മാതാപിതാക്കളെ സംബന്ധിച്ച് കുഞ്ഞുങ്ങളുടെ ശൈശവ കാലം ഏറ്റവും മനോഹരമായ ഒന്നാണ്. അവരുടെ കുഞ്ഞ് വികൃതികളും തമാശകളും കളിയും ചിരിയുമൊക്കെ കണ്ടിരിക്കാൻ തന്നെ എന്ത് രസമാണ്. ഇതുപോലെ അതി മനോഹരമായ ഒന്ന് ഈ ലോകത്ത് മറ്റൊന്നുമില്ലെന്ന് തന്നെ പറയാം.
കുഞ്ഞുങ്ങളുടെ മസ്തിഷ്കത്തിന് വികാസം പ്രാപിക്കുന്ന കാലഘട്ടവുമാണ് ശൈശവം. മാതാപിതാക്കൾ കുഞ്ഞുങ്ങളെ വളർത്തുന്നതിനെ ആശ്രയിച്ചിരിക്കും. മുതിർന്ന പ്രായത്തിലുള്ള അവരുടെ സ്വഭാവ രൂപീകരണവും ബുദ്ധിശക്തിയും. കുഞ്ഞുങ്ങളുടെ ബുദ്ധിശക്തി വളർത്തുന്നതിന് സഹായകമായ ചില ടിപ്സുകളുണ്ട്. മാതാപിതാക്കൾ അത്യാവശ്യം അറിഞ്ഞിരിക്കേണ്ടവയാണിത്.
കുഞ്ഞുങ്ങൾ ഏറെയിഷ്ടപ്പെടുന്ന കാര്യമാണ് കഥ കേൾക്കുകയെന്നത്
കുട്ടികൾ കുഞ്ഞായിരിക്കെ തന്നെ അവർക്ക് ചിത്രങ്ങളോടു കൂടിയ കഥ വായിച്ചു കൊടുക്കുക. കുഞ്ഞുങ്ങൾക്ക് അത് മനസിലായില്ലെങ്കിൽ കൂടിയും ഈ ശീലം ഭാഷ പഠിക്കാനുള്ള കഴിവ് അവരിൽ വളർത്തുമെന്നാണ് ഗവേഷണങ്ങൾ പറയുന്നത്. ഇങ്ങനെ കഥകൾ വായിച്ച് കേൾക്കുന്ന കുഞ്ഞുങ്ങൾ പിന്നീട് വായനയിൽ കൂടുതൽ താൽപര്യം കാട്ടും. കുട്ടികളുടെ കഴിവുകളെ വികസിപ്പിക്കാൻ നല്ലൊരു വഴിയാണ് അവർക്ക് കഥകൾ വായിച്ചു കൊടുക്കുകയെന്നത്.
പഠനം വളരെ നേരത്തെയാക്കാം
കുട്ടികളെ വളരെ നേരത്തെ പഠിപ്പിച്ച് തുടങ്ങുന്നത് കുഞ്ഞുങ്ങളുടെ ബുദ്ധിവികാസം ശരിയായ രീതിയിലാക്കാൻ സഹായിക്കുമെന്നാണ് വിദ്ഗദ്ധർ പറയുന്നത്. കുഞ്ഞുങ്ങളെ ആഹ്ലാദിപ്പിക്കുന്ന കാര്യങ്ങൾ ചെയ്യുക, അവരിലെ സ്ട്രെസ് കുറയ്ക്കുക. നമ്പർ ഗെയിംസ്, മ്യൂസിക് എന്നിവ ഉപയോഗിച്ച് അവരോട് സംസാരിക്കുകയും പാട്ട് പാടുകയും ചെയ്യത് പഠനത്തിൽ താൽപര്യം ജനിപ്പിക്കുക.
കുഞ്ഞുങ്ങളുമായുള്ള ആശയവിനിമയം
കുഞ്ഞുങ്ങളെ വാത്സല്യക്കുന്നതും കൊഞ്ചിക്കുന്നതും അവരോടൊപ്പം കളിക്കുന്നതും അവരുടെ ബുദ്ധിശക്തിയെ വികസിപ്പിക്കുമെന്നാണ് ശാസ്ത്രം പറയുന്നത്. ഇതൊന്നുമില്ലാതെ വളരുന്ന കുഞ്ഞുങ്ങളിൽ ശരിയായ ബുദ്ധിവികാസങ്ങൾ നടക്കാതെ വരുന്നു. ഡിപ്രഷന് അടിപ്പെടുകയും വളർച്ച മുരടിക്കുകയും ചെയ്യും. കുഞ്ഞുങ്ങൾക്ക് മാതാപിതാക്കൾ കൂടുതൽ ശ്രദ്ധയും സ്നേഹവും പരിലാളനയും നൽകുക.
കുഞ്ഞുങ്ങൾക്കുള്ള കളിപ്പാട്ടം ശ്രദ്ധയോടെ തെരഞ്ഞെടുക്കാം
കുഞ്ഞുങ്ങളുടെ ബുദ്ധിശക്തി വളർത്താൻ ഉതകുന്ന തരത്തിലുള്ള കളിപ്പാട്ടങ്ങൾ അവർക്കായി തെരഞ്ഞെടുക്കാം. കുഞ്ഞുങ്ങളുടെ ചിന്താശക്തിയെ ഉണർത്തുംവിധമുള്ള പല രീതിയിൽ പ്രയോഗിക്കാവുന്ന കളിപ്പാട്ടങ്ങൾ അവർക്ക് വാങ്ങി നൽകാം.
കുഞ്ഞുങ്ങളെ കളിക്കാൻ അനുവദിക്കാം
ബുദ്ധി വികാസത്തിനും ശാരീരികവും വൈകാരികവുമായ കഴിവുകൾ വളരാനും സാമൂഹ്യ ഇടപഴകലിനും കളികൾ കുഞ്ഞുങ്ങളെ സഹായിക്കും. അതുകൊണ്ട് അവർ വീടിനകത്തും പുറത്തും മതിവരുവോളം കളിക്കട്ടെ. ഓടുകയും ചാടുകയും ചെയ്യട്ടെ. മറ്റ് കുട്ടികൾക്കൊപ്പം കളിക്കുന്നതിലൂടെ ആശയങ്ങൾ കൈമാറാനും ഉൾക്കൊള്ളാനും പരസ്പരം മനസിലാക്കാനും പങ്ക് വയ്ക്കാനും അവർ പരിശീലിക്കുകയാണ് ചെയ്യുന്നത്.
കുഞ്ഞുങ്ങളെ നല്ല വായനക്കാരാക്കുക
വായനയോടുള്ള ഇഷ്ടം കുഞ്ഞുങ്ങൾക്ക് കൂടുതൽ പ്രയോജനം ചെയ്യും. കുഞ്ഞുങ്ങൾ സമർത്ഥന്മാരായി വളരാൻ ഏറ്റവും നല്ല മാർഗ്ഗമാണ് അവരിൽ വായനാശീലം വളർത്തുകയെന്നത്. വായനയിൽ നിന്നും അവനും /അവളും മനസിലാക്കുന്ന കാര്യങ്ങൾ കൂടുതൽ അറിവുകൾ നേടാൻ അവരെ പ്രാപ്തമാക്കും. വളരെ ചെറുപ്രായത്തിൽ വായിച്ച് തുടങ്ങുന്ന കുട്ടികൾക്ക് സ്ക്കൂൾ ഘട്ടമെത്തുന്നതോടെ കഠിനമായ വിഷയങ്ങൾ വളരെ വേഗം മനസിലാക്കാനും ഹൃദിസ്ഥമാകാനും കഴിയും.
