ആരോടെങ്കിലും മനസ്സ് തുറന്ന് ഒന്ന് സംസാരിക്കാൻ കഴിഞ്ഞിരുന്നെങ്കിലെന്ന് ഇടയ്ക്ക് എപ്പോഴെങ്കിലും ആഗ്രഹിക്കാത്തവരായി ആരും കാണില്ല. മനസ്സിനുള്ളിലെ സന്തോഷത്തെയും സങ്കടങ്ങളെയും പറ്റി തുറന്ന് സംസാരിക്കാനും അതൊക്കെ നിറഞ്ഞ മനസ്സോടെ കേട്ടിരിക്കാനും തൊട്ടരികെ സ്നേഹനിർഭരമായ ഒരാൾ ഉണ്ടാവുകയെന്നാൽ അതിൽപ്പരം ഭാഗ്യം മറ്റൊന്നുമില്ല എന്ന് തന്നെ പറയാം. അത്തരം സൗഹൃദങ്ങൾ ഉണ്ടാവുകയെന്നത് ജീവിതത്തിലെ ഏറ്റവും വലിയ സൗഭാഗ്യമാണ്. ആ ഹൃദയബന്ധങ്ങൾ നൽകുന്ന കരുതലും സ്നേഹവും വിശ്വാസവും ഉറപ്പുമൊക്കെ വാക്കുകൾക്ക് അപ്പുറമായിരിക്കും. എന്നാൽ അത്തരം സൗഹൃദങ്ങൾ ഉള്ള ഭാഗ്യവാന്മാരും ഭാഗ്യവതികളും വിരലിൽ എണ്ണാവുന്നവർ മാത്രമായിരിക്കുമെന്നതാണ് ഒരു പ്രശ്‌നം. അല്ലെങ്കിൽ അങ്ങനെ വലിയ സൗഹൃദങ്ങൾ ഒന്നും കാത്തു സൂക്ഷിക്കാത്തവരോ സൗഹൃദങ്ങളെ സംശയത്തോടെ വീക്ഷിക്കുന്നവരോ ആയിരിക്കും പലരും. തീർത്തും ഒറ്റപ്പെട്ട മരങ്ങൾ കണക്കെ.
മറ്റൊന്ന് തിരക്കുപിടിച്ച ജീവിത സാഹചര്യം പലരേയും സൗഹൃദങ്ങളിൽ നിന്നും അകറ്റിനിർത്തുന്നുവെന്നതാണ്. ജോലി സമ്മർദ്ദവും ജീവിതപ്രശ്‌നങ്ങളും മിക്കവരെയും ഒറ്റപ്പെടലിലേക്ക് തള്ളിയിടുന്നതും സാധരണമായിരിക്കുന്നു. ജോലി സംബന്ധമായോ പഠന സംബന്ധമായോ വീട്ടിൽ നിന്നും അകന്നു താമസിക്കുന്നവരും ഒറ്റപ്പെട്ടുപോകാറുണ്ട്.
ഈ സാഹചര്യത്തിൽ സ്വന്തം വികാരങ്ങൾ പങ്കുവയ്ക്കാൻ മനസ്സിനിണങ്ങിയ ഒരു കൂട്ടുകാരിയോ കുട്ടുകാരനോ ഉണ്ടായിരുന്നുവെങ്കിൽ എന്ന് മിക്കവാറും ആഗ്രഹിച്ചേക്കാം. നല്ല സൗഹൃദങ്ങൾ വളർത്തിയെടുക്കുന്നതിലൂടെ മാനസികാരോഗ്യവും ശാരീരികാരോഗ്യവും മെച്ചപ്പെടുമെന്നാണ് മനഃശാസ്ത്രജ്‌ഞർ വിലയിരുത്തുന്നത്. നല്ല സൗഹൃദങ്ങൾക്കൊപ്പം സമയം ചെലവഴിക്കുന്നതിലൂടെ മസ്തിഷ്കത്തിൽ ആഹ്ളാദകരമായ അവസ്ഥ ജനിപ്പിക്കുന്ന എൻഡോർഫിനുകൾ ഉൽപാദിപ്പിക്കും.
തുറന്ന മനസ്സോടെ സംസാരിക്കാനുള്ള ശക്തി
വൈവിധ്യമാർന്ന കാഴ്ചപ്പാടുകളും ആശയങ്ങളും വിശ്വാസങ്ങളും കൂടുതലായി വർധിച്ചുകൊണ്ടിരിക്കുന്ന ഒരു ലോകത്ത് തുറന്ന മനസ്സോടെ സംസാരിക്കാനുള്ള കഴിവ് ഏറെ വിലപ്പെട്ടത് തന്നെയാണ്. തുറന്ന മനസ്സോടെയുള്ള ആശയവിനിമയം പരസ്പര ബഹുമാനം വളർത്തുന്നു. പഠനം സുഗമമാക്കുന്നു. വ്യക്‌തിപരവും തൊഴിൽപരവുമായ ബന്ധങ്ങൾ ശക്തിപ്പെടുത്തുന്നു.
തുറന്ന മനസ്സോടെ സംസാരിക്കുന്നതു കൊണ്ടുള്ള മെച്ചമെന്താണ്? അത് എത്രത്തോളം പ്രധാനമാണ്?
കർക്കശമായ പക്ഷപാതങ്ങളോ മുൻവിധികളോ അടഞ്ഞ മനോഭാവമോ ഇല്ലാതെ ചർച്ചകളെ സമീപിക്കുക എന്നതാണ്. മറ്റുള്ളവരുടെ കാഴ്‌ചപ്പാടുകൾ നമ്മുടേതിൽ നിന്ന് വ്യത്യസ്തമാണെങ്കിൽപ്പോലും അവരുടെ വീക്ഷണങ്ങൾ കേൾക്കാൻ മനസ്സൊരുക്കം കാണിക്കുന്നതും അതിൽ ഉൾപ്പെടും. ഒരൊറ്റ ആശയത്തിൽ എല്ലാ ഉത്തരങ്ങളും ഉണ്ടാകണമെന്നില്ല. മറ്റുള്ളവരുടെ വെല്ലുവിളിയുയർത്തുന്ന വിഭിന്നമായ ആശയങ്ങളുമായി ഇടപഴകാൻ തയ്യാറാണെന്ന് തുറന്ന ആശയവിനിമയക്കാർ തിരിച്ചറിയുന്നിടത്ത് സൗഹൃദങ്ങൾ പൂത്തുലയും. ആശയങ്ങൾ സ്വതന്ത്രമായും ക്രിയാത്മകമായും കൈമാറാൻ കഴിയുന്ന ഒരു ഇടം സൃഷ്ടിക്കുക എന്നതാണ് ഇതുകൊണ്ട് ഉദ്ദേശിക്കുന്നത്.
മനസ്സ് തുറന്ന് സംസാരിക്കുന്നതിന്‍റെ പ്രയോജനങ്ങൾ
മികച്ച ധാരണ വളർത്തിയെടുക്കാം: തുറന്ന മനസ്സോടെ ആശയവിനിമയം നടത്തുമ്പോൾ മറ്റുള്ളവരുടെ കാഴ്ചപ്പാടുകളും അനുഭവങ്ങളും പൂർണ്ണമായി മനസ്സിലാക്കാൻ നാം നമ്മെത്തന്നെ പരുവപ്പെടുത്തുകയാണ് ചെയ്യുന്നത്. ഇത് കൂടുതൽ സഹാനുഭൂതിയിലേക്ക് നയിക്കുന്നു. ശക്തവും മാന്യവുമായ ബന്ധങ്ങൾ കെട്ടിപ്പടുക്കുന്നതിന് ഇത് ഏറ്റവുമാവശ്യമാണ്. സൗഹൃദങ്ങളിലോ ജോലി സ്‌ഥലങ്ങളിലോ കമ്മ്യൂണിറ്റികളിലോ ആകട്ടേ തുറന്ന മനസ്സോടെയുള്ള സമീപനത്തിന് വ്യത്യസ്‌ത വീക്ഷണങ്ങൾ തമ്മിലുള്ള വിടവുകൾ നികത്താനും സഹകരണം പ്രോത്സാഹിപ്പിക്കാനും കഴിയും. വൈവിധ്യങ്ങളിൽ ഐക്യം ഊട്ടിയുറപ്പിക്കാൻ ഇത്തരക്കാർക്ക് സാധിക്കും.
വ്യക്തിഗത വളർച്ചയെ പ്രോത്സാഹിപ്പിക്കുന്നു: നമ്മുടേതിൽ നിന്ന് വ്യത്യസ്തമായ ആശയങ്ങളുമായി ഇടപഴകുന്നത് ചിലപ്പോഴെങ്കിലും അസ്വസ്ഥതയുണ്ടാക്കാം. എന്നാൽ ബൗദ്ധികമായും വൈകാരികമായും വളരാനുള്ള ഏറ്റവും ഫലപ്രദമായ മാർഗ്ഗം കുടിയാണിതെന്ന് ഓർക്കുക. തുറന്ന മനസ്സോടെയുള്ള സംഭാഷണങ്ങൾ നമ്മുടെ വിശ്വാസങ്ങളെ പുനർമൂല്യനിർണയം ചെയ്യാൻ സഹായിക്കുകയും വിമർശനാത്മകമായി ചിന്തിക്കാൻ നമ്മെ അത് പ്രേരിപ്പിക്കുകയും ചെയ്യും.
പൊരുത്തക്കേടുകളും തെറ്റിദ്ധാരണയും കുറയ്ക്കുന്നു: ഇത് സത്യം തന്നെയല്ലേ. പല സംഘർഷങ്ങളും പരസ്പര ധാരണ ഇല്ലായ്മ‌കൊണ്ടാണ് ഉടലെടുക്കുന്നത്. അടഞ്ഞ ചിന്താഗതിയോടെ സംഭാഷണങ്ങളെ സമീപിക്കുമ്പോൾ മറ്റുള്ളവരുടെ ഉദ്ദേശ്യങ്ങളെയോ കാഴ്‌ചപ്പാടുകളെയോ പലപ്പോഴും നമ്മൾ തെറ്റിദ്ധരിക്കും. ഇത് തർക്കങ്ങൾക്കും നിരാശയ്ക്കും ഇടവരുത്തുമെന്ന് പറയേണ്ടതില്ലല്ലോ. നേരെമറിച്ച് തുറന്ന മനസ്സോടെ നിലകൊള്ളുമ്പോൾ ആരോഗ്യകരമായ സംവാദത്തിൽ ഏർപ്പെടാനും പൊതുവായ ആശയങ്ങൾ കണ്ടെത്താനും അഭിപ്രായവ്യത്യാസങ്ങളെ ക്രിയാത്മകമായി പരിഹരിക്കാനും സാധ്യതയുണ്ടെന്ന് അറിയുക.
സഹകരിച്ചുള്ള പ്രശ്‌നപരിഹാരം: പ്രശ്നപരിഹാരത്തിൽ പ്രത്യേകിച്ച് ഗ്രൂപ്പ് ക്രമീകരണങ്ങളിൽ തുറന്ന മനസ്സോടെയുള്ള ചർച്ചകൾ അത്യന്താപേക്ഷിതമാണ്. വ്യക്തികൾ വൈവിധ്യമാർന്ന ആശയങ്ങൾ കേൾക്കാൻ മനസ്സ് കാട്ടുമ്പോൾ സ്വന്തം അഭിപ്രായങ്ങൾക്ക് ഉപരിയായി മറ്റുള്ളവരെ ശ്രവിക്കാനും ഉൾക്കൊള്ളാനും കൂട്ടായ ചർച്ചകൾക്ക് സാധിക്കും. ജോലിസ്‌ഥലത്തുള്ള ഒരു ടീമിലായാലും ഒരു കമ്മ്യൂണിറ്റി പ്രോജക്റ്റിലായാലും അല്ലെങ്കിൽ ഒരു കുടുംബ ചർച്ചയിലായാലും തുറന്ന സമീപനം ശരിയായ ചിന്തയ്ക്കും സർഗ്ഗാത്മകതയ്ക്കും അടിത്തറ സൃഷ്ടിക്കും.
തുറന്ന മനസ്സോടെയുള്ള ആശയവിനിമയങ്ങൾ എങ്ങനെ വളർത്താം
സജീവമായി കേൾക്കുക: തുറന്ന മനസ്സോടെയുള്ള ആശയവിനിമയത്തിന്‍റെ അടിസ്ഥഥാനം തന്നെ ശ്രദ്ധയോടെ ശ്രവിക്കുകയെന്നതാണ്. ഇതിനർത്ഥം സ്പ‌ീക്കർക്ക് പൂർണ്ണ ശ്രദ്ധ നൽകുക. അവരുടെ വാക്കുകൾ ശ്രവിക്കുക എന്നൊക്കെയാണ്. പ്രതികരിക്കുന്നതിന് മുമ്പായി അവരുടെ കാഴ്ചപ്പാട് മനസ്സിലാക്കാൻ ശ്രമിക്കുക. ഈ ഒരു അടിസ്‌ഥാന തത്വം പരിശീലിക്കുന്നതിലൂടെ സംസാരിക്കാനുള്ള ഊഴത്തിനായി കാത്തിരിക്കുകയല്ല. മറിച്ച് പറയുന്ന കാര്യങ്ങളുമായി ഇടപഴകുകാണെന്ന് നിങ്ങൾക്ക് ഉറപ്പാക്കാനാകും.
ജിജ്‌ഞാസുക്കളായിരിക്കുക വിധിക്കരുത്: തുറന്ന മനസ്സുള്ളവർ ഏറെ ജിജ്‌ഞാസയുള്ളവരായിരിക്കും. വിചിത്രമെന്നോ അസ്വാസ്‌ഥ്യമുളവാക്കുന്നതെന്നോ തോന്നുന്ന ആശയങ്ങളെ തള്ളിക്കളയുന്നതിനുപകരം കാര്യങ്ങളെ ആഴത്തിൽ പഠിക്കാൻ ശ്രമിക്കും. സ്വന്തമായ നിഗമനങ്ങളിൽ എത്തിച്ചേരുന്നതിന് മുമ്പായി കൂട്ടുകാരനോ കൂട്ടുകാരിക്കോ വിശദീകരിക്കാൻ കഴിയുന്ന രീതിയിൽ ചോദ്യങ്ങൾ ചോദിക്കുക.
സഹാനുഭൂതി പരിശീലിക്കുക: മറ്റുള്ളവരുടെ വികാരങ്ങൾ മനസ്സിലാക്കാനും പങ്കിടാനും സഹാനുഭൂതി എന്ന വികാരത്തിനുള്ള പങ്ക് വളരെ വലുതാണ്. തുറന്ന മനസ്സോടെയുള്ള സംഭാഷണത്തിൽ ഏർപ്പെടുമ്പോൾ അവരുടെ സ്ഥാനത്തു നിന്നുകൊണ്ട് ചിന്തിക്കുക. പ്രത്യേകിച്ചും അവരുടെ വിശ്വാസങ്ങളോ അനുഭവവങ്ങളോ നിങ്ങളുടേതിൽ നിന്ന് വ്യത്യസ്ത‌മാണെങ്കിൽ. ഇത് സൗഹൃദത്തെ ശക്‌തിപ്പെടുത്തും.
സമചിത്തത പാലിക്കുക: ശാന്തമായും ബഹുമാനത്തോടെയും തുറന്ന മാനസികാവസ്‌ഥ ഉള്ളവർക്ക് വൈകാരിക നിയന്ത്രണം ആവശ്യമാണ്. വ്യത്യസ്‌ത അഭിപ്രായങ്ങൾ ഉൾപ്പെടുന്ന സംഭാഷണങ്ങൾ ചൂടുപിടിച്ചേക്കാം. പ്രത്യേകിച്ചും രാഷ്ട്രീയമോ മതമോ സാമൂഹിക പ്രശ്‌നങ്ങളോ പോലുള്ള സെൻസിറ്റീവ് വിഷയങ്ങൾ ആണെങ്കിൽ. നിങ്ങളുടെ സ്വന്തം കാഴ്‌ചപ്പാടുകളെ വെല്ലുവിളിക്കുന്ന തരത്തിലുള്ള ആശയങ്ങളെ അഭിമുഖീകരിക്കുമ്പോൾ പോലും ശാന്തമായും ബഹുമാനത്തോടെയും സമചിത്തതയോടെയും നിലകൊള്ളേണ്ടത് അത്യാവശ്യമാണ്. ഇത് മനുഷ്യനിലുണ്ടാകേണ്ട ഏറ്റവും നല്ല ക്വളിറ്റിയാണ്.
വിയോജിപ്പുകൾ മാന്യമായി സ്വീകരിക്കുക: നിങ്ങൾ എല്ലായ്പ്പോഴും വിയോജിപ്പുകളെ അനുകൂലിക്കണമെന്നല്ല തുറന്ന മനസ്സോടെയുള്ള ആശയവിനിമയം കൊണ്ട് അർത്ഥമാക്കുന്നത്. വാസ്‌തവത്തിൽ, തുറന്ന സംഭാഷണത്തിന്‍റെ സ്വാഭാവികവും ആരോഗ്യകരവുമായ ഭാഗമാണ് വിയോജിപ്പ് എന്നോർക്കുക. ശത്രുതയോ അവഹേളനമോ ഇല്ലാതെ ക്രിയാത്മകമായി വിയോജിക്കുക എന്നതാണ് ലക്ഷ്യം. വ്യത്യസ്‌ത വീക്ഷണങ്ങൾ സ്വാഭാവികമാണെന്നും അത് മനുഷ്യ ഇടപെടൽ സജീവമാക്കുന്നതിന്‍റെ ഭാഗമാണെന്നും ഓർക്കുക.
സജീവമായ സൗഹൃദം: സജീവമായ സൗഹൃദം എന്നാൽ സമയം നന്നായി ചെലവഴിക്കുക എന്നാണ്. നല്ല സൗഹൃദങ്ങളിൽ സമയം കടന്നുപോകുന്നത് അറിയുകയേയില്ല. ഓരോ നിമിഷവും ആസാദ്യകരമായിരിക്കും. ഉറ്റസുഹൃത്തിനൊപ്പം ഒരു വീക്കൻഡ് ഷോപ്പിംഗിനോ തീയേറ്ററിലോ പോകുന്നതോ ആസൂത്രണം ചെയ്യാം. അല്ലെങ്കിൽ പുറത്തുപോയി ഇഷ്ടഭക്ഷണം കഴിച്ചു സൗഹൃദം വിളക്കി ചേർക്കാം. ഇത്തരം ഒത്തുകൂടലുകൾ മനസ്സ് തുറന്നുളള സംസാരങ്ങൾക്ക് വഴി വയ്ക്കും. ഒരുമിച്ചുള്ള ആഹ്ളാദകരമായ ഇത്തരം വേളകൾക്ക് മനഃപൂ ർവമെങ്കിലും സമയം കണ്ടെത്താം. പൊതുവായ ഇഷ്‌ടങ്ങൾ കണ്ടെത്തി അവയ്ക്ക് സമയം ചെലവഴിക്കുന്നത് സൗഹൃദത്തിനെ കൂടുതൽ ആഴമുള്ളതാക്കും. എല്ലാറ്റിനുമുപരി പരസ്‌പരം മനസിലാക്കാനും ഉൾക്കൊള്ളാനുമുള്ള വഴികൾ തുറന്നു കിട്ടും എന്നതാണ്.
ഇന്നത്തെ ആഗോളവൽക്കരിക്കപ്പെട്ട ലോകത്ത് ഉൾക്കൊള്ളലും ഐക്യവും വളർത്തുന്നതിന് തുറന്ന മനസോടെയുള്ള സമീപനം വളരെ പ്രധാനമാണ്. ആളുകൾ തുറന്ന മനസ്സോടെയുള്ള സംഭാഷണങ്ങളിൽ ഏർപ്പെടുമ്പോൾ വൈവിധ്യമാർന്ന കമ്മ്യൂണിറ്റികൾ പിറവി കൊള്ളും. വ്യത്യസ്‌ത സാംസ്ക്കാരിക വീക്ഷണങ്ങൾ, സാമൂഹിക മാനദണ്ഡങ്ങൾ, ജീവിതരീതികൾ എന്നിവ ഉൾക്കൊള്ളുന്നതിലൂടെ സമൂഹം മൊത്തത്തിൽ കൂടുതൽ സ്വീകാര്യമാകും. കൂടുതൽ നല്ല സൗഹൃദങ്ങൾ രൂപം കൊള്ളുകയും ചെയ്യും.
