കൂട്ടുകാരിയുടെ വീട്ടിലെത്തിയതായിരുന്നു അനിതയും അഞ്ച് വയസ്സുകാരൻ മകൻ ഋത്വിക്കും. കൂട്ടുകാരി വിളമ്പിയ പലഹാരങ്ങൾ കണ്ട് ഋത്വിക്ക് അവയിൽ മിക്കതും സ്വന്തം പോക്കറ്റിൽ തിരുകി കയറ്റി, അതിനു ശേഷം കൂട്ടുകാരിയുടെ നാലു വയസ്സുകാരി മകളെ അവൻ നിലത്ത് തള്ളിയിട്ടു. അനിത അവനെ എത്ര വിലക്കിയിട്ടും അവൻ കുട്ടിയോട് ഉച്ചത്തിൽ കയർത്തു കൊണ്ടിരുന്നു. മകന്‍റെ ഇത്തരത്തിലുള്ള പെരുമാറ്റത്തിൽ അനിതയ്ക്ക് വല്ലാത്ത ലജ്‌ജ തോന്നി. മിക്ക മാതാപിതാക്കളും നേരിടുന്ന ഒരു പ്രശ്നമാണിത്.
ചില കുട്ടികളുടെ അപ്രതീക്ഷിതമായ ഇത്തരം പെരുമാറ്റം മനസ്സിലാക്കാൻ തന്നെ പ്രയാസകരമായിരിക്കും. വീട്ടിൽ വളരെ മര്യാദയോടു കൂടി പെരുമാറുന്ന കുട്ടികളുണ്ട്. പക്ഷേ ഇത്തരക്കാർ പുറത്ത് പോകുമ്പോഴാകും വിചിത്രമായി പെരുമാറുക. ഇത്തരം അവസ്‌ഥകൾക്ക് സാക്ഷ്യം വഹിക്കേണ്ടി വരുന്ന മാതാപിതാക്കളുടെ മാനസികാവസ്‌ഥ എന്തായിരിക്കുമെന്ന് ഊഹിക്കാവുന്നതേയുള്ളൂ. കുട്ടികൾ എങ്ങനെയെല്ലാം പെരുമാറുന്നോ അവയെല്ലാം സ്വന്തം കുടുംബത്തിൽ നിന്നും ശീലിച്ച കാര്യങ്ങളായിരിക്കുമെന്നാണ് മന:ശാസ്ത്രജ്‌ഞനായ അമുൽ വർമ്മ പറയുന്നത്. മുതിർന്നവർ വീട്ടിൽ എങ്ങനെയാണോ സംസാരിക്കുക കുട്ടികളും അപ്രകാരം തന്നെയാവും ചെയ്യുക. മുതിർന്നവരുടെ ശ്രദ്ധയാകർഷിക്കാൻ വേണ്ടി പലപ്പോഴും കുട്ടികൾ വിചിത്രമായ രീതിയിൽ പ്രവർത്തിക്കാം.
കുട്ടിയുടെ വേണ്ടതും വേണ്ടാത്തതുമായ എല്ലാ ആവശ്യങ്ങളും സാധിച്ചു കൊടുക്കുകയെന്നതല്ല പേരന്‍റിംഗ് എന്ന വാക്കു കൊണ്ട് ഉദ്ദേശിക്കുന്നത്. മറിച്ച് ശരിയായ കാര്യം കുട്ടിയുടെ കാഴ്ചപ്പാടിനനുസരിച്ച് പഠിപ്പിക്കുകയാണ് വേണ്ടത്. മാതാപിതാക്കൾ സ്വന്തം കുഞ്ഞിന് നല്ലതും ചീത്തയുമായ കാര്യങ്ങൾ പറഞ്ഞു കൊടുക്കും. എന്നാൽ മുതിർന്നവരോടും അല്ലാത്തവരോടും അച്ചടക്കത്തോടെ എങ്ങനെ പെരുമാറണമെന്ന അടിസ്‌ഥാന കാര്യം കുഞ്ഞുങ്ങൾക്ക് മാതാപിതാക്കൾ പറഞ്ഞു കൊടുക്കാറില്ല. ഇക്കാരണത്താൽ എപ്പോൾ എവിടെ എങ്ങനെ പെരുമാറണമെന്ന കാര്യത്തിൽ കുട്ടികൾ അജ്ഞരായിരിക്കും.
കുട്ടിയിൽ അച്ചടക്കബോധവും നല്ല പെരുമാറ്റ ശീലങ്ങളും വളർത്തിയെടുക്കാനുള്ള ചില കൊച്ചു വലിയ കാര്യങ്ങളിതാ.
സ്വയം മാറ്റത്തിന് തയ്യാറാകൂ
സ്വന്തം കുഞ്ഞിനെ വെൽ ബിഹേവ്ഡ് ആക്കുന്നതിന് മാതാപിതാക്കൾ സ്വയം മാറ്റത്തിന് തയ്യാറാകണം. നിങ്ങൾ സ്വന്തം മാതാപിതാക്കളോട് എങ്ങനെ പെരുമാറുന്നോ കുട്ടികളും അത് കണ്ടാവും ശീലിക്കുക.
കുട്ടികൾ മുതിർന്നവരെ ബഹുമാനിക്കണം. അവരോട് ഉച്ചത്തിൽ കയർത്ത് സംസാരിക്കരുതെന്ന് മാതാപിതാക്കൾ ആഗ്രഹിക്കുന്നുണ്ടാകുമല്ലോ. അതുകൊണ്ട് മാതാപിതാക്കളും വീട്ടിലെ മറ്റ് കുടുംബാംഗങ്ങളോട് ഹൃദ്യമായി പെരുമാറണം. അമ്മായിയച്‌ഛനോടും അമ്മായിയമ്മയോടും മറ്റ് കുടുംബാംഗങ്ങളോടും സൗഹാർദ്ദത്തോടൊയും ആദരവോടെയുമുള്ള മാതാപിതാക്കളുടെ പെരുമാറ്റം കണ്ട് കുഞ്ഞുങ്ങളും അത് തന്നെ പിന്തുടരും.
മുതിർന്നവരോട് കള്ളം പറയരുതെന്ന് പറഞ്ഞ് മനസ്സിലാക്കുന്നതും പ്രധാനമാണ്. കളവ് പറഞ്ഞാലുണ്ടാകുന്ന ഭവിഷ്യത്ത് ചൂണ്ടിക്കാട്ടുന്ന കുഞ്ഞ് കഥകൾ അവർക്ക് പറഞ്ഞു കൊടുക്കാം. കുഞ്ഞുങ്ങൾ കാര്യങ്ങൾ തിരിച്ചറിയുന്നതിനും മനസ്സിലാക്കുന്നതിനും മാതാപിതാക്കൾ സ്വയം മാറ്റത്തിന് തയ്യാറാകണം. കാരണം കാര്യങ്ങൾ മനസ്സിലാക്കാനുള്ള ശേഷിയും കഴിവും കുഞ്ഞുങ്ങൾക്കുണ്ടാവില്ല. അതിനാൽ മാതാപിതാക്കളെ കണ്ട് മനസ്സിലാക്കിയാണ് അവൻ സ്വന്തം പെരുമാറ്റത്തെ രൂപപ്പെടുത്തുക.
സ്വയമുണ്ടാക്കിയ നിയമത്തെ മുറുകെ പിടിക്കുക
മാതാപിതാക്കൾ കുഞ്ഞുങ്ങൾക്കായി ചില ചിട്ടകളും നിയമങ്ങളും ഉണ്ടാക്കുക സാധാരണമാണ്. ഉദ: ആഴ്ചയിൽ രണ്ട് തവണയേ ചോക്കളേറ്റ് തരൂ, കാർട്ടൂൺ കാണാൻ ദിവസം ഒരു മണിക്കൂർ എന്നിങ്ങനെയുള്ള നിബന്ധനകൾ. ഇത്തരം ചിട്ടകൾ പാലിക്കാനും അനുസരിക്കാനും കുട്ടികൾ തയ്യാറാകും. കുഞ്ഞുങ്ങൾ നിയമങ്ങൾ പാലിക്കണമെന്ന് മാതാപിതാക്കൾ ആഗ്രഹിക്കുന്നുണ്ടെങ്കിൽ മാതാപിതാക്കളും സ്വന്തം നിയമങ്ങൾ പിന്തുടരണം. മാതാപിതാക്കൾ ഇക്കാര്യത്തിൽ വീഴ്ച വരുത്തുന്നത് കണ്ടാൽ കുട്ടികൾ അത് ചൂണ്ടിക്കാട്ടും. മൂഡ് ഇല്ലെങ്കില്ലോ ജോലി തിരക്കുകൾ മൂലമോ മാതാപിതാക്കൾ ചിട്ടകൾ പാലിക്കുന്നതിൽ അലംഭാവം പുലർത്തരുത്.
