സ്ത്രീകളിലെ സ്തനാർബുദബാധ വർദ്ധിച്ചുവരുന്ന വേളയിൽ ഓരോ സ്ത്രീയെയും ബോധവൽക്കരിക്കാനായി പ്രെമി മാത്യു എന്ന പ്രവാസി മലയാളി 13 വർഷം മുന്നേ കണ്ടെത്തിയ മാർഗ്ഗമാണ് പ്രൊട്ടക് റ്റ് യുവർ മോം എന്ന ഫേസ്ബുക്ക്‌ പേജ്. എന്നാൽ ഇന്നത് വെറും ഒരു പേജല്ല, നൂറുകണക്കിന് ആളുകളെ പ്രചോദിപ്പിക്കുന്ന മഹത്തായ ഒരു പ്രസ്ഥാനമാണ്.
മുടി ദാനം മഹത്തരം
വിദേശ രാജ്യങ്ങളിൽ വളരെയധികം പ്രചാരത്തിലുള്ള സംഗതിയാണ് മുടി ദാനം. പക്ഷേ മുടി നീട്ടി വളർത്താൻ താൽപര്യമുള്ള മലയാളികൾക്ക് ഇത് പുതിയ ഒരു വിഷയമാണ്. മലയാളി പെൺകുട്ടികളുടെ ശാലീന സൗന്ദര്യത്തിന്‍റെ മുഖ മുദ്രയാണ് നീണ്ട ഇടതൂർന്ന മുടി. ഫാഷന്‍റെ പേരിലോ അസൗകര്യത്തിന്‍റെ പേരിലോ അത് മുറിച്ചു കളയാൻ ഉദ്ദേശിക്കുന്നവരുടെ ശ്രദ്ധയ്ക്ക്… നിങ്ങൾക്ക് ഒട്ടും മനസ്താപമില്ലാതെ ഇനി അത് നിർവഹിക്കാം. മുടിയില്ലാത്ത ക്യാൻസർ രോഗികൾക്കായി കരുതി വയ്‌ക്കാം ഒരു പിടി മുടി…! വെറുതെ വെട്ടിക്കളയുന്ന മുടിയിഴകളിലൂടെ കുറേ ജീവിതങ്ങളിലേക്ക് ആത്മവിശ്വാസത്തിന്‍റെ കിരണങ്ങൾ പ്രസരിക്കട്ടെ.
റീജിയണൽ ക്യാൻസർ സെന്‍ററിലെ ആവശ്യക്കാരായ കീമോ പേഷ്യന്‍റുകൾക്ക് നാച്ചുറൽ മുടി കൊണ്ടുണ്ടാക്കിയ വിഗ്ഗുകൾ ലഭ്യമാക്കാൻ, ഇതുകൊണ്ടു കഴിഞ്ഞേക്കും. അതിനു വേണ്ടിയാണ് ഹെയർ ഫോർ ഹോപ്പ് ഇന്ത്യ എന്ന പ്രസ്ഥാനം വഴി ദുബായിൽ സ്ഥിരതാമസം ആക്കിയ പ്രെമി മാത്യു എന്ന കൊച്ചിക്കാരി ശ്രമിക്കുന്നത്.
കാൻസർ നേരത്തെ തിരിച്ചറിയാൻ
“ഡോക്‌ടർ കുടുംബമാണ് എന്‍റേത്. എന്നിട്ടും ക്യാൻസർ രോഗബാധ രണ്ടാംഘട്ടത്തിലാണ് ഞാൻ മനസ്സിലാക്കിയത്. മിക്ക സ്‌ത്രീകളും അങ്ങനെയാണ്. സ്വന്തം ആരോഗ്യ കാര്യങ്ങളിൽ വേണ്ടത്ര ശ്രദ്ധിക്കാറില്ല.” പ്രൊട്ടക്റ്റ് യുവർ മം എന്ന പ്രചരണം ഫേസ്‌ബുക്കിലൂടെ താൻ തുടങ്ങാനുണ്ടായ സാഹചര്യത്തെപ്പറ്റി പ്രെമി വിശദീകരിച്ചു. അമ്മമാരെ സ്വന്തം ആരോഗ്യകാര്യങ്ങളിൽ കൂടുതൽ ശ്രദ്ധിക്കാനായി പ്രേരിപ്പിക്കാൻ കഴിയുക മക്കൾക്കാണ്. സ്‌തനാർബുദ രോഗം സ്‌ത്രീകളിൽ കൂടുതലായ സാഹചര്യത്തിൽ, കുളിക്കുമ്പോൾ, സ്വന്തം ശരീരത്തിൽ മുഴകൾ ഉണ്ടോയെന്ന് പരിശോധിക്കാൻ അമ്മമാരെ കുഞ്ഞുങ്ങൾ ഓർമ്മിപ്പിക്കണമെന്ന ഉപദേശമാണ് പ്രൊട്ടക്റ്റ് യുവർ മം എന്ന കാംപെയിനിലൂടെ ചെയ്യുന്നത്.
കുട്ടികൾ വഴി അമ്മമാരിലേക്ക്
കാൻസർ സർവൈവർ, എന്ന നിലയിൽ രോഗത്തെ ചെറുക്കാൻ ആദ്യം കുട്ടികളുടെ ഒരു സൈന്യത്തെ ആണ് പ്രെമി സൃഷ്ടിച്ചത് എന്ന് പറയാം. ഹെയർ ഫോർ ഹോപ്പ് ഇന്ത്യ, രാജ്യത്തെ യുവാക്കളെ കാൻസർ രോഗികൾക്കായി മുടി ദാനം ചെയ്യാൻ പ്രചോദിപ്പിച്ചു കൊണ്ടിരിക്കുന്നു.
പ്രെമി മാത്യു സ്തനാർബുദത്തിനുള്ള അവസാന ഘട്ട ചികിത്സ പൂർത്തിയാക്കിയ വേളയിൽ, തന്‍റെ ആറുവയസ്സുള്ള അനന്തരവൻ ഡിലൻ കുറച്ചുകാലമായി മുടി മുറിച്ചിട്ടില്ലെന്ന് ശ്രദ്ധിച്ചു. കാൻസർ രോഗികൾക്കുള്ള വിഗ്ഗിലേക്ക് അവൻ മുടി ദാനം ചെയ്യുന്നു എന്ന് അറിഞ്ഞപ്പോൾ, അതിൽ തനിക്ക് എത്രമാത്രം ചെയ്യാൻ കഴിയും എന്നതിന്‍റെ സാധ്യതകൾ തെരഞ്ഞു. തന്‍റെ 17 വർഷത്തെ അധ്യാപന പരിചയം ഉപയോഗിച്ച് മുടി ദാനം ചെയ്യുന്നതിനും നേരത്തെ കാൻസർ കണ്ടെത്തുന്നതിനുമുള്ള ആഗോള പ്രസ്ഥാനത്തിന് പ്രെമി തുടക്കം കുറിച്ചത് അങ്ങനെ ആണ്. ഡിലൻ എന്ന ആറുവയസുകാരന്‍റെ മുടി വളർത്തൽ നിമിത്തമായി കണ്ട് പ്രെമി തുടങ്ങിയ ഹെയർ ഫോർ ഹോപ്പ് ഇന്ത്യ, എന്ന പ്രസ്ഥാനം മുന്നോട്ട് കൊണ്ടുപോകുന്നവരിൽ ഭൂരിഭാഗവും കുട്ടികളും ചെറുപ്പക്കാരുമാണ്.
സ്നേഹം നിറഞ്ഞ വിഗ്ഗുകൾ
ഈ സംരംഭത്തെ പിന്തുണയ്ക്കുകയും അതിനോട് ചേർന്ന് പ്രവർത്തിക്കുകയും ചെയ്യുന്ന വലിയ പ്രസ്ഥാനമാണ് പ്രൊട്ടക്റ്റ് യുവർ മോം (PYM) ഇന്‍റർനാഷണൽ. ഇത് കുട്ടികളെ അവരുടെ അമ്മമാരോട് ഉത്തരവാദിത്തം കാണിക്കാൻ പ്രോത്സാഹിപ്പിക്കുന്നു. എല്ലാ മാസവും സ്വയം പരിശോധനയിലൂടെ മുഴകളും സ്തനാർബുദത്തിന്‍റെ ആദ്യ ലക്ഷണങ്ങളും പരിശോധിക്കാൻ അമ്മമാരെ കുട്ടികൾ പ്രോത്സാഹിപ്പിക്കുന്നു. ഇതിനായി സ്കൂളുകളിലും സർവ്വകലാശാലകളിലും വിദ്യാർത്ഥികൾ പരിപാടികൾ സംഘടിപ്പിക്കുന്നുണ്ട് .
ദാനം ചെയ്ത മുടി കാൻസർ രോഗികൾക്ക് സൗജന്യമായി നൽകുന്ന വിഗ്ഗുകളാക്കി മാറ്റാൻ മാത്യു 60-ലധികം സർക്കാരിതര സംഘടനകളെ (എൻജിഒ) പരിശീലിപ്പിച്ചിട്ടുണ്ട്. അങ്ങനെ 4,000-ലധികം വിഗ്ഗുകൾ സംഭാവന ചെയ്തിട്ടുണ്ട്. വിഗ്ഗുകൾ വാങ്ങാൻ കഴിയുന്നവർക്കായി, അഞ്ച് ദാതാക്കൾക്ക് നേരിട്ട് രോഗിക്ക് സംഭാവന നൽകാവുന്ന ഒരു സംവിധാനം ഏർപ്പെടുത്തിയിട്ടുണ്ട്. ഹെയർ ഫോർ ഹോപ്പ് ഇന്ത്യ വിപണിയിൽ ഏഴിലൊന്നിൽ താഴെ വിലയ്ക്ക് വിഗ് നിർമ്മിക്കുന്ന ഒരു വിഗ് നിർമ്മാതാവുമായി ബന്ധിപ്പിക്കുന്നു. ഈ വിഗ് പ്രിയപ്പെട്ടവരുടെ മുടി ഉപയോഗിച്ചോ അല്ലെങ്കിൽ രോഗിയുടെ സ്വന്തം മുടി ഉപയോഗിച്ചോ നിർമിക്കുന്നു.
ബ്രാൻഡ് അംബാസിഡർമാർ
പിവൈഎമ്മിന്‍റെ ബ്രാൻഡ് അംബാസഡർമാരിലൊരാളായ ദുബായിലെ ഡിപിഎസിലെ ആദിത്യ സിംഗ് മുഴകളും ക്യാൻസറിന്‍റെ മറ്റ് ലക്ഷണങ്ങളും പരിശോധിക്കാൻ അമ്മയെ പ്രേരിപ്പിക്കുമ്പോൾ എട്ട് വയസ്സായിരുന്നു. ക്യാൻസർ ബാധിച്ച് മുത്തശ്ശിയെ നഷ്ടപ്പെട്ടതിന് ശേഷം ആദിത്യ അമ്മയെ സെൽഫ് പരിശോധനയ്ക്ക് പ്രേരിപ്പിക്കും. ഓരോ തവണയും ടെസ്റ്റിൽ ഫുൾ മാർക്ക് വാങ്ങുമ്പോൾ, അമ്മ ഒരു ചെക്കപ്പിന് വിധേയയാകണം എന്നാണ് അവന്‍റെ നിഷ്കർഷ.ഓരോ തവണയും അവൻ ഒരു മത്സരത്തിൽ വിജയിക്കുമ്പോൾ, നേരത്തെയുള്ള കണ്ടെത്തലിന്‍റെ നേട്ടങ്ങളെക്കുറിച്ച് അമ്മയ്ക്ക് ആളുകളോട് സംസാരിക്കേണ്ടി വരും” പ്രെമി പറയുന്നു.
ആദിത്യ 2022-ൽ PYM-ന്‍റെ ബ്രാൻഡ് അംബാസഡറായി. ഛത്തീസ്ഗഡിലെ ഭിലായിലെ വിദ്യാർത്ഥിനിയായ റിതിഷ സിംഗ് ഹെയർ ഫോർ ഹോപ്പ് ഇന്ത്യയുടെ ഡയറക്ടറാണ്, കാൻസറിനുള്ള അവബോധവും ഫണ്ടും സ്വരൂപിക്കുന്നതിനായി നിരവധി പരിപാടികൾ അവൾ നടത്തുന്നു. ഹെയർ ഫോർ ഹോപ്പ് ഇന്ത്യ ഇന്ത്യയിലെ 20 ലധികം സംസ്ഥാനങ്ങളിൽ നൂറുകണക്കിന് പരിപാടികൾ നടത്തി. പാകിസ്ഥാൻ, ശ്രീലങ്ക, ഭൂട്ടാൻ എന്നിവിടങ്ങളിൽ സമാനമായ പ്രസ്ഥാനങ്ങൾക്ക് പ്രചോദനം നൽകികൊണ്ടിരിക്കുന്നു.
