തൈറോയിഡ് പ്രശ്നങ്ങൾ ഉണ്ടാകുന്നത് ഇപ്പോൾ വളരെ സാധാരമായിരിക്കുന്നു. ലോകമെമ്പാടും 200 ദശലക്ഷം പേർ തൈറോയിഡ് രോഗങ്ങൾ അനുഭവിക്കുന്നവരാണ്. നാഷണൽ സെന്‍റർ ഫോർ ബയോടെക്നോളജി ഇൻഫർമേഷൻ അനുസരിച്ച് ഇന്ത്യയിൽ ഏകദേശം 42 ദശലക്ഷം പേർ തൈറോയിഡ് പ്രശ്നം നേരിടുന്നു. ഇതിൽ 60 % പേരും സ്ത്രീകളാണ്. ഇന്ത്യയിൽ 8 സ്ത്രീകളിൽ ഒരാൾക്ക് തൈറോയ്ഡ് പ്രശ്നം ഉണ്ട്.
എന്താണ് തൈറോയ്ഡ് പ്രശ്നം
തൈറോയ്ഡ് ഗ്ലാൻഡ് കഴുത്തിൽ ഒരു പൂമ്പാറ്റയുടെ ആകൃതിയിലാണ് സ്‌ഥിതി ചെയ്യുന്നത്. ഹോർമോൺ ഉൽപാദിപ്പിച്ച് ശരീരത്തിന്‍റെ വിവിധ ഭാഗങ്ങളുടെ പ്രവർത്തനം കാര്യക്ഷമമാക്കുന്ന ജോലി നിർവഹിക്കുന്നത് ഈ ഗ്ലാൻഡ് ആണ്. ശരീരത്തിന്‍റെ മെറ്റബോളിസം നിരക്ക്, ഹൃദയ സംബന്ധവും ദഹന സംബന്ധവുമായ പ്രവർത്തനം, മസ്തിഷ്ക വികാസം, മാംസപേശികളുടെയും എല്ലുകളുടെയും ശക്തി ഇതൊക്കെ സാധ്യമാക്കുന്ന അപാരശക്തി കേന്ദ്രം തന്നെയാണ് ഈ ഗ്രന്ഥി.
എന്തുകൊണ്ട് സ്ത്രീകൾക്ക്
തൈറോയ്ഡ് പ്രശ്നങ്ങൾ കൂടുതലായും സ്ത്രീകളിലാണ് കണ്ടുവരുന്നതെന്ന് പറഞ്ഞുവല്ലോ. അത് നിരവധി സങ്കീർണ്ണതകൾ ഉണ്ടാക്കുന്നുണ്ട് എന്നും വ്യക്‌തമാണ്. പ്രതിരോധശേഷിയെയും ഇത് ബാധിക്കുന്നുണ്ട്. തൈറോയിഡ് ഗ്രന്ഥിയുടെ പിഴവു കൊണ്ട് ഓട്ടോ ഇമ്യൂൺ ഡിസീസ്, ഡയബറ്റീസ് മാലിറ്റസ് ടൈപ്പ്, ഇൻഫ്ളമേറ്ററി ബേവൽ ഡിസീസ്, മൾട്ടിപ്പിൾ സെക്റോസിസ്, റ്യൂമറ്റോയ്ഡ് ആർത്രൈറ്റീസ് എന്നിവയൊക്കെ സ്ത്രീകളിൽ കണ്ടുവരുന്നു.
ലക്ഷണങ്ങൾ
ഹൈപ്പോതൈറോയിഡിസം, തൈറോയിഡിറ്റിസ്, തൈറോയിഡ് കാൻസർ തുടങ്ങിയ പ്രശ്നങ്ങൾ സ്ത്രീകളിലും പുരുഷന്മാരിലും കണ്ടുവരുന്നുണ്ട്. തൈറോയിഡ് ഗ്രന്ഥിയുടെ പ്രവർത്തനം കുറയുന്ന അവസ്‌ഥയാണ് ഹൈപ്പോതൈറോയിഡിസം. അതോടെ ഹോർമോൺ ഉൽപാദനവും കുറയുന്നു. അതോടെ മെറ്റബോളിസത്തിന്‍റെ സന്തുലിനവും നഷ്ടമാകുന്നു.
സ്ത്രീകളിൽ ഹൈപ്പോതൈറോയിഡിസിന്‍റെ ഏറ്റവും പ്രധാന കാരണങ്ങളിലൊന്നാണ് ഓട്ടോ ഇമ്യൂൺ ഡിസീസ്. ശരീരത്തിലെ ആന്‍റി ബോഡികൾ തൈറോയിഡിനെ ലക്ഷ്യം വച്ച് പ്രവർത്തിക്കുകയും, അതോടെ തൈറോഡിലെ ഹോർമോൺ ഉൽപാദനം ക്രമേണ കാര്യക്ഷമമല്ലാതാവുകയും ചെയ്യുന്നു.
പത്ത് സ്ത്രീകളിൽ ഒരാൾക്ക് എന്ന നിരക്കിൽ ഹൈപ്പോതൈറോയിഡിസം ഉണ്ട് എന്നാണ് കണക്കുകൾ. ഹൈപ്പോതൈറോയിഡിസം ഉണ്ടാകുന്നവരിൽ ഹോർമോൺ ഉൽപാദനം ക്രമാതീതമായി മാറുകയും ശരീരത്തിന്‍റെ പ്രവർത്തനം താളം തെറ്റുകയും ചെയ്യുന്നു. തൈറോയിഡ് ഗ്രന്ഥി വലുതാക്കുകയും ചെയ്യും. അവിചാരിതമായി ഭാരം കുറയുക, ഹൃദയമിടിപ്പ് ക്രമം തെറ്റുക തുടങ്ങിയ ലക്ഷണങ്ങൾ ഉണ്ടെങ്കിൽ ഹൈപ്പോതൈറോയിഡിസം ഉണ്ടോ എന്ന് പരിശോധിക്കേണ്ടതുണ്ട്.
തൈറോയിഡ് പ്രശ്നങ്ങൾക്ക് പൊതുവായ ലക്ഷണങ്ങൾ പറയാൻ കഴിയില്ല. പക്ഷേ ഇതിന്‍റെ പേരിൽ വന്ധ്യത, ലിപിഡ് ഡിസോർഡർ, അനീമിയ, ഡിപ്രഷൻ ഇതൊക്കെ ഉണ്ടാകാം. ക്ഷീണം, വരണ്ട ചർമ്മം, മാംസപേശികൾക്ക് വേദന, തണുപ്പും ചൂടും സഹിക്കാൻ കഴിയാതെ വരിക, വീർത്തു തൂങ്ങിയ കൺപോളകൾ, മാസമുറ ക്രമം തെറ്റുക, അമിതഭാരം, ഭാരക്കുറവ്, ഭയം, ഉറങ്ങാൻ പ്രയാസം, ക്രമം തെറ്റിയ ഹൃദയമിടിപ്പ്, വിശപ്പ് കൂടുക, വയറിന്‍റെ പ്രശ്നങ്ങൾ ഇങ്ങനെ എന്തു അവസ്‌ഥകൾക്കു പിന്നിലും തൈറോയിഡ് പ്രശ്നം ഉണ്ടാകാമെന്ന് കരുതേണ്ടതുണ്ട്.
പാരമ്പര്യം, ഓട്ടോ ഇമ്മ്യൂൺ സിസ്റ്റം കഴുത്തിലെ റേഡിയേഷൻ തൈറോയിഡിലുണ്ടായ സർജറി ഇതെല്ലാം കൊണ്ട് തൈറോയിഡ് ഗ്രന്ഥി തകരാറിലാവാൻ സാധ്യതയുണ്ട്. ഒരു ജീവിതശൈലി രോഗമായും തൈറോയിഡിനെ കാണാൻ പറ്റും. ശരീരത്തിൽ അയഡിൻ കുറഞ്ഞാൽ തൈറോയിഡ് രോഗങ്ങൾ ഉണ്ടാകാം.
