രണ്ടുവർഷത്തെ തീവ്രപ്രണയത്തിനൊടുവിലാണ് കുമാറും ഗായത്രിയും വിവാഹിതരായത്. താലി ചാർത്തിയതിന്‍റെ രണ്ടാം വാർഷികത്തിനു മുമ്പേ തന്നെ ഇരുവർക്കുമിടയിൽ പൊട്ടലും ചീറ്റലും ഉണ്ടായി തുടങ്ങിയിരുന്നു. മൂന്ന് വർഷമായപ്പോഴേക്കും ഇരുവരും ചേർന്ന് വിവാഹ മോചനത്തിനു ഹർജി സമർപ്പിച്ചു. സുഹൃത്തുക്കൾ ഇടപെട്ട് ഇരുവരേയും പിന്തിരിപ്പിക്കാനും പ്രശ്നം ചർച്ച ചെയ്യാനും തീരുമാനിക്കുകയും ഇരുവരും കൗൺസിലിംഗിനു സമ്മതിക്കുകയും ചെയ്തു. മൂന്ന് മാസത്തെ കൗൺസിലിംഗിനു ശേഷം കുമാറിന്‍റെയും ഗായത്രിയുടെയും മനസ്സ് മാറി. ഇരുവരും വിവാഹമോചന ഹർജി പിൻവലിച്ചു. എന്തായിരുന്നു ഇവരുടെ ഇടയിലുള്ള അകൽച്ചയ്ക്ക് കാരണം? വിരസമായ ദാമ്പത്യരതി തന്നെ.
റൊമാൻസും രതിയും അപൂർവ്വാവസരങ്ങളിൽ മാത്രമായി ഒതുങ്ങുമ്പോഴാണ് പങ്കാളികൾ തമ്മിൽ മാനസികമായും ശാരീരികമായും അകലാൻ ഇടവരുന്നത്. ദാമ്പത്യത്തിൽ സ്നേഹത്തിന്‍റെ മറ്റൊരു പേരാണ് രതി. അതു നിലനിർത്താനും മനോഹരമാക്കാനും സാധിക്കാത്തവരാണ് നീറി കഴിയാൻ വിധിക്കപ്പെടുന്ന പങ്കാളികൾ.
ആനന്ദരതിയും സുഖവും
ജീവിതസുഖം പകരുന്നതിൽ രതിയ്ക്കുള്ള പങ്ക് നിർണ്ണായകമാണ്. കിടപ്പറയിൽ മനസ്സിനെയും ശരീരത്തെയും തൃപ്തിപ്പെടുത്താൻ കഴിയാതെ വരുമ്പോഴാണ് പങ്കാളിയെ വെറുക്കാൻ മനസ്സ് പാകപ്പെടുത്തുന്നത്. പരസ്പര സ്നേഹവും ബഹുമാനവും നഷ്ടപ്പെടാനും രതിസുഖമില്ലായ്മയും ലാളനയില്ലായ്മയും കാരണമാകുന്നുണ്ടെന്നാണ് പഠനങ്ങൾ പറയുന്നത്.
“ഞങ്ങൾ രണ്ടു കൗൺസിലർമാരെ കണ്ടിരുന്നു. മണിക്കൂറുകളോളം സംസാരിച്ചു. രണ്ടുപേരും ഒരേ കാരണമാണ് ചൂണ്ടികാട്ടിയത്. അപ്പോൾ ഞങ്ങൾക്ക് കാരണം മനസ്സിലായി. ഞങ്ങൾ രണ്ടാളും യാത്ര പോകാൻ തീരുമാനിച്ചു. രണ്ടാം ഹണിമൂൺ എന്നാണ് ഞങ്ങൾ യാത്രയെ വിശേഷിപ്പിച്ചത്. കശപിശ, തെറ്റിദ്ധാരണ എല്ലാം മാറ്റി വച്ചു കൊണ്ടുള്ള സമീപനവും രതിയ്ക്ക് മുമ്പുള്ള ഫോർപ്ലേ ചെയ്യാൻ തുടങ്ങിയതും നല്ല മാറ്റമാണ് ഞങ്ങളുടെ റിലേഷൻഷിപ്പിൽ വരുത്തിയത്. ഇങ്ങനെ ചെയ്‌തപ്പോൾ ജീവിതത്തിലാദ്യമായി ഞങ്ങൾക്ക് ദാമ്പത്യരതി നന്നായി ആസ്വദിക്കാൻ സാധിച്ചു. ഞാൻ ഓർഗാസം ആദ്യമായി അനുഭവിച്ചു.
ദിവസത്തിൽ 2-3 പ്രാവശ്യം ലൈംഗികബന്ധത്തിൽ ഏർപ്പെടാനും അത് ഒന്നിനൊന്ന് മെച്ചപ്പെട്ടതാക്കാനും കഴിഞ്ഞു. 3 ദിവസം നീണ്ടു നിന്ന ഈ ഹ്രസ്വയാത്രയാണ് എനിക്കെന്‍റെ ദാമ്പത്യ ജീവിതം തിരിച്ചു തന്നത്. പുതിയ ഉത്തരവാദിത്വങ്ങൾ ഏറ്റെടുക്കാനും ഇത് സഹായിക്കുമെന്ന് ഞാൻ മനസ്സിലാക്കി. ഈ കാര്യങ്ങൾ തുറന്ന് പറയാൻ എനിക്കൊരു മടിയുമില്ല. കാരണം എന്നെപ്പോലെ ദാമ്പത്യപ്രശ്നം അനുഭവിക്കുന്ന സ്ത്രീകൾ അനവധിയുണ്ടാവാം. എന്‍റെ അനുഭവം അവർ ക്കൊരു ആശ്വാസമാകുമെങ്കിൽ ആയിക്കോട്ടെ.” ഞാനിപ്പോൾ ഏറ്റവും സംതൃപ്തയായ സ്ത്രീയാണ്, ഭാര്യയാണ് ഗായത്രി പറയുന്നു.
എന്താണ് ഓർഗാസം
ലൈംഗിക ബന്ധത്തിനിടയിൽ അനുഭവിക്കുന്ന രതിസുഖത്തിന്‍റെ പാരമ്യമാണ് സാധാരണ നാം ഓർഗാസം എന്ന് വിശേഷിപ്പിക്കുന്നത്. രതിയനുഭവിക്കുമ്പോൾ പങ്കാളികളിൽ ഒരാൾ മാത്രം ഓർഗാസം അനുഭവിക്കുകയും മറ്റെയാൾക്ക് തൃപ്തി വരാതിരിക്കുകയും ചെയ്യുന്ന അവസ്ഥ വലിയ കഷ്ടമാണ്. സംതൃപ്തി വരികയാണെങ്കിൽ അവർ രതിയ്ക്ക് ശേഷം ആലസ്യത്തോടെ കിടക്കാനോ കുറച്ചു സമയം വെറുതെ വിശ്രമിക്കാനോ ഇഷ്ടപ്പെടും. പുരുഷനു പക്ഷേ അങ്ങനെ ആഗ്രഹം തോന്നാറില്ല. ആലസ്യ കിടപ്പിനു ശേഷവും മറ്റൊരു രതി ക്രീഡയ്ക്ക് സ്ത്രീ മനസ്സ് വയ്ക്കാറുണ്ട്. പുരുഷന് പക്ഷേ ഓർഗാസത്തിനു ശേഷം ഉറക്കം പിടിക്കാനാവും ഇഷ്‌ടം. പുരുഷൻ ആദ്യം സംതൃപ്തനാവുകയാണെങ്കിൽ സ്ത്രീയ്ക്ക് രണ്ടാമതൊരു രതി അനുഭവം കിട്ടണമെന്നില്ല. ഇതും ദാമ്പത്യത്തിലെ ഇഷ്‌ടക്കേട് വർദ്ധിപ്പിക്കുമെന്ന് മനസ്സിലാക്കുക.
രതിയ്ക്ക് ശേഷം ഓർഗാസം ലഭിച്ചാലും ഇല്ലെങ്കിലും ഭാര്യയെ കെട്ടിപ്പിടിച്ചു അൽപ്പം നേരം കിടക്കുക. ലിംഗം എടുക്കാതെ കുറച്ചു നേരം കൂടി കിടക്കുകയാണെങ്കിൽ അത് സ്ത്രീയ്ക്ക് വലിയ ആനന്ദം പകരുമെന്നാണ് മെഡിക്കൽ ജേണലുകൾ പറയുന്നത്. യോഗ ചെയ്യുന്ന പുരുഷന്മാർക്ക് ശുക്ലം പോയ ശേഷവും ഉടനെ മറ്റൊരു രതിയനുഭവം പകരാൻ സാധിക്കും. സ്റ്റാമിന മാത്രമല്ല, വീണ്ടും മടുപ്പില്ലാതെ പങ്കാളിയെ പ്രാപിക്കാനുള്ള മാനസികാരോഗ്യവും യോഗ ചെയ്യുന്നവരിൽ കണ്ടുവരാറുണ്ട്.
സഹ സന്തുഷ്ടി ഒരേ തരത്തിലുള്ള രതിയിൽ നിന്നും ജീവിതശൈലിയിൽ നിന്നും രൂപപ്പെട്ടു വരുന്ന സംഗതിയാണ്. മാനസികമായും ശാരീരികമായും പങ്കാളികൾ ഒരേപോലെ തയ്യാറാവുമ്പോഴാണ് ഇരുവരുടെയും രതി ആനന്ദകരവും വേദനാരഹിതവും ഒരിക്കലും അവസാനിക്കുകയില്ലെന്ന രീതിയിലും ആയി തീരുന്നത്.
സെക്സ് ശരീരത്തിൽ മാത്രമല്ല തലച്ചോറിലും സംഭവിക്കുന്നുണ്ടെന്നാണ് സൈക്യാട്രിസ്റ്റായ രൂപാലി ദേവി പറയുന്നത്. ഈ സ്നേഹം വളരെ ശക്തവും നിയന്ത്രിക്കാൻ ഇരുവർക്കും എളുപ്പമുള്ളതുമാണത്രേ. നല്ല ഭക്ഷണം, നല്ല മൂഡ്, നല്ല ആരോഗ്യം ഒക്കെ നല്ല സെക്‌സിനു അനുകൂലമാകുന്ന ഘടകങ്ങൾ ആണ്. നല്ല സെക്സ് മനസ്സിനും ശരീരത്തിനും ഉത്തേജനം നൽകുന്ന കാര്യമാണ്.
വിവാഹത്തിന്‍റെ ആദ്യ നാളുകളിൽ ഉള്ള സ്നേഹവും ലാളനയും വളരെ കൂടുതലായിരിക്കും. സമയം കടന്നു പോകുന്നതോടെ രതി നേർച്ച പോലെ ആയിത്തീരുന്നു. ഇങ്ങനെ സംഭവിക്കുന്നത് പല കാരണങ്ങൾ കൊണ്ടുമാകാം. പങ്കാളിയുടെ വൃത്തിക്കുറവ്, അനുകമ്പയില്ലായ്മ, മദ്യപാനം, പുകവലി തുടങ്ങിയവയൊക്കെ കാരണങ്ങൾ ആവാം. വ്യായാമക്കുറവും വില്ലനാണ്. മനസ്സിൽ എപ്പോഴും റൊമാൻസ് നിലനിർത്താൻ ആരോഗ്യം കാക്കുക തന്നെ വേണം.
രതി പല ഗുണങ്ങളും ജീവിതത്തിൽ ഉണ്ടാക്കുന്നുണ്ട്. അത് കേവലം സന്താനോൽപ്പാദനത്തിനു വേണ്ടി മാത്രമുള്ള പ്രക്രിയയല്ല. ലൈംഗിക കേളികൾ ഒരേ മുറിയിൽ അല്ലെങ്കിൽ ഒരേ സ്‌ഥലത്തും ഒരേ പൊസിഷനിൽ ദീർഘനാൾ ചെയ്യരുത്. കിടക്കവിരി മാറ്റുന്നതു പോലും നല്ലതാണ്. ചെറിയ ചെറിയ മാറ്റങ്ങൾ, വലിയ ഫലം ചെയ്യും. ഒരു ദിവസം നല്ല റൊമാന്‍റിക് പാട്ട് വച്ചുകൊണ്ട് രതിയിൽ ഏർപ്പെട്ടു നോക്കൂ. ഇങ്ങനെ ക്രിയാത്മകമായി ദാമ്പത്യരതി ആസ്വദിക്കുമ്പോൾ ജീവിതബന്ധം ദൃഢമാകും.
രതിയിലേർപ്പെടുമ്പോൾ ഒരിക്കലും ഗിൽറ്റി ഫിലീംഗ് പാടില്ല. മുമ്പും ശേഷവും. എല്ലാ ലൈംഗികബന്ധത്തിലും ഓർഗാസം പ്രതീക്ഷിക്കുകയുമരുത്. അത് പല ഘടകങ്ങളെ ആശ്രയിച്ചാണ് ഇരിക്കുന്നത്. എന്നാലും മാസത്തിൽ 3-4 തവണ സഹസുഖം ലഭിക്കുകയാണെങ്കിൽ അത് വളരെ ആരോഗ്യകരമായ ലൈംഗിക ജീവിതത്തിന്‍റെ ലക്ഷണമാണ്.
ദാമ്പത്യരതി ഒരു ടീം ഗെയിം ആണ്. ഒരാൾ മാത്രം ഗോളടിക്കുന്നത് കളി വിരസമാക്കും. അതിനാൽ ഫോർപ്ലേയിലൂടെ ഇരുവരുടെയും മൂഡിനെ ഒരേ നിലവാരത്തിലേയ്ക്ക് കൊണ്ടുവരാൻ ശ്രമിക്കണം. ലാളന രതിയുടെ ആനന്ദ മാർഗ്ഗമാണ്.
