പ്രായത്തിനനുസരിച്ച് ആവശ്യമുള്ളത്ര ശരീരഭാരം ഇല്ലാത്തവർ, ജീവിതശൈലിയിൽ മാറ്റം വരുത്തുമ്പോൾ നല്ല മാറ്റം സംഭവിക്കും. ഉദാഹരണത്തിന് നിത്യേന ഒരേ വ്യായാമം ചെയ്യുന്നത് ശരീരത്തിന് കാര്യമായ ഗുണം ചെയ്യില്ല.
മെലിഞ്ഞ ശരീരം ചിലരെ സംബന്ധിച്ച് വളരെ വിഷമിപ്പിക്കുന്ന സംഗതിയാണ്. എന്തു കഴിച്ചാലും ശരീരത്തിൽ കാണാൻ പാകത്തിന് ഒന്നുമുണ്ടാകില്ല എന്ന അവസ്‌ഥ. ഒരു വ്യക്‌തിയുടെ പ്രായത്തിനും ഉയരത്തിനും അനുസരിച്ചുള്ള ഭാരം ആ വ്യക്‌തിക്ക് ഉണ്ടായില്ലെങ്കിൽ തീർച്ചയായും ശ്രദ്ധിക്കണം. പക്ഷേ മറ്റു രോഗാവസ്‌ഥകളൊന്നുമില്ലാതെ ശരീരം മെലിഞ്ഞിരിക്കുന്നതിനെ അത്ര കാര്യമാക്കേണ്ടതില്ല എന്നാണ് ആരോഗ്യ വിദഗ്ദ്ധർ പറയുന്നത്.
എന്തൊക്കെ പറഞ്ഞാലും നല്ലൊരു വസ്ത്രം ധരിക്കുമ്പോൾ ഭംഗി കിട്ടാൻ, ആളുകൾക്കിടയിൽ പോകുമ്പോൾ പരിഹാസത്തിന ഇരയാകാതിരിക്കാനൊക്കെ കുറച്ചു ശരീരം വേണമെന്ന് തോന്നുന്നത് തെറ്റല്ല. തടി വയ്ക്കാനായി മരുന്നു കഴിക്കുകയും ഹെൽത്ത് സപ്ലിമെന്‍റുകൾ ഉപയോഗിക്കുകയും ചെയ്യാറുണ്ട്. എന്നിട്ടും ശരീരം നന്നാവാത്തവരുണ്ട്. മെലിഞ്ഞ ശരീരം മൂലം ഉണ്ടാകുന്ന കോംപ്ലക്സുകളും ചില്ലറയല്ല. സ്കൂളിലും കോളേജിലും ഓഫീസിലും ഒക്കെ പോകുമ്പോൾ ലജ്ജ തോന്നുന്നവരുണ്ട്. ആനയെ പോലെ തിന്നാലും ആടു പോലെ ഇരിക്കുന്നു എന്ന പരിഹാസം കേട്ടു മടുത്തിട്ടുണ്ടെങ്കിൽ ചില കാര്യങ്ങൾ കൂടി നിങ്ങൾ ശ്രദ്ധിക്കണം.
എന്തുകൊണ്ട് ഇങ്ങനെ?
ശരീരഭാരം കുറയുന്നത് ആരോഗ്യമില്ലാത്ത അവസ്‌ഥ ഉണ്ടാകുന്നതിന് പല കാരണങ്ങളുണ്ട്. ചില തെറ്റായ ജീവിതശൈലിയും ഇതിന്‍റെ കാരണമായി വന്നേക്കാം. ഈ ശീലങ്ങൾ ശരീരത്തിന്‍റെ പുറത്തും അകത്തും പ്രയാസങ്ങൾ ഉണ്ടാകാം. വളരെയധികം ഭക്ഷണം കഴിച്ചിട്ടും ശരീരം നന്നാവുന്നില്ല എങ്കിൽ, താഴെ പറയുന്ന തെറ്റായ രീതികൾ ജീവിതശൈലിയിൽ ഉൾപ്പെട്ടിട്ടുണ്ടോ എന്ന് പരിശോധിക്കുന്നത് നന്നായിരിക്കും.
വിശക്കുമ്പോൾ ഭക്ഷിക്കാതിരിക്കൽ
തിരക്കിട്ട ജീവിതമാണ് പലർക്കും. സമയം ഷെഡ്യൂൾ ചെയ്യുന്നതിന്‍റെ അപാകത കൊണ്ട് യഥാസമയം ഭക്ഷണം കഴിക്കാൻ പറ്റാതെ വരുന്നു. ഇങ്ങനെ പതിവായി ചെയ്താൽ ആരോഗ്യം മോശമായി ബാധിക്കുന്നു. തുടർച്ചയായി ഈ രീതി ഉണ്ടാകുമ്പോൾ വിശപ്പ് കുറഞ്ഞു വരികയും ചെയ്യും. വിശക്കുമ്പോൾ ഭക്ഷണം കഴിക്കാതെയിരുന്നാൽ ശരീരത്തിൽ വിപരീതഫലമാണ് ഉളവാക്കുക.
നിത്യേന ഒരേതരം വ്യായാമം
ഫിറ്റായിരിക്കാനും ശരീരഭാരം വർദ്ധിപ്പിക്കാനും നിത്യേന വ്യായാമം ചെയ്യേണ്ടത് അത്യാവശ്യമാണ്. മൈതാനത്തിലോ പാർക്കിലോ നടക്കുന്നതും ചാടുന്നതുമൊക്കെ ആരോഗ്യം മികച്ചതാക്കും. ഇതിനു പകരം പലരും ജിം ആണ് തെരഞ്ഞെടുക്കുന്നത്.
ബോഡി ക്രിയേറ്റ് ചെയ്യാനായി മരുന്നുകളും സപ്ലിമെന്‍റുകളും എടുക്കുകയും ഇവ മസിലുകളുടെ വളർച്ചയെ ഒട്ടൊക്കെ സഹായിക്കുകയും ചെയ്യുന്നു. പക്ഷേ തുടർന്ന് ഇതിന് സൈഡ് ഇഫക്ടുകൾ ഉണ്ടാകാനും സാധ്യതയുണ്ട്. മറ്റുള്ളവർ ചെയ്യുന്നതു പോലെ ബോഡി ബിൽഡിംഗ് നോക്കി കണ്ടു മനസിലാക്കി ദിവസവും അതേ രീതി പിന്തുടരുന്നവരുണ്ട്. ഇത് ശരിയായ ആരോഗ്യ പരിപാലന രീതിയല്ല.
ജിമ്മിൽ പോയി നിത്യേന ഒരേതരം വ്യായാമം ചെയ്‌തു കൊണ്ടിരിക്കുന്നത് ശരീര ഭാഗങ്ങളെ ദുർബലമാക്കുകയാണ് ചെയ്യുന്നത്. ഇനി ജിമ്മിലെ വ്യായാമങ്ങളാണ് ചെയ്യുന്നതെങ്കിൽ മികച്ച ട്രെയിനറുടെ സഹായം തേടണം. ഓരോ വ്യക്‌തിയുടെ ശരീരപ്രകൃതിക്കനുസരിച്ചുള്ള വ്യായാമം ട്രെയിനർക്ക് പറഞ്ഞു തരാൻ കഴിയും. ആഴ്ചയിൽ 6 ദിവസവും വ്യത്യസ്തമായ വ്യായാമങ്ങളാണ് ചെയ്യേണ്ടത്. ട്രെയിനറുടെ നിർദ്ദേശങ്ങൾ പാലിച്ചു കൊണ്ട് വ്യായാമം പതിവായി ചെയ്താൽ ശരീരത്തിന്‍റെ ആകൃതിയും ഭാരവും അനുയോജ്യമായ വിധം വികസിക്കുകയും ചെയ്യും.
