വിശാലമായ പറമ്പും അതിലൊരു വീടും എന്ന സങ്കൽപം എന്നേ മലയാളി ഉപേക്ഷിച്ചു! ജോലി സംബന്ധമായും കുട്ടികളുടെ പഠന സൗകര്യാർത്ഥവും നഗരത്തിലേക്ക് ചേക്കേറുന്ന കുടുംബങ്ങളുടെ എണ്ണം നാൾക്കുനാൾ കൂടി വരുന്നു. പക്ഷ നഗരത്തിലായാലും സുരക്ഷിതവും സ്വച്ഛവുമായ അന്തരീക്ഷത്തിൽ പാർപ്പിടം വേണമെന്ന ആഗ്രഹം ശക്തമാണു താനും.
പട്ടണങ്ങൾ തോറും ഉയർന്നു വരുന്ന ഫ്ളാറ്റുകൾ എല്ലാവിധ സുഖസൗകര്യങ്ങളും വാഗ്ദാനം ചെയ്യുന്നു. അതുകൊണ്ട് വീട് എന്ന സങ്കൽപത്തെക്കുറിച്ച് ചിന്തിച്ച് വേവലാതിപ്പെടേണ്ട ആവശ്യമേ വരുന്നില്ലായെന്നതാണ് വസ്‌തുത. സ്വന്തം അഭിരുചിക്കും ബജറ്റിനും ഇണങ്ങുന്ന ഫ്ളാറ്റുകൾ തെരഞ്ഞെടുക്കുകയേ വേണ്ടൂ. സ്ഥലം വാങ്ങുക വീട് പണിയുക തുടങ്ങിയ അലച്ചിലുകളൊന്നും ബാധിക്കുന്നുമില്ല.
ഇനി കൈയിൽ രൊക്കം പണം എടുക്കാനില്ല എന്നു കരുതി ഇഷ്ടപ്പെട്ട വീട് നഷ്‌ടമാവുകയുമില്ല. പലതരം വായ്പാ പദ്ധതികൾ കെട്ടിട നിർമ്മാതാക്കൾ തന്നെ ഉപഭോക്താക്കൾക്കായി ആവിഷക്കരിക്കുന്നു. കൂടാതെ വിവിധ ബാങ്കുകളും ധനകാര്യ സ്‌ഥാപനങ്ങളും ഇപ്പോൾ ഉദാരമായ രീതിയിൽ വായ്പ അനുവദിക്കുന്നുണ്ട്. ഇതിന്‍റെ പലിശ നിരക്കുകളും മറ്റു തിരിച്ചടവുകൾ സംബന്ധമായ കാര്യങ്ങളും പ്രത്യേകം ചോദിച്ചറിയണം. അടിക്കടിയുണ്ടാകുന്ന വില വർദ്ധന കണക്കിലെടുത്താൽ വാങ്ങിയ വസ്‌തുവിൽ വർഷങ്ങൾ കഴിഞ്ഞാലും ലാഭം തന്നെയായിരിക്കുമെന്നതും പണം മുടക്കാൻ ആളുകളെ പ്രേരിപ്പിക്കുന്നു.
ആകർഷകമാക്കുന്നത്
പരസ്‌പര ആശ്രയത്വം, കുട്ടികളുടെ സൗഹൃദം, ഷോപ്പിംഗ് സൗകര്യം എന്നിവയെല്ലാം ഒരു കുടക്കീഴിൽ അണിനിരക്കുമ്പോൾ ആരും ആഹ്ളാദചിത്തരായിത്തീരും. ഇപ്പോൾ നടപ്പിലാക്കുന്ന പ്രൊജക്‌റ്റുകളിലെല്ലാം തന്നെ അത്യാധുനിക സൗകര്യങ്ങൾ ഉൾക്കൊള്ളിക്കാൻ ബിൽഡർമാർ മത്സരിച്ചു കൊണ്ടിരിക്കുന്നു.
ബയോഗ്യാസ്പ്ലാന്‍റ്, ഫുഡ് കോർട്ടുകൾ, ഫുൾ ബാക്ക്അപ് ജനറേറ്റർ, ഓഫീസ് സ്പേസ്, ക്ലബ് ഹൗസ്, മെയിഡ് സർവീസ്, കളിക്കളങ്ങൾ, ഓട്ടോമാറ്റിക് കാർവാഷ്, നീന്തൽക്കുളങ്ങൾ, കാർപാർക്കിംഗ് സൗകര്യം, സർവീസ് ലിഫ്റ്റ്, പൂന്തോട്ടം എന്നിങ്ങനെ നിരവധി സൗകര്യങ്ങളാണ് ഫ്ളാറ്റ് നിർമ്മാതാക്കൾ നടപ്പിലാക്കുന്നത്. കമ്മ്യൂണിറ്റി ലിവിംഗിന്‍റെ ഗുണങ്ങളും ഗ്രീൻ ബിൽഡിംഗിന്‍റെ മേന്മകളും ഒത്തിണങ്ങുന്ന ടൗൺഷിപ്പുകളായാണ് പുതുപുത്തൻ കെട്ടിടങ്ങൾ പടുത്തുയർത്തുന്നത്.
പിരിമുറുക്കങ്ങളിൽ നിന്നും ഒരു മോചനം ലഭിക്കത്തക്കവണ്ണം ശാരീരികവും മാനസികവുമായ ഉണർവ് ലഭിക്കുന്നയിടമായിരിക്കണം താമസസ്ഥലം. ഒറ്റപ്പെടലിന്‍റെ വിഷമതകൾ അറിയാത്ത കുട്ടികൾ, ഷോപ്പിംഗ് സൗകര്യം, ഓഫീസ്, സുരക്ഷിതത്വം എന്നിവയെല്ലാം ഇവിടെയുണ്ടാകും. കഠിനാദ്ധ്വാനത്തിലൂടെ ലഭിക്കുന്ന പണം ഉചിതമായ ഇടത്തു തന്നെ നിക്ഷേപിക്കാനായിരിക്കുമല്ലോ എല്ലാവരുടേയും താൽപര്യം. ഇപ്പറഞ്ഞ മുല്യങ്ങളെല്ലാം തിരിച്ചു നൽകുന്ന ടൗൺഷിപ്പുകളിൽ വീടു വാങ്ങാൻ ആരും മടിച്ചു നിൽക്കാറുമില്ല.
ഫ്ളാറ്റ് തെരഞ്ഞെടുക്കുമ്പോൾ
നിങ്ങളും ഒരു ഫ്ളാറ്റ് വാങ്ങാൻ ആഗ്രഹിക്കുന്നവരാണോ? എങ്കിൽ അതിനുമുമ്പ് ചില കാര്യങ്ങൾ തീർച്ചയായും അറിഞ്ഞിരിക്കേണ്ടതാണ്. സാധാരണ വീടും സ്ഥലവും വാങ്ങുമ്പോൾ ശ്രദ്ധിക്കേണ്ടതുപോലെ ആവശ്യമായ രേഖകളൊക്കെ ഫ്ളാറ്റിനും വേണമെന്നതാണ് അതിൽ പ്രധാനം. രേഖകളെല്ലാം കൃത്യമാണെന്ന് ഉറപ്പാക്കിയ ശേഷം മാത്രമേ അഡ്വാൻസ് നൽകാൻ തയ്യാറാകാവൂ.
- വസ്‌തുവിന്‍റെ ആധാരം വ്യക്‌തമായി പരിശോധിക്കുകയാണ് ആദ്യമായി വേണ്ടത്. വസ്‌തു നൽകുന്ന ആളിന്‍റെ പേരിൽ തന്നെയാണ് അവകാശം എന്ന് ഉറപ്പുവരുത്തുക.
- തെരെഞ്ഞെടുക്കുന്ന ഫ്ളാറ്റന് നിയമപരമായ ബാദ്ധ്യതകളോ, ലോണോ ഇല്ലെന്ന് ഉറപ്പു വരുത്തേണ്ടത് ആവശ്യമാണ്. കൈവശാവകാശം തെളിയിക്കുന്നതിന് വില്ലേജ് ഓഫീസിൽ നിന്നു ലഭിക്കുന്ന പൊസ്സക്ഷൻ സർട്ടിഫിക്കറ്റ് ആവശ്യപ്പെടാം.
- രജിസ്ട്രേഷൻ നടത്തുന്നതിനു മുമ്പു തന്നെ ഭൂമിയുടെ അതിരു ക്യത്യമാണെന്ന് പരിശോധിച്ച് ഉറപ്പു വരുത്തുക. സർവ്വേ ഡിപ്പാർട്ട്മെന്‍റിൽ നിന്നും സർവ്വേ സ്കെച്ച് വാങ്ങി നോക്കിയാൽ പുറം പോക്കു ഭൂമി ഉൾപ്പെട്ടിട്ടുണ്ടോയെന്ന് അറിയാൻ കഴിയും.
പ്രധാന വസ്‌തുതകൾ
- സങ്കൽപത്തിനും ബജറ്റിനും യോജിച്ച ഫ്ളാറ്റാണ് തെരഞ്ഞെടുക്കുന്നതെങ്കിൽ പോലും ഗുണനിലവാരത്തെക്കുറിച്ചും സൗകര്യങ്ങളെക്കുറിച്ചും ബോധവാന്മാരായിരിക്കണം. സൽപ്പേരും വിശ്വാസ്യതയുമുള്ള ബിൽഡേഴ്സിൽ നിന്നും ഫ്ളാറ്റുകൾ വാങ്ങാൻ ശ്രദ്ധിക്കേണ്ടതാണ്. അഡ്വാൻസ് തുക നൽകുമ്പോൾ തന്നെ ഫ്ളാറ്റ് എന്ന് ലഭ്യമാകുമെന്നതിനെക്കുറിച്ച് രേഖാമുലമുള്ള എഗ്രിമെന്‍റ് ആവശ്യപ്പെടാം. ഇവർ മുമ്പ് നൽകിയിട്ടുള്ളതും നിർമ്മാണത്തിൽ ഇരിക്കുന്നതുമായ മറ്റു പ്രോജക്റ്റുകളെക്കുറിച്ചും അറിഞ്ഞു വയ്‌ക്കാവുന്നതാണ്.
- ദൈനംദിന ജീവിതത്തിൽ ആവശ്യമായി വരുന്ന കാര്യങ്ങൾക്ക് വളരെയകലെയല്ലാതെ സൗകര്യങ്ങൾ ഉണ്ടെന്ന് ഉറപ്പാക്കുക. (ഉദാ: ഷോപ്പ്സ്, ഹോസ്പിറ്റൽ, കോളേജ്, സ്കൂൾ, ബസ് റൂട്ട്, പോസ്റ്റ് ഓഫീസ്, ബാങ്ക്, റെയിൽവേ)
- നിങ്ങൾ ജോലിയുമായി ബന്ധപ്പെട്ടാണ് ഫ്ളാറ്റ് തെരഞ്ഞെടുക്കുന്നതെങ്കിൽ ദിവസേനയുള്ള യാത്രാ സൗകര്യം, ചെലവ് ഇവയൊക്കെ എങ്ങനെയായിരിക്കുമെന്ന് മനസ്സിലാക്കുക.
- കുടുംബത്തിൽ പ്രായമായവർ ഉണ്ടെങ്കിൽ അവർക്ക് ഉയർന്ന നിലകളിൽ കയറിയിറങ്ങുവാൻ പ്രയാസകരമാണ്. അഥവാ എടുത്താൽ ലിഫ്റ്റ് സൗകര്യം ഉള്ളതും പവർ ഫെയിലയർ ആയാലും ജനറേറ്റർ സംവിധാനം ഉള്ളവയാണെന്നതും ശ്രദ്ധേയമാണ്.
- താഴത്തെ നിലകൾ തെരഞ്ഞെടുക്കുമ്പോൾ മഴക്കാലങ്ങളിൽ വെള്ളപ്പൊക്കത്തിന്‍റെ പ്രശ്നങ്ങൾ ഉണ്ടാകാത്തയിടമാണെന്ന് ഉറപ്പാക്കണം.
- നിങ്ങൾ തെരഞ്ഞെടുക്കുന്ന ഫ്ളാറ്റിന് ഒരു കോമൺ ബാത്ത്റൂം ഉള്ളത് വളരെ നല്ലതാണ്. അതിഥികൾ വന്നാലും അത് അസൗകര്യങ്ങൾക്കിടയാക്കില്ല.
- ഫ്ളാറ്റ് വാങ്ങാൻ ഉദ്ദേശിക്കുന്ന ഫ്ളാറ്റിൽ മറ്റ് കുടുംബങ്ങൾ വന്നിട്ടുണ്ടെങ്കിൽ അവരിൽ നിന്നും വിവരങ്ങൾ എടുക്കാം.
- ഫ്ളാറ്റിലേക്ക് പ്രത്യേകം വഴി സൗകര്യമുണ്ടോയെന്ന് ശ്രദ്ധിക്കേണ്ടതാണ്. ഇടുങ്ങിയ വഴി, ലെവൽ ക്രോസിംഗ് എന്നിവയൊക്കെ വരുന്നുണ്ടെങ്കിൽ ഒഴിവാക്കുകയാണ് ഉത്തമം.
- ഭൂകമ്പത്തിൽ നിന്നും സംരക്ഷണം നൽകുന്ന രീതിയിലാണ് കെട്ടിടം നിർമ്മിച്ചിരിക്കുന്നതെന്ന് ഉറപ്പുവരുത്തണം. കെട്ടിടനിർമ്മാണത്തിന്‍റെ നിലവാരം വെളിപ്പെടുത്തുന്ന സർട്ടിഫിക്കറ്റ് ആവശ്യപ്പെടാവുന്നതാണ്.
- പാർക്കിംഗ് സൗകര്യമാണ് മറ്റൊരു പ്രധാന കാര്യം. നിശ്ചിത സ്ഥലം മാർക്കു ചെയ്‌തു നൽകുകയാണ് പതിവ്. പാർക്കിംഗ് സ്ഥലം കുറവുള്ള ഫ്ളാറ്റാണെങ്കിൽ ആദ്യം ബുക്കു ചെയ്യുന്നവർക്കായിരിക്കും അതു ലഭിക്കുക.
- ഫ്ളാറ്റ് നഗരത്തിലായാലും അല്ലെങ്കിലും ശുദ്ധമായ വായു സഞ്ചാരം ലഭിക്കുന്നതും അന്തരീക്ഷമലിനീകരണം ഇല്ലാത്ത ഇടവുമാണെന്ന് ഉറപ്പു വരുത്തണം.
- മലിനമായി ഒഴുകുന്ന പുഴ, മറ്റു ഫാക്ടറികൾ, ചേരി പ്രദേശം എന്നിവയൊക്കെ സമീപത്തുണ്ടോ എന്ന കാര്യം മനസ്സിലാക്കിയിരിക്കണം. അത്തരം ഇടങ്ങളിലുള്ള ഫ്ളാറ്റ് തെരഞ്ഞെടുക്കരുത്.
- സ്റ്റെയർ കെയ്‌സ്, മെഷീൻ റൂം, ലിഫ്റ്റ്, പ്ലേ ഗ്രൗണ്ട് തുടങ്ങി എല്ലാവരും ചേർന്ന് ഉപയോഗിക്കുന്ന സ്‌ഥലത്തെ കോമൺ ഏരിയാ എന്നാണ് പറയുക. ഇതിന്‍റെ നിർമ്മാണച്ചെലവ് ഫ്ളാറ്റിലെ താമസക്കാരിൽ നിന്നും പകുത്തെടുക്കുയയാണ് ചെയ്യുന്നത്.
- കെട്ടിടത്തിന്‍റെ കോൺക്രീറ്റ് നടത്തിയിരിക്കുന്നതിൽ അപാകതയൊന്നുമില്ലെന്ന് പരിശോധിക്കണം. കമ്പികൾ തള്ളി ഭിത്തിയിൽ നനവുണ്ടായിരിക്കുക, തേപ്പ് നിരപ്പല്ലാതായിരിക്കുക, ജനലിന്‍റെയും കതകിന്‍റെയും നിർമ്മാണത്തിൽ അപാകത എന്നിവയൊക്കെ കെട്ടിടത്തിന്‍റെ ഗുണനിലവാരം മോശമാണെന്ന് വ്യക്‌തമാക്കുന്നു. ഇത്തരം ഫ്ളാറ്റുകൾ തെരഞ്ഞെടുക്കരുത്.
- ഫ്ളാറ്റ് വാങ്ങാൻ തയ്യാറാകുമ്പോൾ ഒരു സ്ട്രക്ച്ചർ എഞ്ചിനീയറും ആർക്കിടെക്ചറും പരിശോധിച്ച് ഫ്ളാറ്റിന്‍റെ നിർമ്മാണം ബലവത്താണെന്ന് ഉറപ്പു വരുത്തണം.
ഫ്ളാറ്റിനെ സംബന്ധിച്ചത്
- എത്ര നിലയുള്ള ഫ്ളാറ്റാണെങ്കിലും മുകൾ നിലയിലുള്ളത് തെരഞ്ഞെടുക്കുമ്പോൾ പ്രത്യേകം ശ്രദ്ധ ചെലുത്തണം.
- കെട്ടിടത്തിൽ തീപ്പിടിത്തം തടയാനുള്ള ഉപകരണങ്ങൾ സുസജ്‌ജമാക്കിയിട്ടുണ്ടോയെന്ന് അറിഞ്ഞിരിക്കുക. ഇത്തരം സാഹചര്യങ്ങളിൽ രക്ഷപ്പെടാനുള്ള ഫയർ എസ്കേപ്പ് സ്റ്റെയര്‍ കേസുകൾ തയ്യാറാക്കിയിട്ടുണ്ടോയെന്നും മനസ്സിലാക്കണം.
- കുളിമുറി, അടുക്കള എന്നിവിടങ്ങളിൽ നിന്നുള്ള അഴുകുവെള്ളം ഒഴുക്കാനുള്ള ചാലുകൾക്ക് തടസ്സമുണ്ടായാൽ അതു വേഗത്തിൽ പരിഹരിക്കാനുള്ള സംവിധാനമോ, അറ്റകുറ്റപ്പണികൾക്കുള്ള സൗകര്യമോ ഏർപ്പെടുത്തിയിട്ടുണ്ടെന്ന് ഉറപ്പാക്കണം.
- കുട്ടികൾക്ക് കളിക്കാനുള്ള സ്ഥല സൗകര്യം ലഭ്യമാണോയെന്ന് നോക്കുക. പാർക്ക്, ഗാർഡൻ തുടങ്ങിയവയും ശ്രദ്ധിക്കാവുന്നതാണ്.
- മുറികളിൽ കാറ്റും വെളിച്ചവും കടക്കുന്ന തരം വാതിലുകളും ജനാലകളും ഉണ്ടായിരിക്കണം.
നിയമങ്ങൾ അറിയുക
- ഫ്ളാറ്റുമായി ബന്ധപ്പെട്ട രേഖകൾ രണ്ടു വിഭാഗമായി തിരിച്ചിട്ടുണ്ട്. നിർമ്മാണം നടത്തുന്നതിനു മുമ്പായി ഫ്ളാറ്റ് നിർമ്മാതാക്കൾ അനുമതി പത്രങ്ങൾ നേടേണ്ടതായുണ്ട്.
- ഫ്ളാറ്റ് നിർമ്മിക്കുന്നവർ വസ്‌തു ഉടമക്ക് ബന്ധപ്പെട്ട അധികാരികളിൽ നിന്നും ചില അനുമതി പത്രങ്ങൾ ലഭിക്കേണ്ടതായുണ്ട്.
- ബിൽഡർമാർ സ്വന്തം സ്‌ഥലത്തല്ല ഫ്ളാറ്റ് പണിയുന്നതെങ്കിൽ ഡവലപ്മെന്‍റ് എഗ്രിമെന്‍റ് പൂർത്തിയാക്കേണ്ടതുണ്ട്. ഫ്ളാറ്റ് നിർമ്മാതാവും സ്‌ഥലമുടമയും തമ്മിലുള്ള എഗ്രിമെന്‍റാണിത്. തന്‍റെ ഉടമസ്ഥതയിലുള്ള ഭൂമിയിൽ ഫ്ളാറ്റ് നിർമ്മിക്കുന്നതിന് ഉടമസ്‌ഥന്‍റെ സമ്മതം രേഖപ്പെടുത്തുന്ന വ്യവസ്‌ഥകളാണ് ഇതിലുണ്ടാവുക.
- ഫ്ളാറ്റ് സമുച്ചയത്തിന്‍റെ പ്ലാൻ അധികാരികൾക്കു നൽകി അനുമതി വാങ്ങണം. ഇത് അപ്രൂവ്ഡ് ബിൽഡിംഗ് പ്ലാൻ എന്നറിയപ്പെടുന്നു. വസ്‌തു സ്‌ഥിതി ചെയ്യുന്നിടത്തെ മുനിസിപ്പാലിറ്റി, കോർപ്പറേഷൻ, പഞ്ചായത്ത് ഇവിടങ്ങളിൽ നിന്നാണ് ഇത് ലഭിക്കുക.
- വസ്‌തുവിൽ ഫ്ളാറ്റ് പണി തുടങ്ങാനുള്ള അനുമതി നൽകുന്നതാണ് കമൻസ്മെന്‍റ് സർട്ടിഫിക്കറ്റ് കെട്ടിടത്തിന്‍റെ പ്ലാൻ പാസാക്കിയ അധികൃതരാണ് ഈ സർട്ടിഫിക്കറ്റ് നൽകുക.
- വ്യവസ്‌ഥകൾ പാലിച്ചു കൊണ്ട് കെട്ടിടത്തിന്‍റെ നിർമ്മാണ് പൂർത്തിയാക്കിയെന്ന് കാണിക്കുന്നതാണ് കംപ്ലീഷൻ സർട്ടിഫിക്കറ്റ്. ഇത് കെട്ടിടം താമസയോഗ്യമാണെന്ന് ഉറപ്പു നൽകുകയും ചെയ്യുന്നു.
