വിവാഹം, പിറന്നാൾ ഇങ്ങനെ പല ആഘോഷവേളകളിലും ചെടികൾ പരസ്പരം സമ്മാനമായി നൽകുന്ന രീതിയാണ് ഇപ്പോഴത്തെ പുത്തൻ ഗിഫ്റ്റ് ട്രെന്‍റ്. പ്രകൃതിയോടിണങ്ങി ജീവിക്കാനുള്ള പ്രേരണ ഈ സമ്മാനത്തിലൂടെ കുറച്ചെങ്കിലും ലഭിക്കുമെന്നതിൽ സംശയമില്ല. എങ്കിലും ചെടികൾ സമ്മാനമായി നൽകാൻ നേരം ചില കാര്യങ്ങൾ ശ്രദ്ധിക്കണം. അതു സ്വീകരിക്കുന്ന ആളുടെ സാഹചര്യം, സൗകര്യം ഇതൊക്കെ പരിഗണിക്കുന്നത് നന്നായിരിക്കും.
ഒരു വിവാഹത്തിന് വന്ന അതിഥികൾക്കെല്ലാം വധുവരന്മാർ സമ്മാനമായി നൽകിയത് റോസാച്ചെടിയായിരുന്നു. പക്ഷേ കല്യാണം കഴിഞ്ഞപ്പോൾ ആ പരിസരത്തും റോഡരികിലുമെല്ലാം ധാരാളം റോസാച്ചെടികൾ കൂടെ കൊണ്ടുപോകാൻ നിവൃത്തിയില്ലാതെ അതിഥികളിൽ പലരും ഉപേക്ഷിച്ചു പോയവയായിരുന്നു അത്. അനാഥമായ റോസാച്ചെടികൾ കാണുമ്പോൾ സമ്മാനിച്ചവർക്കു സങ്കടം, കൊണ്ടുപോകാൻ കഴിയാതെ ഉപക്ഷേിച്ചവർക്കും ഉണ്ടാകും വൈക്ലബ്യം.
കുട്ടികൾ ഉള്ള വീട്
കുഞ്ഞുങ്ങളും ഓമന വളർത്തു മൃഗങ്ങളും ഉള്ള വീടുകളിൽ മനോഹരമായ ഇൻഡോർ പ്ലാന്‍റുകൾ സമ്മാനമായി നൽകുമ്പോൾ ഒരൽപം കരുതൽ ആവശ്യമാണ്. ഇൻഡോർ പ്ലാന്‍റുകൾ തെരഞ്ഞെടുക്കുന്ന വേളയിൽ അവ ഏതെങ്കിലും തരത്തിലുള്ള അലർജികൾക്കോ മറ്റോ ഇടയാക്കുമോ എന്ന് ചോദിച്ചറിയണം. ചില ചെടികളുടെ ഇലകൾ കടിക്കുവന്നതും, തൊടുന്നതുമൊക്കെ അലർജി ഉണ്ടാക്കിയേക്കാം.
സ്ഥലപരിമിതി
സമ്മാനമായി ചെടി നൽകുമ്പോൾ അതു വാങ്ങുന്നയാളുടെ വീട്ടിൽ ചെടി വയ്ക്കാനുള്ള സ്‌ഥല സൗകര്യം ഉണ്ടോയെന്ന് മുൻകൂട്ടിയറിഞ്ഞാൽ നന്നായിരിക്കും. ചെടി എത്ര ഉയരം വയ്ക്കുമെന്നാണ് പരിഗണിക്കേണ്ടത്. മുറ്റവും പറമ്പുമുള്ളവർക്ക് എന്തുതരം ചെടി കൊടുത്താലും കുഴപ്പമില്ല. ഫ്ളാറ്റുകളിൽ താമസിക്കുന്നവർക്ക് ഉയരം വയ്‌ക്കുന്ന ചെടികൾ കൊടുത്തിട്ട് കാര്യമില്ല. ഇവിടെ ഇൻഡോർ ചെടികൾ സമ്മാനമായി നൽകുന്നതാണ് ഉത്തമം. ഫിലോഡെൻഡ്രോൺ ഹെഡെറേഷ്യം നല്ലൊരു ഓപ്ഷനാണ്. ചെറിയ വെളിച്ചം മതി ഇതിന് വളരാൻ. ഹാങിംഗ് ബാസ്ക്കറ്റുകളിൽ മനോഹരമായിരിക്കും.
സൂര്യപ്രകാശം
ഇൻഡോർ പ്ലാന്‍റുകൾ ഗിഫ്റ്റ് കൊടുക്കുമ്പോൾ പരിഗണിക്കേണ്ട കാര്യമാണ് അവയ്ക്ക് സൂര്യപ്രകാശം വേണോ വേണ്ടയോ എന്നത്. അരണ്ട വെളിച്ചത്തിൽ വളരുന്ന പ്ലാന്‍റുകൾക്കു പോലും ഇടയ്ക്ക് ചെറിയ അളവിൽ സൂര്യപ്രകാശമേൽക്കേണ്ടത് അത്യാവശ്യമാണ്. ജനാലക്കരികിൽ കൊണ്ടു വച്ച് ദിവസവും വെയിൽ കൊടുക്കേണ്ട സ്‌ഥിതി ഉണ്ടായാൽ അതും ബുദ്ധിമുട്ടാകും. വീടിന്‍റെ അകത്ത് ശരിക്കും ഇണങ്ങുന്ന പ്ലാന്‍റ് മാത്രം തെരഞ്ഞെടുക്കുക.
ആരോഗ്യം, ഹോബി
ലാവണ്ടർ പോലുള്ള ചെടികളുടെ സാന്നിധ്യം മനസ്സിനെ ആശ്വസിപ്പിക്കാൻ കഴിയുന്നതാണ്. വളരെയധികം സ്ട്രെസ് അനുഭവിക്കുന്ന ഒരാൾക്ക് ലവണ്ടർ ചെടി സമ്മാനമായി നൽകാം. റോസ്മേരി പോലുള്ള ഔഷധച്ചെടികൾക്ക് ആരോഗ്യപരമായ ഗുണമുണ്ട്. അതിനു പുറമേ, നല്ലൊരു കുക്കിംഗ് ഇൻഗ്രീഡിയന്‍റ് കൂടിയാണ്. പാചകം ഇഷ്‌ടമുള്ളയാൾക്ക് ഇതുപോലുള്ള ചെടികൾ സമ്മാനമായി നൽകാം.
സുഗന്ധം
സൗന്ദര്യവും സുഗന്ധവും ഒത്തുചേർന്ന ഒരു സമ്മാനം ആർക്കാണ് ഇഷ്‌ടമാവാത്തത്? മുല്ല, ഗാർഡെനിയ, ടീറോസ്, ബിഗോണിയ തുടങ്ങിയവ നല്ല ചോയിസാണ്. ഇവയ്ക്ക് കാണാനും ഭംഗിയുണ്ടെന്നു മാത്രമല്ല മാസ്മരിക സുഗന്ധം കൂടിയുണ്ട്. മിന്‍റിന്‍റെ ഇല ഭക്ഷ്യയോഗ്യമാണ്. ഒപ്പം നല്ല ഗന്ധവും ഉണ്ടാവും.
ജോലിസ്‌ഥലം
ചെടികൾ എവിടെ വച്ചാലും ആ സ്‌ഥലം മനോഹരമായിരിക്കും. പൂച്ചെടികൾ വീട്ടിൽ മാത്രമല്ല വർക്ക് പ്ലെയിസിലും വയ്‌ക്കാം. ഓഫീസുകളിൽ വയ്ക്കാൻ കഴിയുന്ന ചെടികൾ ഭാരം കുറഞ്ഞതായിരിക്കണം. കാക്റ്റി, ബോൻസായ്, അഡെനിയം, ഒബ്സിയം ഇതൊക്കെ നല്ല ചോയിസാണ് സ്പൈറൽ ബാംബുവും അനുയോജ്യമാണ്. അഡെനിയം ഒബ്സിയത്തിന്‍റെ കടും നിറത്തിലുളള പൂക്കൾ ഹൈലൈറ്റാണ്.
മിക്സ് ആന്‍റ് മാച്ച്
പ്ലാന്‍റുകളും, കണ്ടെയ്നറുകളും വേറെ വേറെ വാങ്ങിയും ഗിഫ്റ്റ് ബാസ്ക്കറ്റ് ആക്കാവുന്നതാണ്. പൂച്ചെടികൾ, ഔഷധച്ചെടികൾ ഇവ ഇങ്ങനെ നൽകാൻ ഉത്തമമാണ്. ഇങ്ങനെ മിക്സ് ചെയ്‌തു കൊടുക്കുമ്പോൾ മണ്ണും വെള്ളവും ഒക്കെ ഉപയോഗിക്കുന്നത് അനുപാതത്തിലാവണം.
ലൈഫ് സ്റ്റൈൽ
സമ്മാനം കൊടുക്കുമ്പോൾ തീർച്ചയായും ശ്രദ്ധിക്കണം. വാങ്ങുന്നയാളുടെ ജോലി ത്തിരക്കും ജീവിതശൈലിയും തിരക്ക് ഒരുപാട് ഉള്ള ആളാണെങ്കിൽ ഈസിയായി കൈകാര്യം ചെയ്യാൻ പറ്റുന്ന ചെടികളാണ് നൽകേണ്ടത്. നനയ്ക്കൽ, വളം കൊടുക്കൽ തുടങ്ങിയ കാര്യങ്ങൾ കൂടെക്കൂടെ ചെയ്യേണ്ട ആവശ്യമില്ലാത്ത സ്പൈഡപ് പ്ലാന്‍റ്,പാം, ഫേൺ തുടങ്ങിയവ നല്ല ഓപ്ഷനാണ്.
ഗാർഡനിംഗ്
എക്സോട്ടിക് പ്ലാന്‍റുകൾ കാഴ്ചയ്ക്ക് വളരെ കൗതുകം ജനിപ്പിക്കും. എന്നാൽ ഇവയെ പരിപാലിക്കാൻ അത്ര എളുപ്പമല്ല. ഇത്തരം ചെടികൾ ഗാർഡനിംഗ് ഇഷ്ടമുള്ളവർക്ക് മാത്രമേ നൽകാവൂ. നല്ല പൂന്തോട്ടമുള്ളവർക്ക് ഓർക്കിഡുകൾ സമ്മാനമായി നൽകാം.
പാക്കിംഗ്
ചെടി തെരഞ്ഞെടുക്കുന്നതിലെ ഔചിത്യം അതു ഭംഗിയായി പാക്കിംഗ് ചെയ്യുന്നതിലും പ്രകടിപ്പിക്കാം. വീട്ടിൽ ആണ് കൊടുക്കുന്നതെങ്കിൽ കൂടി ഭംഗിയായി പൊതിയാം. പക്ഷേ ചെടിക്ക് കേടുപറ്റുന്ന വിധം അടച്ചുപൂട്ടി വയ് ക്കാതെ വേണം പൊതിയാൻ. അൽപം പെബിളുകളും കൂടെ വയ്‌ക്കാം.
