ദാമ്പത്യത്തിന്‍റെ ഉണർവ്വം ആവേശവുമാണ് ദമ്പതികൾ തമ്മിലുള്ള പ്രണയവും സെക്സും. പ്രണയമില്ലാത്ത ജീവിതം തീർത്തും വിരസം തന്നെ. ഒരു പക്ഷേ, പ്രണയ നിമിഷങ്ങളിൽ കാതിൽ കിന്നാരം പറഞ്ഞതും പങ്കാളിയെ മോഹിപ്പിച്ചതും ആവേശത്തോടെ ചുംബിച്ചതുമൊക്കെ വർഷങ്ങൾ പിന്നിടുമ്പോൾ ഒരു പഴങ്കഥയായി പരിണമിച്ചേക്കാം. പ്രസവം, കുഞ്ഞുങ്ങളെ വളർത്തൽ, ജോലി തുടങ്ങിയ ഭാരിച്ച ഉത്തരവാദിത്തങ്ങൾക്കിടയിൽപ്പെട്ട് റൊമാൻസ് അകന്നു പോയിട്ടുണ്ടാവാം. അതോടൊപ്പം ലൈംഗികത യാന്ത്രികമായ പ്രവൃത്തിയായി ചിലരിൽ തുടർന്നു കൊണ്ടിരിക്കുമെന്നുമാത്രം.
സ്നേഹത്തോടെയുള്ള ഒരു വാക്കിനു പോലും വിരസപൂർണ്ണമായ ദാമ്പത്യത്തിൽ പ്രണയത്തിന്‍റെ അലകടൽ സൃഷ്ടിക്കാനാവും. അതിന് അല്പം വിവേകം പ്രകടിപ്പിക്കണമെന്നു മാത്രം. ജീവിതത്തിൽ വീണ്ടും പ്രണയം നിറയുന്നത് നിങ്ങൾക്ക് സ്വയം അനുഭവിച്ചറിയണോ? എങ്കിൽ വിവാഹത്തിന്‍റെ ആദ്യനാളുകളെക്കുറിച്ച് മെല്ലേ ഓർത്തുനോക്കു. മനസ്സിൽ ലജ്ജയും പ്രണയവും നിറയുന്നില്ലേ... വീണ്ടും അതുപോലൊരു ജീവിതത്തിന് മനസ് കൊതിക്കുന്നില്ലേ...
തീവ്രമായി പ്രണയിച്ച ആ ദിനങ്ങൾ... സമയം കടന്നുപോകുന്നത് അറിയാതെ പരസ്പരം കൗതുകത്തോടെ മിഴിചേർത്തിരുന്ന സുന്ദരനിമിഷങ്ങൾ, സ്നേഹ നിർഭരമായ വാക്കുകൾ, സ്വകാര്യമായ നിമിഷങ്ങളിൽ പങ്കാളി പകർന്ന ചൂടുചുംബനങ്ങൾ. ഇതെല്ലാം ഓർക്കുന്നതും പറയുന്നതും മനസ്സിൽ പ്രണയം തിരികെയെത്തിക്കും.
കൂട്ടുകൂടാം
ദാമ്പത്യത്തിൽ ഏകപക്ഷീയമായ ഒന്നല്ല സ്നേഹവും സമർപ്പണവും. പ്രത്യേകിച്ചും ലൈംഗിക കാര്യങ്ങളിൽ ഇരുവരും ഒരുപോലെ പങ്കാളികളാവണം. എങ്കിലേ യഥാർത്ഥ ലൈംഗികസുഖം നേടാനാവൂ. വിവാഹം കഴിഞ്ഞ് കുറച്ചുനാൾക്കകം തന്നെ പരസ്പരം നന്നായി മനസ്സിലാക്കി കഴിഞ്ഞിരിക്കും. അടുത്തറിഞ്ഞ ദമ്പതിമാരാവുമ്പോൾ ഫോർപ്ലേ പോലെയുള്ള കാര്യങ്ങളിൽ ഭാര്യ മുൻകൈയെടുക്കുന്നതിൽ ഒരു തെറ്റുമില്ലെന്ന് അറിയുക.
കിടപ്പറയിലെത്തും മുമ്പ് പങ്കാളികൾ ചില കാര്യങ്ങൾ പ്രത്യേകം ശ്രദ്ധിക്കണം. ശരീരശുചിത്വം അതിൽ ഏറ്റവും പ്രധാനമാണ്. ശരീരശുചിത്വത്തിന് ലൈംഗികതയുമായി ബന്ധമുണ്ട്. പങ്കാളിയുടെ ശരീരത്തിൽ നിന്നുയരുന്ന അസുഖകരമായ ചെറിയൊരു ഗന്ധം പോലും പങ്കാളിയുടെ ലൈംഗിക താല്പര്യത്തെ കെടുത്തിക്കളയാം. വായനാറ്റവും വിയർപ്പുനാറ്റവും ഉദാഹരണങ്ങളാണ്. അതുകൊണ്ട് കിടക്കും മുമ്പ് കുളിക്കുക. സവിശേഷതയാർന്ന നൈറ്റ് ഡ്രസ്സുകൾ അണിയുന്നത് കിടപ്പറയിൽ റൊമാന്‍റിക് മൂഡ് സൃഷ്ടിക്കാൻ സഹായിക്കും. സുഗന്ധം ഇഷ്ടപ്പെടുന്നവർക്ക് പെർഫ്യും ഉപയോഗിക്കാം. കിടപ്പറയിലെ സുഗന്ധ പൂരിതമായ അന്തരീക്ഷം ദമ്പതികളുടെ മനസ്സിൽ പ്രണയ വികാരമുണർത്തും.
രോഗങ്ങളില്ലാത്ത പ്രണയത്തിന്...
ചെറുതും വലുതുമായ ഏതുതരം ലൈംഗികരോഗങ്ങൾക്കും ഇന്ന് ഫലപ്രദമായ ചികിത്സയുണ്ട്. മാത്രമല്ല, പ്രമേഹം പോലെയുള്ള രോഗങ്ങൾ ലൈംഗിക ബലഹീനതയ്ക്ക് കാരണമാകാമല്ലോ. ഇത്തരം പ്രശ്നങ്ങൾക്ക് ഫലപ്രദമായ പരിഹാരങ്ങൾ വൈദ്യശാസ്ത്രം കണ്ടെത്തിയിട്ടുണ്ട്. ഉദ്ധാരണശേഷിയില്ലായ്മ, സിഫിലിസ്, വന്ധ്യത, വെള്ളപോക്ക്, ഗുണേറിയ തുടങ്ങിയ പുറത്തുപറയാൻ മടിക്കുന്ന ലൈംഗികരോഗങ്ങൾക്കെല്ലാം ശാശ്വതമായ പരിഹാരങ്ങൾ വൈദ്യശാസ്ത്രം നിർദ്ദേശിക്കുന്നുണ്ട്. ലൈംഗിക പ്രശ്നങ്ങളിൽ പലതും മാനസികമാണ്. അതുകൊണ്ട് യഥാർത്ഥ പ്രശ്നം തിരിച്ചറിഞ്ഞ് ആഹ്ളാദകരമായ ലൈംഗിക ജീവിതം സാധ്യമാക്കാൻ ശ്രമിക്കുക.
സ്നേഹം മാത്രം
ടെൻഷനും ചിന്തകളുമായി ഒരിക്കലും കിടപ്പറയിലെത്തരുത്. കഴിവതും ദമ്പതികൾ ഒരുമിച്ചുറങ്ങാൻ ശ്രമിക്കുന്നതാണ് നല്ലത്. ഭർത്താവ് രാത്രിയിൽ ജോലി ചെയ്യുന്നത് തുടരുകയും ഭാര്യ നേരത്തെ കിടന്നുറങ്ങുകയും ചെയ്യുന്ന അവസ്‌ഥ ഉണ്ടാകരുത്. ഇത്തരം സാഹചര്യത്തിൽ പിന്നീട് ഉറങ്ങാനെത്തുന്നയാൾക്ക് പങ്കാളിയോട് നിരസം തോന്നാം. പരസ്പരം അഡ്‌ജസ്‌റ്റ് ചെയ‌്ത് ഉറങ്ങാനായി ഒരുസമയം തെരഞ്ഞെടുക്കാം. ക്രമമായ ലൈംഗികബന്ധം എല്ലാ ദമ്പതികളേയും സംബന്ധിച്ച് സാധ്യമാകണമെന്നില്ല. എന്നാലും പതിവായുള്ള ചുംബനങ്ങളിലും ആലിംഗനങ്ങളിലും കളിചിരി തമാശകളിലും പിശുക്കുവേണ്ട. പങ്കാളികളുടെ മനസ്സിൽ പരസ്പരം സ്നേഹവും വിശ്വാസവും നിറയ്ക്കാൻ ഇത്തരം സ്നേഹപ്രകടനങ്ങൾക്കു കഴിയും.
