1894 -ലാണ് ഗോധുവും ലാൽജിയും ചേർന്ന് ലാൽജിഗോധു ആൻഡ് കമ്പനി സ്‌ഥാപിക്കുന്നത്. തലമുറകളെയും പൈതൃകത്തെയും സമന്വയിപ്പിച്ചു കൊണ്ടുള്ള മനോഹരമായ ഒരു യാത്രയായിരുന്നു പിന്നീട് അങ്ങോട്ട്. മറ്റുള്ളവരിൽ നിന്നും തികച്ചും വ്യത്യസ‌മായിരുന്നു അവരുടെ ലക്ഷ്യം. ആ ലക്ഷ്യം കായത്തിന്‍റെ ഒരു “കട്ടയിൽ” നിന്നാണ് തുടങ്ങിയത്. മുംബൈയിൽ നിന്ന് ആരംഭിച്ച് ആറ് തലമുറകൾ കടന്ന ഈ ബിസിനസ്സിന്‍റെ പ്രശസ്ത‌ി ഇന്ത്യയിൽ മാത്രമല്ല ലോകമെമ്പാടും പരന്നു.
ഇന്ന് എല്ലാ വീടിന്‍റെയും അടുക്കളയിൽ ഒഴിച്ചുകൂടാനാവാത്ത ഒന്നായി മാറിയിരിക്കുന്നു ലാൽജി ഗോധൂ കായം. ഇതിന്‍റെ രുചി സ്‌പർശമില്ലാത്ത ഒരു വിഭവവും ഇല്ലെന്നു തന്നെ പറയാം. ലോകമെമ്പാടും കായപ്പെരുമ എത്തിക്കുകയെന്നുള്ളത് ഈ വ്യവസായകുടുംബത്തിന് എളുപ്പമായിരുന്നോ? അതും അത്യാധുനിക യന്ത്രങ്ങളോ സാങ്കേതിക വിദ്യയോ ഇല്ലാതിരുന്നപ്പോൾ കൈ കൊണ്ടു കുഴച്ചു രുചിസമ്പന്നവും സുഗന്ധപൂരിതവുമാക്കിയാണ് ഓരോ ഉൽപന്നവും അക്കാലത്ത് വിപണിയിൽ എത്തിച്ചിരുന്നത്. ഈ കുടുംബ ബിസിനസ്സിന്‍റെ പാരമ്പര്യം ഇപ്പോൾ വിജയകരമായി മുന്നോട്ടു നയിക്കുന്ന അമ്മ ഹീന മെർച്ചന്‍റും മകൾ റിധി മെർച്ചന്‍റും തങ്ങളുടെ ജൈത്രയാത്രയെക്കുറിച്ച് സംസാരിക്കുന്നു.
ചോ: ലാൽജി കായം ബിസിനസ്സിന്‍റെ തുടക്കം എങ്ങനെ ആയിരുന്നു?
ഉ: ആറ് തലമുറകളായി പ്രവർത്തിച്ചു വരുന്ന ബിസിനസ്സാണിത്. തുടക്കം വളരെ രസകരമായിരുന്നു. ലാൽജി ഗോധുവാണ് കമ്പനി സ്‌ഥാപിച്ചത്. അദ്ദേഹത്തിന്‍റെ ആശയമാണ് ഈ കമ്പനിയ്ക്ക് അടിത്തറയായത്. ഒരു ദിവസം മുംബൈയിലെ മസ്‌ജിദ് ബന്ദറിലേക്കുള്ള യാത്രാമധ്യേ അദ്ദേഹം പലതരം സാധനങ്ങൾ വിൽക്കുന്ന ഒരു പഠാനെ കണ്ടുമുട്ടി. അയാളിൽ നിന്നും അദ്ദേഹം കുറച്ചു കായം വാങ്ങി കൊണ്ടു വന്നു. അതെന്താണ് എങ്ങനെയാണ് അത് ഉപയോഗിക്കുക എന്നിങ്ങനെയുള്ള കാര്യങ്ങളെക്കുറിച്ചു ചിന്തിക്കാൻ തുടങ്ങി. അദ്ദേഹം ആ കായം സംസ്കരിച്ച് കട്ട രൂപത്തിലാക്കി കൊട്ടയിൽ കൊണ്ടു നടന്നുവിൽക്കാൻ തുടങ്ങി. അങ്ങനെയാണ് കായത്തിന്‍റെ യാത്ര ആരംഭിക്കുന്നത്. ക്രമേണ അത് ദക്ഷിണേന്ത്യയിൽ ആദ്യമായി അവതരിപ്പിച്ചു. ദക്ഷിണേന്ത്യക്കാർ വർഷങ്ങളായി വിഭവങ്ങളിൽ കായം ചേർക്കുന്നതായിരുന്നു അതിനു കാരണം. കായം കൂടുതൽ പ്രചാരത്തിലായതോടെ ഫാക്ടറിയും ആരംഭിച്ചു. അടിസ്ഥാനപരമായി ഗോധു ആണ് കായം കണ്ടെത്തിയത്. ലാൽജി വന്നതിനുശേഷം “ലാൽജി ഗോധ്ര ആൻഡ് കമ്പനി” എന്ന പേര് നൽകുകയായിരുന്നു. അതിനു ശേഷം ഖിംജി മെർച്ചന്‍റ്, അജിത് മെർച്ചന്‍റ്, വിമൽ മെർച്ചന്‍റ്, ഹീന, മകൾ റിധി എന്നിവരായി ചുമതലക്കാർ. തമിഴ്‌നാട്ടിലെ കുംഭകോണത്തുള്ള ഒരു ചെറിയ ഫാക്‌ടറിയിൽ നിന്ന് തുടങ്ങിയ ബിസിനസ്സ് ഇന്നിപ്പോൾ ഇവിടെ എത്തി നിൽക്കുന്നു.
ചോ: ഇപ്പോൾ ഇത് ലക്ഷക്കണക്കിന് ആളുകളുടെ അടുക്കളയുടെ ഭാഗമായിരിക്കുന്നു. ഇതുമായി ബന്ധപ്പെട്ട രസകരമായ കാര്യങ്ങൾ പറയാമോ?
ഉ: ലോകമെമ്പാടുമുള്ള ധാരാളം ആളുകൾ കായം കഴിക്കുന്നുണ്ടെന്ന കാര്യം എന്നെ അത്ഭുതപ്പെടുത്തുകയാണ്. മോര്, ചട്‌ണി, മരുന്ന് എന്നിങ്ങനെയുള്ള രീതികളിൽ ഇത് ഉപയോഗിക്കുന്നു. ഗ്യാസ് സംബന്ധമായ പ്രശ്നത്തിന് കുഞ്ഞുങ്ങൾക്ക് വരെ ഇത് നൽകുന്നു.
ചോ: ബിസിനസ്സ് വിജയകരമായ നിലയിൽ എത്തിക്കുന്നതിന് നേരിട്ട വെല്ലുവിളികളെ എങ്ങനെയാണ് പരിഹരിച്ചത്?
ഉ: വളരെ ചെറുപ്പം തുടങ്ങി ഞാൻ അമ്മയ്ക്കൊപ്പം കമ്പനി പരിപാടികൾക്ക് പോകാറുണ്ടായിരുന്നു. കായത്തിന്‍റെ പ്രോസസ്സിംഗും മറ്റും കണ്ടപ്പോൾ എനിക്ക് ഈ മേഖലയിൽ താൽപര്യം വർധിച്ചു. കൂടാതെ എന്‍റെ അമ്മ വളരെക്കാലമായി ഇതിൽ പ്രവർത്തിക്കുന്നു. സ്വന്തം കഠിനാധ്വാനം കൊണ്ട് വിറ്റു വരവ് കോടികളിൽ എത്തിച്ചു. അത് അഭിമാനകരമാണ്. 50 വർഷങ്ങൾക്കു മുമ്പ് കമ്പനിയ്ക്ക് മത്സരം കുറവായിരുന്നു. പിന്നീട് സ്ഥാപനങ്ങൾ വർദ്ധിച്ചതോടെ കമ്പനിയെ ദേശീയതലത്തിൽ ജനപ്രിയമാക്കി നിലനിർത്തുന്നത് എളുപ്പമായിരുന്നില്ല. എന്നാൽ തുടർച്ചയായ ഗവേഷണത്തിലൂടെ ഞങ്ങൾ പുതിയ ഉൽപ്പന്നങ്ങൾ വിപണിയിൽ അവതരിപ്പിക്കാൻ ശ്രമിച്ചു. ഇതിൽ ലാൽജി ഗോധൂ മസാലകളും ഉൾപ്പെടുന്നുണ്ട്.
മാത്രമല്ല, കായം കൂടുതലും മിഡിൽ ഈസ്റ്റിൽ നിന്നാണ് വരുന്നത്. അവിടങ്ങളിൽ രാഷ്ട്രീയ അസ്‌ഥിരതയുണ്ട്. അതിനാൽ അസംസ്കൃത വസ്‌തുക്കളുടെ വിലയും സംഭരണവും വലിയൊരു വെല്ലുവിളിയാണ്.
ചോ: വിപണി മത്സരാധിഷ്‌ഠിതമായതിനാൽ എങ്ങനെയാണ് ഉൽപ്പന്നത്തിന്‍റെ ഗുണനിലവാരവും ഉപഭോക്താക്കളുടെ വിശ്വാസവും നിലനിർത്തുന്നത്?
ഉ: ബിസിനസ്സിൽ ഉൽപ്പന്നത്തിന്‍റെ വിശ്വാസ്യത നിലനിർത്തുന്നത് എളുപ്പമാണ്. ഗുണനിലവാരത്തിൽ എനിക്ക് വലിയ വിശ്വാസമുണ്ട്. അത് പരിപാലിക്കുകയെന്നത് വലിയ കാര്യമാണ്. കാരണം അവയെല്ലാം പ്രകൃതിദത്തമാണ്. ഒരുതരത്തിലുമുള്ള രാസവസ്‌തുക്കളും ഇതിൽ ഉപയോഗിക്കുന്നില്ല. കാലാവസ്‌ഥ വ്യതിയാനങ്ങൾ പ്രകൃതിദത്ത കായക്കറയുടെ ഗുണമേന്മയിൽ മാറ്റം വരുത്തും. അതിനാൽ വരുന്ന കായ ഡ്രമ്മുകളുടെയെല്ലാം ക്വാളിറ്റി ചെക്ക് ചെയ്തു മോശമായത് റിജെക്റ്റ് ചെയ്യേണ്ടി വരും. അതിനായി വലിയ ഒരു ടീം തന്നെയുണ്ട്. അഫ്ഗാനിസ്ഥാൻ, ഉസ്ബെക്കിസ്‌ഥാൻ, കസാഖിസ്‌ഥാൻ തുടങ്ങിയ പല സ്‌ഥലങ്ങളിൽ നിന്നുമാണ് അസഫോയിറ്റിഡ (കായം) സംഭരിക്കുന്നത്. ഇതിൽ പ്രയോഗിക്കുന്ന “ഗം” സുഡാനിൽ നിന്നാണ് വാങ്ങുന്നത്.
ചോ: വ്യാജ ഉൽപ്പന്നങ്ങൾ പോലുള്ള പ്രശ്ന‌ങ്ങളെ എങ്ങനെയാണ് നേരിടുന്നത്?
ഉ: (ചിരിക്കുന്നു) ഞങ്ങളുടെ സ്വന്തം കമ്പനിയാണ് ഇത്. എല്ലാ കാര്യത്തിലും സൂക്ഷ്‌മത പുലർത്തുന്നു. കായത്തിന്‍റെ രുചിയും സുഗന്ധവും നിലനിർത്തുക, നമ്മളിൽ വിശ്വാസം അർപ്പിച്ച ഉപഭോക്താക്കളിൽ അത് എത്തിക്കുക തുടങ്ങിയ കാര്യങ്ങൾ ഞങ്ങളുടെ ഉത്തരവാദിത്തമാണ്. നമ്മുടെ ഉൽപ്പന്നങ്ങളെ കോപ്പിയടിച്ച് ഗുണവിലവാരമില്ലാത്ത അസംസ്കൃത വസ്‌തുക്കളിൽ നിന്നും ഉൽപ്പന്നങ്ങൾ തയ്യാറാക്കി വിപണിയിൽ ഇറക്കുന്നത് ആളുകളിൽ ആരോഗ്യപ്രശ്നങ്ങൾ ഉണ്ടാക്കും. ഇതിൽ നിന്നുള്ള പരിരക്ഷയ്ക്ക് നിയമ സഹായം, സാങ്കേതിക വിദ്യയുടെ പിന്തുണ, എൽജി ആപ്പ് എന്നീ മാർഗ്ഗങ്ങൾ ഉണ്ട്. അതിലൂടെ ഉപഭോക്താക്കൾക്കും ഉൽപ്പന്നത്തിന്‍റെ ഗ്യാരണ്ടി സ്കാൻ ചെയ്യാനും നേരിട്ട് വാങ്ങാനും സാധിക്കും.
ചോ: കായ നിർമ്മാണത്തിന്‍റെ ഘട്ടങ്ങളെക്കുറിച്ച് വിശദീകരിക്കാമോ?
ഉ: വ്യത്യസ്തതരം കായങ്ങൾ (അസഫോയിറ്റിഡ) ഉണ്ട്. അവ ഒരേ അനുപാതത്തിൽ ചേർത്ത് അന്തിമ ഉൽപ്പന്നം തയ്യാറാക്കുകയാണ് ചെയ്യുക. ആട്ട പോലെ കുഴച്ചശേഷം വെള്ളത്തിൽ കലർത്തി പൗഡർ രൂപത്തിൽ ഉണക്കി എടുക്കുകയാണ് ചെയ്യുക. ഉണക്കുന്നതിന് ഹീറ്റർ ഉപയോഗിക്കുന്നു. പൗഡർ, കട്ട എന്നീ രൂപത്തിലാണ് കായം വരുന്നത്. പൗഡർ രൂ പത്തിലുള്ളത് ഈസി ആയി ഉപയോഗിക്കാം. ദക്ഷിണേന്ത്യയിൽ ഉള്ളവർ കട്ട രൂപത്തിലുള്ള കായമാണ് അധികവും ഉപയോഗിക്കുക.
ചോ: വിദേശ രാജ്യങ്ങളിൽ എവിടെയാണ് ലാൽജി ഗോധു കായം ലഭിക്കുക?
ഉ: യുഎഇ, അമേരിക്ക, ഓസ്ട്രേലിയ, യുകെ, ജപ്പാൻ, തുടങ്ങി മിക്ക
രാജ്യങ്ങളിലും എൽജി കായം ലഭിക്കും.
ചോ: ബ്രാൻഡിന്‍റെ ഭാവി പരിപാടികൾ എന്തൊക്കെയാണ്?
ഉ: എൽജി ഉൽപ്പന്നങ്ങളുടെ റേഞ്ച് വർദ്ധിപ്പിക്കാനാണ് പദ്ധതി. കേരളം, കർണ്ണാടക എന്നിവിടങ്ങളിലെ രുചി മുൻനിർത്തി ഉൽപ്പന്നങ്ങൾ ഇറക്കാനാണ് ലക്ഷ്യം.
ചോ: വനിതാ ദിനത്തിൽ വനിതകൾക്കു നൽകാൻ ആഗ്രഹിക്കുന്ന സന്ദേശം?
ഉ: കുടുംബത്തിന് പുറത്തുള്ള എല്ലാ ജോലിയും ചെയ്യാൻ ഇന്ന് സ്ത്രീകൾക്ക് കഴിയുന്നുണ്ട്. അവൾ എല്ലാ മേഖലയിലും മികച്ച രീതിയിൽ പ്രവർത്തിക്കുന്നു. തീരുമാനം എടുക്കാൻ കഴിവുള്ളവൾ. ഏത് തീരുമാനത്തിലും അവളുടെ പങ്കാളിത്തം വളരെ പ്രധാനമാണ്. ഇക്കാര്യം കുടുംബവും സമൂഹവും മനസ്സിലാക്കണം.
