കടന്നുപോയ ഓരോ ദിനങ്ങളും അജന്തയ്‌ക്ക് സമ്മാനിച്ചുകൊണ്ടിരുന്നത് ജീവിതത്തിൽ ഇന്നുവരെ അനുഭവിക്കാത്ത മാനസിക തലമായിരുന്നു. ശശാങ്കിന്‍റെ പക്വതയില്ലാത്ത പെരുമാറ്റവും സംസാരവും പരിധി വിട്ടുകൊണ്ടിരുന്നു. എന്നിട്ടും അത് അവസാനിപ്പിക്കണം എന്ന തോന്നൽ അജന്തയ്‌ക്കുണ്ടായില്ല.
ടിച്ചർ-സ്‌റ്റുഡന്‍റ് ബന്ധം ഒന്നും അവന് ഒരു തടസമായില്ല. തന്നേക്കാൾ നാലു വയസു മൂത്ത അജന്തയോടുള്ള അവന്‍റെ പ്രേമം തുടർന്നുകൊണ്ടിരുന്നു. അവളുടെ മനസും അവന്‍റെ പ്രണയത്തെ ഇഷ്‌ടപ്പെടുന്നുണ്ടായിരുന്നു. ശശാങ്കാണ് തന്നെ കൂടുതൽ സ്‌നേഹിക്കുന്നത്. ജീവിതത്തിൽ പ്രണയം എന്തെന്ന് മനസിലാക്കിത്തരുന്നത് ശശാങ്കാണ്. ഇങ്ങനെയൊക്കെ അവൾ ആലോചിക്കും. അടുത്ത നിമിഷം തന്നെ പ്രശാന്തിന്‍റെ ഓർമ്മ വരും.
തന്‍റെ ഇഷ്‌ടങ്ങളും നിയമങ്ങളുമൊക്കെ അജന്തയ്‌ക്കുമേൽ അടിച്ചേൽപ്പിക്കാൻ ശ്രമിക്കുന്നുണ്ട് പ്രശാന്ത്. എന്നാൽ അതൊന്നും അജന്തയ്‌ക്ക് ഇഷ്‌ടമല്ലെന്ന് കണ്ടാൽ, അത് അംഗീകരിച്ച്, അജന്തയെ സന്തുഷ്‌ടയാക്കാൻ ശ്രമിക്കാറുണ്ട്.
സത്യം പറഞ്ഞാൽ അജന്തയുടെ മനസും ജീവിതവും പ്രശാന്തിനും ശശാങ്കിനും ഇടയിൽപ്പെട്ട് കുരുങ്ങിക്കിടക്കുകയായിരുന്നു. ചില നേരങ്ങളിൽ അവൾക്ക് രണ്ടുപേരോടും ദേഷ്യവും വെറുപ്പും തോന്നും. രണ്ടുപേരെയും ധൈര്യപൂർവം സ്വന്തം ജീവിതത്തിൽ നിന്ന് വലിച്ച് പുറത്തെടുത്തുകളയണം എന്നൊക്കെ ചിന്തിച്ചിട്ടുണ്ട്. പക്ഷേ അത്രയും കഠിനഹൃദയമുള്ള ആളല്ല താൻ. അതുകൊണ്ടാണ് ശശാങ്കിനോട് കടുപ്പിച്ച് പറയാൻ കഴിയാത്തത്. പ്രശാന്തിനോടും അവന്‍റെ വീട്ടുകാരോടും ഉള്ള പ്രതിബദ്ധത കൊണ്ട് അവിടെയും ഒന്നും പറയാൻ കഴിയുന്നില്ല. ഒരുപാട് ആലോചിച്ചിട്ടും, തീരുമാനത്തിലെത്താൻ കഴിയാതെ അവൾ ഉലഞ്ഞുപോയി.
അജന്തയ്‌ക്ക് വലിയൊരു ഭയം വേറെയുണ്ടായിരുന്നു. കോളേജ് പഠനകാലത്ത് തനിക്ക് രാജീവിനെ ഇഷ്‌ടമായിരുന്നു എന്ന് പ്രശാന്ത് വിവാഹശേഷം അറിയുമ്പോൾ എന്തായിരിക്കും പ്രതികരണം. സ്വന്തം ഭാര്യ മാനസികമായി പോലും കന്യകയായിരിക്കണം എന്നു നിർബന്ധമുള്ള ആളാണല്ലോ പ്രശാന്ത്!
അതിനപ്പുറം ചില ചിന്തകളിൽ പെടുമ്പോഴെല്ലാം അവൾ ശശാങ്കിൽ നിന്നും പ്രശാന്തിൽ നിന്നും ഒഴിഞ്ഞുമാറാൻ വളരെയധികം ആഗ്രഹിച്ചു.
പ്രശാന്തിനെ കാണാൻ പോകുന്ന സമയങ്ങളിൽ ശശാങ്കിന് ഇഷ്‌ടപ്പെട്ട വസ്‌ത്രം ധരിക്കാൻ അവൾ ശ്രമിച്ചു. ശശാങ്കിനെ കണ്ടുമുട്ടുന്ന വേളകളിൽ, പ്രശാന്തിനിഷ്‌ടപ്പെട്ട വസ്‌ത്രം ധരിച്ചാലോ എന്നും ആഗ്രഹിച്ചു. അജന്തയെ അത്തരം വസ്‌ത്രങ്ങളിൽ കാണുമ്പോൾ പ്രശാന്തിന്‍റെ മൂഡ് നഷ്‌ടപ്പെടും. ഷോർട്ട് സ്‌കർട്ടൊക്കെ ധരിച്ചു ചെല്ലുമ്പോൾ നീ ടീച്ചറല്ലെ, ഇതൊന്നും കൊള്ളില്ല എന്നൊക്കെ പറഞ്ഞ് പ്രശാന്ത് വഴക്കുണ്ടാക്കും. സൽവാർ കമ്മീസ് ധരിച്ച് ശശാങ്കിനെ കാണുമ്പോഴും ശശാങ്ക് ചിരിക്കും. “മാം ഇന്നു സുന്ദരിയായിരിക്കുന്നു. പക്ഷേ സ്‌കർട്ട് ധരിക്കുമ്പോഴാണ് കൂടുതൽ സുന്ദരി” എന്ന് പറയാനും അവൻ മറക്കാറില്ല.
തന്‍റെ ആഗ്രഹങ്ങൾക്ക് വില കൽപ്പിക്കുന്ന ആളാണ് ശശാങ്ക്. അതുകൊണ്ടാണ് തനിക്ക് ശശാങ്കിനോട് ഇഷ്‌ടം തോന്നിയത്. അതേസമയം പ്രശാന്ത് പ്രതിശ്രുത വരനാണ്. ഏതാനും മാസങ്ങൾക്കകം വിവാഹിതരാകാൻ തീരുമാനിച്ചവരാണ്.
കുടുംബങ്ങളാണ് തീരുമാനത്തിന് പിന്നിലെങ്കിലും വിവാഹം തകർന്നാൽ എന്തായിരിക്കും പരിണത ഫലം! വർഷങ്ങളായി നിലനിൽക്കുന്ന കുടുംബബന്ധങ്ങളും തകർന്നു പോവില്ലേ?
ശശാങ്കിനോട് തനിക്ക് തോന്നിത്തുടങ്ങിയ താൽപര്യവും, തിരിച്ച് ശശാങ്കിനുള്ള തീവ്രമായ സ്‌നേഹവും തടയാൻ വേണ്ടി ഒരു ദിവസം അജന്ത ശശാങ്കിനോട് പ്രശാന്തിനെ കുറിച്ച് സംസാരിച്ചു. ഉടനെ തന്നെ തങ്ങളുടെ വിവാഹം നടക്കും എന്നു പറഞ്ഞു കേട്ടതോടെ, അല്‌പനേരം ശശാങ്കിന്‍റെ മുഖത്ത് നിരാശ പടർന്നു. പിന്നെ വിടർന്ന ചിരിയോടെ അവൻ പ്രതികരിച്ചു.
