മിഡിൽ ഈസ്റ്റിലേക്കാണോ യാത്ര... എങ്കിൽ യുണൈറ്റഡ് അറബ് എമിറേറ്റ്സിലെ റാസ് അൽ ഖൈമ സന്ദർശിച്ചേ മടങ്ങാവൂ. ടൂറിസ്റ്റുകൾക്ക് ദൃശ്യവിരുന്നൊരുക്കുന്ന എത്രയെത്ര മനോഹര കാഴ്ചകളാണ് ഇവിടെയുള്ളതെന്നോ? സ്വച്ഛസുന്ദരമായ ബീച്ചുകൾ, കടൽക്കരയോട് ചേർന്ന് ചെറു മണൽക്കൂനകൾ, വിശ്രമകേന്ദ്രങ്ങൾ, ഹജ്ജാർ പർവ്വതനിരകൾ, വന്യജീവിസങ്കേതം, കഴ്ചകളുടെ ഒരു വിസ്മയലോകം നമുക്ക് മുന്നിൽ തുറക്കപ്പെടുകയാണ്...
സഞ്ചാരപ്രിയനായ സുഹൃത്ത് റാസ് അൽ ഖൈമ യാത്രാനുഭവത്തെക്കുറിച്ച് പലവട്ടം പറഞ്ഞ് കൊതിപ്പിച്ചപ്പോഴാണ് അവിടം സന്ദർശിക്കണമെന്ന ആഗ്രഹം മനസ്സിൽ പൂവിട്ടത്. ആശിച്ചതുപോലെ അധികം വൈകാതെ മിഡിൽ ഈസ്റ്റ് യാത്രയ്ക്കൊരു അവസരം തരപ്പെട്ടു.
മുംബൈയിൽ നിന്നും എയർ അറേബിയ എയർലൈൻസിലാണ് യാത്ര തിരിച്ചത്. ഇന്ത്യൻ സമയം രാവിലെ 6 മണിയോടെ ഷാർജ എയർപോർട്ടിൽ എത്തിച്ചേർന്നു. ഷാർജയിലെ അംബരചുംബികളായ സൗധങ്ങളും വിശാലഭൂപ്രകൃതിയും ഞങ്ങളെ ശരിക്കും അത്ഭുതസ്തബ്ധരാക്കി. അവിടെ നിന്നും ഞങ്ങൾ ബസ് മാർഗ്ഗം യാത്ര ചെയ്ത് റാസ് അൽ ഖൈമയിലെത്തി.
ചുറ്റും കടൽ കാണാം
സമുദ്രത്താൽ ചുറ്റപ്പെട്ട മനോഹരമായ ഒരു ടൂറിസ്റ്റ് ഡസ്റ്റിനേഷനാണ് റാസ് അൽ ഖൈമ. അറേബ്യൻ കടലിടുക്കിന്‍റെ വടക്കേ അറ്റത്തുള്ള തീരദേശം. യുണൈറ്റഡ് അറബ് എമിറേറ്റ്സിൽ റാസ് അൽ ഖൈമയ്ക്ക് പുറമേ അബുദാബി, ദുബായ്, ഉം അൽ, കുവൈറ്റ്, അജമൻ, ഫുജയിറ എന്നീ എമിറേറ്റുകളാണ് ഉള്ളത്. കിഴക്ക് ഹജ്ജാർ പർവ്വതനിരകളും പേർഷ്യൻ കടലിടുക്കും സുൽത്താൻ ഓഫ് ഒമാനുമാണ് റാസ് അൽ ഖൈമയുടെ അതിർത്തി പ്രദേശങ്ങൾ. 1700 സ്ക്വയർ കിലോമീറ്റർ വസ്തൃതിയിൽ വ്യാപിച്ചു കിടക്കുന്ന പ്രദേശമാണിത്. ഇത് ഇന്ന് റാസ് അൽ ഖൈമ, നഖീൽ എന്നിങ്ങനെ രണ്ടു നഗരങ്ങളായാണ് അറിയപ്പെടുന്നത്. ഒട്ടനവധി ഷേയ്ക്ക് ഭരണാധികാരികൾ ഇവിടെ ഭരണം കാഴ്ച വെച്ചിട്ടുണ്ടെന്ന് ഇവിടുത്ത ചരിത്ര- പുരാവസ്തു അവശേഷിപ്പുകൾ പരിശോധിച്ചാൽ വ്യക്തമാകും. റാസ് അൽ ഖൈമയുടെ പഴയനാമം ജുൽഫർ എന്നായിരുന്നു. പിന്നീട് ഇവിടുത്തെ തദ്ദേശീയവാസികളും ജുൽഫർ എന്നപേരിൽ അറിയപ്പെടാൻ തുടങ്ങി. കാലക്രമേണ ഇവർ കടൽ കടന്ന് കുടിയേറി പാർക്കാനും തുടങ്ങിയത്രേ.
18ാം നൂറ്റാണ്ടിൽ കാസിം ആണ് റാസ് അൽ ഖൈമ രൂപീകരണത്തിന് മുൻകൈയെടുത്തത്. എന്നാൽ 19ാം നൂറ്റാണ്ടിന്‍റെ തുടക്കത്തിൽ ബ്രട്ടീഷ് നാവികാക്രമണത്തിനുശേഷം കാസിമിനെ നാടുകടത്തുകയായിരുന്നു.
1869ഓടെ റാസ് അൽ ഖൈമ ഷാർജയുടെ അധീനതിയിൽ നിന്നും വിട്ടുമാറി ഒരു സ്വതന്ത്രരാജ്യമായിത്തീർന്നു. പിന്നീട് 11 ഫെബ്രുവരി 1972ൽ റാസ് അൽ ഖൈമ ഷേക്ക് ശക്ര ബിൻ മുഹമ്മദ് അൽ കാസിയുടെ നേതൃത്വത്തിൽ യുണൈറ്റഡ് അറബ് എമിറേറ്റ്സിനോട് ചേർക്കപ്പെടുകയായിരുന്നു. ലോകത്തിലെ ഏറ്റവും വലിയ എണ്ണഖനി ഇവിടെയാണുള്ളത്. സാമ്പത്തികമായി മിഡിൽ ഈസ്റ്റിൽ വളർച്ച നേടിയ എമിറേറ്റസാണിത്. ഒരു ഉഷ്ണമേഖലാ മരുപ്രദേശമെന്നതിനാൽ പൊതുവേ മഴ ഇവിടെ കുറവാണ്. കറൻസി യുഎഇ ദിർഹം. സംസാരഭാഷ അറബിക്. എന്നാൽ വ്യാപാര വാണിജ്യ ആവശ്യങ്ങൾക്കായി ഇംഗ്ലീഷ് ഭാഷയാണ് ഉപയോഗിക്കുന്നത്. ഇതിനു പുറമേ ഹിന്ദി, മലയാളം, തമിഴ്, ഉർദു, ബംഗള, പാഴ്സി ഭാഷകളും സംസാരിക്കുന്നവരുമുണ്ട്. ഇവിടെ നിന്നും ദുബായിലേക്ക് 87 കിലോമീറ്റർ ദൂരമുണ്ട്. ദുബായിൽ നിന്നും 45 മിനിറ്റ് യാത്ര ചെയ്താൽ റാസ് അൽ ഖൈമയിലെത്തി ചേരാനാകും.
