കുളിരുൾക്കൊണ്ട പുലർകാലം. വഴിത്താരയിൽ അധികം ആൾ സഞ്ചാരമില്ല. സോഫ നേരെയിട്ട് മുഖം കഴുകി ഓഫീസ് പൂട്ടി പുറത്തിറങ്ങി. കേക്കുവണ്ടി ഇടക്കിടക്ക് പണിമുടക്കും. വണ്ടി ലോനേട്ടന്‍റെ വർക്ക് ഷാപ്പിൽ ഏൽപ്പിച്ചിട്ട് രണ്ടാഴ്ചയാകുന്നു. ലോനേട്ടൻ വണ്ടി പണിയിൽ വിദഗ്ധനാണ്. അതുകൊണ്ടു തന്നെ പണിയെപ്പോഴെ തീർത്തു കാണണം. തോമാച്ചനോടു പറഞ്ഞ് അതൊന്നു വാങ്ങണം.
വഴിത്താരക്കരികെ നിന്നും ഒരു കട്ടൻ കുടിച്ച് കുളിരകറ്റിയ ശേഷം ഒരോട്ടോ പിടിച്ച് വീടു പറ്റി. കുളിച്ചുഷാറായി വന്നപ്പോഴതാ വെളുത്തു മയമുള്ള റവ ഉപ്പുമാവും വെണ്ണ പോലുള്ള ഞാലിപ്പൂവൻ പഴവും എന്നെ കാത്തിരിക്കുന്നു. ഒപ്പം ബ്രൂ കോഫിയും. അമ്മയുടെ ഉപ്പുമാവ് നല്ല രുചിയാണ്. കല്യാണവീടുകളിൽ രാവിലെ ഇലകീറിൽ കഴിക്കാറുള്ള ഉപ്പുമാവിന്‍റെ രുചിയാണ് ഓർമ്മ വരുന്നത് ഞാൻ പല തവണ ഉണ്ടാക്കാൻ ശ്രമിച്ചിട്ടുണ്ട്. അതു കഴിക്കാം എന്നേയുള്ളൂ. ഈ രുചി ലഭിക്കാറില്ല.
അമ്മ ഉപ്പുമാവ് വല്ലപ്പോഴുമേ ഉണ്ടാക്കാറുള്ളൂ. ഉപ്പുമാവിനു കൂട്ടായി തൊടിയിലുണ്ടായ ഞാലിപ്പൂവൻ പഴം. മാധുര്യമാർന്ന ഞാലിപ്പൂവൻപഴം ഒരൽപ്പം ഉപ്പുമാവിൽ കുഴച്ച് കഴിച്ചു. അമൃതിനു സമം. നാവിലെ രുചി മുകുളങ്ങൾ ആ രുചിയെ സഹർഷം സ്വാഗതം ചെയ്തു. ഒരു പാട് ഇടങ്ങളിൽ നിന്നും ആഹാരം കഴിച്ചിട്ടുണ്ട്. രുചിയുടെ ഈ മേളം അമ്മയ്ക്കു മാത്രം സ്വന്തം. കുറച്ചു കൂടെ ഉപ്പുമാവ് വാങ്ങി കഴിച്ച ശേഷം അമ്മയോട് പറഞ്ഞ് ഓഫീസിലേക്ക് പുറപ്പെട്ടു. ഈ നേരമായിട്ടും കഴിഞ്ഞ ദിവസം ഏറ്റെടുത്ത വിഷയത്തെക്കുറിച്ച് ചിന്തിക്കുക പോലും ചെയ്തില്ല എന്നോർത്ത് സങ്കോചം തോന്നി. മേശമേൽ കാലെടുത്തു വച്ച് കസേരയിലേക്ക് ചാഞ്ഞ് കണ്ണടച്ച് ഇന്നലെ ഉൾക്കൊണ്ട വിവരങ്ങളിലേക്ക് മനസ്സു പായിച്ചു.
ലോക്കൽ പോലീസ് ആത്മഹത്യയെന്ന് വിധിയെഴുതിയ കേസ്. ദത്തൻ സാറ് ഇത്രയേറെ സൗഹൃദത്തോടെ സംഭവങ്ങൾ വള്ളി പുള്ളി വിടാതെ വിവരിച്ചു തന്നിട്ടും അതുമായി ബന്ധപ്പെട്ട് കാര്യമായി ഒന്നും തന്നെ ചോദിക്കാൻ കഴിഞ്ഞില്ല. അദ്ദേഹത്തിൽ നിന്നും ഇത്തരത്തിലുള്ള ഒരു വിവരണം തീർത്തും പ്രതീക്ഷിച്ചിരുന്നില്ല എന്നു പറയുന്നതാവും ശരി.
ഇത്രയേറെ തെളിവുകൾ ഒരുമിച്ച് പഴുതടച്ചു യാതൊരു പിടിയും തരാതെ നിൽക്കുമ്പോൾ പെൺകുട്ടി ആത്മഹത്യ ചെയ്തതാവാനേ തരമുള്ളൂ. പുറമെ സന്തോഷവും ഉത്സാഹവും കാണിക്കുന്ന പല പെൺകുട്ടികളും അകമേ ഹൃദയവേദനയുടെ കടലാഴം താണ്ടുന്നവരായിരിക്കും. ചില പത്രവാർത്തകളിൽ അത്തരം സംഭവങ്ങൾ വായിച്ചു വിഷമിച്ചു പോയിട്ടുണ്ട്.
ചുരുങ്ങിയ കാലയളവ് മാത്രം ഇടപഴകിയിട്ടുള്ള ദത്തൻ സാറിന് അതു മനസ്സിലാക്കാൻ കഴിയാതെ പോയതാവും.
ആ കുട്ടിയുടെ കുടുംബ സാഹചര്യം പരിശോധിച്ചാൽ അരക്ഷിതമായ ഒരുചുറ്റുപാടാണ് ഉണ്ടായിരുന്നത്. അച്ഛനില്ല, സഹോദരൻ മരിച്ചു. അമ്മയ്ക്കും കാര്യമായ ജോലിയില്ല. കടുത്ത സാമ്പത്തിക പരാധീനതകളുണ്ടാകാം. പിന്നെ ആകെ ബന്ധു എന്നു പറയാനുള്ളത് അമ്മയുടെ ഒരു സഹോദരനാണ്.
ചെറുപ്രായത്തിൽ തന്നെ ദുഖത്തിന്‍റെയും വേദനയുടെയും നീരാളിപ്പിടുത്തത്തിൽ അകപ്പെട്ടാണ് അവൾ വളർന്നിട്ടുള്ളത് കടുത്ത ജീവിതയാഥാർഥ്യങ്ങൾ ഒന്നിന് പുറകെ ഒന്നായി തിരമാല കണക്കു തിരയടിക്കുമ്പോൾ മനസുറപ്പിച്ചു പഠിക്കാനും ജോലി തേടാനുമുള്ള സമയമോ മാനസികാവസ്ഥയോ ആ കുട്ടിക്കുണ്ടായിട്ടില്ല. അതു കൊണ്ടാണല്ലോ സിനിമ അവർ തിരഞ്ഞെടുത്തത്. കലാപരമായ കഴിവുകൾ പുറത്തെടുക്കാനുള്ള ഒരു വേദി എന്നതിലുപരി സാമ്പത്തിക സുരക്ഷിതത്വം മോഹിച്ചു തന്നെയാണ് സന മാത്യു സിനിമയിൽ അഭിനയിക്കാൻ ആഗഹിച്ചത്.
പൊടുന്നനെയാണ് ആകെയുള്ള കുടുംബാംഗത്തിനു സംഭവിച്ച അപകടം. അതാ കുട്ടിയെ മുറിവേൽപ്പിച്ചിരിക്കാം. ആ ഒരു വിഷമകരമായ സാഹചര്യത്തിൽ ഒപ്പം നിന്ന് സമാധാനിപ്പിക്കേണ്ട അമ്മയും കൂടെ ഉണ്ടാകാതെ പോയി.
എന്‍റെ ഒരു സുഹൃത്ത് പറഞ്ഞ സംഭവം ഓർമ്മ വരുന്നു. അദ്ദേഹത്തിന്‍റെ സുഹൃത്ത്, വളരെ തിരക്കുള്ള ഒരു ഐ.ടി. മാനേജർ. വിവാഹം കഴിഞ്ഞ് ഒരു മാസമേ ആയുള്ളൂ. തിരക്കുപിടിച്ച ഓഫീസ് ജോലികൾക്കിടയിൽ, അപ്പോൾ സമയം രാത്രി ഏറെ വൈകിയിരുന്നു. ഭാര്യയുടെ തുടർച്ചയായ ഫോൺ കോളുകൾ. അത് അറ്റൻഡ് ചെയ്യാനുള്ള മാനസികാവസ്ഥയിലായിരുന്നില്ല അന്നേരമയാൾ. തുടർന്ന് ഒരു പാട് സന്ദേശങ്ങൾ. അതും അയാൾ നോക്കിയില്ല. ഒടുവിൽ സമയമേറെക്കഴിഞ്ഞ് അയാൾ വായിച്ചു നോക്കിയ മെസേജുകൾ ഇങ്ങനെയായിരുന്നു.
“എന്നെ ഒന്നു വിളിക്കാമോ?”
അതിനു ശേഷം ഏറ്റവുമൊടുവിൽ ഇനി എന്നെ വിളിക്കണ്ട ഞാൻ പോകുന്നു. മനം മടുപ്പിക്കുന്ന ഏകാന്തത, പരിഗണനയില്ലായ്മ അതെല്ലാം ആ ഭാര്യയെക്കൊണ്ടതു ചെയ്യിപ്പിച്ചു. പുറമേക്ക് നിസാരമെന്ന് തോന്നിയേക്കാവുന്ന കാര്യങ്ങൾ ചില പെൺകുട്ടികളുടെ ദുർബലമായ മനസിനെ മാരകമായി മുറിവേല്പിക്കാൻ തന്നെ ഇടയാക്കിയേക്കാം. സാഹചര്യങ്ങളും വസ്തുതകളും ശരിയാം വിധം ഉൾക്കൊള്ളാൻ കഴിയാത്തതും മനോബലമില്ലാത്തതുമാണ് അതിന്‍റെ കാരണം.
സനയുടെ മരണ കാരണം ഇനിയൊരു വേള കൊലപാതകമെങ്കിലോ? അതിന് വിദൂരമായ സാധ്യത മാത്രമെന്ന് തോന്നുന്നു. ഒന്നാമതായി ആ പാവം കുട്ടിക്ക് ശത്രുക്കളില്ല. നിരന്തരം ശല്യം ചെയ്തിരുന്ന ഹാസ്യനടനെക്കുറിച്ച് പരാതിപ്പെട്ടതും പിന്നീട് അയാൾ അപമാനിതനായതും ഒരു കല്ലുകടിയായി സജീവമായുള്ളത് മറക്കുന്നില്ല. ദത്തൻ സാറിന്‍റെ പുറത്താക്കലിൽ അയാൾ ഒതുങ്ങിയെങ്കിലും ഒരു പ്രതികാരബുദ്ധി അയാളിൽ നിന്നും പ്രതീക്ഷിക്കണം. കടുത്ത അപമാനം നേരിട്ട ഈയൊരു വ്യക്തിയെ ഒഴിവാക്കിയാൽ, പൊതുവെ അറിഞ്ഞിടത്തോളം അവൾ ഇല്ലാതാവുന്നതോടെ ആർക്കും ഒന്നും നേടാനില്ല.
മോഷണശ്രമത്തിനിടെ ഉണ്ടായ സംഭവമല്ലെന്ന് ഉറപ്പാണ്. പിന്നെ ലൈംഗികാതിക്രമങ്ങളൊന്നും അവിടെ നടന്നിട്ടില്ല എന്ന കാര്യം പോസ്റ്റ്മോർട്ടം റിപ്പോർട്ടിനെ ഉദ്ധരിച്ച്‌ ദത്തൻ സാർ തന്നെ സൂചിപ്പിച്ചതാണ്. പിന്നെ ആര് എന്തിനു വേണ്ടി അതു ചെയ്യണം. ഇനി കൊലപാതകമെന്ന നേരിയ സാധ്യത സത്യമെങ്കിൽ ഭയക്കണം. തീർത്തും പ്രബലൻമാർ തന്നെ ആയിരിക്കണം ഈ പാതകത്തിനു പിന്നിൽ.
നിയമ വ്യവസ്ഥയെത്തന്നെ അടിമുടി അട്ടിമറിക്കാൻ കെൽപ്പുള്ളവർ. പോസ്റ്റ്മോർട്ടം റിപ്പോർട്ട് തങ്ങളുടെ അഭീഷ്ടപ്രകാരം തിരുത്താൻ കെൽപ്പുളളവർ. വിഷാദത്തിന് ചികിത്സ തേടിയിരുന്നതായി ഡോക്ടറെക്കൊണ്ട് തെളിവു സംഘടിപ്പിക്കാൻ കഴിവുള്ളവർ. ലോക്കൽ പോലീസിനെക്കൊണ്ട് അന്വേഷണം പ്രഹസനമാക്കാൻ തക്ക സ്വാധീനശേഷി ഉള്ളവർ. എന്തിനേറെ ഹോട്ടൽ റൂമിൽ കൊലയാളിയെ അയച്ച് ഈച്ച പോലുമറിയാതെ കൊലപാതകം നടത്തി രക്ഷപെടാൻ തക്ക പ്രാവീണ്യമുള്ളവർ.
ഈ വിഷയത്തിൽ ഞാൻ ഇടപെടുന്നത് അറിയാനിടയായാൽ എന്നെത്തന്നെ ഇല്ലായ്മ ചെയ്യാനും ഇവർ മടിക്കില്ല എന്നതിൽ സംശയമൊന്നുമില്ല. കാര്യങ്ങൾ ഇത്രത്തോളമെത്തിയ സ്ഥിതിക്ക് ഇനി പിൻമാറുന്നത് ഭീരുത്വമാണ്.
ഏതായാലും ഈ വിഷയവുമായി ബന്ധപ്പെട്ട് എന്‍റെ ഐഡന്‍റിറ്റി ആരോടും വെളിപ്പെടുത്തിക്കൂടാ. വിഷയം കഴിയുന്നതുവരെ ഞാൻ ഒരു നവാഗത തിരക്കഥാകൃത്താണ്. സിനിമയിൽ അവസരം തേടി നടക്കുന്ന ഒരു കഥാകാരൻ. ജോഫിൻ കല്പിച്ചു തന്ന പുതിയ പട്ടം.
ഒരു സിനിമ കാണുന്ന അനുഭവത്തോടെ സംഭവങ്ങൾ തട്ടും തടവുമില്ലാതെ ദത്തൻ സാർ പറഞ്ഞു തന്നു. ഒരിക്കലും പ്രതീക്ഷിച്ച ഒന്നല്ല അത്. എന്നിരുന്നാലും പല കാര്യങ്ങളും വ്യക്തമല്ല. ഈ സംഭവങ്ങളിൽ സൂചിപ്പിച്ച ഒരാളുടേയും കുടുംബ പശ്ചാത്തലം വ്യക്തമല്ല. എന്തിനേറെ? ഈ ദത്തൻ സാറിന്‍റെ പശ്ചാത്തലം എന്താണ്. ആദ്യം ഈ വിഷയവുമായി ബന്ധപ്പെട്ടവരുടെ പശ്ചാത്തലം അറിയണം.
സഹോദരൻ അപകടത്തിൽ പെട്ട വാർത്തയറിഞ്ഞ് നാട്ടിൽ പോയ അമ്മയുടെ കൂടുതൽ വിവരങ്ങൾ ഇല്ല. അതെല്ലാം അറിയാൻ തോമ്മാച്ചന്‍റെ അടിയന്തിര ഇടപെടൽ കൂടിയേ തീരൂ. അതറിയാതെ അന്വോഷണത്തിൽ ഒരിഞ്ച് പുരോഗതി ഉണ്ടാവുക പ്രയാസമാണ് .
അപ്പോഴാണ് ദത്തൻ സാറിന്‍റെ ഒരു വാട്സപ്പ് സന്ദേശം വന്നത്. സനയുടെ ഫോട്ടോയും ബയോഡാറ്റയുമായിരുന്നു അത്.
അന്വേഷണം ആവശ്യമായ ആളുകളുടെ വിവരങ്ങൾ എല്ലാം ഒരു പേപ്പറിൽ എഴുതി തോമാച്ചന് അയച്ചു കൊടുത്തു. അതിൽ പ്രത്യേകം അന്വോഷിക്കേണ്ട ആളായി വിളറി വെളുത്ത മുഖഭാവത്തോടെ കണ്ടെന്ന് ദത്തൻ സാർ പറഞ്ഞിരുന്ന നിർമ്മാതാവിനെക്കുറിച്ച് വ്യക്തമായി എഴുതിയിരുന്നു. കഴിയാവുന്ന നേരത്തെ വിവരങ്ങൾ അന്വോഷിച്ച് തരാമെന്ന് തോമാച്ചൻ അറിയിച്ചു.
തുടർന്ന് ലാപ്ടോപ് ഓൺ ചെയ്ത് സനയുടെ മരണം നടന്ന ദിവസങ്ങളിലെ പഴയ പത്രത്താളുകൾ ഓരോന്നായെടുത്തു കണ്ണോടിച്ചു. ഇന്നാട്ടിലെ എഡിഷൻ പത്രത്താളുകൾ ഒന്നൊഴിയാതെ അരിച്ചു പെറുക്കി നോക്കി. ഒടുവിൽ അത് കണ്ടുപിടിച്ചു. ഒരു പത്രത്തിലെ ചരമക്കോളത്തിനു താഴെ അഞ്ചു വരി വാർത്ത.
സിനിമയിൽ അഭിനയിക്കാനെത്തിയ ഒരു പെൺകുട്ടി ആത്മഹത്യ സന്ദേശം അയച്ചശേഷം ഹോട്ടൽ മുറിയിൽ ആത്മഹത്യ ചെയ്ത നിലയിൽ എന്നാണ് വാർത്ത. ഈ വാർത്തക്കു വേണ്ടി അന്വേഷിക്കുന്നവർക്കല്ലാതെ സാധാരണ പത്രവായനക്കാരന്‍റെ ശ്രദ്ധയിൽ പെടാൻ യാതൊരു സാധ്യതയും ഇല്ലാത്തിടത്താണ് ഈ മരണവാർത്ത കൊടുത്തിരിക്കുന്നത്.
മറ്റൊരു പത്രത്തിലും കാണുന്നുമില്ല. ഈ വാർത്ത കൊടുത്ത പത്രലേഖകനെ സമീപിച്ചാൽ എന്തെങ്കിലും വിവരം കിട്ടുമോ എന്ന് ആലോചിച്ചു. അവർക്ക് പോലീസ് സ്റ്റേഷനിൽ നിന്ന് ലഭിച്ച വിവരമായിരിക്കണം. അതിൽ കൂടുതൽ ഒന്നും തന്നെ അവർക്ക് അറിവുണ്ടാകുമെന്ന് തോന്നുന്നില്ല.
തോമാച്ചന്‍റെ അന്വേഷണ വിവരങ്ങൾ ലഭിക്കാൻ സമയമെടുക്കും. ദത്തൻ സാർ ഇതുവരെ അഞ്ചു ചിത്രങ്ങൾ സംവിധാനം ചെയ്തിട്ടുണ്ട്. ഒന്നൊഴിച്ച് എല്ലാം പ്രേക്ഷക ശ്രദ്ധ ലഭിച്ചവയാണ്. ആറാമത്തെ ചിത്രത്തിനിടക്കാണ് ഈയൊരു മരണം നടക്കുന്നത്. അദ്ദേഹത്തിന്‍റെ മുൻ ചിത്രങ്ങൾ പരതിയപ്പോൾ എല്ലാം യുടൂബിൽ ലഭ്യമാണ്. ഒന്നുപോലും ഞാൻ മുഴുവനായി കണ്ടിട്ടില്ല. അതൊന്നും കുറ്റാന്വേഷണ സ്വഭാവം ഉള്ളതല്ല. അതായിരിക്കാം എന്‍റെ ശ്രദ്ധയിൽ പെടാതെ പോയത്. ഏതായാലും എല്ലാം ഒന്നോടിച്ചു കണ്ടു എന്ന് നിശ്ചയിച്ചു . കലാകാരന്‍റെ കലാസൃഷ്ടിയിൽ കലാകാരന്‍റെ മനസിന്‍റെ സ്പന്ദനം തൊട്ടറിയാം അദ്ദേഹത്തിന്‍റെ അഭിരുചികളെക്കുറിച്ച് ഒരു ധാരണ ലഭിക്കുമല്ലോ?
ബംഗാളിപ്പയ്യനെ വിട്ട് മസാല ചായയും ചെറിയ എരിവുള്ള പരിപ്പുവടയും വാങ്ങിപ്പിച്ചു. ഏതായാലും ഒരു തിരക്കഥാകൃത്തിന് ഒരു പാട് സിനിമകൾ കണ്ടുള്ള പരിചയം അത്യന്താപേക്ഷിതം തന്നെ. മൊരിഞ്ഞ പരിപ്പുവട, ചൂടു ചായ, പുറത്തെ ഈ ചാറൽ മഴ. പിന്നെ ദത്തൻ സാറിന്‍റെ ഒന്നാന്തരം സിനിമയും.
ബന്ധത്തിന്‍റെയും ത്യാഗത്തിന്‍റേയും വൈകാരിക മുഹൂർത്തങ്ങളാൽ സമ്പന്നമായ സിനിമ. ജീവിത യാഥാർഥ്യങ്ങളുടെ നെരിപ്പോടിൽ തിടം വച്ച് ഉയർത്ത കഥാപാത്രങ്ങൾ. രക്തബന്ധത്തേക്കാൾ കരുത്താർജ്ജിക്കുന്ന മനുഷ്യ ബന്ധങ്ങൾ. ബന്ധങ്ങളിലെ പൊരുത്തക്കേടുകൾ അത്തരമൊരു വൈകാരിക തുളുമ്പുന്ന സീനിലാണ് ഞാൻ ആ പെൺകുട്ടിയെക്കണ്ടത്. റീവൈൻഡ് ചെയ്ത് സൂക്ഷിച്ചു നോക്കിയപ്പോഴാണ് ആ കുട്ടിയെ മനസ്സിലായത്‌. സന!
അപ്പോൾ സംവിധായകൻ പറഞ്ഞത് ? അപ്പോൾ അയാൾക്ക് മുൻപേ തന്നെ ഈ കുട്ടിയുമായി പരിചയമുണ്ട്. പരിചയം മാത്രമോ? അടുപ്പവും ഉണ്ട്. മുൻപ് റിലീസായ സിനിമയും സനയുടെ മരണം നടന്ന സിനിമാ ചിത്രീകരണ സമയവും തമ്മിൽ ഒന്നര വർഷത്തെ സമയ വ്യത്യാസമുണ്ട്. അപ്പോൾ ഒന്നര വർഷത്തിലേറെ പരിചയം ഇവർ തമ്മിലുണ്ട്.
ചിലപ്പോൾ ദത്തൻ സാർ സനയെ ആദ്യമായി കണ്ടതെന്നു അവകാശപ്പെടുന്നത് മുൻ സിനിമയുടെ ചിത്രീകരണ സമയത്താകാം. അതെന്തുകൊണ്ടോ എന്നിൽ നിന്നും മറച്ചു വച്ചു. ആ ഒരു പ്രത്യേക അടുപ്പം ഞാൻ അറിയരുതെന്ന് അയാൾ ആഗ്രഹിച്ചിരിക്കാം.
ആ അടുപ്പം വെറും ജോലി സംബന്ധമായ വിഷയങ്ങളിലെ പരസ്പര ബഹുമാനത്തിന്‍റെ അടിസ്ഥാനത്തിൽ മാത്രമാണോ? ഏതായാലും ഇതു പ്രാധാന്യമർഹിക്കുന്ന ഒന്നു തന്നെയാണ്. സത്യം പറഞ്ഞാൽ ഒരു ചെറിയ പിടിവള്ളി.
ഈ പിടിവളളിയിൽ പിടിച്ചു കയറിയാൽ ചിലപ്പോൾ ലക്ഷ്യം കണ്ടേക്കും. ഒരു കഴിവുള്ള ആർട്ടിസ്റ്റിനോടുള്ള ആദരവിന്‍റെ ഇഴയടുപ്പമായി മാത്രം ഈ ബന്ധത്തെ കാണാനാവില്ല.
ഈ മരണം ദത്തൻ സാറിനെ അടിമുടി ഉലച്ചിട്ടുണ്ട്. ആഴത്തിലുള്ള ഒരാത്മബന്ധം, അതായത് ഒരു കുടുംബാംഗത്തെ പോലെയുള്ള ഒരാത്മബന്ധം അവർ തമ്മിലുണ്ട്. അതു കൊണ്ടാണല്ലോ പോലീസ് വിധിയെഴുതിയിട്ടും തന്നെ ബാധിക്കാവുന്ന ഒരു വിഷയമല്ലാതിരുന്നിട്ടും എന്നെ സമീപിച്ചത്.
പോലീസിന്‍റെ വിധിയെഴുത്തിൽ പോലും അയാൾതൃപ്തനല്ല. ഈയടുപ്പത്തിന് ആ കുട്ടിയുടെ മരണത്തിൽ ചെറുതല്ലാത്ത പങ്കുണ്ടെന്ന് മനസ്സു പറയുന്നു. ആ അടുപ്പത്തിൽ നിഗൂഢമായി പ്രയാസപ്പെടുന്നവരുണ്ടാകാം.
ആ കുട്ടിയോട് പ്രണയമുള്ള കാമുകനുണ്ടെങ്കിലോ? ആ കാമുകനെ ധിക്കരിച്ചും ഒഴിവാക്കിയും പെൺകുട്ടി ദത്തൻ സാറുമായുള്ള അടുപ്പവുമായി മുന്നോട്ടു പോയിക്കാണും. ചിലതരം പ്രത്യേക മനോനിലയുള്ള സൈക്കോ കാമുകൻമാരുണ്ട്. പ്രണയം നിഷേധിക്കുന്ന കാമുകിയെ ആസിഡ് എറിഞ്ഞും കത്തിച്ചും മറ്റും അപായപ്പെടുത്താൻ ശ്രമിക്കുന്നവർ. ഇത്തരക്കാർ തുനിഞ്ഞിറങ്ങിയാൽ പിന്നെ അമ്പരപ്പിക്കുന്ന അപകടകരമായ കാര്യങ്ങളാണ് സംഭവിക്കുക.
അവൻ ഷൂട്ടിംഗ് സൈറ്റിൽ ആരുടേയും ശ്രദ്ധയിൽ പെടാതെ ചുറ്റിത്തിരിഞ്ഞു പലതും ഗ്രഹിച്ചു കാണും. സനയുടെ അമ്മയുടെ സഹോദരന്‍റെ അപകടത്തിലും അവന് പങ്കുകാണും. അമ്മയെ ആ കുട്ടിയിൽ നിന്നകറ്റാനുള്ള പദ്ധതിയായിരിക്കും അത്. അതു വിജയിച്ച ശേഷം കൊലയാളി അവളുടെ മുറിയിൽ കയറിപ്പറ്റി കൃത്യം നടത്തിയ ശേഷം രക്ഷപ്പെട്ടു.
അന്നേ ദിവസം ഷൂട്ടു ചെയ്ത തൂങ്ങി മരണവും അവനൊരു പ്രചോദനമായിക്കാണും. അതിനു ശേഷം സംഭവം ജനശ്രദ്ധ പിടിച്ചുപറ്റി വിവാദമായി പടത്തെയും പടവുമായി ബന്ധപ്പെട്ടവരേയും ബാധിക്കാതിരിക്കാൻ കോടികൾ അമ്മാനമാടുന്ന നിർമ്മാതാവും ബന്ധപ്പെട്ടവരും ചേർന്ന് വിവാദങ്ങളൊഴിവാക്കി. പടത്തെ രക്ഷപ്പെടുത്താൻ തന്‍റെതായ സംഭാവനകൾ സിനിമയുമായി ബന്ധപ്പെട്ട എല്ലാവരും നല്കിയിരിക്കും. ഈയൊരു കുരുക്കിൽ നിന്നും തലയൂരാൻ എന്തൊക്കെ ചെയ്യേണ്ടി വരും? അതേക്കുറിച്ചു ചിന്തിച്ചായിരിക്കും നിർമാതാവ് മൃതശരീരം കണ്ട വേളയിൽ വിളറി വെളുത്തത്.
ഇത് തന്നെയായിരിക്കും നടന്നിരിക്കുക. ഇതു തന്നെയാണ് സാഹചര്യങ്ങളോട് പൊരുത്തപ്പെട്ടു പോകുന്നത്. ആ ഹോട്ടലിലെ സെക്യൂരിറ്റിക്ക് ഇതിൽ അറിവു കാണില്ലേ? ആ രാത്രിയിൽ സംശയാസ്പദമായ എന്തെങ്കിലും സംഭവിച്ചോ എന്നറിയണം.
ലോനേട്ടന്‍റെ വർക്ക് ഷോപ്പിൽ കേക്കു വണ്ടിയുടെ റിപ്പയർ നടക്കുന്നു. അടുത്തെങ്ങും റിപ്പയർ ചെയ്തു കിട്ടുന്ന ലക്ഷണമില്ല അടിയന്തിരമായി ചെയേണ്ടുന്ന ഒരുപാട് റിപ്പയർ ജോലികൾ പെട്ടന്ന് വന്നുപെട്ടു എന്ന് ലോനേട്ടൻ ന്യായം പറഞ്ഞു.
ലോനേട്ടനോട് ചൂടായി അവിടെയിരുന്ന ഒരു ബൈക്കുമെടുത്ത് പുറപ്പെട്ടു. ഹോട്ടൽ ആരാധന റസിഡൻസി. പത്തു പതിനഞ്ച് കിലോമീറ്റർ ദൂരമുണ്ട്. ബൈക്കോടിച്ചിട്ട് ഏറെ നാളായിരിക്കുന്നു. ഈറൻ കാറ്റടിക്കുന്ന വഴിത്താരകൾ. നീണ്ടു പോകുന്ന നെടുവഴി. വഴിയരികെ എവിടെയൊക്കെയോ നഷ്ടപ്പെട്ടു പോകുന്ന പേരറിയാത്ത പൂത്തുനിൽക്കുന്ന വൻമരങ്ങൾ.
പൂത്ത വാകമരത്തിനു ചുവട്ടിൽ ബൈക്കു പാർക്കു ചെയ്ത് ആരാധനയിലേക്കു നടന്നു. പെട്ടന്നാണ് ഗേറ്റിൽ സെക്യൂരിറ്റിയായി നിൽക്കുന്ന ആളെ ശ്രദ്ധയിൽ പെട്ടത്. വർക്കിച്ചേട്ടൻ! സെക്യൂരിറ്റി വേഷത്തിൽ ആളെ തിരിച്ചറിഞ്ഞില്ല.
ജോലിയും നാടകവും മദ്യവുമെല്ലാം ഒഴിവായിപ്പോയ വർക്കിച്ചേട്ടൻ. വർക്കിച്ചേട്ടനും എന്നെ മനസ്സിലായി. ഒരു പാട് തവണ കാറ്ററിംഗ് സർവ്വീസിന് എന്നെ കൂടെക്കൂട്ടിയിരുന്നല്ലോ? വർക്കിച്ചേട്ടന് എന്നെക്കണ്ടപ്പോൾ ഒരു ജാള്യത. പതിയെ അരികെ ചെന്ന് പറഞ്ഞു.
“വർക്കിച്ചേട്ടന് എന്നെ മനസ്സിലായില്ലേ?“
മദ്യത്തിന്‍റെ ജീവിക്കുന്ന രക്തസാക്ഷിയായ വർക്കിച്ചേട്ടൻ വിളറിയ ചിരിയോടെ തലയാട്ടി.
“ചേട്ടനെപ്പോഴാ ഒഴിവാകുന്നത്? ഒന്നു സംസാരിക്കാനുണ്ട്.”
മുഖത്തെ ജാള്യത കുടഞ്ഞു കളഞ്ഞ് വർക്കിച്ചേട്ടൻ ഉഷാറായി. “ഒരര മണിക്കൂർ. ഡ്യൂട്ടി മാറാറായി.”
വർക്കി ചേട്ടനോട് സമ്മതമറിയിച്ച് വാകമരച്ചോട്ടിലേക്ക് നടന്നു. അവിടുള്ള സിമന്‍റു ബഞ്ചിൻമേൽ ഇരുന്നു. പടർന്നു പന്തലിച്ച വാകമരത്തിന്‍റെ പരന്ന തണുത്ത തണല്. കുരുന്നിലകൾ പേറുന്ന മരഞ്ചില്ലകളിൽ കിളിക്കൂട്ടങ്ങളുടെ മേളപ്പെരുക്കം. ഉണങ്ങിയ ഇലയും നാരും കൊണ്ട് കൂടൊരുക്കാൻ തന്ത്രപ്പെടുന്ന ഇണക്കുരുവികൾ.
വർക്കിച്ചേട്ടന്‍റെ ഡ്യൂട്ടി സാകൂതം ഉറ്റുനോക്കുകയായിരുന്നു ഞാൻ. വർക്കിച്ചേട്ടൻ ചൂടുവെള്ളത്തിൽ വീണ പൂച്ചയാണ്. പച്ച വെള്ളം കണ്ടാലും ഒന്നറക്കും. അതു കൊണ്ടു തന്നെ വിവരങ്ങൾ ലഭിക്കുക ദുഷ്ക്കരമാകും. സഹായിക്കണമെന്നു പറയാം. അറിയാവുന്ന വിവരങ്ങൾ തരാൻ അഭ്യർത്ഥിക്കാം. യാതൊരു കാരണവശാലും വിവരങ്ങളുടെ പ്രഭവകേന്ദ്രം വെളിപ്പെടുത്തുകയില്ലെന്നു പറയാം. പിന്നെയും യാതൊരു രക്ഷയുമില്ലെങ്കിൽ അറ്റകൈക്ക് എന്തെങ്കിലും വാഗ്ദാനം. അതിന്‍റെ പ്രലോഭനത്തിൽ നിന്നും അയാൾ വഴുതി മാറിയാൽ പിന്നെ മറ്റു മാർഗമില്ല.
അപ്പോഴാണ് ഒരു ചെറുപ്പക്കാരനൊടൊപ്പം ഹോട്ടലിന്‍റെ ഗേറ്റു കടന്ന് ഒരോട്ടോക്ക് കൈ കാണിക്കുന്ന സ്ത്രീ എന്‍റെ ശ്രദ്ധയിൽ പെട്ടത്. പേഴ്സിൽ തുണിക്കടയിലെ ബില്ലുണ്ട്. അതുടനെ എടുത്ത് അതിലെഴുതിയ നമ്പറിൽ വിളിച്ചു. ടീ ഷർട്ട് വാങ്ങിയതും അതു സ്വല്പം ഇറുക്കമുണ്ടെന്നും മാറ്റിത്തരാൻ എന്തെങ്കിലും വകുപ്പുണ്ടോ എന്നു ചോദിച്ചു. മാനേജരോട് സംസാരിക്കണമെന്നും നാളെ ബില്ലും കൊണ്ട് വരാനും ഇന്ന് മാനേജർ ലീവാണെന്നുമായിരുന്നു മറുപടി.
വേദനയോടെ ഫോൺ കട്ടു ചെയ്തു.
തല കുമ്പിട്ട് സിമന്‍റു ബഞ്ചിൽ ഇരിക്കുമ്പോൾ ചന്ദ്രേട്ടന്‍റെ വിഷയം അയാളെ ഏറെ പ്രയാസപ്പെടുത്താതെ എങ്ങനെ അവസാനിപ്പിക്കുമെന്ന് ചിന്തിക്കുകയായിരുന്നു. ഇനിയാ ചെറുപ്പക്കാരന്‍റെ ഭാവി പരിപാടി കൂടി അറിഞ്ഞ് ഈ വിഷയം സമാധാനപരമായി അവസാനിപ്പിക്കണം. തോമാച്ചന് ഈ വിഷയത്തിൽ ഒരു സന്ദേശം അയച്ചിരുന്നതാണ്. മറുപടി ഇതുവരെ തന്നില്ല.
തോളത്തു ഒരു കൈപ്പത്തിപൊടുന്നനെ പതിഞ്ഞപ്പോൾ പെട്ടെന്നെഴുന്നേറ്റു. വർക്കിച്ചേട്ടൻ. അയാൾ റോഡു മുറിച്ചു വന്നത് കണ്ടിരുന്നില്ല. ഉടനെത്തന്നെ പോകാനൊരുങ്ങി ബൈക്കു സ്റ്റാർട്ടു ചെയ്തപ്പോൾ വീട്ടിൽ കൊണ്ടു വിടണമെന്നയാൾ ഓർമ്മിപ്പിച്ചു. ധാബക്കു മുന്നിൽ ബൈക്കു നിർത്തി.
ധാബയിലെ ഒരു മാമ്പഴലസ്സി ഉള്ളു തണുപ്പിച്ചപ്പോൾ വർക്കിച്ചേട്ടൻ ഉഷാറായി. പണ്ടത്തെ പ്രസരിപ്പ് മുഖത്ത് തെളിഞ്ഞു വന്നു. ഇപ്പോഴത്തെ സ്ഥിതിയിൽ അയാൾ പൂർണ്ണ തൃപ്തനാണ്. ആർക്കു മുന്നിലും നട്ടെല്ലു വളച്ച് നിൽക്കണ്ട. ഭേദപ്പെട്ട ശമ്പളമുണ്ട്. മകനും തിരക്കുപിടിച്ച ഒരു ജോലിയായി.
യാദൃശ്ചികമായി ഒരു സിനിമാ നിർമ്മാതാവിനെ പരിചയപ്പെട്ടതും തന്‍റെ വിവരങ്ങൾ അറിയിക്കാൻ കഴിഞ്ഞതുമാണ് നിമിത്തമായത്. കാര്യങ്ങൾ മനസ്സിലാക്കിയ നിർമ്മാതാവ് ഉടനെത്തന്നെ അദ്ദേഹത്തിന്‍റെ മൂന്നു നക്ഷത്ര ഹോട്ടൽ ആരാധനയിൽ സെക്യൂരിറ്റി ജോലി ഏർപ്പാടാക്കിത്തരികയും മകൻ അമലിന് അയാളുടെ സിനിമാ ലൊക്കേഷനുകളിൽ സ്ഥിരം കാറ്ററിംഗ് ജോലി നല്കുകയും ചെയ്തു.
ലോകത്തോടു മുഴുവൻ വെറുപ്പായി നടന്നിരുന്ന തനിക്ക് ഈ ലോകത്ത് മനുഷ്യപ്പറ്റുള്ളവരും ഉണ്ടെന്ന് ബോധ്യമായി. തന്‍റെ അനുഭവങ്ങൾ പറയാൻ ഒരാളെ കിട്ടിയ സന്തോഷത്തോടെ വർക്കിച്ചേട്ടൻ പറഞ്ഞു നിർത്തി.
ആ പറഞ്ഞതിനിടയിൽ ഒരു പഴുതു കണ്ട ഞാൻ ചോദിച്ചു.
“അയാളുടെ സിനിമേടെ ഷൂട്ടിങ്ങിനിടക്കല്ലേ ഒരു കുട്ടി മരിച്ചത്”അതു കേട്ടതും വർക്കിച്ചേട്ടന്‍റെ മുഖം ഇരുണ്ടു.
“അതിപ്പോ നാട്ടിൽ മുഴുവൻ പാട്ടായോ? ആ അങ്ങനെയും സംഭവിച്ചു. ആ കുട്ടി ആത്മഹത്യ ചെയ്തതാ. സുഖമില്ലാത്ത കുട്ടിയായിരുന്നു.”
അല്ല, ഈ കഥ എവിടുന്ന് കിട്ടി?
“എന്‍റെ ഒരു ഫ്രണ്ട് ഉണ്ട് . സിനിമയിലേക്ക് ആർട്ടിസ്റ്റുകളെ നല്കുന്ന ആൾ ആണ്. അയാള് ഓരോ കാര്യങ്ങൾ പറഞ്ഞപ്പോ പറഞ്ഞതാ.”
ആ കുട്ടി നിങ്ങളുടെ ആരാധനയിലെ ഹോട്ടൽ മുറിയിലല്ലേ മരിച്ചത്? അന്ന് വർക്കിച്ചേട്ടന്നായിരുന്നോ സെക്യൂരിറ്റി?
“ആരാധന റെസിഡൻസി എന്‍റെതല്ല. ഞാൻ അവിടുത്തെ ജോലിക്കാരനാണ് അതേയ് സംഭവം നീയെന്‍റെ നല്ല കാലത്ത് കൂടെയുണ്ടായിരുന്നവനാ. നിന്നെ ഞാൻ ഒരു ഹെൽപ്പറായിട്ടല്ല കണ്ടിട്ടുള്ളത്. ഇമ്മാതിരി ചോദ്യം ചോദിക്കാനാണോ നീയെന്നെ കൂട്ടിക്കൊണ്ടുവന്നു ലസ്സി കുടിപ്പിച്ചത്? നീയെന്നെ വേഗം വീട്ടിൽ കൊണ്ടുവിട്.”
വർക്കിച്ചേട്ടനോട് എന്താണ് പറയേണ്ടതെന്നറിയാതെ ഞാൻ കുഴങ്ങി. ഒടുവിൽ ആരുടേയും പേരു പറയാതെ ഞാൻ അന്വേഷണം ഏറ്റെടുക്കാനുണ്ടായ സാഹചര്യം വിശദീകരിച്ചു. തല പോയാലും ഒരാളോടും വിവരം തന്നതിന്‍റെ പേരിൽ വർക്കിച്ചേട്ടന്‍റെ പേരു പറയില്ലെന്നും കുരിശിൽ പിടിച്ച് സത്യം ചെയ്തു.
തികഞ്ഞ ദൈവ വിശ്വാസിയായ ചേട്ടൻ ഒന്നയഞ്ഞു ആ തക്കം നോക്കി പനിർ ടിക്കയും ദാലും ബട്ടൂരയും പിന്നെ മധുരത്തിന് ഗുലാബ് ജാമും ഓർഡർ ചെയ്തു. അതിൽ പ്രസാദിച്ച വർക്കിച്ചേട്ടൻ തനി സ്വഭാവം പുറത്തെടുത്തു.
“പിന്നെ ഇതിലെനിക്കെന്താ ഗുണം?”
“ഇതൊക്കൊത്തന്നെ ഗുണം.”
”ഈ ഗുണം പോര. ”
“ശരി. ഞാൻ മര്യാദപോലെ വേണ്ടതു ചെയ്യാം?”
“ആ മര്യാദ എന്താന്ന് ഒന്നു പറ.”
“വർക്കിച്ചേട്ടാ സഹകരിക്കുക ഗുണമുണ്ടാവും.“
“ശരി, ശരി. എന്താ നിനക്കറിയണ്ടത്? പറ അറിയാവുന്നത് സത്യം സത്യം പോലെ പറയാം.”
“ശരി. ആ പെൺകുട്ടി ആത്മഹത്യ ചെയ്ത ദിവസം രാത്രി ഉണ്ടായ കാര്യങ്ങൾ ഒന്നു പറയാമോ?”
“ശരി… ഒന്നാലോചിക്കാൻ സമയം തരണം.”
ധാബയിലെ ചിത്രപ്പണികളുള്ള ചുമരിലേക്ക് ദൃഷ്ടിയൂന്നി വർക്കിച്ചേട്ടൻ പറഞ്ഞു തുടങ്ങി.
