ഫെബ്രുവരി പ്രണയത്തിന്‍റെയും പ്രണയനികളുടെയും മാസം. “എനിക്ക് നിന്നോടുള്ള പ്രണയത്തിന് അതിരുകളും ആകാശവും ഇല്ല. എന്‍റെ ഓരോ അണുവിലും നീ ആണ്. നീ ഒരു ശബ്‌ദം മാത്രമാണ്. അതിന്‍റെ പേരാണ് സന്തോഷം.”
ഇങ്ങനെ കാവ്യാത്മകമായ വാക്കുകൾ നാവിലും വിരൽ തുമ്പിലും ഒഴുകിയെത്തുന്ന ഫെബ്രുവരി മാസം. എനിക്ക് നിന്നോട് പ്രണയമാണെന്ന് ഒരുപാട് പറഞ്ഞിട്ടുണ്ടെങ്കിൽ പോലും പ്രണയദിനത്തിൽ അതു പറയുമ്പോൾ കുറച്ചു കൂടി റൊമാന്‍റിക്ക് ആവുന്നു. പ്രണയത്തിന് കൂടുതൽ തീവ്രത കൈവരുന്നു. പ്രണയിനിയോട് സ്നേഹം പറയുമ്പോൾ സുന്ദരമായ ഒരു സമ്മാനം കൂടി ഉണ്ടാവുന്നതാണ് നല്ലത്. ഫെബ്രുവരി 14, എന്ന ദിവസത്തിന് പ്രണയവുമായുള്ള ബന്ധം എന്ത് എന്ന് ഇപ്പോൾ പലർക്കുമറിയാം.
പ്രണയിക്കുന്നവർക്കും പ്രണയിക്കാൻ ആഗ്രഹിക്കുന്നവർക്കും വേണ്ടി സ്വന്തം ജീവിതം ദാനം ചെയ്‌ത വാലന്‍റൈൻ എന്ന വ്യക്‌തിയുടെ സ്മരണയിലാണ് വാലന്‍റൈൻ ഡോ ആചരിക്കാൻ തുടങ്ങിയത്. അദ്ദേഹത്തിന്‍റെ കാലത്ത് റോമിൽ ഉണ്ടായിരുന്ന ഭരണാധികാരിയുടെ ക്രൂരമായ ഭരണരീതി നിമിത്തം പ്രണയികളെ തുറങ്കിലടയ്ക്കുകയോ കൊല്ലുകയോ ചെയ്യുമായിരുന്നു. പ്രണയവിവാഹം നിരോധിച്ചു കൊണ്ടുള്ള രാജാവിന്‍റെ ഉത്തരവിനെ മറികടന്ന് വാലന്‍റൈൻ പ്രണയ ജോടികൾക്ക് വിവാഹം നടത്തി കൊടുത്തു. ഇതറിഞ്ഞ രാജാവ് വാലന്‍റൈനെ വധശിക്ഷയ്ക്കു വിധേയനാക്കി. ഫെബ്രുവരി 14 ന് ആണ് അദ്ദേഹത്തെ വധിച്ചത്.
ലോകമെങ്ങും വാലന്‍റൈൻ ഡേ പ്രചാരത്തിലുണ്ട് ഇന്ത്യയിൽ ഈ ദിനം ഇത്രയും പ്രചാരത്തിലായിട്ട് കുറച്ചു വർഷങ്ങളെ ആയിട്ടുള്ളൂ. തുടക്കത്തിൽ ആളുകൾ ഈ ദിവസത്തിൽ പ്രണയലേഖനം കൈമാറുന്നതായിരുന്നു ആകെയുള്ള ഒരു കാര്യം. പിന്നീട് ഈ ദിനം പ്രണയനികളുടെ ഡേറ്റിംഗ് ഡേയും, സമ്മാനം കൊടുക്കൽ ഡേയുമൊക്കെയായി. ഓരോ സമ്മാനങ്ങൾ കൊടുക്കുമ്പോഴും അതിൽ ഓരോ സന്ദേശമുണ്ട്. വാലന്‍റൈൻ ഡേയ്ക്ക് പ്രിയപ്പെട്ടവർക്ക് സമ്മാനം നൽക്കുമ്പോൾ ഇതും അറിഞ്ഞിരിക്കാം.
റോസാപുഷപം
സ്നേഹത്തിന്‍റെ പ്രണയത്തിന്‍റെ പ്രതീകമാണ് റോസാപുഷ്പം. എന്നാൽ ഒരു കാര്യം വിസ്മരിക്കരുത്. പ്രണയിനിക്ക്, പ്രണയിതാവിന് നൽകുന്ന പുഷ്പങ്ങളുടെ സംഖ്യയും നിങ്ങളോട് ചിലതു പറയും. പ്രണയം പറയാൻ ഒരു പുഷ്പം ആയാലും മതി, ആശംസകൾ അർപ്പിക്കാൻ 25 പുഷ്പങ്ങൾ, നിബന്ധനകളില്ലാത്ത പ്രണയം പ്രകടിപ്പിക്കാൻ 50 പുഷ്പങ്ങൾ ഇങ്ങനെ പല സംഖ്യകൾ ഉപയോഗിക്കാറുണ്ട്. റോസാപുഷ്പം ഉപഹാരമായി കൊടുക്കുമ്പോൾ ഈ കാര്യം മറക്കരുത് ഒരു പ്രണയലേഖനം!
ഹൃദയം
വാലന്‍റൈൻ ഡേയിൽ റോസാപുഷ്‌പങ്ങൾക്കു ശേഷം ഏറ്റവും കൂടുതൽ ഡിമാന്‍റ് ഹൃദയത്തിനാണ്. ഹൃദയത്തിന്‍റെ ആകൃതിയിലുള്ള ഗ്രീറ്റിംഗ് കാർഡുകളും സമ്മാനങ്ങളും പ്രിയപ്പെട്ടയാൾക്ക് നൽകാവുന്നതാണ്. ഷോപീസ്, ടെഡി ബിയർ, പൗച്ച്, ഇയറിംഗ്സ്, റിംഗ്സ്, ജ്വല്ലറി ബോക്‌സ്, സെറാമിക് കോഫി മഗ്, കുഷ്യൻ കവർ, പില്ലോ കവർ ഇവയൊക്കെ സമ്മാനമാക്കാം.
ഇണപ്രാവുകൾ
നീയില്ലെങ്കിൽ എനിക്ക് ജീവിക്കാൻ വയ്യ എന്ന തോന്നലാണല്ലോ പ്രണയത്തിന്‍റെ കാതൽ. പ്രാവുകൾ അങ്ങനെയാണ്. ഇണപ്രാവുകളിൽ ഒരാൾ മൃദിയടഞ്ഞാൽ മറ്റേ ഇണ തുടർ ജീവിതം ഏകാകിയായി നയിക്കും. അവരുടെ സ്നേഹം പരസ്‌പരം സമർപ്പിതമാണ്. രണ്ട് പ്രാവുകളെ സമ്മാനമായി നൽകിയാൽ മരണം വരെ പിരിയില്ലെന്ന് വാക്കു നൽകുന്നതു പോലെയാണ്.
ചിനാർ ഇല
കാനഡയിലെ ദേശീയ വൃക്ഷമായ ചിനാർ മരങ്ങളുടെ ഇലകൾ ഇപ്പോൾ പ്രണയത്തിന്‍റെ അടയാളമായി ലോകം കാണുന്നു. ജപ്പാനിലും ചൈനയിലും ഇത് പ്രണയ സൂചകമായി ഉപയോഗിക്കാറുണ്ട്. ഇതിന്‍റെ ഇലയ്ക്ക് ചെറിയ മധുരമുണ്ട്. കാമുകി കാമുകന്മാർ കിടക്കയിൽ ചിനാർ ഇല സൂക്ഷിച്ചു വയ്‌ക്കുന്ന പതിവ് അമേരിക്കയിലുണ്ട്. യഥാർത്ഥ പ്രണയം ലഭിക്കാനാണത്രേ ഇങ്ങനെ ചെയ്യുന്നത്. വാലന്‍റൈൻ ഡേയിലും ഈ ഇല വച്ച കാർഡുകൾ ലഭ്യമാണ്.
ടുലിപ് പൂക്കൾ
11-ാം വിവാഹ വാർഷികത്തിന്‍റെ പ്രതീകമായി ചിലയിടങ്ങളിൽ ടുലിപ് പൂക്കൾ ഉപയോഗിക്കാറുണ്ട്. ഈ പൂക്കളുടെ ഇതളുകൾക്കിടയിലെ കറുത്ത അടയാളം പ്രണയിയുടെ ഹൃദയമായിട്ടാണ് അതിനെ കാണുന്നത്. ശീരി ഫർഹാദ് പ്രണയകഥയിലൂടെയാണ് ടുലീപ് പുഷ്പം പ്രണയത്തിന്‍റെ അടയാളമായത്. തുർക്കിക്കാരനായ ഫർഹാദിന് ശീരിയോട് അതിശക്‌തമായ പ്രണയം ആയിരുന്നു. വർഷങ്ങൾക്കു ശേഷം ശീരി ജീവിച്ചിരിപ്പില്ലെന്ന വിവരം ഫർഹാദ് അറിയുന്നു. അയാൾ ഭ്രാന്തനെപ്പോലെ കുന്നിൻ മുകളിൽ കയറി കൊക്കയിലേക്ക് സ്വയം ചാടി മരിച്ചു. അയാളുടെ രക്തം വീണ് വിരിഞ്ഞതാണ് ടുലിപ് പുഷ്പങ്ങൾ എന്നാണ് കഥ.
ഡയമണ്ട്
സ്നേഹം പ്രകടിപ്പിക്കാൻ ഡയമണ്ടിനേക്കാൾ വലിയ മറ്റൊരു സമ്മാനം ഉണ്ടാവില്ല. ഈ പ്രണയം ശിലാലിഖിതം പോലെ എന്നുമുണ്ടാകും എന്ന് പറയാതെ പറയുകയാണ് വജ്ര സമ്മാനം. ഗ്രീക്ക് ഇതിഹാസപ്രകാരം വജ്രം ദേവതയുടെ കണ്ണുകളാണ്. ഇത് ധരിച്ചാൽ വ്യക്‌തിത്വത്തിൽ ദേവസമാനമായി ഉയർച്ച ഉണ്ടാകുമെന്നാണ് വിശ്വാസം. കാമുകിയെ ഇംപ്രസ് ചെയ്യാൻ വജ്രം വാലന്‍റൈൻ ദിനത്തിൽ അണിയിക്കാം.
