ജോലി ചെയ്യുന്ന പെൺകുട്ടികളുടെ എണ്ണത്തിന് ഇന്ന് ഒട്ടും കുറവില്ല. പഠിക്കുമ്പോൾ പാർട്ട് ടൈം ജോലി പോലും ചെയ്‌ത് വരുമാനമുണ്ടാക്കുന്ന പെൺകുട്ടികളുമുണ്ട്. വിവാഹ മാർക്കറ്റിലും ജോലിയുള്ള പെണ്ണിന് വിലയുണ്ട്. പക്ഷേ കല്യാണമൊക്കെ കഴിഞ്ഞ് ഒരു കുട്ടിയാകുന്ന വേളയിലാണ് സ്ത്രീയുടെ ജോലി അവൾക്ക് ഭാരമായി മാറുന്നത്. കുട്ടി സ്ക്കൂളിൽ പോകുന്ന സമയം വരെ അമ്മയുടെ സാമീപ്യം ആവശ്യമാണ് എന്ന ചിന്തയിൽ മിക്കവരും സ്വന്തം ജോലി ഉപേക്ഷിക്കണോ വേണ്ടയോ എന്ന ആശയക്കുഴപ്പത്തിലാകുന്നു. സ്വന്തം ജോലി അതോ സ്വന്തം കുഞ്ഞ്? ഈ രണ്ടു ചോയിസുകളിൽ ജോലിയാണ് വേണ്ടെന്ന് വയ്ക്കുക.
ഇന്ന് കുടുംബങ്ങളിൽ അംഗസംഖ്യ കുറവാണ്. ഗർഭിണിയുടെ അമ്മ, സഹോദരങ്ങൾ എന്നിവരുടെ സഹായം കിട്ടാൻ ഭാഗ്യം വളരെ കുറച്ചു പേർക്കു മാത്രം. ഇനി പ്രസവവേളയിൽ വന്നാൽ തന്നെ രണ്ടോ മൂന്നോ മാസം സഹായിക്കും. പക്ഷേ കുഞ്ഞ് സ്ക്കൂളിൽ പോകുന്നതു വരെ, അതായത് കുറഞ്ഞത് 4 വയസ്സുവരെയെങ്കിലും അവരെയൊന്നും കിട്ടിയെന്നു വരില്ല.
കുഞ്ഞിനു വേണ്ടി ഭർത്താവിന്‍റെ ജോലി കോംപ്രമൈസ് ചെയ്യുന്ന രീതി നമ്മുടെ നാട്ടിൽ സാധാരണവുമല്ല മാത്രമല്ല, ഈ കാലയളവിൽ കുഞ്ഞിന് അച്‌ഛന്‍റെ സാമീപ്യത്തേക്കാൾ അമ്മയുടെ സാമീപ്യമാണ് കൂടുതൽ വേണ്ടത്. ചില കുട്ടികളെ കണ്ടിട്ടില്ലേ, അമ്മയിൽ നിന്ന് അര മണിക്കൂർ പോലും അകന്നു നിൽക്കില്ല.
ഉദ്യോഗസ്‌ഥരായ സ്ത്രീകൾക്ക് 6 മാസം വരെ പ്രസവാവധി ലഭിക്കുമെന്നതു മാത്രമാണ് ചെറിയൊരു ആശ്വാസം. ഈ ആറുമാസങ്ങൾ കുഞ്ഞിന്‍റെ ആരോഗ്യത്തിന് നിർണായകമായതിനാൽ ഈ വേളയിൽ ജോലി ചെയ്യുക എന്നത് സാധ്യവുമല്ല.
ജോലി ഉള്ളവർക്ക്, അത് ഉപേക്ഷിക്കേണ്ടി വരുന്നത് മനപ്രയാസമുണ്ടാക്കുന്ന കാര്യമാണ്. ജോലി ഇപ്രകാരം ഉപേക്ഷിച്ച് ഒന്നോ രണ്ടോ വർഷത്തെ ഇടവേളയ്ക്കു ശേഷം ജോലി അന്വേഷിക്കുമ്പോൾ എളുപ്പത്തിൽ ലഭിക്കുകയുമില്ല. ചിലർക്ക് ഇത്തരം ഇടവേളകൾ ഉണ്ടാകുമ്പോൾ, പിന്നീട് ജോലി ചെയ്യാനുള്ള ആഗ്രഹവും കുറയുന്നതായി കാണാറുണ്ട്.
വരുമാനമുള്ള ജോലി ഉപേക്ഷിക്കുമ്പോൾ വീട്ടിൽ സാമ്പത്തിക ഭാരം കൂടുകയാണ് ചെയ്യുന്നത്. വരുമാനവും ചെലവും യോജിച്ചു പോകാനും പ്രയാസം നേരിട്ടേക്കാം. ഇത്തരം പ്രയാസങ്ങളെക്കുറിച്ച് വിവാഹിതയാവുന്നതിനു മുമ്പോ സ്ത്രീകൾ ആലോചിക്കേണ്ടതുണ്ട്.
സ്വന്തം കുഞ്ഞിനെ ജോലിക്കാരുടെ അടുത്ത് ഏൽപിച്ച് പോകുന്നത് നല്ല കാര്യവുമല്ല. വിവാഹിതരാകാൻ പോകും മുമ്പ് തന്നെ തന്‍റെ ജോലി നിലനിർതതേണ്ടതാണെന്ന തീരുമാനം ഉണ്ടെങ്കിൽ കൂട്ടുകുടുംബത്തിൽ നിന്ന് ജീവിതപങ്കാളിയെ കണ്ടെത്താൻ ശ്രമിക്കാവുന്നതാണ്. മുലയൂട്ടാൻ മാത്രമേ അമ്മയുടെ ആവശ്യം ഇത്തരം കുടുംബങ്ങളിൽ കുഞ്ഞുങ്ങൾക്ക് വേണ്ടി വരൂ.
ഒരു കുഞ്ഞിന്‍റെ അമ്മയായാൽ പിന്നെ ഉള്ള ജോലി ഉപേക്ഷിക്കുന്നതും, പുതിയ ജോലിയിൽ പ്രവേശിക്കുന്നതും ഒക്കെ ഒരുപാട് ആലോചിച്ച് കൃത്യമായ തീരുമാനം എടുക്കേണ്ടി വരും. ജോലി ഉപേക്ഷിക്കേണ്ടി വന്നാൽ ശിശുപരിപാലനത്തിനിടയിൽ കിട്ടുന്ന ഇടവേളകൾ ഫലപ്രദമായി വിനിയോഗിക്കാൻ ശ്രമിക്കുക.
ഭർത്താവിന്‍റെ വരുമാനം കൊണ്ട് ജീവിക്കാൻ നിർവാഹമില്ലെന്ന് ഉറപ്പാണെങ്കിൽ ജോലി ഉപേക്ഷിക്കരുത്. ഈ വേളയിൽ അവധിയെടുക്കുക മാത്രമാണ് പോംവഴി. ഇത്തരം തീരുമാനങ്ങൾ സ്വയം എടുക്കാതെ കുടുംബത്തിന്‍റെ അഭിപ്രായം കൂടി കണക്കിലെടുക്കണം.
