അപർണ സന്തോഷത്തിലായിരുന്നു. ഇന്ന് അവളുടെയും സന്ദീപിന്‍റെയും ഒന്നാം വിവാഹ വാർഷികമാണ്. മേക്കപ്പിന് അവസാനമായി ഒരു ടച്ച് കൊടുത്തുകൊണ്ട് ഭംഗിയുള്ള കസവുകൾ നിറഞ്ഞ സാരിയുടെ മുന്താണി കയ്യിൽ വിടർത്തിയിട്ട ശേഷം ഡ്രസ്സിംഗ് ടേബിളിന് മുന്നിലുള്ള കണ്ണാടിയിൽ നോക്കി പുഞ്ചിരി തൂകി. പിങ്ക് നിറമുള്ള പട്ടുസാരി അവളെ ഒരു റോസാപ്പൂ പോലെ സുന്ദരിയാക്കി.
ഇന്ന് രാവിലെ സന്ദീപ് സമ്മാനിച്ച വിലകൂടിയ സാരിയാണ് ഇത്. ഇന്ന് സന്ദീപിന് ഞാനും ഒരു സമ്മാനം കരുതി വെച്ചിട്ടുണ്ട്. തീർച്ചയായും സന്ദീപിനത് ഒത്തിരി ഇഷ്ടമാവും. അപർണയുടെ സുന്ദരമായ മുഖം ലജ്ജയാൽ കൂമ്പി പോയി.
കുറച്ചു ദിവസങ്ങളായി ജീവിതത്തിലെ ഏറ്റവും സന്തോഷകരമായ അവസ്ഥയിലൂടെ കടന്നുപോവുകയാണ്. അതിന്‍റെ ചില ലക്ഷണങ്ങളും സൂചനകളും അവളുടെ ശരീരം കാട്ടിത്തുടങ്ങിയിരിക്കുന്നു. വെഡിംഗ് ആനിവേഴ്സറി ഡേയിൽ ഈ വാർത്ത അറിയിച്ച് സന്ദീപിനെ അത്ഭുതപ്പെടുത്താമല്ലോ. ജീവിതത്തിലെ ഏറ്റവും ശുഭകരമായ വാർത്ത അറിയാൻ ഇതിലും മനോഹരമായ മറ്റേതു ദിവസമാണ് ഉള്ളത്. ഇന്ന് രണ്ട് പരിപാടികളാണ് സന്ദീപ് ആസൂത്രണം ചെയ്തിരിക്കുന്നത്. ഒന്ന് സിനിമ അതുകഴിഞ്ഞ് ഗ്രീൻ പാർക്കിൽ ഡിന്നർ.
ഡിന്നർ കഴിഞ്ഞ് അവർ ഗ്രീൻ പാർക്കിൽ നിന്നും പുറത്തിറങ്ങി. രാത്രി ഏറെ വൈകിയിരുന്നു. കറുത്തിരുണ്ട ആകാശത്തിൽ ഒരൊറ്റ നക്ഷത്രത്തെ പോലും കാണാനില്ല. ആഞ്ഞുവീശിയ കാറ്റിനൊപ്പം ഇരമ്പിയെത്തിയ മഴ നനഞ്ഞ അവർ ഹോട്ടലിലെ കാർ പാർക്കിംഗ് ഏരിയയിലേക്ക് നടന്നു. സന്ദീപും അപർണയും തിടുക്കപ്പെട്ട് കാറിൽ കയറി. സന്ദീപ് കാർ സ്റ്റാർട്ട് ആക്കി. വഴി വിജനമായിരുന്നു. വീട്ടിലേക്ക് ഇനി കുറെ ദൂരം ഉണ്ട്. പെട്ടെന്ന് കാർ ഒരു ഞെരുക്കത്തോടെ നിന്നു. എൻജിനിൽ വെള്ളം കയറിയത് ആയിരുന്നു.
ഏതെങ്കിലും വാഹനത്തിൽ ലിഫ്റ്റ് കിട്ടുമെന്ന് പ്രതീക്ഷയിൽ അവർ വണ്ടിയിൽ തന്നെയിരുന്നു. പെട്ടെന്ന് പിന്നിൽ നിന്നും ഒരു കാർ വരുന്നത് കണ്ട് സന്ദീപ് പുറത്തേക്കിറങ്ങി വാഹനത്തിന് നേരെ കൈവീശി. സന്ദീപിന് തൊട്ടടുത്തായി കാർ വന്നുനിന്നു. ഗ്ലാസ് താഴ്ത്തി ഒരു യുവാവ് പുറത്തേക്ക് നോക്കി. അയാൾ അപർണയെ ഒന്നു നോക്കിയശേഷം പിൻവശത്തെ ഡോർ തുറന്നു. അപർണ നന്ദി സൂചകവുമായി ചിരിച്ചുകൊണ്ട് കാറിലേക്ക് കയറി. സന്ദീപ് തന്‍റെ കാർ ലോക്ക് ചെയ്യുന്നതിനിടെ യുവാവ് കാർ സ്റ്റാർട്ട് ആക്കി ചീറിപ്പാഞ്ഞു. സന്ദീപ് അലറി വിളിച്ചു കൊണ്ട് കാറിന് പിന്നാലെ ഏറെ ദൂരം പാഞ്ഞുവെങ്കിലും യാതൊരു പ്രയോജനവും ഉണ്ടായില്ല.
കാറിന്‍റെ പിൻസീറ്റിൽ ഉണ്ടായിരുന്ന യുവാവ് അപർണയെ കടന്നു പിടിച്ചു. അപർണ അയാളുടെ കൈ തട്ടി മാറ്റി കൊണ്ട് ഡോർ തുറക്കാനായി മുന്നോട്ടാഞ്ഞു. അടുത്തിരുന്ന യുവാവ് അവളെ ബലമായി പിടിച്ചു വലിച്ചു. അവളുടെ മുഖം പിടിച്ചുയർത്തി മൃഗീയമായ ആവേശത്തോടെ അയാൾ ചുംബിക്കാനാഞ്ഞു.
അവൾ ഉച്ചത്തിൽ ബഹളം വെച്ചതോടെ യുവാക്കളിൽ ഒരുവൻ അവളുടെ ചുണ്ടു കടിച്ചു പറിച്ചു. കടുത്ത വേദനയിൽ നിലവിളി അവളുടെ തൊണ്ടയിൽ കുടുങ്ങി. വായിൽ രക്തത്തിന്‍റെ ഉപ്പു രസം. ഏറെ ദൂരം മുന്നോട്ടു പോയ ശേഷം അവർ വിജനമായ റോഡരിയിൽ കാർ നിർത്തി. അവളുടെ ദീനരോദനം പുറത്തു കേൾക്കാതിരിക്കാൻ അവർ കാർ സ്റ്റീരിയോയിലൂടെ ഒഴുകിക്കൊണ്ടിരുന്ന പാട്ടിന്‍റെ ശബ്ദം ഉയർത്തി. മൂവരും മദ്യലഹരിയിൽ ആയിരുന്നു.
