സ്വാദിൽ സൗന്ദര്യം ഉണർത്തും ഫുഡ് കാർവിങ്ങ്

റെസ്റ്റോറന്‍റുകളിലും സ്റ്റാർ ഹോട്ടലുകളിലും രുചിയേറും വിഭവങ്ങൾ വളരെ സുന്ദരമായി കാർവിങ്ങിലൂടെ അലങ്കരിച്ചു വച്ചിരിക്കുന്നത് നിങ്ങൾ കണ്ടിട്ടുണ്ടാകുമല്ലോ? ഫലവർഗ്ഗങ്ങളും പച്ചക്കറികളും ഉപയോഗിച്ച് പൂക്കളുടെയോ മറ്റുതരത്തിലുള്ള എന്തെങ്കിലും ആകൃതി തയ്യാറാക്കുന്നതിനാണ് കാർവിങ്ങ് എന്ന് വിളിക്കുന്നത്.

ഈ കല സ്വായത്തമാക്കുകയാണെങ്കിൽ നിങ്ങൾ തയ്യാറാക്കി വച്ചിരിക്കുന്ന സാലഡ്, പച്ചക്കറികൾ, കേക്ക് എന്നിവയലങ്കരിച്ച് കൂടുതൽ ആകർഷകമായ സെന്‍റർ പീസിൽ ഇവ വച്ച് സജ്ജീകരിച്ചാൽ അതിഥികളറിയാതെ ചോദിച്ചു പോകും “ഇതാരാണുണ്ടാക്കിയത്, എങ്ങനെയാണുണ്ടാക്കിയത്” എന്ന്.

കാർവിങ്ങ് ചെയ്യുമ്പോൾ ശ്രദ്ധിക്കേണ്ട കാര്യങ്ങൾ

• ഫലവർഗ്ഗങ്ങളും പച്ചക്കറികളും അധികം പഴുത്തതോ പച്ചയോ ആകാൻ പാടില്ല.
• അവ ശരിയായ ആകാരത്തോടു കൂടിയവയായിരിക്കണം.
• തിളക്കമുള്ളതും മിനുസമുള്ളതുമായിരിക്കണം. പാടുകളോ കറയോ ഉണ്ടാവാൻ പാടില്ല.
• കാർവിങ്ങ് ചെയ്യുമ്പോൾ ഫലവർഗ്ഗങ്ങളിൽ നാരങ്ങാനീര് അഥവാ അൽപം ശർക്കർപ്പാവ് പുരട്ടണം. ഇവ കറുത്തു പോകാതിരിക്കാനാണ് ഇങ്ങനെ ചെയ്യുന്നത്.
• ഫലങ്ങൾ ഐസ് വെള്ളത്തിൽ മുക്കി വച്ചാൽ അവ നല്ലതു പോലെ വികസിക്കും. ഉണങ്ങുകയുമില്ല.
• നിങ്ങൾ കാർവ് ചെയ്ത രൂപം വളരെനാൾ വയ്ക്കുവാന്‍ ആഗ്രഹിക്കുന്നുവെങ്കിൽ ഒരു ചെറിയ സ്പൂൺ ജെലാറ്റിൻ അര കപ്പ് വെള്ളത്തിൽ കുതിർത്ത് അത് തിളപ്പിച്ച് തണുത്തതിനു ശേഷം ബ്രഷ് ഉപയോഗിച്ച് ഇവയിൽ പുരട്ടണം.
• കാർവിങ്ങിനു ശേഷം ബാക്കി വരുന്ന കഷണങ്ങൾ കളയരുത്. അവ സാലഡ്, സൂപ്പ് അല്ലെങ്കിൽ കറികളിൽ ചേർക്കാം.
• കാർവിങ്ങ് നൈഫും ബോർഡും എപ്പോഴും വൃത്തിയായി സൂക്ഷിക്കണം.
• കട്ടിങ്ങിനു മുമ്പ് പെൻസിലുപയോഗിച്ച് ലൈറ്റായി ഡിസൈൻ തയ്യാറാക്കിയ ശേഷം കത്തിയുപയോഗിച്ച് കാർവ് ചെയ്യാം.
• ആദ്യമാദ്യം ചെറിയ പീസ് തയ്യാറാക്കണം. പിന്നെപ്പിന്നെ വലിയ പീസ് തയ്യാറാക്കുന്ന പ്രാക്ടീസ് ചെയ്യാം.

താഴെപ്പറയുന്ന എളുപ്പമുള്ള സ്റ്റെപ്സ് ഉപയോഗിച്ച് നിങ്ങൾക്ക് സാവധാനത്തിൽ ഈ ആകർഷകമായ ആകൃതികൾ രൂപപ്പെടുത്താം.

ടൊമാറ്റോ റോസ്

1. ഒരു നല്ല ഉരുണ്ട തക്കാളിയുടെ അടിഭാഗത്തു നിന്നും കനം കുറച്ച് തൊലിയെടുക്കാൻ തുടങ്ങണം. തക്കാളി കറക്കിക്കൊണ്ട് പതുക്കെ പതുക്കെ ഒരൊറ്റ പീസിൽ തന്നെ മുഴുവൻ തൊലിയും കളയണം.
2. ഏതറ്റത്തു നിന്നാണോ തൊലിയെടുത്തത് അവിടെ പിടിച്ച് റിബൺ പോലെ മടക്കുവാൻ തുടങ്ങണം.
3. തൊലി മുഴുവനും മടക്കി അവസാനിമാകുമ്പോഴേക്കും റോസ് പോലെയുള്ള ആകാരം ലഭിക്കും.

ഇലകൾ

1. ഒരു ആപ്പിളെടുത്ത് 4 കഷണങ്ങളാക്കി കുരു കളയണം.
2. ഓരോ കഷണത്തിനും ഇലയുടെ ആകൃതി നൽകണം.
3. ഈ ഇലകൾക്കിടയിലൂടെ കത്തി നേരെ വലിച്ച് നാഡിയുടെ ആകൃതിയിൽ മുറിക്കണം.
4. കത്തി ചരിച്ച് ഇതിന് നാഡിയുടെ ഔട്ട്ലൈൻ നൽകി ആവശ്യമില്ലാത്ത ഭാഗം പതുക്കെ നീക്കം ചെയ്യാം.
5. കത്തി നേരെയും ചരിച്ചും ക്രമമായി പ്രവർത്തിപ്പിച്ച് രണ്ടു വശത്തെയും ചെറിയ ചെറിയ നാഡി വശങ്ങൾ എടുത്ത് കളയണം.
6. അവസാനം ആവശ്യമില്ലാത്ത ഭാഗങ്ങൾ എടുത്തു കളഞ്ഞ് ഇലകളുടെ പൂർണ്ണ ആകാരം നൽകണം.
7. ഇതുപോലെ തന്നെ കാരറ്റ്, വെള്ളരിക്ക, പപ്പായ, തണ്ണീർ മത്തങ്ങ എന്നിവ കൊണ്ടും ഇലകളുണ്ടാക്കി സാലഡിന്‍റെയും സ്നാക്ക്സിന്‍റെ പ്ലേറ്റും അലങ്കരിക്കാം.

പപ്പായ കൊണ്ടുണ്ടാക്കിയ ലാംപ്

1. ഒരു നീളമുള്ള പപ്പായയും ഒരു ചെറിയ മെഴുകുതിരിയുമെടുക്കണം.
2. പപ്പായ കഴുകി തുടയ്ക്കണം.
3. തണ്ടുള്ള വശത്തുനിന്നും 2 ഇഞ്ച് ഭാഗം എടുത്തു മാറ്റി ഒരു സ്പൂണുപയോഗിച്ച് അകത്തുള്ള കുരുവും നാരും മാറ്റി പതുക്കെ വൃത്തിയാക്കണം.
4. ജോമെട്രിക് ഡിസൈനാണ് ആഗ്രഹിക്കുന്നതെങ്കിൽ പെൻസിൽ കൊണ്ട് വരച്ച് കത്തി കൊണ്ട് നേരെ കാർവ് ചെയ്യാൻ തുടങ്ങണം.
5. ഒരു പ്ലേറ്റിൽ മെഴുകുതിരി കത്തിക്കണം. എന്നിട്ട് കാർവ് ചെയ്തതിനു മുകളിൽ വയ്ക്കണം. നിങ്ങളുടെ തീൻമേശയുടെ സൗന്ദര്യം പതിന്മടങ്ങ് വർദ്ധിച്ചിരിക്കുന്നതായി കാണാൻ സാധിക്കും.

മെലൺ റോസ്

1. ഒരു വലിയ തണ്ണീർ മത്തങ്ങയെടുക്കണം.
2. ആദ്യം പെൻസില്‍ ഉപയോഗിച്ച് ഡിസൈൻ വരയ്ക്കണം.
3. മൂർച്ചയുള്ള കത്തി ഉപയോഗിച്ച് ഇതിൽ കൊത്തുപണി ചെയ്തു തുടങ്ങണം.
4. ഇതിൽ പൂക്കളുടെ ഇടയിൽ നിന്നും തുടങ്ങി പുറത്തേക്ക് അധികമാഴത്തിൽ കട്ട് ചെയ്യാം.
5. അവസാനം ഇലകൾ തയ്യാറാക്കി മുഴുവൻ ഡിസൈനും ഔട്ട്ലൈൻ നൽകാം.
6. അധികം ദിവസം വയ്ക്കണമെങ്കിൽ ക്ലിഗ് ഫിലിം കൊണ്ടടച്ച് ഫ്രിഡ്ജിൽ വയ്ക്കാം.

കുക്കുംബർ ഫാൻ

1. വെള്ളരിക്ക തൊലി കളയാതെ 1 ഇഞ്ച് കനത്തിൽ മുറിക്കണം. ഇത് നടുക്കു നിന്നും പകുതിയായി മുറിക്കണം. കത്തി 90 ഡിഗ്രിയിൽ വച്ച് തുല്യ ആകൃതിയിൽ സ്ലൈസുകൾ മുറിക്കണം. ഇത്തരത്തിലെ എല്ലാ സ്ലൈസുകളും ഒരറ്റത്ത് യോജിച്ച് നിൽക്കണം.
2. ഈയറ്റം അമർത്തി സ്ലൈസുകൾക്ക് ചിറകിന്‍റെ ആകൃതി നൽകണം.
3. ഇത് മറ്റൊരു തരത്തിലുമലങ്കരിക്കാം. ഒരു സ്ലൈസ് അതേപടി ഇട്ട് തൊട്ടടുത്ത സ്ലൈസ് അകത്തേക്ക് മടക്കാം.
4. ഇത് 1-2 മണിക്കൂർ വെള്ളത്തിൽ വയ്ക്കണം.

ലെമൺ ട്വിസ്റ്റ്

1. നാരങ്ങ നേർത്ത സ്ലൈസായി മുറിക്കണം.
2. സ്ലൈസിന്‍റെ ഒരുവശത്ത് മുറിക്കണം.
3. ഇനി ഇതിന്‍റെ ഒരറ്റം പിടിച്ച് 180 ഡിഗ്രി ആംഗിളിൽ തിരിക്കണം. ഇതേ പോലെ ഓറഞ്ചിന്‍റെയും മുസംബിയുടെയും ട്വിസ്റ്റും ഉണ്ടാക്കാം.

ലെമൺ സ്റ്റാർ

1. കേടില്ലാത്ത വലിയ നാരങ്ങ എടുത്ത് ഒരു മൂർച്ചയുള്ള കത്തിയുപയോഗിച്ച് 45 ഡിഗ്രി കോണിൽ ആഴത്തിലും ചരിച്ചും മുറിവ് ഉണ്ടാക്കണം. രണ്ടാമത്തെ കട്ട് ആദ്യത്തെ കട്ടിന്‍റെ അവസാനത്തിൽ നിന്നും തുടങ്ങണം. എന്നാൽ എതിർദിശയിലും ആയിരിക്കണം.
2. ഇങ്ങനെ മുഴുവൻ നാരങ്ങയിലും ആഴത്തിലുള്ള മുറിവുകളുണ്ടാക്കണം. ഇനി സാവധാനത്തിൽ രണ്ടു ഭാഗവും വേർപെടുത്തണം.
3. ലെമൺ സ്റ്റാർ തയ്യാർ.