സ്‌ത്രീകളുടെ സോഷ്യൽ നെറ്റ്‍വർക്കായ ഷിറോസിന്‍റെ ഫൗണ്ടറാണ് സായരി ചഹൽ. ദേവി അവാർഡ്, ഫെമിന അച്ചീവേഴ്‌സ് അവാർഡ്, എഡിറ്റേഴ്‌സ് ചോയിസ് ഫോർ ലോറിയൽ, ഫെമിന വുമൻസ് തുടങ്ങി നിരവധി അവാർഡുകൾ നേടിയിട്ടുണ്ട്.
ഷിറോസ് ഒരു വലിയ സോഷ്യൽ നെറ്റ്‌വർക്ക് പ്ലാറ്റ്‌ഫോമാണ്. അതിലൂടെ നിരവധി കാര്യങ്ങൾ സായരി ചെയ്യുന്നു. അതിൽ എന്തും പോസ്‌റ്റ് ചെയ്യാം. ഭക്ഷണം, ആർട്ട്, ഫാഷൻ, ഇങ്ങനെ എന്തും. പ്രോഡക്‌ടുകൾ വിൽക്കാം, വാങ്ങാം. കവിതകളും കഥകളും എഴുതി ഷെയർ ചെയ്യാം. വീട്ടിൽ നിന്ന് ജോലി ചെയ്യുകയുമാവാം.
ഈ പ്ലാറ്റ് ഫോമിൽ പുരുഷന്മാർ ഇല്ല. അതിനാൽ ബന്ധങ്ങൾ, സെക്‌സ്, പീരിയഡ്‌സ്, ബോഡി ഇമേജ് തുടങ്ങിയ തികച്ചും സ്വകാര്യമായ കാര്യങ്ങൾ പോലും ഇവിടെ സംസാരിക്കാൻ പ്രയാസമില്ല.
കുട്ടിക്കാലം മുതൽ ബിസിനസ് വുമൺ ആകാനാണോ ആഗ്രഹിച്ചിരുന്നത്?
അല്ല. എനിക്ക് യൂണിവേഴ്‌സിറ്റി പ്രൊഫസർ ആകണമെന്നായിരുന്നു ആഗ്രഹം. കോളജിൽ നിന്ന് തന്നെ എന്‍റെ എന്‍റർപ്രണർഷിപ്പ് യാത്ര ആരംഭിച്ചു. 1999-ൽ ഇന്‍റർനെറ്റുമായി പരിചയമായപ്പോൾ, ലോകത്തെ മാറ്റിമറിക്കാനുള്ള ഇന്‍റർനെറ്റിന്‍റെ കഴിവിൽ ഞാൻ പ്രചോദിതയായി. 2014-ൽ ഇന്‍റർനെറ്റ് ഉപയോഗിച്ച് സ്‌ത്രീകൾക്കുവേണ്ടി കൂട്ടായ്‌മ ചെയ്യാൻ തീരുമാനിച്ചു. അവിടെ നിന്നാണ് ബിസിനസ് വുമൺ എന്ന വഴി തെളിഞ്ഞത്.
സ്‌ത്രീകളുടെ സ്വപ്‌നങ്ങൾ പൂർത്തീകരിക്കാൻ ഷിറോസ് എങ്ങനെയാണ് സഹായിക്കുന്നത്?
അംഗീകാരവും ആദരവും സൗഹൃദവും അവസരങ്ങളും ഉന്നതിയും ഓരോ സ്‌ത്രീയും ആഗ്രഹിക്കുന്നുണ്ട്. അവരുടെ ആഗ്രഹങ്ങൾ പൂർത്തീകരിക്കാനാണ് ഷിറോസ് ഒരു വലിയ ഓൺലൈൻ ഇക്കോസിസ്‌റ്റം രൂപീകരിച്ചത്. ഞങ്ങൾ ആപ്പ് ലോഞ്ച് ചെയ്‌തത് വീട്ടിലിരിക്കുന്ന സ്‌ത്രീകൾക്ക് എന്‍റർപ്രണർ ആകാൻ സഹായം നൽകാനാണ്. ഷിറോസ് കൗൺസിലിംഗ് ഹെൽപ്പ് ലൈൻ ഉപയോഗിച്ച് തങ്ങളുടെ സംഘർഷങ്ങളെക്കുറിച്ച് പറഞ്ഞ് ഉപദേശം തേടാം.
ഫിറ്റ്‌നസ് സൂക്ഷിക്കാൻ എന്താണ് ചെയ്യുന്നത്?
എല്ലാ ദിവസത്തിന്‍റെ തുടക്കവും വ്യായാമത്തിലൂടെയാണ്. യാത്രയിലാണെങ്കിൽ കൂടി ഞാൻ ആ ദിനചര്യ മുടക്കാറില്ല. എനിക്ക് നേച്ചർ വാക്ക് വലിയ ഇഷ്‌ടമാണ്. അതുകൊണ്ടാണ് എന്നെ നിങ്ങൾ സ്‌നീക്കേഴ്‌സ് ധരിച്ച് മിക്കവാറും കാണുന്നത്.
സ്‌ത്രീകൾ ഭീരുക്കളാവുന്നത് എപ്പോഴാണ്?
സ്‌ത്രീകൾ എപ്പോഴും കരുത്തരായിരിക്കണം. കുടുംബത്തിന്‍റെയും, മറ്റു സ്‌ത്രീകളുടെയും സഹകരണം അവർക്ക് കൂടുതൽ കരുത്ത് നൽകുന്നു. സ്വന്തം ഉന്നതി, സന്തോഷം, സാമ്പത്തിക സ്വാതന്ത്യ്രം ഇവയ്‌ക്കായി ഇന്‍റർനെറ്റ് ഉപയോഗിക്കാൻ പഠിക്കണം. അതിലൂടെ അവർ കൂടുതൽ കരുത്തരും, സ്വാശ്രയ ശീലമുള്ളവരും ആയി മാറും.
ഭയം തോന്നിയിട്ടുണ്ടോ?
ആകെ ഭയപ്പെടുത്തിയിട്ടുള്ള കാര്യം അനാരോഗ്യം മാത്രമാണ്. മാനസികവും ശാരീരികവുമായ ആരോഗ്യം നാം സൂക്ഷിക്കണം. അതാണ് ശരിയായ ധനം.
ഒരു നല്ല എന്‍റർപ്രണർ ആകാൻ എന്തൊക്കെ വേണം?
കഠിനാധ്വാനം, ഫോക്കസ്, ത്യാഗം, ലീഡർഷിപ്പ്, ക്രിയേറ്റിവിറ്റി തുടങ്ങിയ കാര്യങ്ങൾ വിജയകരമായ എന്‍റർപ്രണർഷിപ്പിന് അനിവാര്യമാണ്. മോശം സമയത്തും ദൃഢമായ മനസോടെ മുന്നേറുന്നതാണ് പരമപ്രധാനം. പരാജയപ്പെടുമ്പോൾ അതിൽ നിന്ന് എങ്ങനെ വിജയിക്കാമെന്ന പാഠവും പഠിക്കുന്നുണ്ട്.
താങ്കളുടെ ഏറ്റവും വലിയ ഭാഗ്യം?
അമ്മ. എന്‍റെ അമ്മ നല്ലൊരു ലീഡർ ആണ്. അമ്മ ഒരു സാധാരണ ഹൗസ്‌വൈഫ് ആയിട്ടും, എല്ലാ കാര്യവും എത്ര ഭംഗിയായി മാനേജ് ചെയ്യുമെന്നോ! ഷിറോസിന്‍റെ സൂപ്പർ യൂസർ ആണ് അമ്മ. ഇന്‍റർനെറ്റ് വളരെ ഭംഗിയായി ഉപയോഗിക്കും. ചിത്രങ്ങൾ, റെസിപ്പികൾ, കഥകൾ, ഇങ്ങനെ എല്ലാം സോഷ്യൽ മീഡിയയിൽ ഷെയർ ചെയ്യുന്നു. ഇതെല്ലാം അമ്മ ചെയ്യുന്നതു കണ്ടിട്ടാണ് എനിക്ക് പ്രചോദനം ലഭിക്കുന്നത്. ഷിറോസിൽ ഇപ്പോൾ 16 ദശലക്ഷം അംഗങ്ങളുണ്ട്. എന്‍റെ അമ്മയെപ്പോലെ നിരവധി സ്‌ത്രീകൾ ഈ പ്ലാറ്റ്‌ഫോം വിജയകരമായി ഉപയോഗിക്കുന്നത് കാണുന്നതാണ് എന്‍റെ ഏറ്റവും വലിയ സന്തോഷവും ഭാഗ്യവും!
