കുറേപ്പേരുടെ അമ്മയായി.
ടൊവിനോയ്ക്കൊപ്പമാണ് ഏറ്റവും കൂടുതൽ അമ്മ വേഷം ചെയ്തത്. 4 സിനിമകൾ. ടൊവിനോ, പൃഥ്വി, ഷെയ്ൻ ഇവരൊക്കെ വലിയ ടാലന്‍റ് ഉള്ളവരല്ലേ. ഇപ്പോഴത്തെ കാലത്ത് എല്ലാവരും പ്രതിഭകളാണ്. ഗെയിം ഓവർ എന്ന ചിത്രത്തിലും മികച്ച റോൾ ഉണ്ട്. ഒരു നടിയുടെ അമ്മ റോൾ ചെയ്യണം എന്നാഗ്രഹിക്കുന്നുണ്ട് മാലാ പാർവ്വതി. അതു മറ്റാരുമല്ല, സായ്പല്ലവി. എന്‍റെ തുടക്കത്തിലെ രീതികൾ ഒക്കെ കണ്ട കൂട്ടുകാർ വിചാരിച്ചിരുന്നത് ഞാനൊരു രാഷ്ട്രീയ നേതാവാകുമെന്നോ മറ്റോ ആണ്. ഇപ്പോൾ എന്തായി? എല്ലാം അൺപ്രഡിക്ടറ്റബിൾ ആണ്. എന്‍റെ ഏറ്റവും വലിയ ക്രിട്ടിക് എന്‍റെ മകൻ തന്നെയാണ്. അവൻ ഒരു റോളും വിമർശിക്കാതെ വിട്ടിട്ടില്ല.
ഉർവ്വശി
അഭിനയത്തിലും ജീവിതത്തിലും വളരെ തുറന്ന സ്വഭാവമാണ് ഉർവ്വശിക്ക്. അതിനാൽ വിവാദങ്ങളാണ് കൂടപ്പിറപ്പ്. കരിയറിന്‍റെ തുടക്കകാലത്തു പോലും അമ്മ വേഷം ചെയ്യാൻ തയ്യാറായ നടിയാണ് ഉർവ്വശി. അച്ചുവിന്‍റെ അമ്മ എന്ന ചിത്രത്തിലൂടെ പ്രേക്ഷക മനസിൽ അമ്മ എന്ന വാക്ക് അർത്ഥവത്താക്കിയ അഭിനയമായിരുന്നു. മീരാ ജാസ്മിന്‍റെ അമ്മ വേഷമാണ് അതിൽ ചെയ്തത്.
ശരീരത്തെക്കുറിച്ച് യാതൊരു ചിന്തയുമില്ലാത്ത നടിയാണ് ഉർവ്വശി. ഒരുപാട് അസുഖങ്ങളൊക്കെയുണ്ട്. പുറം വേദന, മുട്ടുവേദന, ബിപി, ഷുഗർ, കൊളസ്ട്രോൾ. പക്ഷേ ഭക്ഷണം നിയന്ത്രിക്കുന്ന കാര്യം ഒട്ടും താൽപര്യമില്ല. “ഞാൻ ഭയങ്കര മടിച്ചിയാണ്. എനിക്ക് സന്തോഷം തോന്നിയാൽ ഞാൻ ധാരാളം കഴിക്കും. ഇടയ്ക്ക് ആരെങ്കിലും ഓർമ്മിപ്പിക്കുമ്പോഴാണ് തടി കൂടിയല്ലോ എന്നോർക്കുക.”
“ഒരു സ്ത്രീയുടെ ഏറ്റവും റെസ്പെക്ട്ഫുൾ സ്റ്റേജ് ആണ് അമ്മയാവുക എന്നത്. എനിക്ക് ഒരുപാടു കുഞ്ഞുങ്ങളുടെ അമ്മ ആകണമെന്നാണ് ആഗ്രഹം. ലേറ്റ് ഡെലിവറി ആയിട്ടും, റിസ്ക് ആയിട്ടും ഞാൻ അമ്മയാകാൻ തയ്യാറായത് അതുകൊണ്ടാണ്.
40 കഴിഞ്ഞ നടിമാരോട് മാധ്യമങ്ങൾ കുറച്ചു കൂടി ദയ കാട്ടണമെന്നാണ് എനിക്ക് തോന്നാറുള്ളത്. നല്ല അമ്മ വേഷങ്ങൾ മാത്രമല്ല, അതിശക്‌തമായ കഥാപാത്രങ്ങൾ ചെയ്യാനും ഞാൻ തയ്യാറാണ്. അടുത്തിറങ്ങിയ എന്‍റെ ഉമ്മാന്‍റെ പേരിൽ ടൊവിനോയുടെ അമ്മ റോൾ ചെയ്‌തിരുന്നു.
ലെന
ഏതു വേഷവും അസാമാന്യ കയ്യടക്കത്തോടെ അഭിനയിച്ചു പൊലിപ്പിക്കാൻ കഴിവുള്ള താരമാണ് ലെന. വ്യത്യസ്തമായ നിരവധി വേഷങ്ങൾ ചെയ്തിട്ടുണ്ട്. പ്രണവ് മോഹൻലാൽ നായകനായ ആദിയിലെ അമ്മ വേഷം ചെയ്തത് ലെനയാണ്. അതിനു മുമ്പ് വിക്രമാദിത്യനിലും, എന്ന് നിന്‍റെ മൊയ്തീനിലും അമ്മറോൾ കൈകാര്യം ചെയ്‌തു. വിക്രമാദിത്യനിൽ ദുൽഖറിന്‍റെ അമ്മ. എന്ന് നിന്‍റെ മൊയ്തീനിൽ പൃഥ്വിരാജിന്‍റെ അമ്മ വേഷം.
അമ്മ വേഷം ചെയ്യുമ്പോൾ മറ്റു റോളുകൾ ചെയ്യുമ്പോഴുള്ളത്ര കംഫർട്ട് ഫീൽ ഉണ്ടായിട്ടില്ല എന്ന് ലെന തുറന്നു സമ്മതിക്കുന്നു. പൃഥ്വിയ്ക്കും ലെനയ്ക്കും ഏതാണ്ട് ഒരേ പ്രായമാണ്. എന്ന് നിന്‍റെ മൊയ്തീനിൽ അഭിനയിക്കാൻ ആർ.എസ്.വിമൽ വിളിച്ചപ്പോൾ, എന്നെ എന്തുകൊണ്ട് അമ്മവേഷം ചെയ്യാൻ ക്ഷണിച്ചുവെന്ന് സംശയിച്ചിരുന്നു. മൊയ്തീന്‍റെ അമ്മ പാത്തുമ്മയുടെ വേഷം അത്രയും ശ്രദ്ധേയമാണ്. അതിനാൽ ഈ റോളിൽ ലെനയായിരിക്കും നല്ലത് എന്ന തോന്നലുണ്ടായി, അത് ലെന എന്ന നടിയിലുള്ള വിശ്വാസമാണ്. എന്തു വേഷമാകട്ടെ, സഹതാരമായാലും, അമ്മ വേഷമായാലും അഭിനയത്തിന്‍റെ കാര്യത്തിൽ കോംപ്രമൈസ് പറ്റില്ലല്ലോ. ലെനയെ പ്രേക്ഷകർ ഇഷ്ടപ്പെടുന്നത് ഇതുപോലുള്ള നിലപാടുകൾ കൊണ്ടും കൂടിയാണ്.
ആശ ശരത്
വിവാഹശേഷം സിനിമാരംഗം വിട്ടു പോകുന്നവർക്കിടയിൽ രണ്ട് പെൺകുട്ടികളുടെ അമ്മയായ ശേഷം സിനിമാ രംഗത്തേക്ക് ചുവടുറപ്പിച്ച വനിതയാണ് ആശ ശരത്. ഹിറ്റ് ചിത്രങ്ങളുടെ ഭാഗമാണ് എന്നു പറയാം. പാവാട എന്ന ചിത്രത്തിൽ പൃഥ്വിയുടെ അമ്മ റോൾ ചെയ്തത് ആശയാണ്. പ്രായമേറിയ രൂപത്തിലുള്ള പോസ്റ്ററുകൾ വയ്ക്കരുത് എന്നു മാത്രമേ ഇക്കാര്യത്തിൽ ചെറിയ ഒരു ആഗ്രഹം ഉള്ളത്. ഏറെ വൈകാരിക അഭിനയതലങ്ങളുള്ള സിസിലി എന്ന കഥാ പാത്രത്തെയാണ് ആശ അവതരിപ്പിച്ചത്. “കരിയറിലെ മികച്ച വേഷം തന്നെയാണിത്” ആശ പറയുന്നു. അനുരാഗ കരിക്കിൻ വെള്ളത്തിൽ ആസിഫിന്‍റെ അമ്മയായി അഭിനയിച്ചതും ആശയാണ്.
സക്കറിയായുടെ ഗർഭിണികൾ എന്ന ചിത്രത്തിലൂടെയാണ് വെള്ളിത്തിരയിലെത്തിയത്. ഇപ്പോൾ വിദേശത്ത് താമസിക്കുന്ന ആശ കലാമണ്ഡലം സുമതിയുടെ മകളാണ്.
ശാന്തി കൃഷ്ണ
1980 കളിലെ നായിക, ഒരിടവേളയ്ക്കു ശേഷം അമ്മ റോളിലാണ് തിരിച്ചെത്തിയത്. ശാന്തി കൃഷ്ണയുടെ ആ തിരിച്ചു വരവ് നിവിൻ പോളിയുടെ അമ്മയായിട്ടാണ്. ഞണ്ടുകളുടെ നാട്ടിൽ ഒരിടവേളയിലാണ് അതു സംഭവിച്ചത്. കുട്ടനാടൻ മാർപ്പാപ്പയിൽ സിംഗിൾ മദറാണ്. “മേരിക്കുട്ടി എന്ന കഥാപാത്രവുമായി സ്വന്തം ജീവിതം റിലേറ്റ് ചെയ്യാൻ കഴിയുന്നതിനാൽ വളരെ ആസ്വദിച്ചാണ് ചെയ്തത്.”
പണ്ടൊക്കെ ഞാൻ ഷൂട്ടിംഗ് ലൊക്കോഷനുകളിൽ മസിൽ പിടിച്ചിരിക്കുന്ന രീതിയായിരുന്നു. പക്ഷേ ഇപ്പോൾ റിലാക്സ്ഡ് മൂഡിലാണ് എല്ലാം ചെയ്യുന്നത്. കുട്ടനാടൻ മാർപാപ്പയിൽ കുഞ്ചാക്കോ ബോബന്‍റെ അമ്മയായി. അമ്മയും മകനും എന്ന നിലയിൽ നല്ല കെമിസ്ട്രിയാണ് ഈ ചിത്രത്തിൽ ഫീൽ ചെയ്തത്. അരവിന്ദന്‍റെ അതിഥികളിൽ വിനീത് ശ്രീനിവാസന്‍റെ അമ്മയായതും ശാന്തികൃഷ്ണയാണ്. ഇനിയും നിരവധി ചിത്രങ്ങൾ വരാനിരിക്കുന്നു.
