എത്ര കിട്ടിയാലും എന്‍റെ കൈയിൽ പണം നിൽക്കില്ല. ഇങ്ങനെ പറയുന്നവരെ നാം ഒരുപാട് കണ്ടിട്ടുണ്ടാവും. ചിലപ്പോൾ ആ കാറ്റഗറിയിൽ നിങ്ങളും ഉണ്ടാവാം. സമ്പാദിക്കുന്ന പണം ക്രിയാത്മകമായി ഉപയോഗിക്കാനും മിടുക്ക് കാണിക്കണം. പണം ഉണ്ടാക്കാൻ പഠിച്ചാൽ മാത്രം പോരാ അത് ഉപകാരപ്പെടുന്ന വിധത്തിൽ വിനിയോഗിക്കാനും ശ്രദ്ധ കാണിക്കണം. തങ്ങൾക്ക് യോജിച്ച സമ്പാദ്യ പദ്ധതികൾ തെരഞ്ഞെടുക്കുന്നതിലെ അപാകതയാണ് പലരെയും വെട്ടിലാക്കുന്നത്. സ്ത്രീകൾക്ക് യോജിച്ച നിക്ഷേപ പദ്ധതികൾ ഏതൊക്കെയെന്ന് മനസ്സിലാക്കാം.
ഫിക്സഡ് ഡിപ്പോസിറ്റ്
എല്ലാ ബാങ്കുകളിലും ഈ സേവനം ലഭ്യമാണ്. ബാങ്കിൽ നിക്ഷേപിക്കുന്ന നിശ്ചിത തുക കാലാവധി പൂർത്തിയാകുമ്പോൾ പലിശ അടക്കം മടക്കി കിട്ടുന്നു. പൊതുവേ ഒരു വർഷത്തിന് നിബന്ധനകൾക്ക് വിധേയമായി ആറു മുതൽ 9 ശതമാനം വരെ പലിശ നിരക്കും അഞ്ച് വർഷത്തിന് ഏഴ് ശതമാനത്തിൽ കൂടുതലും റിട്ടേൺ ലഭിക്കും.
റിക്കറന്‍റ് സേവിംഗ്സ്
ഈ സമ്പാദ്യ പദ്ധതി പ്രകാരം ഒരു നിശ്ചിത തുക വീതം ബാങ്കിൽ നിക്ഷേപിക്കാം. ബാങ്കുകൾക്ക് പുറമെ പോസ്റ്റ് ഓഫീസ് വഴിയും ഈ സമ്പാദ്യ പദ്ധതിയിൽ പങ്കുചേരാം.
കിസാൻ വികാസ് പത്ര
ദീർഘ കാലാവധി നിക്ഷേപം ആണെങ്കിൽ കിസാൻ വികാസ് പത്ര നല്ലൊരു ചോയിസ് ആണ്. പണം ഇരട്ടിയായി ലഭിക്കും എന്നതാണ് പ്രത്യേകത. എട്ടു വർഷവും ഏഴ് മാസവും കൊണ്ടാണ് പണം ഇരട്ടിക്കുക. ഏകദേശം 8 ശതമാനത്തിലും അധികം റിട്ടേൺ കിട്ടും. ജാമ്യം ഇല്ലാതെ തന്നെ ഏത് സമയത്തും പണം തിരികെ എടുക്കാം. എന്നാൽ ഈ നിക്ഷേപത്തിൽ നികുതി ഇളവ് ലഭിക്കുകയില്ല.
പോസ്റ്റ് ഓഫീസ് മന്ത്‌ലി സേവിംഗ്സ്
ഓരോ മാസവും പലിശ സമ്പാദിക്കാൻ ആഗ്രഹിക്കുന്നവരെ സംബന്ധിച്ച് നല്ലൊരു സമ്പാദ്യ പദ്ധതിയാണിത്. പ്രത്യേകിച്ച് നല്ല തുക നിക്ഷേപിച്ച് പെൻഷൻ പറ്റിയവർക്ക് പോസ്റ്റ് ഓഫീസിൽ നിക്ഷേപിക്കുന്ന പണത്തിന് എട്ടു ശതമാനത്തിന് അടുത്ത് റിട്ടേൺ മാസാമാസം ലഭിക്കും. തുക മെച്യൂരിറ്റി ആകുന്നതോടെ അഞ്ച് ശതമാനം ബോണസും അതോടൊപ്പം ലഭിക്കും.
ദേശീയ സമ്പാദ്യ പദ്ധതി
സർക്കാരിന്‍റെ ദേശീയ സമ്പാദ്യ പദ്ധതി സുരക്ഷിതമായ സ്കീം ആണ്. ഇതിൽ പണനിക്ഷേപം നടത്തി നികുതിയിളവ് നേടാം. പതിനായിരം രൂപയുടെ നിക്ഷേപത്തിന് ആറു വർഷങ്ങൾക്കുശേഷം പതിനാറായിരം രൂപ ലഭിക്കും.
പിപിഎഫ്
കേന്ദ്ര ഗവൺമെന്‍റിന്‍റെ അധികാരപരിധിയിൽ വരുന്ന സമ്പാദ്യ പദ്ധതിയാണ് പിപിഎഫ്. അക്കൗണ്ട് തുടങ്ങുന്നതിനായി മാസ വരുമാനമുള്ള ഉദ്യോഗസ്ഥയാവണമെന്നില്ല. സ്വതന്ത്രമായ ജോലി ചെയ്യുന്ന ആർക്കും ഇതിൽ ധന നിക്ഷേപം നടത്താം.
പി പി എഫ് അക്കൗണ്ട് കൈകാര്യം ചെയ്യുന്ന ദേശസാത്കൃത ബാങ്കുകളിലോ അതിന്‍റെ ശാഖകളിലോ അക്കൗണ്ട് തുറക്കാൻ ആവും. പോസ്റ്റ് ഓഫീസുകളിൽ ഇതിനുള്ള സൗകര്യമുണ്ട്. അക്കൗണ്ട് തുറക്കുന്നതിനുള്ള ഏറ്റവും കുറഞ്ഞത് 500 രൂപ. കൂടിയ തുക 70000 രൂപയും 8 ശതമാനം വാർഷിക റിട്ടേൺ ഉള്ള പിപിഎഫ് സുരക്ഷിതമായ നിക്ഷേപ പദ്ധതിയാണ്.
സീനിയർ സിറ്റിസൺ സേവിംഗ് പദ്ധതി
60 വയസ്സിന് മുകളിലുള്ളവർക്ക് ധനനിക്ഷേപം നടത്തുന്നതിന് സീനിയർ സിറ്റിസൺ സേവിംഗ് സ്കീമുകൾ പ്രയോജനപ്രദങ്ങളാണ്. ഇതിൽ 9-10% വരെ റിട്ടേൺ ലഭിക്കും. സർക്കാർ ബാങ്കുകളിലും മറ്റ് സ്ഥാപനങ്ങളിലും 5 മുതൽ 8 വർഷം വരെ കാലാവധിയുള്ള പദ്ധതികൾ ഉണ്ട്.
മണി ബാക്ക് ഇൻഷുറൻസ് പോളിസി
കാലാവധിക്ക് ശേഷം ഏതെങ്കിലും പ്രധാനപ്പെട്ട കാര്യത്തിന് പണം ആവശ്യമായി വരുന്നവരെ സംബന്ധിച്ച് ഈ പദ്ധതി പ്രയോജനപ്രദമാണ്. പോളിസിയുടെ കാലാവധി സമയത്ത് പോളിസി ഉടമ മരണപ്പെടുകയാണെങ്കിൽ ഡെത്ത് ബെനിഫിറ്റായി മുഴുവൻ പോളിസി തുകയും ലഭിക്കും എന്നതാണ് മണി ബാക്ക് ഇൻഷുറൻസ് പോളസിയുടെ സവിശേഷത. പോളിസി ഉടമയ്ക്ക് നേരത്തെ തന്നെ കൊടുത്തു കഴിഞ്ഞ സർവൈവൽ ബെനിഫിറ്റ് ഈ തുകയിൽ നിന്നും കുറവ് ചെയ്യുകയില്ല. മുഴുവൻ തുകയുടെ അടിസ്ഥാനത്തിലാണ് ബോണസ് നിശ്ചയിക്കുക.
സാധാരണ എൻഡോമെന്‍റ് പോളിസി പദ്ധതികളിൽ എൻഡോമെന്‍റ് കാലാവധി അവസാനിക്കുന്നതോടെ സർവൈവൽ ബെനിഫിറ്റ് നൽകുകയാണ് ചെയ്യാറ്. എന്നാൽ മണി ബാക്ക് പോളിസിയിൽ ഇടയ്ക്കിടെ സർവൈവൽ ബെനിഫിറ്റ് ഒരു വിഹിതം ലഭിക്കും. ഗുരുതരമായ അസുഖം പിടിപെടുന്ന സാഹചര്യത്തിലും ലാഭം കിട്ടും. അപകടത്തിൽ മരണപ്പെട്ടാൽ നോമിനിക്ക് പോളിസിയിൽ നിന്നും ലാഭം കിട്ടും. പ്രീമിയം പെയ്മെന്‍റിൽ ഇളവ്, മറ്റാനുകൂല്യങ്ങളും ലഭിക്കും. എന്നാൽ പോളസിയുടെ നിബന്ധനകൾ നന്നായി മനസ്സിലാക്കിയശേഷം വേണം തീരുമാനം എടുക്കാൻ.
യൂലിപ്
യൂലിപ് അഥവാ യൂണിറ്റ് ലിക്വിഡ് പോളസിയിൽ ലിക്വിഡിറ്റി, കാലാവധി, ഒരു ഫണ്ടിൽ നിന്നും മറ്റൊരു ഫണ്ടിലേക്ക് പണം ട്രാൻസ്ഫർ ചെയ്യൽ തുടങ്ങി ധാരാളം സൗകര്യങ്ങൾ ഉണ്ട്. ലാഭ ശതമാനവും കൂടുതലായിരിക്കും. മാർക്കറ്റിൽ കുറഞ്ഞത് 50 തരം യൂലിപ്പ് സ്കീമുകൾ ഉണ്ട്. എൽഐസിക്കൊപ്പം എല്ലാ ഇൻഷുറൻസ് കമ്പനികളും ഒന്നിനൊന്ന് മെച്ചപ്പെട്ട സ്കീമുകൾ നടത്തുന്നുണ്ട്. ഇതിൽ നിന്നെല്ലാം ഇരട്ടി ലാഭവും കിട്ടുന്നു. ഭൂരിഭാഗം യൂണിറ്റ് പദ്ധതികളും മൂന്നുവർഷത്തെ ലോക്കിംഗ് കാലാവധി ഉള്ളതാണ്.
