ഗാർലിക് റൈസ്
ചേരുവകൾ
അരി - ഒരു കപ്പ്
വെളുത്തുള്ളി- 5-6 അല്ലി
ഇഞ്ചി അരിഞ്ഞത്- അര ചെറിയ സ്‌പൂൺ
സവാള നീളത്തിൽ അരിഞ്ഞത് അൽപ്പം
ഉള്ളി തണ്ട്- 2 എണ്ണം
സോയ സോസ്- അര ചെറിയ സ്‌പൂൺ
വിനഗർ- 4 തുള്ളി
ടൊമാറ്റോ സോസ്- 2 ചെറിയ സ്‌പൂൺ
ഗ്രീൻ ചില്ലി സോസ്- അര ചെറിയ സ്‌പൂൺ
വറ്റൽ മുളക്- ഒന്ന്
എണ്ണ- ഒരു ചെറിയ സ്‌പൂൺ
കോൺഫ്ളോർ- 3 ചെറിയ സ്‌പൂൺ
ഉപ്പ്- ആവശ്യത്തിന്
തയ്യാറാക്കുന്ന വിധം
അരി വെള്ളത്തിലിട്ട് അരമണിക്കൂർ നേരം കുതിർക്കുക. ശേഷം പാനിൽ അരിയും 5 കപ്പ് വെള്ളവും ചേർത്ത് തിളപ്പിക്കുക. വെള്ളം തിളച്ച് തുടങ്ങുമ്പോൾ അരി വേകും വരെ വേവിക്കുക. വെള്ളം വാർക്കുക. ഫ്രൈയിംഗ് പാനിൽ എണ്ണയൊഴിച്ച് ചൂടാക്കി ഇഞ്ചി, വെളുത്തുള്ളി പേസ്‌റ്റ് ഇട്ട് വഴറ്റുക. ഇതിനിടെ ഒരു ഗ്ലാസ് വെള്ളത്തിൽ വറ്റൽ മുളകിട്ട് വയ്ക്കുക. ഇഞ്ചി വെളുത്തുള്ളി പേസ്‌റ്റ് നന്നായി ഗോൾഡൻ നിറമാകുമ്പോൾ മുളകിട്ട് വെള്ളം അതിലേക്ക് ഒഴിക്കുക. ഇത് നല്ലവണ്ണം തിളച്ച് വരുമ്പോൾ സോയാ സോസ്, വിനേഗർ, ടൊമാറ്റോ സോസ്, ഗ്രീൻ ചില്ലി സോസ്, ഉപ്പ് ചേർക്കുക. കുറച്ച് വെള്ളത്തിൽ കോൺ ഫ്ളോർ കലക്കി അൽപ്പാൽപമായി അതിൽ ഒഴിച്ച് നിർത്താതെ ഇളക്കുക. സോസ് കട്ടിയാവുമ്പോൾ ഗ്യാസ് ഓഫാക്കുക. ഈ സോസ് വേവിച്ചു വച്ച ചോറിൽ ചേർത്ത് ഉള്ളിതണ്ട് അരിഞ്ഞത് വച്ച് അലങ്കരിച്ച് സർവ്വ് ചെയ്യുക.
ബേസനി ക്യാപ്‌സിക്കം
കടലമാവു ചേർന്നുള്ള രുചിയൂറും ഒരു വ്യത്യസ്ത വിഭവം. എളുപ്പത്തിൽ ഈസിയായി തയ്യാറാക്കാം. കുട്ടികൾക്ക് ഈ ഡിഫറന്‍റ് ടേസ്‌റ്റ് ഇഷ്പ്പെടും.
ചേരുവകൾ
കടലമാവ്- അര കപ്പ്
സവാള- 2 എണ്ണം അരിഞ്ഞത്
ക്യാപ്‌സിക്കം- 2 എണ്ണം അരിഞ്ഞത്
മുളകുപൊടി- ഒരു ചെറിയ സ്‌പൂൺ
മഞ്ഞൾപ്പൊടി- അര ചെറിയ സ്‌പൂൺ
എണ്ണ പാകം ചെയ്യാൻ ആവശ്യത്തിന്
മല്ലിയില്ല അരിഞ്ഞത്- അൽപ്പം
ഉപ്പ്- ആവശ്യത്തിന്
തയ്യാറാക്കുന്ന വിധം
പാനിൽ എണ്ണ ചൂടാക്കി ക്യാപ്‌സിക്കം വഴറ്റി മാറ്റി വയ്ക്കുക. കടലമാവ് ഇടഞ്ഞ് മാറ്റി വയ്ക്കുക. ചീനച്ചട്ടിയിൽ എണ്ണ ചൂടാക്കി സവാള ഗോൾഡൻ നിറമാകും വരെ വഴറ്റുക. ഇനി ഇതിൽ മുഴുവൻ മസാലകളും കടലമാവും ക്യാപ്സിക്കവും ചേർത്ത് 2 മിനിറ്റ് നേരം വരെ പാകം ചെയ്യുക. മല്ലിയില കൊണ്ട് ഗാർണിഷ് ചെയ്ത് സർവ്വ് ചെയ്യാം.
ട്രൂഫൽ പുഡിംഗ്
ചേരുവകൾ
സ്പോഞ്ച് കേക്ക്- ആവശ്യത്തിന്
വിപ്പിംഗ് ക്രീം, വാഴപ്പഴം, അനാർ, ആപ്പിൾ, മുന്തിരി, ചിക്കു എന്നിവ മുറിച്ചത് - ഒരു കപ്പ്
വാനില കസ്‌റ്റാർഡ് പൗഡർ- അൽപ്പം
മഞ്ഞ, ചുവപ്പ് ഫുഡ് കളർ- അൽപ്പം
പാൽ- ഒരു ഗ്ലാസ്
തേൻ അല്ലെങ്കിൽ പഞ്ചസാര- ആവശ്യത്തിന്
തയ്യാറാക്കുന്ന വിധം
പാലിൽ നിന്നും 3-4 ചെറിയ സ്‌പൂൺ പാൽ ഒരു പാത്രത്തിൽ ഒഴിക്കുക. ബാക്കി പാൽ ഒരു ഫ്രൈയിംഗ് പാനിൽ ഒഴിച്ച് തിളപ്പിക്കുക. പാൽ തിളച്ച് തുടങ്ങുമ്പോൾ തീ കുറയ്ക്കുക. കസ്‌റ്റാർഡ് പൗഡർ മാറ്റി വച്ച പാലിൽ ചേർത്ത ശേഷം ചൂടാക്കിയ പാലിൽ ചേർക്കാം. 5 മിനിറ്റ് നേരം പാകം ചെയ്ത ശേഷം തണുപ്പിക്കുക. വിപ്പിംഗ് ക്രീം ഓരോ ഭാഗങ്ങളായി എടുത്ത് നിറങ്ങൾ ചേർത്ത് പ്രത്യേകം ബീറ്റ് ചെയ്യുക. ഒരു സർവ്വിംഗ് ബൗളിൽ സ്പോഞ്ച് കേക്കിന്‍റെ കഷണങ്ങൾ വയ്ക്കുക. മുകളിൽ ഫ്രൂട്ട്സ് വച്ച് അലങ്കരിച്ച് കസ്‌റ്റാർഡ് ഒഴിക്കുക. ശേഷം വ്യത്യസ്ത നിറങ്ങളിലുള്ള വിപ്പിംഗ് ക്രീം കൊണ്ട് അലങ്കരിച്ച് ഫ്രിഡ്‌ജിൽ വച്ച് തണുപ്പിച്ച് സർവ്വ് ചെയ്യാം.
