ലക്ഷക്കണക്കിന് സ്ത്രീകളെ മരണത്തിലേക്ക് തള്ളിവിടുന്ന രോഗമാണ് സർവിക്കൽ കാൻസർ അഥവാ ഗർഭാശയഗള കാൻസർ. എന്നാൽ ഇത് ഫലപ്രദമായി പ്രതിരോധിക്കുവാനുള്ള അറിവും കഴിവും നമുക്കുണ്ട്.
എല്ലാ വർഷവും ഫെബ്രുവരി 4 നാണ് ലോക കാൻസർ ദിനം.. പ്രശസ്ത ഓങ്കോളജിസ്റ്റ് ആയ ഡോ. മോഹനൻ നായർ സർവിക്കൽ കാൻസറിനെ എങ്ങനെ തിരിച്ചറിയാമെന്നും ചികിത്സിക്കാമെന്നും വരാതെ പ്രതിരോധിക്കാമെന്നും പറയുന്നു
സെർവിക്കൽ കാൻസർ പൊതുലക്ഷണങ്ങൾ
ആരംഭ ദശയിലുള്ള സർവിക്കൽ കാൻസർ യാതൊരു രോഗലക്ഷണവും പ്രകടം ആകണമെന്നില്ല എന്നാൽ പൊതുവേയുള്ള ലക്ഷണങ്ങൾ ഏതൊക്കെയാണെന്നു നോക്കാം.
- ലൈംഗിക ബന്ധത്തിനുശേഷം ഉണ്ടാവുന്ന രക്തം പൊടിച്ചൽ അല്ലെങ്കിൽ രക്ത സ്രാവം
- ലൈംഗിക ബന്ധത്തിൽ ഏർപ്പെടുമ്പോൾ വേദന
- പീരിയഡുകൾക്കിടയിൽ ഉണ്ടാവുന്ന രക്തസ്രാവം,
- ആർത്തവ വിരാമത്തിനു ശേഷം ഉള്ള രക്തസ്രാവം
- യോനിയിൽ നിന്നും ഉള്ള അമിത ദ്രവ സ്രവങ്ങൾ
- ഇടയ്ക്കിടെ അടിവയറ്റിൽ, അരക്കെട്ടിൽ ഉണ്ടാകുന്ന വേദന
- ശരീരക്ഷീണം
- വിളർച്ച
ഈ ലക്ഷണങ്ങൾ പലപ്പോഴും കാൻസറിന്‍റെ ആണെന്ന് അർത്ഥമാക്കുന്നില്ല. പഴുപ്പ്, നീർവീഴ്ച, രോഗാണുബാധ തുടങ്ങി ഗുരുതരമല്ലാത്ത മറ്റ് പല ആരോഗ്യ പ്രശ്നങ്ങൾ മൂലവും മേൽപ്പറഞ്ഞ രോഗലക്ഷണങ്ങൾ സ്ത്രീകളിൽ കാണുന്നത് സാധാരണമാണ്. എന്നിരുന്നാലും, എന്തെങ്കിലും രോഗലക്ഷണങ്ങൾ തുടർച്ചയായി ശ്രദ്ധയിൽപ്പെട്ടാൽ വിദഗ്ധ പരിശോധനയ്ക്ക് പാപ്സ്മിയർ ടെസ്റ്റ്‌ ചെയേണ്ടതാണ്.
പ്രയോജനം
കാൻസർ ഉണ്ടാകുന്നതിനു വർഷങ്ങൾക്കു മുമ്പ് സെർവിക്സിൽ അസാധാരണമായ എന്തെങ്കിലും മാറ്റങ്ങൾ ഉണ്ടായാൽ അത് കണ്ടെത്തുന്നതിന് പാപ്സ്മിയർ പരിശോധന വളരെ ഫലപ്രദമാണ്. വളരെ ലളിതവും വേദനാ രഹിതവും ചിലവ് കുറഞ്ഞതും എല്ലാ ആശുപത്രികളിലും ചെയ്യാൻ കഴിയുന്നതുമായ ഒരു പരിശോധന രീതിയാണ് ഇത്.
ലൈംഗിക ബന്ധത്തിൽ ഏർപ്പെടുന്നവർ ഓരോ 3 വർഷത്തിലും 50 വയസ് വരെയും 50 നും 64 നും ഇടയിൽ പ്രായമുള്ളവർ ഓരോ അഞ്ചു വർഷത്തിലും പാപ്സ്മിയർ പരിശോധന നടത്തണം. സംശയകരമായ എന്തെങ്കിലും കാണുകയാണെങ്കിൽ കോൾപോസ്കോപ്പി (COLPOSCOPY) യുടെ സഹായത്താൽ ബയോപ്സി ഉൾപ്പെടെ കൂടുതൽ പരിശോധനകൾ നടത്തുവാൻ സാധിക്കും
മറ്റ് ടെസ്റ്റുകൾ
ലിക്വിഡ് സൈറ്റോളജി, ജനിതക പരിശോധന തുടങ്ങിയ ആധുനിക രീതികൾ വഴി ഗർഭാശയഗളത്തിൽ ഉള്ള കോശങ്ങളുടെ ആദ്യകാല മാറ്റങ്ങൾ കണ്ടുപിടിക്കാൻ കഴിയും.. സെർവിക്കൽ കാൻസർ സ്ക്രീനിംഗിൽ ജനിതക പരിശോധനയ്ക്കുള്ള പ്രസക്തി വർദ്ധിച്ചു വരികയാണ്. പാപ്പ് സൈറ്റോളജിയേക്കാൾ ഇത് രോഗം വളരെ നേരത്തെ കണ്ടുപിടിക്കുവാൻ സഹായിക്കുന്നു.
പ്രതിരോധം
സർവിക്കൽ കാൻസറിനു HPV വാക്സിനേഷൻ വളരെ ഫലപ്രദമാണ്. ഇന്ന് ഉണ്ടായിക്കൊണ്ടിരിക്കുന്ന 75% ഗർഭാശയഗള കാൻസറിനെയും പ്രതിരോധിക്കുവാൻ കഴിയും. ലൈംഗിക ഇടപെടലുകൾ ആരംഭിക്കുന്നതിന് മുമ്പുതന്നെ വാക്സിൻ നൽകുന്നത് കാൻസർ പ്രതിരോധിക്കാൻ വളരെ സഹായകമാകും.
9 വയസ്സിനും 13 വയസ്സിനും ഇടയിൽ രണ്ട് ഡോസ് വാക്സിൻ പ്രതിരോധത്തിന് സഹായകമാവും. ഒരു ഡോസ് വാക്സിൻ തത്തുല്യമായ പ്രയോജനം ലഭിക്കുമെന്ന് അടുത്തകാലത്ത് നടന്ന നിരീക്ഷണങ്ങൾ തെളിയിക്കുന്നു. പുതിയ വാക്സിനുകൾ ഉണ്ടാക്കാനുള്ള ഗവേഷണങ്ങൾ ലോകത്തെങ്ങും നടന്നു കൊണ്ടിരിക്കുന്നു, അവയിൽ ചിലതൊക്കെ 2021 ൽ ലഭ്യമാകും എന്ന് പ്രതീക്ഷിക്കുന്നു.
2020 ൽ തന്നെ 15 ദശലക്ഷം ആളുകൾ കാൻസർ മൂലം മരണമടഞ്ഞിട്ടുണ്ടാകും. അർബുദ നിർമാർജ്ജനത്തിന് ഇനിയും ശക്തമായി നാം പ്രവർത്തിക്കുന്നില്ലെങ്കിൽ 2030 ഓടെ കാൻസർ മരണങ്ങൾ 18 ദശലക്ഷമായി ഉയരും എന്ന് വിദഗ്ധർ അഭിപ്രായപ്പെടുന്നു.
ഇന്ന് ലോകത്ത് ഉണ്ടായിക്കൊണ്ടിരിക്കുന്ന മൂന്നിലൊന്നു കാൻസറുകളെയും ഒരു പരിധിവരെ നമുക്ക് പ്രതിരോധിക്കുവാൻ കഴിയും. ഇതിൽ ഏറ്റവും പ്രധാനവും ആശ്വാസകരവും ആയ ഒരു കാര്യം ലക്ഷക്കണക്കിന് സ്ത്രീകളെ മരണത്തിലേക്ക് തള്ളിവിടുന്ന സർവിക്കൽ കാൻസർ (ഗർഭാശയഗള കാൻസർ) പ്രതിരോധിക്കുവാനുള്ള അറിവും കഴിവും നമുക്കുണ്ട് എന്നുള്ളതാണ്.
2030 ഓടെ കൂടി സർവിക്കൽ കാൻസറിനെ ഭൂമുഖത്തു നിന്നും നിർമ്മാർജ്ജനം ചെയ്യുക എന്നത് ഈ വർഷത്തെ കാൻസർ ദിനാചരണത്തിന്‍റെ മുഖ്യ ലക്ഷ്യo കൂടിയാണ്. ഈ ലക്ഷ്യം നമുക്ക് കൈവരിക്കുവാൻ സാധിച്ചാൽ ഈ നൂറ്റാണ്ടിൽ കുറഞ്ഞത് അനേകം ദശലക്ഷം സ്ത്രീകൾക്ക് ഈ രോഗത്തിൽ നിന്നും രക്ഷപ്പെടാൻ സാധിക്കും, മരണനിരക്ക് കുറയ്ക്കുവാനും കഴിയും
ചികിത്സ വൈകിപ്പിക്കുന്ന കാരണങ്ങൾ
യഥാസമയം ചികിത്സാ കിട്ടാതെ ആണ് മരണനിരക്ക് കൂട്ടുന്നതെന്നു പറയേണ്ടതില്ലലോ. ചികിത്സ വൈകാൻ പല കാരണങ്ങൾ ഉണ്ടാകും. സാമ്പത്തികമായ അസമത്വം, വിദ്യാഭ്യാസമില്ലായ്മ, ദാരിദ്ര്യം, കാൻസർ സ്ക്രീനിങ്ങിനെ (പാപ്‌ ടെസ്റ്റ്‌, കോൾ പോസ്കോപ്പി തുടങ്ങിയ) കുറിച്ചുള്ള അറിവില്ലായ്മ, ടെസ്റ്റുകളും പരിശോധനകളും ചെയ്യുവാനുള്ള കേന്ദ്രങ്ങളുടെ അഭാവം, ശരിയായ ചികിത്സ ശരിയായ സമയത്ത് കിട്ടാതിരിക്കുക തുടങ്ങിയ അനേകം ഘടകങ്ങൾ സർവിക്കൽ കാൻസർ ഉണ്ടാകുന്ന മരണങ്ങളിലേക്ക് വഴിതെളിക്കുന്നു.
ആരോഗ്യ ജീവിതം അവകാശം
എല്ലാ സ്ത്രീകൾക്കും അവരുടെ ദേശം, വരുമാനം, വംശം, അല്ലെങ്കിൽ വിദ്യാഭ്യാസ നിലവാരം എന്നിവ ഒന്നും പരിഗണിക്കാതെ ആരോഗ്യകരമായ ജീവിതം നയിക്കുവാനുളള അവസരം ഒരുക്കുവാൻ നാം പ്രതിജ്ഞാബദ്ധരാണ്. സർവിക്കൽ കാൻസറിനെ കുറിച്ചുള്ള ഇന്നുവരെ ലഭ്യമായിട്ടുള്ള ശാസ്ത്രീയ വിവരങ്ങൾ, വ്യക്തിയും സമൂഹവും സർക്കാരും ബുദ്ധിപൂർവ്വം പ്രാവർത്തികമാക്കുകയാണെങ്കിൽ, പൊതുജനാരോഗ്യത്തെ വെല്ലുവിളിക്കുന്ന, ഈ കാൻസറിനെ പ്രതിരോധിക്കാൻ നമുക്ക് കഴിയും.
