ഒരു കുടുംബത്തിലെ ആഹാര ശീലങ്ങളിൽ ഉൾപ്പെടുന്നതിന്‍റെയെല്ലാം ബഡ്ജറ്റ് പ്ലാൻ ചെയ്യുക എന്നത് ശ്രമകരമായ ജോലിയാണ്. നിത്യോപയോഗ സാധനങ്ങളുടെ വില കുതിച്ചുയരുമ്പോൾ ഇതെല്ലാം താളം തെറ്റുന്നു. വീട്ടിലെ എല്ലാ അംഗങ്ങളുടേയും ഇഷ്‌ടത്തിനും സംതൃപ്തിക്കും അനുസരിച്ച് ഭക്ഷണം പാകം ചെയ്തു വരുമ്പോഴേക്കും മറ്റു പല ആവശ്യങ്ങൾക്കും പൈസ തികയാതെ വരും. ആരോഗ്യത്തിന്‍റെ കാര്യമായതു കൊണ്ട് ആഹാരം ഒഴിവാക്കാനും സാധ്യമല്ല. എന്നാൽ കൃത്യമായ വീക്ഷണങ്ങളോടെ മുൻകൂട്ടി ചില തീരുമാനങ്ങളെടുത്താൽ ഭക്ഷണം പാകം ചെയ്യുന്നതിലുണ്ടാകുന്ന അനാവശ്യ ചെലവുകൾ ഒഴിവാക്കാം.
താരതമ്യ പഠനം
ഒരേ കമ്പനിയുടെ ഉൽപന്നങ്ങൾ മാത്രമേ വാങ്ങിക്കുകയുള്ളൂ എന്ന കടുത്ത തീരുമാനങ്ങൾ എടുക്കരുത്. കമ്പനികൾ പരസ്പരം മത്സരിക്കുന്നത് കൊണ്ട് വില കുറയാൻ സാധ്യതയുണ്ട്. മാർക്കറ്റിൽ ചെന്ന് സാധനങ്ങളുടെ വിലയെ താരതമ്യപ്പെടുത്തി നോക്കാം. വിലപേശാവുന്ന ഇടങ്ങളിൽ ചിന്തിച്ച് പ്രവർത്തിക്കുക.
ആവശ്യം തിരിച്ചറിയുക
പലപ്പോഴും നമ്മൾ സാധനങ്ങൾ ആവശ്യമുള്ളതിലധികം അളവിൽ വാങ്ങി വച്ച് പിന്നീട് ഉപയോഗിക്കാനാകാതെ എടുത്തു കളയുകയാണ് പതിവ്. ഇത്തരം ശീലങ്ങൾ ഒഴിവാക്കി നമ്മുടെ വീട്ടിലേക്ക് അത്യാവശ്യം വേണ്ടത് മാത്രം വാങ്ങുക. മിതമായ അളവിൽ കുറേശേ വാങ്ങി ഉപയോഗിക്കുന്നതാണ് നല്ലത്. ആഴ്ചതോറും മാർക്കറ്റിലെ വില നിലവാരത്തിൽ വ്യത്യാസം വരാറുള്ളത് കൊണ്ട് കൂടുതൽ സാധനങ്ങൾ വാങ്ങി ശേഖരിച്ചു വയ്‌ക്കരുത്.
പട്ടിക തയ്യാറാക്കുക
ഏറ്റവും അത്യാവശ്യമുള്ളതിന്‍റെ ഒരു പട്ടിക തയ്യാറാക്കുക. ഇത് ഒരുപാട് സാധനങ്ങൾ പിന്നീട് ഉപയോഗിക്കാമെന്നു കരുതി വാങ്ങുന്ന ശീലം ഇല്ലാതെയാക്കും. നിരവധി ഉൽപ്പന്നങ്ങൾ പട്ടികയിൽ നിന്നും ഒഴിവാക്കാം. ഓരോന്നും എഴുതുന്ന സമയത്ത് സ്വയം ആലോചിക്കുക ഇത് അത്ര അത്യാവശ്യമാണോ എന്ന്. പട്ടിക തയ്യാറാക്കുന്നതിലൂടെ ആദ്യം വേണ്ട സാധനങ്ങൾ എന്തൊക്കെയാണെന്നുള്ള മുൻധാരണ കിട്ടുന്നു. ഇതിലൂടെ ഒരു മാസത്തെ അടുക്കളയിൽ ഒഴിവാക്കാനാവാത്തതെല്ലാം പെട്ടെന്ന് കണ്ടെത്താം.
സൂക്ഷിക്കേണ്ട വിധം
അടുക്കളയിലേക്ക് വാങ്ങി വച്ച സാധനങ്ങൾ ഭംഗിയായി സൂക്ഷിക്കുക. കേടുപാടുകളൊന്നും വരാതെ ഓരോ കാലാവസ്‌ഥയ്ക്കും അനുയോജ്യമായ രീതിയിൽ സൂക്ഷിക്കാനുള്ള സ്ഥലങ്ങൾ തെരഞ്ഞെടുക്കാം. അടുക്കും ചിട്ടയോടെയും വൃത്തിയോടെയും സൂക്ഷിക്കുന്നതിലൂടെ കേടുപാടുകൾ ഉണ്ടാകില്ല. വായു കടക്കാത്ത കണ്ടെയ്നറുകൾ, ഭരണികൾ, അടച്ചുറപ്പുള്ള മരപ്പെട്ടികൾ, ഫൈബർ പാത്രങ്ങൾ എന്നിവ തെരഞ്ഞെടുക്കാം. മസാലക്കൂട്ടുകളും മറ്റും ഫ്രിഡ്ജിൽ വയ്‌ക്കുന്നതാണ് നല്ലത്. പച്ചക്കറികളും ഫ്രിഡ്ജിൽ തന്നെ സൂക്ഷിക്കാം.
അടുക്കളത്തോട്ടം
ചെറിയ രീതിയിൽ അടുക്കളത്തോട്ടം ഉണ്ടെങ്കിൽ പെട്ടെന്നുള്ള ആവശ്യത്തിന് ഉപകരിക്കും. അത്യാവശ്യം നുറുങ്ങു കൃഷി പാഠങ്ങൾ കൂടി സ്വായത്തമാക്കി ചെറിയ തോതിൽ പച്ചക്കറി വിളവെടുപ്പും നടത്താം. ചീരയും കറിവേപ്പിലയും ഏത് കാലാവസ്‌ഥയ്ക്കും അനുയോജ്യമാണ്. ഇങ്ങനെ അടുക്കള ചെലവിൽ ഗണ്യമായ മാറ്റം വരുത്താം.
ഹോം മെയ്ഡ്
അച്ചാറുകൾ, ചമ്മന്തിപ്പൊടികൾ, പപ്പടം, തൈര്, പനീർ ഇതുപോലുള്ളവ വീടുകളിൽ തന്നെ ഉണ്ടാക്കി പരിശീലിക്കുക. ഇത് എപ്പോഴും കടയിൽ പോയി സാധനങ്ങൾ വാങ്ങുവാനുള്ള പ്രേരണ കുറയ്ക്കും.
ഉള്ളതു കൊണ്ട് ഓണം പോലെ
ചെറിയ ചെറിയ കറിക്കൂട്ടുകളും പൊടിക്കൈകളും പെട്ടെന്നുണ്ടാക്കാവുന്ന വിഭവങ്ങളും ഇടവിട്ട് പരീക്ഷിക്കാം. ഗ്യാസ് അധിക ചെലവില്ലാതെ തയ്യാറാക്കാവുന്ന സാലഡുകൾ, തൈരുപയോഗിച്ചുള്ള വിഭവങ്ങൾ, ചമ്മന്തികൾ എന്നിവയൊക്കെ ഉൾപ്പെടുത്തി കറിയുണ്ടാക്കാം. സമയവും ലാഭിക്കാം. സാധനങ്ങൾ പരമാവധി ഉപയോഗിച്ച് ചെറുകറികൾ ഉണ്ടാക്കുക. ഭക്ഷണ സാധനങ്ങൾ വേസ്റ്റ് ചെയ്യാതെ ഉപയോഗിക്കുക. വീട്ടിലെ അംഗങ്ങളുടെ അളവിനനു സരിച്ച് ആഹാരം പാകം ചെയ്യുക.
