സ്നേഹസമ്പന്നനായ ഭർത്താവ്, അച്ഛനമ്മമാരെപ്പോലെ കെയറിങ്ങും സപ്പോർട്ടീവുമായ ഇൻലോസ്, സൗഹൃദം പങ്കു വയ്ക്കാൻ തയ്യാറാവുന്ന ഭർതൃസഹോദരങ്ങൾ.... സ്വന്തം വീടിനെക്കാൾ പ്രിയങ്കരം ഭർത്യ വീടാവണം... ഇങ്ങനെയൊക്കെ സ്വപ്നം കണ്ടു നടക്കുന്ന പെൺകുട്ടി വിവാഹ ശേഷം ഭർതൃഗൃഹത്തിലെത്തുമ്പോൾ അവിടത്തെ സാഹചര്യങ്ങൾ അവൾ കരുതും വിധം തൃപ്ത‌ികരമാവണമെന്നില്ല. ഭർതൃസഹോദരങ്ങളും അവരുടെ കുടുംബവും ഒന്നിച്ചു താമസിക്കുകയാണെങ്കിലാണ് കൂടുതൽ അഡ്‌ജസ്‌റ്റ്‌മെന്‍റ് ആവശ്യമായി വരുന്നത്. ബന്ധങ്ങളിൽ കയ്‌പു നിറയാൻ ചെറിയൊരു തെറ്റിദ്ധാരണ മതി. വളർന്നുവരുന്ന പെൺകുട്ടികളോട് നാളെ മറ്റൊരു വീട്ടിലേയ്ക്ക് പോകേണ്ടതാണ് നീയെന്നും, നല്ല അടക്കവും ഒതുക്കവും ക്ഷമയുമൊക്കെ വേണമെന്നും മുതിർന്നവർ ഉപദേശിക്കുന്നത് ഇതുകൊണ്ടാവും. അന്യവീട്ടിൽ നിന്നും വന്നതാണെങ്കിലും സൗമ്യവും ഹൃദ്യവുമായ പെരുമാറ്റത്തിലൂടെ മരുമകൾക്കും ഭർതൃഗൃഹത്തിൽ സ്നേഹത്തിന്‍റെ സുഗന്ധം നിറയ്ക്കാനാവും. ഓരോ കുടുംബാംഗവും നിങ്ങളുടെ ശ്രദ്ധയും പരിഗണനയും ആഗ്രഹിക്കുന്നുണ്ട്. “മരുമകളല്ല മകളാണ് ഇതെന്നു” പറയിക്കാൻ...
- വീട്ടിലെ മുതിർന്നവരെ ആദരിക്കാനും ബഹുമാനിക്കാനും പഠിക്കുക. ഭർതൃ രക്ഷിതാക്കളോട് നിങ്ങൾ സ്നേഹത്തോടെ പെരുമാറുന്നത് ഭർത്താവിന് നിങ്ങളിലുള്ള മതിപ്പ് വർദ്ധിപ്പിക്കുകയേയുള്ളൂ.
- നാത്തൂനോടും സഹോദരങ്ങളോടും സൗഹൃദപരമായി പെരുമാറാം. സ്വന്തം സഹോദരിയെന്ന പോലെ സ്നേഹവും അടുപ്പവും അവരോടുമാവാം. കൊച്ചു കൊച്ചു സഹായങ്ങൾക്കും വിട്ടുവീഴ്ചകൾക്കും തയ്യാറാവണം. ഉദാരമനസ്കതയും ഷെയറിംഗ് മെന്‍റാലിറ്റിയും നല്ലതാണ്.
- കുടുംബാംഗങ്ങൾ ഏതെങ്കിലും തരത്തിലുള്ള പ്രശ്നങ്ങൾ അഭിമുഖീകരിക്കുന്നുണ്ടെങ്കിൽ അത് ചോദിച്ചു മനസ്സിലാക്കി പരിഹാരം കണ്ടെത്താൻ ശ്രമിക്കുക. സ്വന്തം കാര്യം സിന്ദാബാദ് നയം വേണ്ട. ഭർതൃ കുടുംബാംഗങ്ങളും നിങ്ങൾക്ക് വേണ്ടപ്പെട്ടവരാണെന്ന കാര്യം മറക്കരുത്.
- കുടുംബാംഗങ്ങളുടെ ഭക്ഷണകാര്യത്തിൽ അവഗണനയോ അമിത ഇടപെടലോ പാടില്ല.
- ഭർത്താവുമൊന്നിച്ച് ഷോപ്പിംഗിങ്ങിനു പോകുന്നുവെങ്കിൽ വീട്ടിലെ മറ്റ് അംഗങ്ങൾക്കും എന്തെങ്കിലും ചെറിയ ഗിഫ്റ്റ് വാങ്ങുക.
- കുടുംബാംഗങ്ങളിൽ ആർക്കെങ്കിലും ഒരാൾക്ക് സുഖമില്ലാതെ വരികയാണെങ്കിൽ അവർക്ക് വേണ്ട സഹായം ചെയ്‌തു കൊടുക്കുക. ആവശ്യമെങ്കിൽ ഡോക്‌ടറുടെ അടുത്തു കൊണ്ടു പോകണം.
- കൂടുതൽ പരാതിയും പരിഭവങ്ങളും കടപ്പാടുകളുമൊന്നും വേണ്ട.
വീട്ടുത്തരവാദിത്തങ്ങൾ അവഗണിക്കരുത്
- ഭർതൃഗൃഹവും സ്വന്തം വീടു തന്നെ. അപ്പോൾ വീട്ടിലെ ഉത്തരവാദിത്തങ്ങൾ സ്വയം ഏറ്റെടുത്ത് കുടുംബാംഗങ്ങളുടെ പ്രശംസയും ശ്രദ്ധയും നേടിയെടുക്കുക.
- വീട്ടുജോലി ഒരു ഭാരമായി കാണരുത്. ഉത്തരവാദിത്തമായി ഏറ്റെടുക്കുക.
- ഉദ്യോഗസ്ഥയാണ് നിങ്ങളെങ്കിൽ ജോലിഭാരം അധികമാവുന്ന പക്ഷം നാത്തുനോടോ, അമ്മായിയമ്മയോടോ സഹായം അഭ്യർത്ഥിക്കാം.
- ജോലി കൃത്യസമയത്ത് തന്നെ ചെയ്‌ തീർക്കാൻ ശ്രമിക്കുക. കുറ്റം പറയുവാൻ അവസരം ഒരുക്കി കൊടുക്കാതിരിക്കുക.
- വൃത്തിയും വെടിപ്പുമുള്ള വീട് കണ്ടാൽ വീട്ടമ്മയുടെ മിടുക്കാണെന്നേ ആരും പറയൂ. ഇടയ്ക്ക് വീടിന്‍റെ അറേഞ്ച്മെന്‍റ്സിൽ മാറ്റം വരുത്തി ആകർ ഷകമാക്കാം.
പോസിറ്റീവ് അറ്റിറ്റ്യൂഡ്
- ഹോം മെയിന്‍റനൻസിൽ പോസിറ്റീവ് സമീപനം വച്ചു പുലർത്തുന്നതാണ് നല്ലത്. വളരെ ക്രിയാത്മകമായ രീതിയിൽ കാര്യങ്ങൾ നോക്കി കാണുകയാണെങ്കിൽ ഏതു പ്രശ്നത്തിനും അനായാസ പരിഹാരം കണ്ടെത്താനാവും.
- മുഖത്ത് പ്രസന്നഭാവം സൂക്ഷിക്കുക. വിഷമവും ദേഷ്യവും നിറഞ്ഞ ഭാവം മറ്റുള്ളവർക്കും അനിഷ്‌ടം തോന്നിക്കുകയേയുള്ളൂ. സൗമ്യമായും പുഞ്ചിരിച്ച മുഖത്തോടും കൂടി കാര്യങ്ങൾ അവതരിപ്പിച്ചു നോക്കൂ. നിങ്ങളുടെ പ്രശ്നങ്ങൾ ആരും ശ്രദ്ധയോടെ തന്നെ കേൾക്കും.
- ഏതൊരു പ്രശ്‌നത്തിന്‍റെയും നല്ല വശം. മാത്രം സ്വീകരിക്കുക.
- സദാ വഴക്കുണ്ടാക്കലും പരാതി ബോധിപ്പിക്കലുമൊന്നും വേണ്ട. ഇല്ലായ്‌മകളും വല്ലായ്‌മകളും പറഞ്ഞു കൊണ്ടിരിക്കാതെ ഉള്ളതുകൊണ്ട് ഓണം പോലെ എന്ന സമീപനം വളർത്തിക്കൊണ്ടു വരിക. സദാ ഭർതൃവീട്ടുകാരെക്കുറിച്ച് കുറ്റം പറയുന്നതിനു പകരം അവരെക്കുറിച്ച് നല്ലത് പറയാൻ ശ്രമിക്കുക. വഴക്കുകളും പ്രശ്‌നങ്ങളുമുണ്ടാവുമ്പോൾ നിശ്ശബ്ദത പാലിക്കുകയാണ് ബുദ്ധി. നിങ്ങളുടെ ഭാഗത്താണ് ന്യായമെങ്കിൽ പോലും സൗമ്യമായി സംസാരിച്ച് രമ്യതയിലെത്തിക്കാൻ ശ്രമിക്കണം.
- രണ്ടു കൈയും കൊട്ടിയാലേ ശബ്ദമുണ്ടാവൂ എന്നതിനാൽ നിങ്ങളുടെ ഭാഗം കറക്‌ടായിരിക്കാൻ ശ്രദ്ധിക്കുക. തർക്കത്തിന് വരുന്നവർ ശബ്ദമുയർത്തിയാണ് സംസാരിക്കുന്നതെങ്കിൽ നിങ്ങൾ തല്ക്കാലം ശാന്തരായിരിക്കാൻ ശ്രമിക്കുക. അവരുടെ ദേഷ്യം കുറയുമ്പോൾ പ്രശ്നം അവതരിപ്പിക്കുക.
അമ്മായിയമ്മ ശത്രുവല്ല
