ബാല്യത്തിൽ നിന്നും കൗമാരത്തിലേക്കും കൗമാരത്തിൽ നിന്നും യൗവനത്തിലേക്കും കടക്കുന്നതോടെ സ്ത്രീ ശരീരത്തിൽ ബാഹ്യവും ആന്തരികവുമായ ധാരാളം മാറ്റങ്ങൾ ഉണ്ടാകുന്നു. ആർത്തവം തുടങ്ങുന്നതാണ് ഇതിൽ ഏറ്റവും പ്രധാനപ്പെട്ട മാറ്റം. 13-14 വയസ്സു തൊട്ട് 45-50 വയസ്സുവരെയാണ് സ്ത്രീകളിൽ ആർത്തവം ഉണ്ടാകുന്നത്. ഏകദേശം 30-35 വയസ്സാകുന്നതോടെ സ്ത്രീകൾക്ക് പല വിധത്തിലുള്ള രോഗങ്ങളെയും നേരിടേണ്ടതായി വരാം.
സ്ത്രീകളിൽ 92 ശതമാനം രോഗങ്ങളും പ്രത്യുല്പാദന അവയവങ്ങളുമായി ബന്ധപ്പെട്ടുള്ളതാണെന്ന് ഇത് സംബന്ധിച്ചുള്ള പഠനങ്ങൾ ചൂണ്ടിക്കാട്ടുന്നു. ഗർഭധാരണം, പ്രസവം, മുലയൂട്ടൽ തുടങ്ങി സ്ത്രീക്ക് പ്രകൃതി കനിഞ്ഞരുളിയ ഉത്തരവാദിത്തങ്ങളും പ്രത്യുല്പാദന സംബന്ധിയായ രോഗങ്ങൾക്ക് കാരണമാകാറുണ്ട്. അണുബാധ കൊണ്ടോ പാരമ്പര്യം മൂലമോ മറ്റേതെങ്കിലും കാരണങ്ങൾകൊണ്ടോ ഈ രോഗങ്ങൾ തലമുറകളിൽ നിന്നും തലമുറകളിലേക്ക് പകരാം. എന്താണ് ലൈംഗിക രോഗം? അതിൽ നിന്നും എങ്ങനെ മോചനം നേടാം?
ഹോർമോൺ വ്യതിയാനം
മനുഷ്യശരീരത്തിൽ പൊതുവായി രണ്ടുതരം ഹോർമോണുകളുണ്ട്. പുരുഷഹോർമോണുകളും സ്ത്രീഹോർമോണുകളും. പുരുഷന്മാരിൽ ആഡ്രിജൻ ഹോർമോണും സ്ത്രീകളിൽ ഈസ്ട്രജൻ ഹോർമോണുമാണുള്ളത്. ഹോർമോണുകളുടെ അനുപാതത്തിലുണ്ടാകുന്ന വ്യതിയാനങ്ങൾ സ്ത്രീയുടെയും പുരുഷന്റെയും സ്വഭാവത്തെ സ്വാധീനിക്കുമെന്ന് മാത്രമല്ല ലൈംഗികരോഗങ്ങൾ ബാധിക്കാൻ ഇടയാക്കുകയും ചെയ്യും. സ്ത്രീരോഗങ്ങളിൽ ഏറ്റവും പ്രധാനപ്പെട്ട രോഗമാണ് പ്യൂബർട്ടി മെനോറിയ അഥവാ പീരിയഡ്‌സ് ഡിസോർഡർ. 13-14 വയസ്സുതൊട്ടേ പെൺകുട്ടികളിൽ ഇത് തുടങ്ങുന്നു. മാത്രമല്ല, ആർത്തവ സമയത്ത് അമിതമായ രക്‌തസ്രാവമുണ്ടാകുകയും ചെയ്യും. കൂടാതെ ആർത്തവ കാലയളവ് ദീർഘിക്കുകയോ ആർത്തവം ഉണ്ടാകുന്നത് വൈകുകയോ ചെയ്യാം. ആർത്തവ ക്രമക്കേടുകൾ ഉണ്ടാകുന്നതോടെ വയറുവേദനയും പ്രത്യുല്പാദന അവയവങ്ങളിൽ വേദനയും അനുഭവപ്പെട്ടുതുടങ്ങും.
പെൽവിക് ഇൻഫെക്ഷൻ (ല്യൂക്കോറിയ) സ്ത്രീകളിലുണ്ടാകുന്ന ഒരു പ്രധാന പ്രശ്ന‌മാണ്. 20നും 40നുമിടയിലാണ് ഈ രോഗമുണ്ടാകുന്നത്. ഇത് ക്രമേണ ഗർഭാശയത്തിന്‍റെ മറ്റ് ഭാഗങ്ങളിലേക്ക് വ്യാപിക്കുന്നു. ഈ രോഗത്തിന് പാരമ്പര്യവും കാരണമാകാം.
സ്ത്രീകളിൽ കണ്ടുവരുന്ന മറ്റൊരു പ്രധാന രോഗമാണ് ഗർഭാശയ കാൻസർ. ഇതിൽ പൊതുവായി കണ്ടു വരുന്നത് ഒവേറിയൻ കാൻസറാണ്. സാധാരണ 40നും 60നും ഇടയിലാണ് ഈ രോഗം ഉണ്ടാകുന്നത്. ഈ പ്രായത്തിലുള്ള സ്ത്രീകളിൽ യൂട്ടറസ് ക്യാൻസറും ഉണ്ടാകാറുണ്ട്. ഇത് ക്രമേണ ഗർഭാശയത്തെ മൊത്തമായും ബാധിക്കുന്നു. അപകടകാരിയായ ഒരു രോഗമാണിത്.
സ്ത്രീകളിലുണ്ടാകുന്ന മറ്റൊരു സാധാരണ രോഗമാണ് സെർവികൽ ക്യാൻസർ. മധ്യവയസ്സിലെത്തിയവരിലാണ് ഇത് അധികമായി കണ്ടു വരുന്നത്. എന്നാൽ പ്രായഭേദമെന്യേ സ്ത്രീകളിൽ ഏറ്റവും കൂടുതലായി കണ്ടു വരുന്നത് സ്തനാർബുദമാണ്.
ആർത്തവ വിരാമവുമായി ബന്ധപ്പെട്ട് ഉണ്ടാകുന്ന മറ്റൊരു പ്രധാനരോഗമാണ് ഡിയുബി (ഡിസ്‌ഫംഗ്ഷണൽ യൂട്ടറീൻ ബ്ലീഡിംഗ്) 40 കഴിഞ്ഞ സ്ത്രീകളിലുണ്ടാകുന്ന രോഗമാണ് മെനോറിയ. ആർത്തവസമയത്ത് അമിതവും അസാധാരണവുമായ രക്തസ്രാവമുണ്ടാകുന്നതാണ് ഇതിന്‍റെ പ്രധാന ലക്ഷണം. ചിലയവസരങ്ങളിൽ വെളുത്ത സ്രവവുമുണ്ടാകാം. ഗുഹ്യഭാഗങ്ങളിൽ ചൊറിച്ചിലും പുകച്ചിലുമുണ്ടാകാം. തുടയിടുക്കിലും നാഭിക്ക് താഴെയുള്ള ഭാഗങ്ങളിലും ചൊറിച്ചിലുണ്ടാകുന്നതും ലൈംഗിക താല്പര്യക്കുറവും ഇതിന്‍റെ ലക്ഷണങ്ങളാണ്. മാനസിക പിരിമുറുക്കവും അസ്വസ്‌ഥതയും അനുഭവിക്കുന്നവരായിരിക്കും ഈ രോഗികൾ.
