ഓഫീസ് വർക്ക്ഔട്ട് ചെയ്യാം

ഓഫീസിൽ ദീർഘമായി ഇരുന്നുള്ള ജോലി പലപ്പോഴും ശാരീരികമായ അസ്വസ്‌ഥതകൾ ക്ഷണിച്ചു വരുത്താറുണ്ട്. നടുവേദന, കഴുത്തുവേദന, സന്ധി വേദന തുടങ്ങി അമിതവണ്ണം വരെയുള്ള പ്രശ്നങ്ങൾ ഉണ്ടാകുന്നു. ഈ വക പ്രശ്നങ്ങളെ ഒഴിവാക്കാനായി ഓഫീസിൽ ചെയ്യാവുന്ന സൗകര്യപ്രദമായ ചില എക്‌സർസൈസ് ടിപ്‌സുകൾ,

തിരക്കുപിടിച്ച ജോലിക്കൊടുവിൽ ഒഴിവ് കിട്ടുന്ന സമയത്ത് വാം അപ്പുകൾ ചെയ്യുക. ലിഫ്‌റ്റിന് പകരം ഓഫീസിലെ കോണിപ്പടികൾ ഉപയോഗിക്കുക. ടീ ടൈമിലും ലഞ്ച് ബ്രേക്കിലും ഇത് പാലിക്കുക.
ഓഫീസിൽ ഇരിക്കുമ്പോൾ ഇടയ്‌ക്ക് കാലുകൾ നീട്ടുക. കാൽ വിരലുകൾ മടക്കുകയും നിവർക്കുകയും ചെയ്യുക. കാൽപാദം ക്ലോക്ക് വൈസായും ആന്‍റി ക്ലോക്ക് വൈസായും വട്ടത്തിൽ ചലിപ്പിക്കുക. കാലിലേക്കുള്ള രക്‌തസഞ്ചാരം കൂട്ടുന്നതിനൊപ്പം കാൽ വേദന, മരവിപ്പ് തുടങ്ങിയ പ്രശ്നങ്ങൾ ഉണ്ടാവുകയില്ല.
കഴുത്ത് വലത്തോട്ടും ഇടത്തോട്ടും ചലിപ്പിക്കുക. ഇത് ഏതാനും പ്രാവശ്യം ആവർത്തിക്കാം. കഴുത്ത് വേദന പമ്പകടക്കും. ഒപ്പം പേശികൾക്കത് റിലാക്‌സേഷൻ പകരും.
കസേരയിൽ ഇരിക്കുമ്പോൾ കസേര കയ്യിൽ കൈകൾ ഊന്നിക്കൊണ്ട് ശരീരം മൊത്തത്തിൽ ഒരു വശത്തേക്ക് കൊണ്ടു പോകുക. ആ നിലയിൽ 15-20 സെക്കന്‍റ് തുടരുക. ഈ വ്യായാമം മറു വശത്തേക്കും ആവർത്തിക്കുക.
കസേരയിൽ ബലമായി ചാരിയിരുന്നു കൊണ്ട് പാദങ്ങൾ ഒരു വശത്തായി മുകളിലേക്ക് ഉയർത്തുക. മൂന്നു സെക്കന്‍റ് നേരം ആ നില തുടർന്ന ശേഷം പാദം താഴേക്ക് കൊണ്ടു വരിക. ഇപ്രകാരം മറു വശത്തും 12-15 തവണ ആവർത്തിക്കാം.
കസേരയിൽ ഇരിക്കുന്ന സമയത്ത് ഇരുകൈകളും തലയ്‌ക്ക് പിന്നിലായി ചേർത്തു പിടിച്ചുകൊണ്ട് വശത്തേക്ക് ചരിഞ്ഞ് കൈമുട്ടു കൊണ്ട് കസേര കയ്യിൽ സ്‌പർശിക്കാൻ ശ്രമിക്കുക. ഈ നിലയിൽ വ്യായാമം 15-20 സെക്കന്‍റ് നേരം തുടരുക. ഈ വ്യായാമം മറുവശത്തും ഏതാനും തവണ ആവർത്തിക്കുക.
ബ്രേക്ക് സമയത്ത് ബ്രീത്തിംഗ് എക്‌സർസൈസുകൾ ചെയ്യാം. ഇത്തരം ബ്രീത്തിംഗ് എക്‌സർസൈസുകൾ വർക്ക് സ്‌ട്രെസ്സിനെ കുറയ്‌ക്കുകയും ശരീരത്തിന് നവോൻമേഷം പകരുകയും ചെയ്യും. ചിന്താശക്‌തിയ്‌ക്ക് നല്ല വ്യക്‌തതയുണ്ടാവും. ശരീരവും മനസ്സും താളാത്മകമായി പ്രവർത്തിക്കും.
കൈപ്പത്തികൊണ്ട് മുഖത്തിന് ഒരു വശത്ത് ചേർത്ത് പിടിക്കുക. അതിനു ശേഷം കൈയ്‌ക്ക് എതിരായി ശിരസ്സു കൊണ്ട് ബലമായി തള്ളുക. തള്ളലിന് അനുസൃതമായി കൈപ്പത്തി കൊണ്ട് ശക്‌തമായി പ്രതിരോധിക്കുക. മറുവശത്തും ഇപ്രകാരം ചെയ്യുക. പത്ത് തവണ ആവർത്തിക്കുക.
ഓഫീസിൽ ഒരേയിടത്ത് നിന്നു കൊണ്ട് മാർച്ച് ചെയ്യുന്നതു പോലെ പാദങ്ങൾ ഉയർത്തുകയും താഴ്‌ത്തുകയും ചെയ്യുക. ഈ സമയം ഇരു കൈകളും മുകളിലേക്ക് ഉയർത്തുകയും താഴ്‌ത്തുകയും ചെയ്യണം.
നെഞ്ചിന് നേരെ കൈകൾ പരമാവധി നിവർത്തി പിടിക്കുക. ഒരു കൈകൊണ്ട് മറ്റേ കൈ ശക്‌തമായി വലിക്കുക. മുതുകിന് മുകളിലും ഷോൾഡർ ഭാഗത്തും വലിച്ചിൽ അനുഭവപ്പെടുന്ന രീതിയിലാവണം വലിക്കേണ്ടത്.
ഇരു കൈകളും കൊണ്ട് വാട്ടർ ബോട്ടിൽ ഉയർത്തുക. കൈകൾ പരമാവധി മുകളിലേക്ക് നിവർത്തണം. അതിനു ശേഷം ശരീരം ഇടത്തേക്ക് വളയ്‌ക്കുക. പിന്നീട് വലത്തോട്ടും ഇതാവർത്തിക്കണം. ഇത് പത്ത് തവണ ആവർത്തിക്കണം.
റിസ്‌റ്റ് സ്‌ട്രെച്ച്: നെഞ്ചിന് സമമായി കൈകൾ മുന്നോട്ട് പരമാവധി നീട്ടുക. ഒരു കൈകൊണ്ട് മറ്റേ കൈ പരമാവധി മുന്നോട്ട് വലിക്കുക. ഈ നിലയിൽ 20-30 സെക്കന്‍റു നേരം തുടരുക. ഇത് മറ്റേ കയ്യിലും ആവർത്തിക്കുക.