വെള്ളം ജീവന്‍റെ നിലനിൽപ്പിന് ആവശ്യമാണെന്ന പോലെ നല്ലൊരു ഔഷധവും കൂടിയാണ്. വെള്ളം ഉപയോഗിച്ച് അനേകം രോഗങ്ങൾ ഭേദപ്പെടുത്താം. ഹൈഡ്രോ തെറാപ്പി എന്ന പേരിലാണ് ഈ ചികിത്സാരീതി അറിയപ്പെടുന്നത്.
വളരെ പഴക്കമേറിയ ഒരു ചികിത്സാ രീതിയാണ് ഹൈഡ്രോ തെറാപ്പി. ഗ്രീക്ക് റോമൻ സംസ്‌കാരങ്ങളിൽ മാത്രമല്ല ആയുർവേദത്തിലും ജല ചികിത്സയെക്കുറിച്ചുള്ള പരാമർശങ്ങളുണ്ട്.
ചൂട് വെള്ളം ശരീരത്തിന് കുളിർമ്മയേകുമെന്നാണ് ഹൈഡ്രോ തെറാപ്പിയിൽ പറയുന്നത്. ചൂടു വെള്ളം കുടിക്കുക വഴി ശരീരക്രിയ ശാന്തമാകും. മാനസിക പിരിമുറുക്കവും തളർച്ചയും അകന്നു കിട്ടും. വെള്ളത്തിൽ ശരീരം മുങ്ങുമ്പോൾ ശരീരത്തിന് ഭാരമില്ലാത്ത അവസ്‌ഥ അനുഭവപ്പെടാറുണ്ട്. ഈയൊരവസ്‌ഥ ശരീരത്തിന് ഏറ്റവും ആവശ്യമാണ്. സ്വിമ്മിംഗ്‌പൂൾ, കുളം തുടങ്ങിയവയിൽ മുങ്ങി കുളിക്കുമ്പോൾ ശരീരത്തിന് മസാജിംഗ് ഫീൽ ഉണ്ടാകാറുണ്ട്. ഒപ്പം തന്നെ ചർമ്മം ഉത്തേജിക്കപ്പെടുകയും രക്‌ത സഞ്ചാരം കൂടുകയും ചെയ്യും.
പലതരം ഹൈഡ്രോ തെറാപ്പി
- കുളിക്കുക
- വെള്ളത്തിലിരിക്കുക
- പാദങ്ങളുടെ സ്‌നാനം
- ശരീരത്തിന് ആവി കൊള്ളിക്കൽ
- ചൂട് വെള്ളത്തിൽ മുക്കിപ്പിഴിഞ്ഞ തുണികൊണ്ട് ചൂട് കൊള്ളിക്കൽ
- തണുത്ത വെള്ളം കൊണ്ട് ശരീരം തണുപ്പിക്കൽ
ചികിത്സ
നെഞ്ചിൽ കഫക്കെട്ട് പ്രശ്നമുണ്ടെങ്കിലോ ചുമയുണ്ടെങ്കിലോ പാദങ്ങളിലോ മുട്ടിലോ വിരലിലോ പരുക്കേറ്റ് നീര് വന്നിട്ടുണ്ടെങ്കിലോ ചൂട് വെള്ളത്തിൽ മുക്കി പിഴിഞ്ഞ തുണികൊണ്ട് ചൂട് കൊള്ളിക്കുക.
തലവേദന, പല്ലു വേദന, കയ്യിലോ കാലിലോ ഉണ്ടാകുന്ന ഉളുക്ക് എന്നിവയ്‌ക്ക് തണുത്ത വെള്ളം കൊണ്ട് കോൾഡ് കംപ്രഷൻ നൽകാം.
പൈൽസ് പ്രോസ്‌റ്റേറ്റ് ഗ്രന്ഥിയിലുണ്ടാകുന്ന വീക്കം, മൂത്രാശയ സംബന്ധമായ അസുഖങ്ങൾ, സ്‌ത്രീ ജനനേന്ദ്രിയത്തിലുണ്ടാകുന്ന രോഗങ്ങൾ, മുട്ട്, പാദം, കണങ്കാൽ എന്നീ ഭാഗങ്ങളിലുണ്ടാകുന്ന വേദനയ്‌ക്കും കോൾഡ് കംപ്രഷൻ ഒരു പരിധി വരെ ആശ്വാസമാകാറുണ്ടെങ്കിലും ഇതിനെല്ലാം ശരിയായ ചികിത്സ ആവശ്യമായി വരാം.
പകൽ സമയം ഏകദേശം മൂന്നു ലിറ്റർ വെള്ളം കുടിക്കുന്നത് നല്ലതാണ്. കാരണം ശരീരത്തിലെ എല്ലാ അവയവങ്ങൾക്കും വെള്ളം ആവശ്യമാണ്. ചർമ്മത്തിന് ഈർപ്പം ലഭിക്കാനും ഇത് സഹായിക്കും. മാത്രവുമല്ല, മാനസിക പിരിമുറുക്കം കുറയ്‌ക്കാനും ശരീരത്തിന്‍റെ രോഗ പ്രതിരോധശേഷി വർദ്ധിപ്പിക്കാനും ഇത് സഹായിക്കും. അവയവങ്ങൾ കൂടുതൽ കാര്യക്ഷമമായി പ്രവർത്തിക്കും. രക്‌ത സഞ്ചാരം വർദ്ധിക്കുന്നതിനൊപ്പം മുഖക്കുരു ശല്യം കുറയും. തലവേദന, സന്ധി വേദന എന്നിവ മാറിക്കിട്ടും. നല്ല ഉറക്കവും ലഭിക്കും.
തൊണ്ട വരളുക, മൂത്രം കുറയുക, ചൊറിച്ചിൽ തുടങ്ങിയ പ്രശ്നങ്ങൾ വെള്ളം കുറയുന്നതിനാലാണ് ഉണ്ടാവുന്നത്. അതുകൊണ്ട് കായിക വിനോദങ്ങളിൽ ഏർപ്പെടുന്നവർ മതിയായ അളവിൽ വെള്ളം കുടിക്കാൻ പ്രത്യേകം ശ്രദ്ധിക്കുക തന്നെ വേണം. അതായത് 2 ശതമാനം വെള്ളത്തിന്‍റെ കുറവ് 25 ശതമാനം കാര്യക്ഷമതയെ കുറച്ചുകളയും.
ചുവടെ കൊടുത്തിരിക്കുന്ന കാര്യങ്ങൾ ശ്രദ്ധിക്കുക
- എപ്പോഴും തണുത്ത വെള്ളത്തിൽ കുളിക്കുക. വെയിലത്ത് നിന്നും വീട്ടിലെത്തിയാലുടൻ ധാരാളം വെള്ളം കുടിക്കുക.
- തുണിയിൽ ഐസ് കട്ട വച്ച് മുഖത്ത് ഉരസുക. കണ്ണുകൾക്ക് മീതെ റോസ് വാട്ടറിൽ മുക്കിയ കോട്ടൺ പാഡുകൾ വയ്‌ക്കുക.
