വികാസ്… നിങ്ങളുടെ പ്രൊപ്പോസൽ എന്തായി, ക്ലയിന്‍റിന് ഇഷ്ടമായോ, ചുറ്റിപ്പറ്റി നടന്നിട്ട് സംഗതി വല്ലതും നടക്കുമോ?”
“നീ പേടിക്കാതെ എന്‍റെ ഭാര്യേ, ഇന്ന് ആ ഡീൽ ഞാനുറപ്പിക്കും.” വികാസ് നിശയെ നോക്കി പുഞ്ചിരിച്ചു.
“ഗുഡ്, അപ്പോ ഞാൻ ആരോടെങ്കിലും ലിഫ്റ്റ് ചോദിച്ച് വീട്ടിലെത്തിക്കോളാം.”
“ആരുടെ കൂടെ പോകും?”
“ആരെങ്കിലുമുണ്ടാവുമെന്നേ. യു ടേക്ക് കെയർ ഓഫ് യുവർ ക്ലയിന്‍റ് സർ. ഞാൻ പോവുകയാണ്.” ഭർത്താവിനെ സ്നേഹത്തോടെ ചുംബിച്ചിട്ട്, നിശ ആവേശത്തോടെ ക്ലബ് ലക്ഷ്യമാക്കി നടന്നു.
രാജീവ് മേനോൻ ക്ലബ്ബിന്‍റെ കവാടത്തിനരികിൽ അവളെയും പ്രതീക്ഷിച്ച് നിൽക്കുന്നുണ്ടായിരുന്നു.
“അപ്പോ വിക്കിയെ പറഞ്ഞു വിട്ടുവല്ലേ.” രാജീവ് ചിരിച്ചു കൊണ്ട് നിശയോട് ചോദിച്ചു. അതു ചോദിക്കുമ്പോൾ വല്ലാത്ത തിളക്കമായിരുന്നു അയാളുടെ കണ്ണുകൾക്ക്.
“വികാസ് ബിസിയാണ്.” നിശ നിസ്സാരമായി പറഞ്ഞു.
“അപ്പോൾ വീട്ടിലേക്ക് എങ്ങനെ പോകും?”
“ലിഫ്റ്റ് കിട്ടുമല്ലോ.”
“ആ ഭാഗ്യം എനിക്കുണ്ടാവുമോ? ഞാൻ വീട്ടിൽ കൊണ്ട് വിടാം.”
“കൊതിപ്പിക്കാതെ, ഇവിടെ എന്നെക്കാൾ സുന്ദരികളായവർ ഉള്ളപ്പോൾ എന്‍റെ കൂടെ വന്ന് സമയം കളയണോ?” നിശ രാജീവിന്‍റെ കണ്ണുകളിലേയ്ക്ക് നോക്കി.
“നിശേ… ഇവിടെയുള്ള പെൺകുട്ടികളേക്കാൾ സുന്ദരിയല്ലേ നീ. നിന്‍റെ വശ്യതയ്ക്കു മുന്നിൽ ഞാൻ തോറ്റ് പോകും.” രാജീവിന്‍റെ നോട്ടത്തിൽ നിശ ആകെ ചൂളിപ്പോയി. അയാളുടെ അടുത്ത് നിന്നാൽ ആരും പിടിവിട്ട് പോകും.
“കള്ളം പറയാതെ രാജീവ്, ഞാനൊരു 17 വയസ്സുകാരിയുടെ അമ്മയാണ്. ഇവിടെ പാറിക്കളിക്കുന്ന പൂമ്പാറ്റകളെക്കാൾ കിഴവിയാണ് ഞാൻ.”
“ഞാൻ സത്യമാണ് പറഞ്ഞത് നിശാ…” ഇതും പറഞ്ഞ് അയാൾ നിശയുടെ കൈ പിടിച്ച് കാർ പാർക്കിംഗ് ഏരിയയിലേയ്ക്ക് നടന്നു.
അയാൾ സ്പർശിച്ചപ്പോൾ ഒരു മിന്നൽപ്പിണർ നെഞ്ചിലൂടെ കടന്നു പോയതായി നിശയ്ക്കു തോന്നി. തളർന്നു പോയ തന്നെ അയാൾ വലിച്ചു കൊണ്ടു പോവുകയാണോ?
കുറച്ചു ദിവസമായി നിശയുമായി ഫ്ളർട്ട് ചെയ്യാൻ ചുറ്റിപ്പറ്റി നടക്കുകയായിരുന്നു രാജീവ്. അയാളുടെ സൗന്ദര്യത്തിനും വാചകമടിക്കും നിശ കീഴടങ്ങിപ്പോയി. ആരായാലും അതേ സംഭവിക്കൂ. അത്രയും മാസ്മരികതയാണയാൾക്ക്. ഇന്ന് രാജീവിന്‍റെ കൂടെ കുറച്ച് സമയം ചെലവഴിക്കണമെന്ന് നിശയും ആഗ്രഹിച്ചിരുന്നു. അതിനാൽ തലവേദന ഭാവിച്ച് വികാസിനെ ഒഴിവാക്കിയാണ് നിശ ക്ലബ്ബിൽ എത്തിയത്.
നിശ പറഞ്ഞതനുസരിച്ച് രാജീവ് കാർ ഹൈവേയിലേക്ക് എടുത്തു. ഒരു ലോംഗ് ഡ്രൈവിനായി നിശ ആഗ്രഹിച്ചു. അയാളും.
കറങ്ങി തിരിച്ചുവരുമ്പോൾ അവർ ഭക്ഷണവും കഴിച്ചു. വണ്ടി നിശയുടെ വീട്ടിൽ വന്നു നിന്നു. അപ്പോൾ സമയം 12 മണി കഴിഞ്ഞിരുന്നു.
“താങ്ക്സ് ഫോർ ദ ലിഫ്റ്റ്, രാജീവ്.” നിശ രാജീവിന് കൈ കൊടുത്തു.
രാജീവ് കൈ പിടിച്ച് അവളെ അയാളിലേക്ക് അടുപ്പിച്ചു. അവൾക്ക് തടുക്കാനാവുന്നതിനു മുമ്പേ അയാൾ അവളുടെ കവിളിൽ ചുംബിച്ചു.
“വീട്ടിൽ വിട്ടതിന്‍റെ ഫീസും നീ വാങ്ങിയല്ലോ.” നിശ പരിഭവം അഭിനയിച്ചു.
“ഇത് ഫീസൊന്നുമല്ല, നന്ദിയാണ്.” രാജീവ് നുണക്കുഴി കാട്ടി ചിരിച്ചു.
“എന്തിനുള്ള നന്ദി?”
“എന്‍റെ ഈ രാത്രി ധന്യമാക്കിയതിന്.”
“വാക്കുകൾ കൊണ്ട് ആളുകളെ പാട്ടിലാക്കാൻ രാജീവിനെ കഴിഞ്ഞിട്ടേ വേറെ ആളുള്ളൂ.” നിശ കാറിന്‍റെ ഡോർ തുറന്ന് പുറത്തിറങ്ങി.
രാജീവും പുറത്തിറങ്ങി ഡോർ അടച്ചപ്പോൾ അയാളുടെ കണ്ണുകളിലേക്ക് നോക്കി സ്വല്പം ഭീതിയോടെ നിശ ചോദിച്ചു.
“എന്താ… എന്‍റെ കൂടെ വീട്ടിൽ കയറാനാണോ പരിപാടി?”
“അതെ ഡാർലിംഗ്” രാജീവ് ചിരിച്ചു. “വല്ലാതെ ദാഹിക്കുന്നു.”
“ഞാൻ നിങ്ങളെ വീട്ടിൽ കയറ്റില്ല. കാരണം വലിയ അപകടകാരിയാണ് നിങ്ങൾ. എന്തെങ്കിലും അലമ്പുണ്ടാക്കിയാൽ എന്‍റെ മകൾ കാണും.”
“ഞാനൊരു ജന്‍റിൽ മാനാണ്, എന്നെ വിശ്വസിക്കാം.”
നിശ ഗേറ്റ് തുറന്നു. പിന്നിൽ നടക്കുമ്പോൾ രാജീവിന്‍റെ കണ്ണുകൾ നിശയുടെ അഴകളവ് ആസ്വദിക്കുകയായിരുന്നു.
നിശ വന്നപ്പോൾ തന്നെ ശ്രദ്ധിച്ചത് മകൾ ശിഖയുടെ മുറിയാണ്. അവിടെ ലൈറ്റ് അണഞ്ഞിരുന്നു. മകൾ ഉറങ്ങിക്കാണുമെന്ന് നിശ കരുതി. അവിടെ വെളിച്ചം ഉണ്ടായിരുന്നെങ്കിൽ നിശ രാജീവിനെ അകത്തേക്ക് കയറ്റുമായിരുന്നില്ല.
ശിഖ ഉറങ്ങിയിരുന്നില്ല. അമ്മ വന്നത് അവളറിഞ്ഞിരുന്നു. എന്തൊക്കെയോ ചിന്തകൾ കാരണം അവൾക്ക് ഉറങ്ങാൻ കഴിഞ്ഞില്ല. രാജീവിന്‍റെ കാർ വന്ന് നിന്നത് ജാലകത്തിലൂടെ അവൾ കണ്ടിരുന്നു. രാജീവ് അമ്മയോട് ശൃംഗരിക്കുന്നതും അവൾ കണ്ടിരിക്കുന്നു.
ഡ്രോയിംഗ് റൂമിലിരുന്ന് രണ്ടാളും അടക്കിപ്പിടിച്ച് സംസാരിക്കുന്നത് ശിഖ മുറിയിലിരുന്ന് കേൾക്കുന്നുണ്ടായിരുന്നു. അമ്മ മുറിയിലേക്ക് വന്നപ്പോൾ അവൾ കണ്ണടച്ച് ഉറക്കം നടിച്ചു കിടന്നു. അമ്മ മുറിക്ക് പുറത്ത് പോയപ്പോൾ അവൾ എഴുന്നേറ്റ് വാതിലിനടുത്ത് വന്ന് നിന്നു. അവൾ അവരെ ഒളിഞ്ഞു നോക്കി. ഡ്രോയിംഗ് ഹാളിന്‍റെ വലിയ ഭാഗം അവൾക്ക് ദൃശ്യമായി.
അമ്മ അടുക്കളയിലേക്ക് നടന്നപ്പോൾ, പിന്നാലെ ചെന്ന രാജീവ് അമ്മയെ കൈയിലെടുത്ത് മുന്നോട്ട് നടന്നു. അമ്മയുടെ എതിർപ്പുകൾ അയാൾ ആസ്വദിക്കുകയാണെന്ന് തോന്നും.
ശിഖയുടെ ഹൃദയമിടിപ്പ് വർദ്ധിച്ചു. അവൾ സ്വയം നിയന്ത്രിക്കാൻ ശ്രമിച്ചു. അവൾ കണ്ണടച്ച് കിടന്നുറങ്ങാൻ ശ്രമിച്ചു. പക്ഷേ ബെഡ്റൂമിൽ നിന്നുള്ള ശീൽക്കാരങ്ങൾ അവളെ കൂടുതൽ അസ്വസ്ഥതപ്പെടുത്തി.
പതുങ്ങിപ്പതുങ്ങി പപ്പയുടെ ബെഡിറൂമിനരികിലെത്തിയ അവൾ കീ ഹോളിലൂടെ കണ്ട കാഴ്ച ഞെട്ടിക്കുന്നതായിരുന്നു. എല്ലാറ്റിനും അമ്മ മുൻകൈയെടുക്കുന്നു.
അവൾ വേഗം സ്വന്തം മുറിയിൽ കയറി വാതിലടച്ചു. അവൾക്ക് ഒന്നു കുളിക്കണമെന്നു തോന്നി. ഫാനിട്ടിട്ടും അവൾ വിയർത്തു കൊണ്ടേയിരുന്നു. കുതിരകൾ ചീറിപ്പായുന്ന ഒരു വീഥിയിൽ അകപ്പെട്ടതു പോലെ ശിഖയ്ക്കു തോന്നി.
അടുത്ത ദിവസം ഞായറാഴ്ചയായിരുന്നു. ശിഖ 10 മണിക്ക് ട്യൂഷനു പോകാനിറങ്ങി. അമ്മയും അച്‌ഛനും ഉറക്കമുണർന്ന് എഴുന്നേറ്റിരുന്നില്ല. അവൾ കടലാസിൽ ഒരു കുറിപ്പെഴുതി ടേബിളിൽ വച്ചു.
“ഞാൻ ട്യൂഷൻ കഴിഞ്ഞ് ഒരു സുഹൃത്തിന്‍റെ വീട്ടിൽ ബർത്ത്ഡേ പാർട്ടിക്ക് പോകും. വരാൻ വൈകും.” അവൾ ഒരു ഗ്ലാസ് ജ്യൂസ് കഴിച്ച് ഗ്ലാസ് മേശമേൽ വച്ചു. കുറിപ്പ് പാറിപ്പോകരുതല്ലോ. കൂടുതലൊന്നും ആലോചിക്കാതെ അവൾ സുമന് ഫോൺ ചെയ്‌തു. അവൻ ബൈക്കുമായി പാഞ്ഞെത്തി. അവൾ അവന്‍റെ പിറകിൽ ഇരുന്നു.
“എനിക്ക് ഡോ. സുമയുടെ അടുത്ത് 12 മണിക്ക് അപ്പോയിന്‍റ്മെന്‍റ് ഉണ്ട്.” സുമൻ പറഞ്ഞു. “നിനക്ക് ഇത്ര അർജൻസി എന്താണ്?”
“മെഡിക്കൽ റപ്പാണെന്നു കരുതി ഞായറാഴ്ചയും ജോലി ചെയ്യണോ?” ശിഖ മുഖം വീർപ്പിച്ചു.
“ശരി, ശരി… ഒരു തർക്കത്തിന് ഞാനില്ല.” അവൻ പറഞ്ഞു.
“എങ്കിൽ വണ്ടി നിന്‍റെ ഫ്ളാറ്റിലേക്ക് വിട്ടോ.”
സുമൻ അമ്പരന്ന് പോയി. മുമ്പ് എത്ര വിളിച്ചിട്ടും വരാത്തവളാണ്. ഇന്ന് എന്തുപറ്റി?
അവൾ തന്‍റെ ബോയ്ഫ്രണ്ടിനെ ചേർത്ത് പിടിച്ചു. സുമന്‍റെ അമ്മയും പപ്പയും സ്‌ഥലത്തില്ല. അവർ യുഎസിൽ ചേച്ചിയുടെ അടുത്ത് പോയിരിക്കുകയാണ്. ഒരു മാസത്തെ സുഖവാസത്തിന്. ശിഖയ്ക്ക് അതറിയാം. സുമൻ ശിഖയുടെ മനസ്സ് വായിച്ചെടുക്കാൻ ശ്രമിച്ചു കൊണ്ടിരുന്നു.
ഫ്ളാറ്റിലെത്തിയതും ശിഖ സുമന് ഒരു ചായ ഇട്ട് കൊടുത്തു. നല്ല റൊമാന്‍റിക് മൂഡിലായിരുന്നു രണ്ടാളും. സുമൻ ശിഖയെ ചുംബിക്കാനടുത്തു. അവനെ അദ്ഭുതപ്പെടുത്തിക്കൊണ്ട് അവൾ തന്‍റെ പ്രണയം സമർപ്പിച്ചു. തലേന്ന് രാത്രിയിലെ ദൃശ്യങ്ങളായിരുന്നു ശിഖയുടെ മനസ്സ് മുഴുവൻ. ഒരു വാശി പോലെയാണ് അവൾ തന്‍റെ ശരീരവും മനസ്സും സുമനുമായി പങ്കിട്ടത്.
സുമൻ തെല്ല് പേടിച്ചു പോയിരുന്നു. ആദ്യമായിട്ടാണിങ്ങനെ ഒരു അനുഭവം. ശിഖ അമർത്തി ചുംബിക്കുമ്പോഴെല്ലാം ശ്വാസമെടുക്കാൻ അവൻ പ്രയാസപ്പെട്ടു. ഭ്രാന്തിളകിയതു പോലെയായിരുന്നു ശിഖയുടെ പെരുമാറ്റം. ഒറ്റരാത്രി കൊണ്ട് അവളാകെ മാറിപ്പോയിരുന്നു.
“നീയിങ്ങനെ സ്നേഹിച്ചാൽ ഞാൻ ചത്തുപോകും.” സുമൻ ഇടയ്ക്ക് പറയുന്നുണ്ടായിരുന്നു. എല്ലാം കഴിഞ്ഞപ്പോൾ ശിഖ ഏറെ നേരം ശബ്ദമുണ്ടാക്കാതെ കിടന്നു കരഞ്ഞു. അവൾ ഉറങ്ങുകയാണെന്നാണ് സുമനും കരുതിയത്. ക്ഷീണം കാരണം അവനും വൈകാതെ ഉറങ്ങിപ്പോയി.
ശിഖ ഉണർന്നപ്പോഴും സുമൻ നല്ല ഉറക്കമായിരുന്നു. അവൾ ജനലിനരികിൽ ചെന്ന് പുറത്തെ തെരുവിലേക്ക് വെറുതെ നോക്കി നിന്നു.
“സ്നേഹം എന്താണ്? ഭർത്താവിന്‍റെ കൈകൾ ദുർബലമാണെന്ന് തോന്നുമ്പോൾ ഭാര്യ മറ്റൊരു സുരക്ഷിത കരവലയത്തിൽ കിടന്നുറങ്ങുന്നതാണോ അത്.” അമ്മയെ കുറ്റപ്പെടുത്തിയ മനസ്സ് ചിലപ്പോഴൊക്കെ അമ്മയുടെ ചെയ്തികളെ ന്യായീകരിക്കാനും ധീരത കാട്ടി.
“എന്തായാലും ഞാൻ പൂർണ്ണമായി അറിഞ്ഞ ഒരു പുരുഷനെയേ വിവാഹം കഴിക്കൂ.” അവൾ തീർച്ചപ്പെടുത്തി. അമ്മയെപ്പോലെയാവാൻ എന്‍റെ ജീവിതത്തെ ഞാൻ വിട്ട് കൊടുക്കില്ല.
വസന്തം വിരുന്നെത്തിയ ഒരു പ്രഭാതത്തിലാണ് ശിഖ ആ കാര്യം അറിയുന്നത്. അവൾ സുമന്‍റെ ബൈക്കിൽ കയറി നഴ്സിംഗ് ഹോമിലെത്തി.
“ഓപ്പറേഷനുള്ള കാശെല്ലാം റെഡിയാണല്ലോ അല്ലേ?” സുമൻ അവളോട് ചോദിച്ചു.
“എല്ലാം. ഞാൻ ഇന്നലെ എടിഎമ്മിൽ നിന്ന് എടുത്തിട്ടുണ്ട്.”
ഡോക്ടർക്ക് കൈക്കൂലി കൊടുത്താണ് അവർ അബോർഷൻ ചെയ്തത്. ആദ്യം ഡോക്ടർ സമ്മതിച്ചില്ലായിരുന്നു. പിന്നെ സുമൻ ഏതോ സീനിയർ ഡോക്ടറെ വിളിച്ച് സ്വാധീനിക്കുകയായിരുന്നു.
“ഈ മരുന്നു വില്പനക്കാരും ഇങ്ങനെ തുടങ്ങിയാൽ ഞങ്ങൾ ഡോക്ടർമാർക്ക് പണിയാവുമല്ലോ.” ഡോക്ടർ ഒരു വഷളൻ ചിരി ചിരിച്ചു. സുമൻ വല്ലാതായി.
ശിഖയെ ഓപ്പറേഷൻ തീയറ്ററിലേക്ക് കയറ്റിയപ്പോഴാണ് സുമൻ ശരിക്കും വിറച്ചു പോയത്. പിന്നെ മണിക്കൂറുകൾ നീണ്ട കാത്തിരിപ്പിനൊടുവിൽ ശിഖയെ വാടിയ പൂപോലെ കണ്ടപ്പോൾ സുമൻ തകർന്നു പോയിരുന്നു.
“ഇവളെ ഇങ്ങനെ ഒരിക്കൽ പോലും ഇതിനു മുമ്പ് കണ്ടിട്ടില്ല.” വാർഡിലെ റെസ്റ്റിനു ശേഷം വൈകുന്നേരം സുമന്‍റെ ബൈക്കിലിരുന്നു തന്നെയാണ് ശിഖ വീട്ടിലേക്ക് പോയത്.
കോളിംഗ് ബെൽ അടിച്ചപ്പോൾ ജോലിക്കാരിയാണ് വാതിൽ തുറന്നത്. എന്തോ അസുഖം ബാധിച്ചവളെപ്പോലെ അവർക്ക് തോന്നിയെങ്കിലും ശിഖയോട് ഒന്നും ചോദിക്കാനുള്ള ധൈര്യം അവർക്കുണ്ടായില്ല.
ശിഖ മുറിയിൽ പോയിക്കിടന്നു. മരുന്നിന്‍റെ ഇഫക്ട് മാറിയപ്പോൾ അവൾക്ക് വയറ് വേദനിക്കാൻ തുടങ്ങി. അസഹ്യമായ വേദന, ഒറ്റപ്പെടലിന്‍റെയും സ്നേഹരാഹിത്യത്തിന്‍റെയും പെയിൻ കൂടി അവളുടെ ഹൃദയത്തെ കാർന്ന് തിന്നിരുന്നു, അന്നേരം.
ഏറെ വൈകിയാണ് അമ്മ വീട്ടിലെത്തിയത്. “എന്തുപറ്റി മോളേ, വല്ലാതെ ക്ഷീണമുണ്ടല്ലോ.” പുതച്ചു മൂടി കിടന്ന ശിഖയെ ഉണർത്തി അമ്മ ചോദിച്ചു.
“ഏയ് ഒന്നുമില്ല അമ്മേ, നല്ല വയറുവേദന.”
“ഓ, വല്ല ഫുഡ് ഇൻഫെക്ഷനുമാണോ? ഇന്നലെ നീ പാർട്ടിക്ക് കഴിച്ചത് പറ്റിയിട്ടുണ്ടാവില്ല.” നിശ പറഞ്ഞു.
ശിഖ ഒന്നും മിണ്ടാതെ കിടന്നു.
“ഡോക്ടറെ വിളിക്കണോ?” അമ്മ അവളെ തലോടാൻ കൈ നീട്ടിയപ്പോൾ അവൾ കൈ തടുത്തു കൊണ്ട് പതുക്കെ പറഞ്ഞു. “വേണ്ട, എനിക്കൊന്നുമില്ല.”
അമ്മയ്ക്ക് ക്ലബ്ബിലെ വാർഷികത്തിനു പോകാനുള്ള തിരക്കുണ്ടായിരുന്നെന്ന് അവൾ മനസ്സിലാക്കിയിരുന്നു. മകളുടെ അടുത്ത് നിൽക്കണമെന്ന് ആഗ്രഹിച്ചെങ്കിലും വാർഷിക ജനറൽ ബോർഡ് മീറ്റിംഗിൽ തന്നെ പ്രസിഡന്‍റായി തെരഞ്ഞെടുക്കുന്ന ചടങ്ങിന് പോകാതിരിക്കാൻ നിശയ്ക്ക് കഴിഞ്ഞില്ല. രണ്ടാമതൊന്ന് ആലോചിക്കാതെ അവൾ അവിടെ നിന്ന് ഇറങ്ങി. ജോലിക്കാരിയോട് തനിക്ക് ഭക്ഷണം എടുത്തു വയ്ക്കണമെന്ന് പറയാനുള്ള ഔദാര്യം അമ്മയ്ക്കുണ്ടായല്ലോ എന്ന് ശിഖ ആശ്വസിച്ചു.
“ടേക്ക് കെയർ” അമ്മ ചമഞ്ഞിറങ്ങിപ്പോയി.
ശിഖയ്ക്ക് വയറുവേദന കലശലായി. ബാഗിൽ നിന്ന് ഗുളികകൾ എടുത്ത് കഴിച്ച അവൾ ഉറങ്ങാൻ ശ്രമിച്ചു.
“എല്ലാം ഒരു വാശിക്ക് ചെയ്തതാണ്. അതിന് ഇത്രമാത്രം തീ തിന്നണമെന്ന് കരുതിയിരുന്നില്ല.” ശിഖ കരഞ്ഞു കൊണ്ടേയിരുന്നു. ജീവിതത്തെക്കുറിച്ചുള്ള മറ്റെന്തെല്ലാമോ ചിന്തകൾ മനസ്സിനെ അലട്ടി തുടങ്ങിയപ്പോൾ വയറിന്‍റെ വേദന അവൾ അറിഞ്ഞതേയില്ല.
രാത്രി ഏറെ വൈകിയപ്പോൾ മുറ്റത്ത് കാർ വന്ന് നിൽക്കുന്ന ശബ്ദം കേട്ടുകൊണ്ടാണ് അവൾ മയക്കമുണർന്നത്. അവൾ പിന്നെയും ഏറെ നേരം അവിടെത്തന്നെ കിടന്നു. ഒറ്റയ്ക്ക് മുറിയിലെ അരണ്ട വെളിച്ചം കണ്ട് നേരിയ ഭയം തോന്നിയപ്പോൾ അവൾ വാതിൽ തുറന്ന് നോക്കി. ഡൈനിംഗ് റൂമിൽ നിന്ന് ഛർദ്ദിലിന്‍റെ മണം അവളെ കൂടുതൽ അസ്വസ്ഥയാക്കി. അച്‌ഛൻ സോഫയിൽ എല്ലാം നഷ്ടപ്പെട്ടവനെപ്പോലെ കുത്തഴിഞ്ഞ് കിടക്കുന്നുണ്ടായിരുന്നു.
മുന്നോട്ട് കാലെടുത്തു വയ്ക്കാൻ ആഗ്രഹിച്ചെങ്കിലും മിന്നൽ പോലെ ഒരു വേദന അവളുടെ അടിവയറ്റിൽ നിന്ന് കാലിലേയ്ക്കും പിന്നെ കാലിൽ നിന്ന് തിരിഞ്ഞ് വയറ്റിലേക്കും പാഞ്ഞു കയറി. രാത്രി ക്ലോക്കിൽ സമയം രണ്ട് മുഴങ്ങി. അമ്മ വരുന്നത് കാത്തു നിൽക്കാതെ അവൾ മുറിയിൽ കയറി വാതിലടച്ചു.
