സെക്സ് എന്നത് കേവലം ഒരു ശാരീരിക ആക്ടിവിറ്റിയല്ല. മറിച്ച് പങ്കാളികൾക്കിടയിൽ അത് വൈകാരികമായ അടുപ്പം സൃഷ്ടിക്കുന്ന ഒന്നാണ്. എന്നാൽ സാമ്പത്തിക പ്രശ്നങ്ങൾ ഉണ്ടാകുന്നതോടെ പങ്കാളികളുടെ വൈകാരികതലത്തെയത് പ്രതികൂലമായി ബാധിക്കുന്നു. അസ്വസ്ഥമായ ചിന്തകളിലാണ്ടു പോകുന്ന മനസ് ശരീരത്തിനൊപ്പം ചേരാതെ വരുന്നു. ഈയൊരവസ്‌ഥ സെക്സ് ലൈഫിനെയും സ്വാധീനിക്കുകയാണ് ചെയ്യുക. ഈ മാറ്റം ഭാര്യയേയും ഭർത്താവിനേയും മാത്രമല്ല, വീട്ടിലെ മറ്റ് കുടുംബാംഗങ്ങളെയും ബാധിക്കുകയും ചെയ്യും. മോശമായ സെക്സ് ലൈഫ് വ്യക്തിയുടെ കാര്യക്ഷമതയെ ബാധിക്കും.
മാത്രമല്ല എല്ലാ തരത്തിലുമുള്ള മാനസിക പിരിമുറുക്കങ്ങളും സെക്സ് ലൈഫിനെ കാര്യമായി സ്വാധീനിക്കാറുണ്ട്. സാമ്പത്തിക പ്രശ്നം ഉണ്ടാകുമ്പോൾ അത് ഒരു വ്യക്‌തിയെ മാത്രമല്ല ആ വ്യക്തിയുടെ പങ്കാളിയേയും ബാധിക്കും. ഈ സാഹചര്യത്തിൽ പങ്കാളിയെ സന്തോഷിപ്പിക്കാനോ സമ്മാനങ്ങൾ വാങ്ങാനോ കറങ്ങാൻ കൊണ്ടു പോകാനോ കഴിയാത്ത അവസ്‌ഥയിലെത്തിച്ചേരും. അതോടെ കുടുംബ ജീവിതത്തിൽ കലഹങ്ങളും അസ്വസ്ഥതകളും പുകഞ്ഞു തുടങ്ങും.
കോവിഡ് -19 സമയത്ത് സാമ്പത്തിക ബുദ്ധിമുട്ട് ഉണ്ടാകാനുള്ള പ്രധാന കാരണങ്ങൾ വരുമാനക്കുറവും വർദ്ധിച്ച ചെലവുമായിരുന്നു. അതായത് വാടക കൊടുക്കുക, ഉദ്യോഗം നഷ്ടപ്പെടൽ, ശബളം മുഴുവനായും ലഭിക്കാതിരിക്കുക, കൃത്യസമയത്ത് ശമ്പളം ലഭിക്കാതിരിക്കുക എന്നിവയൊക്കെ ഭൂരിഭാഗംപ്പേരും അഭിമുഖീകരിച്ച പ്രശ്നങ്ങളാണ്. അതുപോലെ ഔദ്യോഗിക രംഗത്തെ പ്രശ്നങ്ങൾ വേറെയും. ഉദ്യോഗം വിട്ടു പോകാനുള്ള കമ്പനികളുടെ സമ്മർദ്ദം എന്നിവയൊക്കെയും തന്നെ സെക്സ് ലൈഫിനെ കാര്യമായി ബാധിച്ച പ്രശ്നങ്ങളാണ്.
സാമൂഹിക ജീവിതത്തിലുണ്ടായ മാറ്റം
സാമ്പത്തിക പ്രതിസന്ധിയുണ്ടായതോടെ പലരും വലിയ വീട്, ഫ്ളാറ്റ്, പോഷ് ഏരിയ എന്നിവയൊക്കെ ഉപേക്ഷിച്ച് താരതമ്യേന ചെലവു കുറഞ്ഞ മേഖലയിലേക്ക് താമസം മാറ്റി. ഉയർന്ന ഫീസ് ഉള്ള സ്ക്കൂളിൽ നിന്നും ഫീസ് കുറഞ്ഞ സ്ക്കൂളിൽ കുട്ടികളെ ചേർത്തു. സാമ്പത്തിക പ്രതിസന്ധി ഇത്തരത്തിൽ സാമൂഹിക ജീവിതത്തേയും ബാധിച്ചുവെന്ന് വേണം പറയാൻ.
സ്ത്രീകളെയാണ് ഇതേറ്റവും ഗുരുതരമായി ബാധിച്ചത്. ഇത്തരം മാനസികാവസ്‌ഥയിലുള്ള വ്യക്‌തിയ്ക്ക് പങ്കാളിയ്ക്കൊപ്പം സന്തോഷകരമായ സെക്സ് ജീവിതം എങ്ങനെയാണ് നയിക്കാനാവുക. ഭർത്താവ് നിർബന്ധിച്ചാലും ശരി ഭാര്യ വിസമ്മതിക്കുകയേയുള്ളൂ.
മറ്റൊന്ന് സാമ്പത്തിക പ്രതിസന്ധി അവസാനിപ്പിക്കാൻ മിക്കവരും അധിക ജോലി ചെയ്‌തു തുടങ്ങിയെന്നതാണ്. ഈ സാഹചര്യത്തിൽ ആസ്വാദ്യകരമായ സെക്സിന് സമയം കണ്ടെത്തുകയെന്നത് പലർക്കും പ്രയാസകരമായ കാര്യമായി മാറി. ജോലി കഴിഞ്ഞ് ക്ഷീണിതരാവുന്നവർക്കാകട്ടെ സെക്സിനോട് താൽപര്യവും തോന്നണമെന്നില്ല.
സമ്മർദ്ദം സ്ത്രീകളിൽ കൂടുതൽ
പുരുഷന്മാരെ അപേക്ഷിച്ച് സ്ത്രീകളെയാണ് സാമ്പത്തിക പ്രതിസന്ധി ഏറ്റവും കൂടുതലായി ബാധിച്ചത്. വീട്ടുചെലവുകൾക്കായി അവർ ഭർത്താവിനെ ആശ്രയിക്കുമെങ്കിലും അതിനുള്ള സാധ്യതയ്ക്ക് മങ്ങലേൽക്കുന്നതോടെ അവർ കൂടുതൽ അസ്വസ്ഥരാകുകയാണ് ചെയ്യുക. ഈയൊരു സ്ഥിതി വിശേഷം അവരുടെ ലൈംഗിക ജീവിതത്തേയും ബാധിക്കുന്നു. മാത്രമല്ല, മാനസിക പിരിമുറുക്കം മറ്റ് പല അസ്വസ്ഥതകളിലേക്ക് അവരെ നയിക്കുന്നു. തലവേദന, ഉദരസംബന്ധമായ അസ്വസ്ഥതകൾ, ഹൈ ബ്ലഡ് പ്രഷർ അല്ലെങ്കിൽ നെഞ്ച് വേദന എന്നിവയൊക്കെ അതിൽ പ്രധാനപ്പെട്ടവയാണ്. മാനസിക പ്രശ്നങ്ങളിൽ ഡിപ്രഷൻ, ആശങ്ക, പാനിക് അറ്റാക്കുകൾ എന്നിവയ്ക്കൊപ്പം മറ്റ് വൈകാരിക പ്രശ്നങ്ങളും ഒരു പരിധി വരെ സെക്സ് ലൈഫിനെ ബാധിക്കുന്നു.
മാനസിക പിരിമുറുക്കം വർദ്ധിക്കുന്നത് ശരീരത്തിലെ ഹോർമോൺ മെറ്റബോളിസത്തെ താറുമാറാക്കുന്നു. അതുപോലെ മനസിൽ അശുഭചിന്തകൾ സംജാതമാകുന്നു. ക്രമേണ ഇത് ശരീരത്തിൽ നെഗറ്റീവ് ഇമേജ് സൃഷ്ടിക്കുന്നു.
മാനസികാരോഗ്യം താറുമാറാകുന്നു
മനസ് സന്തുഷ്ടമല്ലെങ്കിൽ മൂഡ് സ്വിംഗ്സ് ഉണ്ടാകുക സ്വാഭാവികമാണല്ലോ. വൈകാരികമായ അസ്വസ്ഥതകൾ അധികരിക്കുന്നതോടെ സെക്സിനോടുള്ള താൽപര്യവും ഇല്ലാതാവുന്നു. ഒരു വ്യക്തിയുടെ സെക്സ് ലൈഫ് മോശമാകുന്നതിന്‍റെ ദൂഷ്യഫലം ആ വ്യക്തിയുടെ പങ്കാളിയുടെ സെക്സ് ലൈഫിനേയും താറുമാറാക്കും. സാമ്പത്തിക പ്രതിസന്ധി ഏറ്റവുമാദ്യം മാനസികാരോഗ്യത്തെയാണ് ബാധിക്കുക. മാനസികപിരിമുറുക്കം മൂലം പലതരം ചിന്തകൾ മനസിൽ ഉണ്ടാകാം. ഈയവസ്‌ഥ പങ്കാളിയേയും അസ്വസ്ഥതയിലേക്ക് തള്ളിവിടുന്നു.
വൈകാരികമായി സ്‌ഥിരതയില്ലാത്ത ഒരു വ്യക്‌തിയൊടൊപ്പം ശാരീരിക ബന്ധം പുലർത്താൻ ആരും തന്നെ ആഗ്രഹിക്കില്ല. പലപ്പോഴും മാനസിക പിരിമുറുക്കം മൂലം പങ്കാളികൾ പരസ്പരമുള്ള സംസാരം തന്നെ ഒഴിവാക്കും. അല്ലെങ്കിൽ പങ്കാളികൾക്കിടയിൽ രൂക്ഷമായ അഭിപ്രായ ഭിന്നതകൾ ഉടലെടുക്കാം.
സെക്സ് ലൈഫ് മികച്ച രീതിയിലാക്കുന്നതിന് മാനസിക പിരിമുറുക്കത്തെ, ഇല്ലാതാക്കുകയോ സ്വന്തം കാഴ്ചപ്പാടിൽ മാറ്റം വരുത്തുകയോ ചെയ്യേണ്ടതാവശ്യമാണ്. ഇത് പറയാൻ എളുപ്പമാണെങ്കിലും പ്രാവർത്തികമാക്കാൻ ബുദ്ധിമുട്ടാണ്. അതിനാൽ മാനസിക പിരിമുറുക്കത്തെ സംഘർഷത്തെ കുറച്ചു കൊണ്ടുവരാൻ ശ്രമിക്കുകയാണ് വേണ്ടത്. അതായത് സംഘർഷഭരിതമായ അവസ്‌ഥ ജീവിതത്തെ ബാധിക്കാതിരിക്കാൻ ശ്രമിക്കുക. എക്സർസൈസ്, കൗൺസിലിംഗ് എന്നിവയിലൂടെ ഇത് സാധിക്കും.
ഹോർമോൺ അസന്തുലിതാവസ്‌ഥ
മാനസിക പിരിമുറുക്കം മൂലം ശരീരത്തിൽ സ്ട്രസ് ഹോർമോണായ കോർട്ടിസോളിന്‍റെ നില ഉയരുന്നു. കോർട്ടിസോളും എപിനെഫ്രിനും ഉയർന്ന നിലയിലാകുന്നത് ഹെൽത്തി സെക്സ് ലൈഫിനെ പ്രതിസന്ധിയിലാക്കും. സ്ത്രീകളുടെ ലൈംഗിക ക്ഷമതയെ അത് കുറയ്ക്കും. ഇക്കാരണം കൊണ്ട് സെക്സ് ലൈഫ് ഏകദേശം നിർജ്‌ജീവാവസ്‌ഥയിലാകുകയാണ് ചെയ്യുക. കോർട്ടിസോൾ നില ഉയരുന്നതോടെ സെക്സ് ഹോർമോൺ റിലീസ് ആകുന്നതിൽ ബുദ്ധിമുട്ടുകൾ ഉണ്ടാകുന്നു. ഇത് ലൈംഗിക താൽപ്പര്യത്തെ കുറയ്ക്കുന്നു. അതിനാൽ സമാധാനവും സന്തോഷവും കൈവരിക്കാൻ സ്വയം ശ്രമിക്കുകയാണ് വേണ്ടത്. കടുത്ത മാനസിക പിരിമുറുക്കം അനുഭവിക്കുന്ന സ്ത്രീകളിലാവട്ടെ ഈയവസ്‌ഥ അവരുടെ ആർത്തവ ചക്രത്തേയും അത് ബാധിക്കും. ഇക്കാരണം കൊണ്ട് ശരീരത്തിൽ ഹോർമോൺ മാറ്റങ്ങൾ ഉണ്ടാകും. മൂഡ് സ്വിംഗ്സ് വർദ്ധിക്കുന്നു. അതോടെ കടുത്ത മാനസിക സംഘർഷം വർദ്ധിക്കുന്നു.
സാമ്പത്തിക പ്രതിസന്ധി ശരീരത്തിലെ ഹോർമോൺ ബാലൻസിനെ മാത്രമല്ല ബാധിക്കുക, മറിച്ച് അത് വൈകാരിക തലങ്ങളേയും ദോഷകരമായി സ്വാധീനിക്കുന്നു. ഈ സാഹചര്യത്തിൽ ആരുമായും സംസാരിക്കാൻ താൽപര്യം അവർക്ക് ഉണ്ടാകണമെന്നില്ല. മാത്രമല്ല മറ്റുള്ളവരിൽ നിന്നും അകന്നു മാറി നിൽക്കാൻ ആയിരിക്കും ഈ പ്രശ്നമനുഭവിക്കുന്ന ഭൂരിഭാഗംപ്പേർക്കും താൽപ്പര്യം.
ഇത്തരം അവസ്‌ഥകളെല്ലാം തന്നെ ക്രമേണ അകൽച്ച സൃഷ്ടിക്കാൻ കാരണങ്ങളാകും. സെക്സ് എന്നത് ശാരീരിക ആക്ടിവിറ്റിയല്ല മറിച്ച് ഇമോഷൻസ് ഉൾപ്പെടുന്ന ഒന്നാണ്.
മാനസിക പിരിമുറുക്കത്തെ എങ്ങനെ നേരിടാം
സാമ്പത്തിക പ്രതിസന്ധിയെ ഇല്ലായ്മ ചെയ്യുന്നതിന് ഏറ്റവും അടിയന്തിരമായി ചെയ്യേണ്ടത് പണത്തിന്‍റെ അഭാവത്തെ ഇല്ലാതാക്കുകയെന്നതാണ്. മനസ് ദൃഢമാക്കുക. ഉടനെ തന്നെ എന്തെങ്കിലും പോംവഴി കണ്ടുപിടിക്കും എന്ന് മനസിൽ ഉറച്ച വിശ്വാസം കൊണ്ടുവരിക. മാനസിക സംഘർഷമുണ്ടാകുന്ന വസ്തുതകളെ ഇല്ലാതാക്കുന്നതിന് പകരം അതിനെ നേരിടുക. അതിനുള്ള പരിഹാരങ്ങൾക്ക് ശ്രമിക്കുക.
പങ്കാളിയേയും അതിനായി പ്രോത്സാഹിപ്പിക്കുകയും ഊർജ്ജം പകരുകയുമാണ് വേണ്ടത്. കഴിവിനനുസരിച്ച് എവിടെയെങ്കിലും കറങ്ങാൻ പോകുക, കറങ്ങാൻ പോകുന്നത് മാനസിക പിരിമുറുക്കത്തെ കുറയ്ക്കും. മറ്റൊന്ന് വ്യായാമം ചെയ്യുന്നത് ഏറ്റവും നല്ലൊരു ഉപായമാണ്. റിലാക്സേഷൻ പകരുന്ന മ്യൂസിക് കേൾക്കുന്നതും മാനസിക സന്തോഷം കൈവരിക്കാൻ സഹായിക്കും.
സാമ്പത്തിക പ്രതിസന്ധിയുള്ള ഘട്ടത്തിൽ മനഃശക്തിയുണ്ടായിരിക്കേണ്ടത് ആവശ്യമാണ്. മൂഡ്, ബിഹേവിയർ എന്നിവയെ അറിയാൻ ശ്രമിക്കുക. അങ്ങനെയായാൽ പ്രശ്നങ്ങളെ നേരിടാൻ കുറച്ചു കൂടി എളുപ്പമാകും. ഏറ്റവും അടുത്ത കൂട്ടുകാരോട് സംസാരിക്കുക. അവരുടെ തുറന്ന ഇടപെടലുകളും പിന്തുണയും പ്രശ്നങ്ങളെ ലഘൂകരിക്കാൻ എളുപ്പമാക്കും.
സന്തോഷം പകരുന്ന പ്രവർത്തികളിൽ ഏർപ്പെടുക. എന്തെങ്കിലും ഹോബികൾ ഉള്ളവരാണെങ്കിൽ അതിൽ മുഴുകാൻ ശ്രമിക്കുക. വായന, ഗാർഡനിംഗ്, പെയിന്‍റിംഗ്, കുക്കിംഗ് എന്നിവയെല്ലാം തന്നെ സന്തോഷം പകരുന്ന ചില ഹോബികളാണ്. മാനസിക പിരിമുറുക്കം അമിതമായി വർദ്ധിക്കുന്നതിനെ അവഗണിക്കരുത്. മറിച്ച്, സൈക്യാട്രിസ്റ്റിനെ കണ്ട് വേണ്ട പരിഹാരങ്ങൾ ആരായാം.
