ലോക്ഡൗണും രോഗഭീതിയും ഒഴിയാൻ ഇനിയും മാസങ്ങൾ എടുത്തേ ക്കാമെന്നിരിക്കെ, ഗതാഗത സംവിധാനങ്ങൾ സുരക്ഷിതമായി ഉപയോഗിക്കാമോ എന്ന് ചോദ്യം ഇനിയും ബാക്കിയാണ്. തീർച്ചയായും പൊതുഗതാഗത സംവിധാനം ഉപയോഗിക്കാം. പക്ഷേ സുരക്ഷിതത്വ മാനദണ്ഡങ്ങൾ കൃത്യമായി പാലിക്കാൻ കഴിയുമെന്ന് ആത്മവിശ്വാസമുള്ളവർക്ക് മാത്രം.
ജോലിക്ക് പോകുന്ന മിക്ക സ്ത്രീകളെ സംബന്ധിച്ചും പൊതുഗതാഗതമായിരുന്നു ഇന്നലെ വരെ ഏറ്റവും വലിയ യാത്രാമാർഗം. എന്നാൽ ഇപ്പോൾ സ്വന്തം വാഹനം ഉപയോഗിക്കുന്നതാണ് കൂടുതൽ സുരക്ഷിതം എന്ന് വ്യക്‌തമാണ്. അതിനാൽ ഡ്രൈവിംഗ് പഠിക്കുകയും സ്വയം വാഹനമോടിക്കാൻ ശീലിക്കുകയും ചെയ്യേണ്ടത് ആവശ്യമാണ്.
സ്ത്രീകൾക്ക് ഡ്രൈവിംഗും വണ്ടിയും വഴങ്ങുകയില്ല എന്നാണ് പൊതുവേയുള്ള ധാരണ.
വണ്ടി വാങ്ങാനോ അത് ഉപയോഗിക്കാനോ പുരുഷന്മാരുടെ അത്രയും താൽപര്യം സ്ത്രീകൾക്ക് കാണിക്കാത്തതുകൊണ്ടാവും സ്ത്രീകൾക്ക് വാഹനമോടിക്കാൻ കഴിയില്ല എന്ന തെറ്റിദ്ധാരണ ഉണ്ടാകാനുള്ള കാരണം. സ്ത്രീകൾ നല്ല ഡ്രൈവർമാരല്ല എന്ന ഈ ചിന്തയുള്ളതിനാലാണ് അവർ വാഹനമോടിക്കുമ്പോൾ ആളുകൾ തുറിച്ചുനോക്കാനും കമന്‍റ് ചെയ്യാനും ശ്രമിക്കുന്നത്.
സ്ത്രീകൾക്ക് വാഹനങ്ങളെക്കുറിച്ച് അറിയില്ല എന്ന് ആളുകൾ ചിന്തിക്കുന്നുണ്ടെങ്കിലും ഓട്ടോ എക്സ്പോയുടെ പവലിയനിൽ സ്ത്രീകളുടെ സാന്നിദ്ധ്യം വർദ്ധിച്ചുവരുന്നത് ശ്രദ്ധിക്കേണ്ടതാണ്. മഹിളകൾ വിമാനവും ഓടിക്കുന്ന കാലത്ത് സ്ക്കൂട്ടറും കാറുമൊക്കെ സാധാരണ കാര്യമാണ്.
വണ്ടികൾ വർക്കിംഗ് വുമണിനു മാത്രമല്ല ഹൗസ് വൈഫുകൾക്കും ജീവതം എളുപ്പമാക്കും. ഓഫീസിൽ പോകാനും കുട്ടികളെ സ്ക്കൂളിലയക്കാനും മാർക്കറ്റിൽ ഒന്നുപോവാനും ആരെയും ആശ്രയിക്കേണ്ടിവരില്ലല്ലോ. വാഹനം ഓടിക്കാൻ വരുന്ന സ്ത്രീകളുടെ എണ്ണം വർദ്ധിച്ചതോടെ വുമൺ ഫ്രണ്ട്‍ലിയായ നിരവധി വാഹനങ്ങൾ പുറത്തിറക്കുകയാണ് വാഹന കമ്പനികൾ. സ്ത്രീകൾക്ക് ഫോക്കസ് ചെയ്യാവുന്ന ചില വാഹനങ്ങളും അവയുടെ സവിശേഷതകളും അറിയാം.
ഓട്ടോമാറ്റിക് ഗിയർബോക്സ്
മാരുതി സെലേറിയോ, ഹുണ്ടായ് ക്രീറ്റ, വർന, ടൊയോട്ടോ ഇന്നോവ ഇവയിലൊക്കെ ഓട്ടോമാറ്റിക് ഗിയർ സംവിധാനമുണ്ട്. ഡ്രൈവിംഗ് വളരെ എളുപ്പമാക്കി തീർക്കുന്ന സംവിധാനമാണ് ഓട്ടോമറ്റിക് ഗിയർ. സ്ത്രീകൾക്കിടയിൽ ഓട്ടോമാറ്റിക് ഗിയർ പ്രിയങ്കരമായത് അതുകൊണ്ടാണ്. ദിവസവും ഓഫീസിൽ പോകാൻ പ്രത്യേകിച്ചും നല്ല ട്രാഫിക് ഉള്ള നഗരങ്ങളിലേക്ക് ഗിയർ ലെസ് വാഹനങ്ങളാണ് ഉത്തമം.
ബ്ലൂടൂത്ത് സ്റ്റീരിയോ സിസ്റ്റം
റൈഡിനൊപ്പം മ്യൂസിക് ആസ്വദിക്കാൻ നല്ല രസമാണ്. ബ്ലൂടൂത്ത് സ്റ്റീരിയോ സിസ്റ്റം സ്ത്രീകൾക്ക് മാത്രമല്ല എല്ലാവർക്കും വളരെ ഇഷ്ടപ്പെടും. മാരുതിയുടെ ആൾട്ടോ, ഇഗ്നിസ് എന്നിവയിലും ബ്ലൂടൂത്ത് സ്റ്റീരിയോ സൗകര്യം ലഭ്യമാണ്. കൂടാതെ ഫോൺ വന്നാലും ഇതുവഴി കണക്ട് ചെയ്ത് അപകടമില്ലാതെ സംസാരിക്കാം.
റിയർ പാർക്കിംഗ് ക്യാമറ, ഓട്ടോമാറ്റിക് വൈപ്സ്
മഴക്കാലമെത്തിക്കഴിഞ്ഞാൽ വൈപ്പറുകൾ ഇടാതെ യാത്ര പറ്റില്ല. മഴത്തുള്ളി വിന്‍റ് സ്ക്രീനിൽ വീണാൽവൈപ്സ് സ്വയം ചലിക്കുന്ന സംവിധാനമുണ്ട്. ഒപ്പം തന്നെ റിയർ പാർക്കിംഗ് ക്യാമറ വനിതകൾക്ക് ഒത്തിരി ഉപകാരപ്രദമാകും. ഡ്രൈവിംഗ് എത്രമാത്രം ഈസി ആകുന്നോ അത്രയും ആസ്വാദ്യകരമാകും. മഴക്കാലത്ത് വിന്‍റ് സ്ക്രീൻ ക്ലിയർ ചെയ്യാൻ മാനുവലി വൈപ്പേഴ്സ് ഓൺ ചെയ്ത് ഓഫ് ആക്കിക്കൊണ്ടിരിക്കുന്നത് അത്ര സുഖകരമാകില്ല. അതിനാൽ ഓട്ടോമാറ്റിക് വൈപ്പേഴ്സ് തെരഞ്ഞെടുക്കുക.
