പുത്തൻ വീട് ഉണ്ടാക്കുകയോ വീട് പുതുക്കിപ്പണിയുകയോ ആവട്ടെ. നാം വസിക്കുന്ന ഇടം മനോഹരവും കംഫർട്ടബിളും ആക്കുന്നത് മനസ്സിനും സ്പേസിനും യോജിച്ച ഹോം സ്റ്റൈലിംഗ് തന്നെയാണ്.
നിറങ്ങളോട് പണ്ടേ ചങ്ങാത്തമുണ്ട് വർഷയ്ക്ക്. അതുകൊണ്ടാണ് എഞ്ചിനീയർ ജോലി മാറ്റി വച്ച് ഹോം സ്റ്റൈലിംഗിനോട് കൂട്ടുകൂടിയത്. വീടുകൾക്കുള്ളിലെ നിറപ്പകിട്ടാർന്ന ലോകത്തേക്ക് കടന്നു വന്നിട്ട് ഒരുപാട് നാളായിട്ടില്ലെങ്കിലും ഹോം സ്റ്റൈലിംഗിലും മേക്കോവറിലും സ്വന്തം സ്റ്റൈൽ ക്രിയേറ്റ് ചെയ്‌തിരിക്കുകയാണ് വർഷ രവീന്ദ്രൻ എന്ന ഹോം സ്റ്റൈലിസ്റ്റ്.
ഇന്‍റീരിയർ ഡിസൈൻ ചെയ്താലും ഒരു ഇടം, താമസിക്കാനിണങ്ങുന്ന ഇടമാകുന്നത് അതിൽ പേഴ്സണൽ ടച്ച് കൂടി വരുമ്പോഴാണ്. അവിടെയാണ് ഹോം സ്റ്റൈലിംഗിന്‍റെ പ്രസക്തി. പുത്തൻ വീട് ഉണ്ടാക്കുകയോ വീട് പുതുക്കിപ്പണിയുകയോ ആവട്ടെ. നാം വസിക്കുന്ന ഇടം മനോഹരവും കംഫർട്ടബിളും ആക്കുന്നത് മനസ്സിനും സ്പേസിനും യോജിച്ച ഹോം സ്റ്റൈലിംഗ് തന്നെയാണ്.
“ഞാൻ കൂടുതൽ ഫോക്കസ് ചെയ്യുന്നത് ഹോം സ്റ്റൈലിംഗിലും മേക്കോവർ പ്രോജക്ടുകളിലുമാണ്. നിലവിൽ ഒരു ഇന്‍റീരിയർ ഉള്ളതും മാറ്റം ആഗ്രഹിക്കുന്നതുമായ സ്പേസുകളിൽ എന്തൊക്കെ ചെയ്താൽ ഭംഗിയാകും എന്നാണ് ഇപ്പോൾ ഞാൻ നോക്കാറുള്ളത്. ഒരു ഫ്ളാറ്റോ വീടോ കിട്ടിയാൽ അതിൽ താമസിക്കുന്ന ഒരു വ്യക്‌തി എന്ന നിലയിൽ എന്തു ചെയ്യാൻ പറ്റുമെന്ന് നാം നോക്കാറുണ്ട്. ചിലർക്ക് നല്ല രീതിയിൽ സ്റ്റൈൽ സെറ്റ് ചെയ്യാൻ പറ്റും. എന്നാൽ ചിലർക്കാകട്ടെ യോജിച്ച കളർ കോർഡിനേഷൻ അറിയാൻ പറ്റില്ല. അത്തരം സാഹചര്യത്തിലാണ് ഹോം സ്റ്റൈലിസ്റ്റിന്‍റെ ആവശ്യം.” കൊച്ചിയിൽ ചെസ്റ്റ്നട്ട് ഹോം സ്റ്റൈലിസ്റ്റ് എന്ന സ്ഥാപനം നടത്തുന്ന വർഷ പറയുന്നു.
കർട്ടൻ, ഫാബ്രിക് സെലക്ഷൻ മുതൽ കസ്റ്റമൈസ്ഡ് പ്രോഡക്ടറ്റുകളും ഫർണീച്ചറുകളും തെരഞ്ഞെടുക്കുന്നതിൽ വരെ വർഷ കസ്റ്റമറെ സഹായിക്കുന്നു. “ഇന്‍റീരിയറിൽ പേഴ്സണൽ ടച്ച് വരുമ്പോഴാണ് ഹൗസ് ഒരു ഹോം ആയി മാറുന്നത്. ഒരു വീടിന് പേഴ്സണൽ ടച്ച് നൽകി, സ്റ്റൈലിംഗ് ചെയ്യുമ്പോൾ ഞാൻ ശ്രദ്ധിക്കാറുള്ളത് ആ വീട്ടിൽ താമസിക്കുന്നവരുടെ ഇഷ്‌ടങ്ങളും അതിനോട് ഒത്തു പോകുന്ന കളർ പാലറ്റും ലൈറ്റിംഗും ഡെക്കോറുമാണ്.” വർഷ പറയുന്നു.
വീടു പണിതു കഴിയുമ്പോഴേക്കും മിക്കവരുടെയും കയ്യിലെ കാശ് മുക്കാലും തീർന്നിട്ടുണ്ടാകും. അപ്പോൾ പറ്റുന്ന കുറേ ഫർണീച്ചർ വാങ്ങും, അല്ലെങ്കിൽ ഗിഫ്റ്റായി ലഭിക്കുന്ന ഫർണീച്ചറിൽ അഡ്ജസ്റ്റ് ചെയ്യാൻ ശ്രമിക്കും. എന്നാൽ ഇവയും വീടിന്‍റെ ഇന്‍റീരിയറും ആളുകളുടെ ഇഷ്ടവും തമ്മിൽ വലിയ കോർഡിനേഷൻ ഒന്നും ഉണ്ടാകില്ല. ഇത്തരം അവസ്‌ഥകളെ ചെറിയ പോംവഴികളിലൂടെ മികച്ചതായി മാറ്റിയെടുക്കാൻ കഴിയും. മേക്കോവർ പ്രോജക്ടുകൾ വളരെ സന്തോഷം നൽകുന്ന കാര്യമാണ് വർഷയ്ക്ക്.
“ഒരു വ്യക്‌തി താൻ താമസിക്കുന്ന ഇടം മടുത്തു തുടങ്ങുമ്പോഴാണ് മേക്കോവറിനെ കുറിച്ച് ചിന്തിച്ചു തുടങ്ങുന്നത്. അടുത്തയിടെ ഞാൻ ചെയ്‌ത മേക്കോവർ ഒരു ഗസ്റ്റ് ബെഡ് റൂമിന്‍റേതാണ്. മുഴുവൻ വുഡ് ടെക്സ്ച്ചർ ഉള്ള ഡാർക്ക് ബ്രൗൺ കർട്ടനുകൾ നിറഞ്ഞ ഒരു മുറി. ആകെ ഇരുട്ടടച്ച ഫീൽ. ഒരു ഗസ്റ്റ് ബെഡ്റൂം ശരിക്കും ഇൻവൈറ്റിംഗ് ഫീൽ നൽകുന്നതാവണം. പോസിറ്റീവ് എനർജി ലഭിക്കാൻ സൂര്യപ്രകാശം ആണ് ഏറ്റവും ആവശ്യം. കർട്ടൻ ഫാബ്രിക് മാറ്റി, വുഡ് ടെക്സ്ച്ചർ നിറം മാറ്റാൻ റീ പെയ്ന്‍റ് ചെയ്‌തു. എല്ലാം ഈട്ടിയുടെയും തേക്കിന്‍റെയും കളറായാൽ ഒരു ഫർണീച്ചർ കടയിൽ പോയ പോലെ തോന്നും. അതിനാൽ പല ഗ്രേഡിയന്‍റുകൾ പരീക്ഷിക്കാം. മുറിയിലെ ശ്രദ്ധ മൊത്തം പോകുന്ന തരത്തിലുള്ള വലിയ വിഷ്വൽ ബ്ലോക്കുകൾ ഉണ്ടാകാതിരിക്കാനും ശ്രദ്ധിക്കാവുന്നതാണ്. പൊളിക്കലുകളില്ലാതെ റീ അറേഞ്ച് ചെയ്യുന്നതിലൂടെ മാത്രം വലിയ വ്യത്യാസം വരുത്താൻ കഴിയും.”
ഇനി കൺസ്ട്രക്ഷൻ സമയത്ത് വീടിന്‍റെ അകം കാണാൻ കഴിയുന്നുണ്ടെങ്കിൽ മാറ്റങ്ങൾ വരുത്താൻ എളുപ്പമാണ്. വീട്ടിലേക്കുള്ള ഇന്‍റീരിയർ സാമഗ്രികൾ വാങ്ങുമ്പോൾ കൂടെ പോയി പർച്ചേസ് ചെയ്‌തു സഹായിക്കാറുണ്ട് വർഷ.
“ഒരു ഡിസൈനർ എന്ന രീതിയിലല്ല, ഇന്‍റീരിയർ കൺസൾട്ടന്‍റ് എന്ന രീതിയിലാണ് ഞാൻ ക്ലൈന്‍റിനെ സമീപിക്കുന്നത്.”
കണ്ടംപററി സ്റ്റൈലിൽ ഇന്‍റീരിയർ ചെയ്യാൻ കസ്റ്റമർ പറഞ്ഞാലും, അവരുടെ മനസ്സിലെ സ്റ്റൈൽ അറിയാൻ ചിത്രങ്ങൾ സഹായിക്കും. തുടർന്ന് കളർപാലറ്റിൽ വർക്ക് ചെയ്യും. ഇഷ്ടപ്പെട്ട ഫർണീച്ചർ സ്റ്റെൽ, ലൈറ്റ് അറേഞ്ച്മെന്‍റ്, ഡെക്കോർ ഇവയും മനസ്സിലാക്കിയ ശേഷം ബജറ്റ് റെഡിയാക്കി കൊടുക്കും. ഇത് അപ്രൂവ് ആയാൽ അവർക്കൊപ്പമോ തനിച്ചോ ഷോപ്പിംഗ് ചെയ്യും.
ഹോം സ്റ്റെലിംഗിൽ ഏറ്റവും ശ്രദ്ധിക്കാനുള്ളത് നിറം തന്നെയാണ്. നിറത്തെ ഒരു തീം എന്ന നിലയിൽ കാണുമ്പോൾ ചിലപ്പോൾ ഉദ്ദേശിച്ച സ്റ്റൈൽ കിട്ടില്ല. ഇഷ്ടവും കളർ കോമ്പിനേഷനും ആണ് പ്രധാനം. ചിലർക്ക് ചില നിറത്തോട് പ്രത്യേക ഇഷ്ടം തന്നെയുണ്ടാവും. എന്നാൽ ആ നിറം തന്നെ മുഴുവൻ ഉപയോഗിക്കുന്നത് ബോറടി സൃഷ്ടിക്കാനും ക്രമേണ ആ നിറത്തോട് വെറുപ്പ് ഉണ്ടാക്കാനും ഇടയാക്കും. ഓരോ ദിവസവും ഓരോ മൂഡ് ആയിരിക്കും. ആ മൂഡിനനുസരിച്ച് നിറത്തോടുള്ള ഇഷ്ടവും മാറിക്കൊണ്ടിരിക്കും. നീല നിറം ഇഷ്ടമാണെങ്കിലും എല്ലാ ദിവസവും നീല ഡ്രസ്സ് ഇടാൻ താൽപര്യമുണ്ടാകില്ലല്ലോ. നിറവും മൂഡും കണക്ടായതു പോലെ തന്നെ ഇന്‍റിരിയറും, കംഫർട്ടും തമ്മിലും ബന്ധമുണ്ട്.
ഹോം സ്റ്റൈലിംഗ് ഒരു തുടർ പ്രക്രിയ എന്നു പറയാം. വ്യത്യസ്തമായ ആശയങ്ങൾ ഉപയോഗിച്ച് അത് കിടിലനാക്കാം. മുറിയുടെ സ്വഭാവമനുസരിച്ച് വേണം സെറ്റ് ചെയ്യാൻ.
ചിലപ്പോൾ ഒരു സ്പെയ്സ് എത്ര വിചാരിച്ചാലും ഭംഗിയാവണമെന്നില്ല. ഒരു മോശം ഫർണീച്ചർ, അല്ലെങ്കിൽ നാച്ചുറൽ വെളിച്ചത്തിന്‍റെ അഭാവം ഇതൊക്കെയായിരിക്കാം കാരണം. വീട് സുന്ദരമാക്കാൻ, ഊർജ്ജം നിറഞ്ഞതാക്കാൻ ചില കാര്യങ്ങൾ ശ്രദ്ധിച്ചാൽ മതി. അതിൽ ഏറ്റവും പ്രധാനപ്പെട്ടത് മുറിയിൽ പരമാവധി സൂര്യപ്രകാശം ലഭിക്കുക എന്നതാണ്. കടും നിറത്തിലുള്ള കർട്ടനുകൾ ഒഴിവാക്കി ഇളം ഷെയ്ഡുകൾ കൊണ്ടു വന്നാൽ മുറിയിൽ കൂടുതൽ വെളിച്ചം ഉണ്ടാകും. ഉറങ്ങുമ്പോൾ ഇരുട്ട് കൂടുതൽ വേണമെന്നുള്ളവർക്ക് ഒരു ഡാർക്ക് ലെയർ വേറെ ചേർത്തു വച്ചാൽ മതിയാവും.
തീം എന്ന രീതിയിൽ സ്പേസ് കാണുന്നതിനപ്പുറം കളർ ടോണിൽ വ്യത്യസ്ത ഘടകങ്ങൾ കൊണ്ടുവരാൻ ശ്രമിക്കുമ്പോൾ അതിശയകരമായ മാറ്റം ലഭിക്കും. ഫ്ളോറുമായി മാച്ച് ചെയ്യാത്ത കളർ പാലറ്റിലാണ് വർക്ക് ചെയ്യേണ്ടി വരുന്നതെങ്കിൽ റഗുകൾ ഉപയോഗിച്ച് ആ പ്രശ്നം പരിഹരിക്കാം. ഒട്ടും ലൈവ് അല്ലാത്ത ഇടങ്ങളിൽ ഒരു ലൈവ് എലമെന്‍റ് കൊണ്ടുവരാൻ പ്ലാന്‍റുകൾക്ക് കഴിയും. വീട്ടിനുള്ളിലെ വെളിച്ചത്തിൽ വളരാൻ കഴിയുന്ന ചെറിയൊരു ചെടി ആയാലും മതിയാവും. മുറിയിൽ ഒരുപാട് ഹെവി ഫീലിംഗ് ഉണ്ടാക്കുന്ന സാമഗ്രികൾ ഒഴിവാക്കുന്നതാണ് മറ്റൊരു കാര്യം. ദൈനംദിന പ്രവർത്തനങ്ങൾക്കനുസരിച്ച് ഫർണീച്ചറുകൾ റീ അറേഞ്ച് ചെയ്യാം.
മുറിയുടെ ഒരു ചിത്രം എടുത്തിട്ട് അതിൽ റീ വർക്ക് ചെയ്‌തു നോക്കി മികച്ച പാറ്റേൺ കണ്ടെത്തുകയുമാവാം. ഹോം സ്റ്റൈലിംഗ് ചെയ്യുമ്പോൾ ഉള്ള ആശ്വാസം അവിടെ പൊളിക്കലുകൾ ഒന്നും ഉണ്ടാക്കുന്നില്ല എന്നതു തന്നെയാണ്. പഴയ ഫർണീച്ചറുകൾ പോലും, മറ്റു പലതുമായി മിക്‌സ് ചെയ്ത് ഉപയോഗിക്കാൻ പറ്റും. വളരെ മോശം ആണെന്നു കണ്ടാൽ മാത്രമേ അതു മാറ്റാൻ നിർദ്ദേശിക്കാറുള്ളൂ.
“ആലപ്പുഴയിൽ ഞാൻ ഒരു പ്രോജക്ട് ചെയ്‌തിരുന്നു. ഒരു രീതിയിലും പൊളിക്കൽ സാധ്യമല്ലാത്ത ഒരു വീട്. ബാത്ത്റൂം മുതൽ കിച്ചൻ വരെ റീവർക്ക് ചെയ്യേണ്ടി വന്നു. അതിന് കണ്ടെത്തിയ മാർഗ്ഗം പൂർണ്ണമായും കസ്റ്റമൈസ് ചെയ്യുക എന്നതു തന്നെയായിരുന്നു. മാർക്കറ്റിലെ വില കുറഞ്ഞ സാധനങ്ങൾ വാങ്ങാതെ സ്വയം ഉണ്ടാക്കി ഉപയോഗിച്ചാൽ ചെലവു കുറയും, ഭംഗിയും സൗകര്യവും വർദ്ധിക്കുകയും ചെയ്യും.” വർഷ നിർദ്ദേശിക്കുന്നു.
പഴയ സ്റ്റൈലിൽ തേക്കു കൊണ്ടുള്ള ഫർണീച്ചറുകളായിരുന്നു ആ വീട്ടുകാർക്ക് ആവശ്യം. അതിനാൽ തേക്കിന്‍റെ സെക്കന്‍റ് ഹാന്‍റ് ഫർണീച്ചർ എടുത്ത് റീ പെയിന്‍റ് ചെയ്‌തു. അപ്പോൾ പഴയ ലുക്ക് കിട്ടി എന്നു മാത്രമല്ല, മികച്ച സ്റ്റൈൽ കൂടിയായി. ഫർണീച്ചർ ലിസ്റ്റ് ചെയ്ത് കാർപ്പെന്‍റർക്ക് എത്തിച്ച് റീ പോളിഷ് ചെയ്‌തു. സെക്കന്‍റ് ഹാന്‍റ് കിട്ടാത്തവ, യോജിച്ച കണ്ടംപററി ഡിസൈനുകൾ കണ്ടുപിടിച്ച് മിക്‌സ് ചെയ്‌തു. ജൂട്ട് റഗുകൾ ഫ്ളോറിൽ നിരത്തുകയും കസ്റ്റമൈസ്ഡ് ആർട്ട് വർക്കുകളും കർട്ടനുകളും മുറികളിൽ വരുകയും ചെയ്‌തതോടെ സ്റ്റൈൽ മാറി.
ഒരു സ്പേസിൽ എന്തു വച്ചാലും ഒരു യൂണിറ്റി കിട്ടണം. ചിതറിക്കിടക്കുന്ന ഫീൽ ഉണ്ടാക്കി റൂം സെറ്റ് ചെയ്യരുത്. അതിന് നാച്ചുറൽ കളറുകളിലുള്ള മെറ്റീരിയലുകൾ തന്നെയാണ് ഭംഗി. പഴയ വീടുകളിലെ ബ്ലാക്ക്, റെഡ് ഓക്സൈഡ്, വുഡ് ഇതിന്‍റെ ഒക്കെ നിറം തന്നെ ശ്രദ്ധിച്ചാൽ ആ മാറ്റം മനസ്സിലാകും. പണ്ടത്തെ വീടുകളിൽ പോകുമ്പോൾ ലഭിക്കുന്ന ഗുഡ് ഫീൽ, അത്തരം നാച്ചുറൽ കോമ്പിനേഷന്‍റെ പ്രത്യേകതയാണ്.
ബുക്ക് ഷെൽഫുകൾ എങ്ങനെ വേണം എന്നത് ഒരാളുടെ വായനാശീലത്തെ അനുസരിച്ചാണ്. അത്രയും കസ്റ്റമൈസ് ചെയ്താൽ ഓരോ ഇടവും മറ്റു സാമഗ്രികൾ കൊണ്ട് ഡംപ് ചെയ്യാതെ നോക്കാൻ പറ്റും. ബുക്ക് ഷെൽഫ് എപ്പോഴും കംഫർട്ടബിൾ സ്പേസിലായിരിക്കണം. രാത്രിയിലും ലൈറ്റ് ഭംഗിയായി ലഭിക്കുന്ന ഇടമായിരിക്കണം. ബെഡ് റൂമിനോടു ചേർന്നും റീഡിംഗ് കോർണർ സെറ്റ് ചെയ്യാം.
ഇന്‍റീരിയറിലും ഹോം സ്റ്റൈലിലും ട്രെന്‍റിനും പിന്നാലെ പോകുന്നതിൽ വലിയ കാര്യമില്ല. ആർക്കിടെക്ടിൽ മിനിമം എന്നൊരു കൺസെപ്റ്റ് ഇപ്പോൾ ഉണ്ട് എന്നതാണ് പ്രത്യേകത.
