ഗർഭകാലം സന്തോഷത്തിന്‍റെയും ആശങ്കകളുടെയും കാലമാണ്. ഗർഭകാലത്ത് ആവശ്യമായ പരിചരണങ്ങൾ സ്വീകരിക്കാതിരിക്കുന്നവരിലും കൃത്യസമയത്ത് ചികിത്സ നടത്താത്തവരിലുമാണ് പ്രസവ സമയം ഏറെ അപകടം പിടിച്ചതാവുന്നത്. അതുകൊണ്ട് ഈ സമയത്ത് വളരെയേറെ ശ്രദ്ധ പാലിക്കണം. പ്രസവം സുഖകരവും സുരക്ഷിതവുമാക്കാൻ ഇത് സഹായിക്കും.
ഗർഭകാലത്ത് ശരീരം ധാരാളം മാറ്റങ്ങൾക്ക്‌ വിധേയമാകുന്നു. ഇത്തരം മാറ്റങ്ങളെക്കുറിച്ച് കൃത്യസമയത്ത് ഡോക്‌ടറെ അറിയിച്ചിരിക്കണം. അങ്ങനെ ചെയ്യുന്ന പക്ഷം പ്രസവ സമയത്തനുഭവപ്പെടുന്ന പല പ്രശ്നങ്ങളും ഒഴിവാക്കാനാകും. ഏതെങ്കിലും പ്രശ്നങ്ങളുണ്ടായി തുടങ്ങുമ്പോഴേ ശരീരം അതിന്‍റെ ലക്ഷണങ്ങൾ കാട്ടിത്തുടങ്ങുമെന്നാണ് ഡോക്‌ടർമാർ അഭിപ്രായപ്പെടുന്നത്. ഇത്തരം ലക്ഷണങ്ങളെ അവഗണിക്കുകയാണെങ്കിൽ ഗുരുതരമായ പ്രശ്നങ്ങളുണ്ടാകാം.
സുരക്ഷിതമായ പ്രസവത്തിന്
- ഗർഭകാലത്ത് കൂടെക്കൂടെ മൂത്രമൊഴിക്കാൻ തോന്നുന്നത് ഗുരുതരമായ പ്രശ്നമല്ല. ഗർഭാശയം വികസിക്കുന്നതിന് അനുസരിച്ച് മൂത്രാശയത്തിലുണ്ടാകുന്ന സമ്മർദ്ദത്തെ തുടർന്നാണ് ഇങ്ങനെ സംഭവിക്കുന്നത്. എന്നാൽ മൂത്രമൊഴിക്കുമ്പോൾ നീറ്റലോ മറ്റോ അനുഭവപ്പെടുകയാണെങ്കിൽ ഡോക്‌ടറുടെ അഭിപ്രായം ആരായാം.
- ഗർഭകാലത്ത് ഛർദ്ദിക്കാൻ തോന്നുന്നത് സ്വാഭാവികമാണ്. 50% കേസുകളിലും ഗർഭിണികൾ രാവിലെ ഉണർന്നെഴുന്നേറ്റാലുടൻ ഛർദ്ദിക്കുന്നു. ദിവസം മുഴുവൻ ഛർദ്ദി നീണ്ടുനില്‌ക്കുകയാണെങ്കിൽ ഡോക്‌ടറെ കാണാൻ മറക്കരുത്.
- ഗർഭകാലത്ത് മലബന്ധമുണ്ടാകുന്നതും സ്വാഭാവികമാണ്. ഭക്ഷണ കാര്യങ്ങളിൽ അല്‌പം ശ്രദ്ധ പാലിച്ചാൽ ഈ പ്രശ്നം ഒഴിവാക്കാവുന്നതേയുള്ളൂ. ദ്രവ രൂപത്തിലുള്ള ഭക്ഷണം കഴിക്കാം. മാത്രമല്ല, നാരുള്ള പഴങ്ങളും പച്ചക്കറികളും ധാരാളമായി കഴിക്കുന്നതും ഈ പ്രശ്നമൊഴിവാക്കും.
- ഗർഭസ്‌ഥ ശിശുവിന്‍റെ വളർച്ച അരക്കെട്ടിനെയും എല്ലുകളെയും സ്വാധീനിക്കും. തത്ഫലമായി ശരീരത്തിലും അരക്കെട്ടിലും വേദന അനുഭവപ്പെടും. ഇതിൽ നിന്നും രക്ഷനേടുന്നതിനായി സ്ലിപ്പറുകൾ അണിയാം. നടപ്പിലും ഇരുപ്പിലും അല്‌പം ശ്രദ്ധ പാലിക്കണം. ഡോക്‌ടറുടെ നിർദ്ദേശമനുസരിച്ച് വ്യായാമം ചെയ്യുന്നതിലൂടെ ഇപ്രകാരമുള്ള വേദനയിൽ നിന്നും മോചനം നേടാം.
- ഗർഭകാലത്തെ നെഞ്ചെരിച്ചിൽ ചിലർ ഹൃദ്‌രോഗമായി തെറ്റിദ്ധരിക്കാറുണ്ട്. ഇതിന് ഹൃദ്‌രോഗവുമായി യാതൊരു ബന്ധവുമില്ല. എരിവുള്ളതും വറുത്തതും പൊരിച്ചതുമായ ഭക്ഷണം ഒഴിവാക്കിയും ഇടവിട്ട് ഭക്ഷണം കഴിച്ചും രാത്രിയിൽ ചൂടുപാൽ കുടിച്ചും ഒരുപരിധി വരെ നെഞ്ചെരിച്ചിൽ തടയാം. കിടക്കുമ്പോൾ തലയിണവെച്ച് തല ഉയർത്തി വെയ്‌ക്കാൻ ശ്രമിക്കുക. ശ്വാസതടസ്സംനിസ്സാരമായി തള്ളിക്കളയരുത്.
- അവസാന മാസങ്ങളിൽ കാൽവണ്ണയിലും മറ്റും മസിലുകൾ വലിഞ്ഞുമുറുകി വേദനയുണ്ടാകാറുണ്ട്. ശരീരത്തിന് ആവശ്യമായ കാത്സ്യം കുറയുമ്പോഴാണ് ഇങ്ങനെ സംഭവിക്കുന്നത്. വേദനയുള്ള ഭാഗം തടവുക. വേദന കുറഞ്ഞു കഴിഞ്ഞാൽ അല്‌പനേരം നടക്കാം.
- അവസാന മൂന്നുമാസങ്ങളിൽ മുഖത്തും കൈകാലുകളിലും പലർക്കും നീരുണ്ടാകാറുണ്ട്. ഇത് സ്വാഭാവികമാണ്.എന്നാൽ വളരെയധികം ശ്രമിച്ചിട്ടും നീര് കുറയുന്നില്ലെങ്കിൽ ഡോക്‌ടറെ കാണണം. രക്‌തസമ്മർദ്ദം കൂടുന്നതും ഇതിന് കാരണമാകാം. ഭക്ഷണത്തിൽ ഉപ്പിന്‍റെ അളവ് പരമാവധി കുറയ്‌ക്കുക. പ്രോട്ടീൻ അടങ്ങിയ ഭക്ഷണം ധാരാളമായി കഴിക്കുക. ഉറങ്ങുമ്പോൾ തലയിണയിൽ കാലുകൾ പൊക്കിവച്ച് ഉറങ്ങുക.
- ഗർഭകാലത്ത് ലൈംഗികബന്ധം ആവാം. പക്ഷേ ഗർഭത്തിന്‍റെ ആദ്യത്തേയും അവസാനത്തേയും മൂന്ന് മാസങ്ങളിൽ ലൈംഗികബന്ധം പൂർണ്ണമായും ഒഴിവാക്കണം. മുമ്പ് ഗർഭം അലസിപ്പോയവരും ആദ്യപ്രസവത്തിൽ ഏതെങ്കിലും വിധത്തിലുള്ള സങ്കീർണ്ണതകൾ ഉണ്ടായവരും ഗർഭിണിയായിരിക്കുമ്പോൾ ലൈംഗികബന്ധം ഒഴിവാക്കുന്നതാണ് ഉചിതം. അവസാന മാസങ്ങളിലെ ലൈംഗിക ബന്ധം പലപ്പോഴും അണുബാധയ്‌ക്ക് കാരണമാകാറുണ്ട്.
അപകട ലക്ഷണങ്ങൾ
ഗർഭകാലത്ത് കാണുന്ന ചില ലക്ഷണങ്ങൾ നിസ്സാരമെന്ന് കരുതി തള്ളിക്കളയരുത്. കാരണം, ഇത്തരം ലക്ഷണങ്ങൾ മറ്റേതെങ്കിലും വിധത്തിലുള്ള പ്രശ്നങ്ങൾക്ക് വഴിവെയ്‌ക്കും. അവ കൃത്യസമയത്ത് പരിഹരിച്ചാൽ പ്രസവം സുരക്ഷിതവും സുഗമവുമായി നടക്കും.
- യോനി, നിപ്പിൾ എന്നിവയിലൂടെ രക്‌തസ്രാവമുണ്ടാകുക.
- മുഖത്തും ശരീരത്തിലും അമിതമായനീർക്കെട്ട് ഉണ്ടാകുക.
- കടുത്ത തലവേദന ഉണ്ടാവുന്നത് ഏതെങ്കിലും ഗുരുതരമായ രോഗലക്ഷണമായി മാറാം.
- കാഴ്‌ചക്കുറവ് തോന്നുക.
- വയറിനുള്ളിൽ ദുസ്സഹമായ വേദന അനുഭവപ്പെടുക.
- വിറയലും പനിയുമുണ്ടാവുക.
- യോനിയിലൂടെയുള്ള സ്രവം.
- കുഞ്ഞിന്‍റെ അനക്കത്തിലുണ്ടാകുന്ന വ്യത്യാസം ഗുരുതരമായ സൂചനയാണ്.
മുൻകരുതലുകൾ
ശരിയായ രീതിയിൽ പ്രസവം നടന്നാലും ചിലരെ പ്രശ്നങ്ങൾ അലട്ടാറുണ്ടെന്ന് സ്‌ത്രീരോഗ വിദഗ്‌ധ ഡോ.സുനിതാ ചന്ദ്രൻ. പ്രസവ ശേഷംഅമ്മയ്‌ക്ക് സാധാരണനില കൈവരിക്കാൻ കുറച്ചു സമയമെടുക്കും. പ്രസവാനന്തരമുള്ള രക്‌തസ്രാവമാണ് ഗുരുതരമായ ഒരു പ്രശ്നം. ഇതൊരു സാധാരണ പ്രശ്നമാണെങ്കിലും ചിലപ്പോൾ ഏതെങ്കിലുമൊരു രോഗത്തിന്‍റെ ലക്ഷണമായിപരിണമിക്കാറുണ്ട്.
- സിസേറിയനായാലും നോർമൽ ഡെലിവറിയായാലും ശരീരം ആവശ്യമില്ലാത്ത മ്യൂക്കസിനേയും പ്ലാസന്‍റൽ കലകളേയും രക്‌തത്തേയും പുറന്തള്ളും. പ്രസവശേഷം 2 മുതൽ 3 ആഴ്‌ച വരെ ഇത് തുടരും. ചിലപ്പോൾ 6 ആഴ്‌ചവരെ തുടരാം. ആ സമയത്ത് സാനിറ്ററി പാഡുകൾ ഉപയോഗിക്കാം. എന്നാൽ രക്‌തസ്രാവം അമിതമാകുകയോ പനിയും കുളിരും അനുഭവപ്പെടുകയോ ചെയ്‌താൽ ഉടൻ വൈദ്യസഹായം തേടണം.
- പ്രസവശേഷമുണ്ടാകുന്ന ഗുരുതരമായ പ്രശ്നമാണ് പോസ്‌റ്റ്‌പാർട്ടം ഹെമറേജ്. രക്‌തം അമിതമായി പോകുന്ന അവസ്‌ഥയാണിത്. പ്ലാസന്‍റ പൂർണ്ണമായും പുറത്തു പോകാതിരിക്കുക, പ്ലാസന്‍റയെ കൃത്രിമ മാർഗ്ഗമുപയോഗിച്ച് പുറത്തേക്ക് വലിക്കുക, പ്രസവ സമയത്ത് ഗർഭാശയത്തിനും സെർവിക്‌സിനും മറ്റും മുറിവേല്‌ക്കുക തുടങ്ങിയവയാണ് ഇതിന് കാരണം. നമ്മുടെ നാട്ടിൽ പ്രസവത്തെ തുടർന്നുണ്ടാകുന്ന മരണങ്ങളിൽ 10% ഇക്കാരണത്താലാണ് ഉണ്ടാകുന്നത്.
- പോസ്‌റ്റ്‌പാർട്ടം ഹെമറേജ് ആണോ എന്ന് സംശയം തോന്നിയാലുടൻ ഡോക്‌ടറെ കണ്ട് വേണ്ട ചികിത്സ തേടണം. ഒപ്പം ശുചിത്വ കാര്യങ്ങളിൽ പ്രത്യേകം ശ്രദ്ധ പുലർത്തുകയും ചെയ്യണം.
- വിട്ടുമാറാത്ത പനിക്ക് പലപ്പോഴും അണുബാധയാണ് കാരണം. അതുകൊണ്ട് പനി നിസ്സാരമായി കാണരുത്.
- സ്‌തനത്തിൽ മുഴയുണ്ടെങ്കിലോ കുഞ്ഞിന് പാലൂട്ടുമ്പോൾ വേദനയുണ്ടെങ്കിലോ വിദഗ്‌ദ്ധ ചികിത്സ തേടണം.
- അനാവശ്യ ഗർഭധാരണം ഒഴിവാക്കാനായി ഗർഭ നിരോധനോപാധികൾ സ്വീകരിക്കാം. മുലയൂട്ടൽ സമയത്ത് ഗർഭധാരണം നടക്കില്ലെന്ന തെറ്റിദ്ധാരണയരുത്.
