നല്ല ക്ഷീണവും മൂഡ് ഓഫും ഉണ്ടെങ്കിൽ ഒരു കപ്പ് ചൂടൻ കട്ടൻ ചായ കുടിച്ചാൽ ഉണ്ടാകുന്ന ആശ്വാസവും സന്തോഷവും എത്രമാത്രമാണെന്ന് വിവരിക്കാനാവില്ല. ഞൊടിയിടനേരം കൊണ്ട് പുത്തനുണർവും ഉന്മേഷവും പ്രദാനം ചെയ്യുന്ന കട്ടൻ ചായയിലെ മാജിക് എന്താണ്? അറിയാം ചില ചായ വിശേഷങ്ങൾ.
ചായയുടെ ചരിത്രം
വളരെ പഴക്കം ചെന്ന ചരിത്രമാണ് ചായക്കുള്ളത്. ചൈനയിലാണ് ചായയുടെ കണ്ടുപിടിത്തം നടന്നത്. പിന്നീട് 6-ാം നൂറ്റാണ്ടിൽ ചൈനയിൽ നിന്നും ജപ്പാ നിലെത്തി. ജപ്പാനിൽ ചായ പ്രിയപ്പെട്ട പാനീയമായി മാറി. ഏഷ്യയിൽ 19-ാം നൂറ്റാണ്ടിലായിരുന്നു ചായയുടെ വരവ്. ഇന്ന് ഇന്ത്യയാണ് ചായയുടെ വലിയ ഉൽപാദകർ.
ചായ കൊണ്ടുള്ള പ്രയോജനങ്ങൾ
ഉന്മേഷം പകരുന്ന പാനീയമാണ് ചായ. ആന്റിഇൻഫ്ളമേറ്ററി, ആന്റി ബാക്ടീരിയൽ, ആന്റി ഡയബറ്റിക് ഗുണങ്ങളാൽ സമ്പുഷ്ടമാണ് ചായ. പൊട്ടാസ്യം അടക്കം ധാരാളം ധാതുക്കൾ അടങ്ങിയിട്ടുണ്ട്. ചായയിൽ അടങ്ങിയിരിക്കുന്ന കാറ്റ്ചിൻ, പോളിഫിനോൾ, ആന്റി ഓക്സിഡന്റ്സ് എന്നിവ ചായയെ പോഷക സമ്പന്നമാക്കുന്നു. ഇന്ത്യയിൽ കൗസാനി, നീലഗിരി റേഞ്ച് മേഖല, ഡാർജിലിംഗ്, അസം, ദക്ഷിണേന്ത്യയിലെ ചില ഭാഗങ്ങളിലുമാണ് തേയില കൃഷിയുള്ളത്.
ബ്ലാക്ക് ടീ
ഓക്സിഡേഷൻ പ്രക്രിയയിലൂടെയാണ് ബ്ലാക്ക് ടീ തയ്യാറാക്കുന്നത്. ഇതിൽ 50 മുതൽ 60 ശതമാനം കഫീൻ അടങ്ങിയിരിക്കും. ചായയുടെ ഏറ്റവും സാധാരണ വെറൈറ്റിയാണ് ബ്ലാക്ക് ടീ. ലോകത്ത് 70 ശതമാനം ആളുകൾ ബ്ലാക്ക് ടീ ഉപയോഗിക്കുന്നവരാണ്. ഇതിൽ പഞ്ചസാര വളരെ മിതമായി ചേർത്ത് കുടിക്കുന്നതാണ് ആരോഗ്യകരം.
ഗുണങ്ങൾ
ഹൃദ്രോഗ സാദ്ധ്യതയെ ഇത് വളരെയധികം കുറയ്ക്കുന്നു. രോമസുഷിരങ്ങളിൽ മുറുക്കം സൃഷ്ടിക്കാൻ ബ്ലാക്ക് ടീ ഉത്തമമാണ്. അതുപോലെ ചുവന്ന രക്താണുക്കളേയും അത് സംരക്ഷിക്കുന്നു.
ഒലോംഗ് ടീ
ചൈനീസ് ഭാഷയിൽ ഒലോംഗിന്റെ അർത്ഥം ബ്ലാക്ക് ഡ്രാഗൺ എന്നാണ്. ഗ്രീൻ ടീയിലും ബ്ലാക്ക് ടീയ്ക്കും ഇടയിൽ വരുന്ന അളവിലാണ് ഇതിൽ കഫീൻ കണ്ടന്റ് ഉള്ളത്. ഇതിന് അതിന്റേതായ സുഗന്ധമുണ്ട്. ഇത് ബ്ലാക്ക് ടീ പോലെയാണ് ഇരിക്കുന്നതെങ്കിലും ഇതിന്റെ ഫെർമന്റേഷൻ വളരെ കുറഞ്ഞ സമയം വരെയുണ്ടാകൂ. അതിനാൽ ഇതിന്റെ സ്വാദ് വളരെ നല്ലതാണ്. ഒലോംഗ് ടീയുടെ ഒരു കപ്പിൽ കഫീനിന്റെ അളവ് 30 മില്ലി ഗ്രാം വരെയുണ്ടാകും.
ഗുണങ്ങൾ
ശരീരഭാരം കുറയ്ക്കുന്നതിന് ഉത്തമമാണ്. അതുപോലെ ചർമ്മത്തിലുണ്ടാകുന്ന ഏജിംഗിനെ നിയന്ത്രിക്കും. കാൻസർ, ഹൃദ്രോഗം എന്നിവയെ തടയും.
ഗ്രീൻ ടീ
ഗ്രീൻ ടീയിൽ കേവലം 10 മുതൽ 30 ശതമാനം വരെ കഫീൻ അടങ്ങിയിട്ടുള്ളൂ. ടീയുടെ സ്വാദ് കൂട്ടാൻ നാരങ്ങാനീരോ പുദീനയിലയോ, തേനോ ചേർക്കാം. എന്നാൽ പഞ്ചസാര ചേർക്കാൻ പാടില്ല.
ഗുണങ്ങൾ
കാറ്റ്ചിൻ എന്ന പേരുള്ള ആന്റി ഓക്സിഡന്റിനാൽ സമ്പന്നമാണിത്. കാൻസർ, ഹൃദ്രോഗം തുടങ്ങിയ രോഗങ്ങളെ ഇത് ചെറുക്കും. ദിവസവും ഒരു കപ്പ് ഗ്രീൻ ടീ കുടിക്കുന്നത് കാർഡിയോ വാസ്ക്കുലർ ഡിസീസിനുള്ള സാദ്ധ്യത 10 ശതമാനം വരെ കുറയ്ക്കുമെന്നാണ് ഒരു പഠനം പറയുന്നത്. അതുപോലെ ശരീരഭാരം നിയന്ത്രിച്ച് നിലനിർത്തുന്നതിന് പകൽ സമയം 3 കപ്പ് ഗ്രീൻ ടീ നിർബന്ധമായും കുടിക്കണം. ചൈനയിലേയും ജപ്പാനിലേയും ഭൂരിഭാഗം പേരും ഗ്രീൻ ടീ കുടിക്കുന്നതു കൊണ്ട് അവിടെ ഹൃദ്രോഗവും കാൻസറും വളരെ കുറവായാണ് കണ്ടുവരുന്നത്.
മസാല ടീ
കുരുമുളക്, ഗ്രാമ്പൂ, ഏലയ്ക്ക, കറുവാപ്പട്ട എന്നിവ പൊടിച്ച് തയ്യാറാകുന്ന ചായയാണ് മസാല ടീ. അതിനായി മസാല നേരത്തെ തയ്യാറാക്കി വയ്ക്കും. ചായ തയ്യാറാക്കുമ്പോൾ മസാലയും കൂടി ചേർത്ത് കപ്പിലേക്ക് പകരും. മസാല ചേർക്കുന്നതിനാൽ എല്ലാ ഫ്ളേവറുകളുടെയും രുചിയും ഗുണവും ആസ്വദിക്കാം.
വൈറ്റ് ടീ
വളരെ കടുപ്പം കുറഞ്ഞ ഫ്ളേവറിലുള്ള ചായയാണിത്. വളരെ രുചികരമാണിത്. ഇതിന്റെ ഒരു കപ്പിൽ 15 മില്ലിഗ്രാം വരെ കഫീൻ അടങ്ങിയിട്ടുണ്ട്.
ഗുണങ്ങൾ
കാർഡിയോ വാസ്ക്കുലർ രോഗങ്ങളിൽ നിന്നും ഇത് സംരക്ഷിക്കും. അതുപോലെ കാൻസറിനെ ചെറുക്കാനും ഫലവത്താണിത്. എൽഡിഎൽ കൊളസ്ട്രോൾ കുറയ്ക്കുന്നതിൽ ഇത് മികച്ചതാണ്.
ഹെർബൽ ടീ
ചില ഡ്രൈ ഫ്രൂട്ടുകളും ഔഷധങ്ങളും (ഹെർബ്സ്) ചേർന്നതാണിത്. കഫീൻ അടങ്ങിയിട്ടില്ല. അതു പോലെ പഞ്ചസാര ചേർക്കേണ്ടതുമില്ല. ഇതിന് വേറിട്ട മണവും സ്വാദുമുണ്ട്.
ഗുണങ്ങൾ
ജേർണൽ ഓഫ് ന്യൂട്രിഷ്യനിൽ പ്രസിദ്ധീകരിച്ച ഒരു പഠനമനുസരിച്ച് ദിവസവും 2 മുതൽ 3 കപ്പ് ഹെർബൽ ടീ കുടിക്കുന്നത് ഹൈപ്പർ ടെൻഷൻ രോഗികൾക്ക് ബ്ലഡ് പ്രഷർ നിയന്ത്രിക്കുന്നതിന് നല്ലതാണ്. ഉന്മേഷവും നല്ലപോലെ പ്രദാനം ചെയ്യും.