ആരോഗ്യവും ഫിറ്റ്നസും ഉറപ്പാക്കാൻ സഹായിക്കുന്ന അനേകം ഗാഡ്ജറ്റുകൾ ഇന്ന് വിപണിയിൽ ലഭ്യമാണ്. ദീർഘനേരം ഇരുന്ന് ജോലി ചെയ്യുന്നത് കുടവയറും പൊണ്ണത്തടിയും നടുവേദനയും ഉണ്ടാക്കുമല്ലോ. അപ്പോൾ എത്ര നേരം ഇരുന്നു എത്രനേരം നടന്നു എന്നൊക്കെ കൃത്യമായി രേഖപ്പെടുത്താനും അത് ഓർമ്മിപ്പിക്കാനും ഉപകരിക്കുന്ന ഉപകരണങ്ങൾ ആരോഗ്യ സംരക്ഷണത്തിന്‍റെ ഭാഗമായി കഴിഞ്ഞു. ഇത്തരം ഫിറ്റ്നസ് ഗാഡ്ജറ്റുകൾ ഒന്നിനും നേരം തികയാത്ത തലമുറയ്ക്ക് പറ്റിയതു തന്നെ.
സ്മാർട്ട് ഷൂ
ഓടാൻ പണ്ട് ഉപയോഗിച്ച ഷൂസിന്‍റെ കാലം അസ്തമിച്ചു. കണ്ടാൽ സ്പോർട്സ് ഷൂ ആണെന്ന തോന്നൽ ഉണ്ടാക്കുന്ന തരം ഫിറ്റ്നസ് ഷൂസാണ് വിപണിയുടെ താരം. ഈ ഷൂ മൊബൈൽ ആപ്പുമായി കണകറ്റ് ചെയ്താൽ ഫിറ്റ്നസ് ആക്റ്റിവിറ്റി സംബന്ധിച്ച സകല വിവരങ്ങളും മൊബൈലിൽ അറിയാനാവും. സഞ്ചരിച്ച ദൂരം, വേഗം, എത്ര സ്റ്റെപ്സ് നടന്നു, എരിഞ്ഞു തീർത്ത കലോറിയുടെ അളവ് ഇവയെല്ലാം മനസിലാക്കാൻ സ്മാർട്ട് ഷൂ സഹായിക്കും.
സ്മാർട്ട് വാട്ടർ ബോട്ടിൽ
ഈ വാട്ടർ ബോട്ടിലിൽ വെള്ളം കഴിച്ചതിന്‍റെ അളവ് ലഭിക്കുന്നു. ജോലിത്തിരക്കിനിടെ വെള്ളം കുടിയ്ക്കാൻ മറന്നു പോകുന്നവർക്കും ഓർമ്മപ്പിശകുള്ളവർക്കും ഉപകരിക്കും. ഈ വാട്ടർ ബോട്ടിലിൽ ബ്ലൂടൂത്ത് വഴി മൊബൈലിൽ ആപ്പുമായി കണക്ട് ചെയ്താൽ കുടിക്കുന്ന വെള്ളത്തിന്‍റെ അളവ് കൃത്യമായി അറിയാൻ സാധിക്കും. വെള്ളം കുടിക്കാൻ നിർബന്ധിക്കുന്ന മെസേജും കൃത്യമായി ഇടവേളകളിൽ ലഭിച്ചു കൊണ്ടിരിക്കുകയും ചെയ്യും. വർക്കൗട്ട്, ഔട്ട്ഡോർ ആക്റ്റിവിറ്റി ഇവ കൂടുതൽ ഉള്ളവർക്ക് വളരെ പ്രയോജനപ്രദമാണ്.
വെയറബിൾ തെർമോമീറ്റർ
ഈ ഉപകരണം അണിഞ്ഞാൽ എത്ര ഡിഗ്രി സെൽഷ്യസ് പനിയുണ്ടെന്ന് ബ്ലൂടുത്ത് വഴി മൊബൈലിൽ അറിയാൻ സാധിക്കും. വീട്ടിൽ വാങ്ങിവച്ചാൽ, കുട്ടികളുടെയും പ്രായമായവരുടെയും പനി അളക്കാൻ സഹായകമാണ്. പനിയുടെ വ്യതിയാനവും നിശ്ചയിക്കാനാവും. ഗ്യാരന്‍റിയുള്ള വിശ്വാസ യോഗ്യമായ ബ്രാന്‍റ് വാങ്ങണമെന്ന് മാത്രം.
ഫെർട്ടിലിറ്റി മോണിറ്റർ
ഗർഭധാരണത്തിനു സാധ്യതയുള്ള ദിവസങ്ങൾ അറിയാൻ ഈ ഗാഡ്ജറ്റ് സഹായിക്കുന്നു. കൂടുതൽ കൃത്യതയോടെ ഓവുലേഷൻ ദിനങ്ങൾ പ്രവചിക്കാൻ കഴിയും എന്നതാണീ ഉപകരണത്തിന്‍റെ പ്രത്യേകത. കുഞ്ഞിനു വേണ്ടി തയ്യാറെടുക്കുന്നവർക്ക് വളരെ പ്രയോജനപ്രദമാണ് ഗാഡ്ജറ്റ്. വാച്ച് പോലെ അണിയാനും സാധിക്കും. ഫെർട്ടിലിറ്റി ട്രാക്കും ലഭ്യമാണ്.
ഫിറ്റ്നസ് ട്രാക്കർ
ഫിറ്റ്നസ് ബാൻഡാണ് പുതിയ തരംഗം. ഇത് സമയം കാണിക്കുന്നതിനൊപ്പം നടന്ന ദൂരം, എരിഞ്ഞ കലോറി, ഹൃദയമിടിപ്പിന്‍റെ നിരക്ക്, എത്ര സമയം ഉറങ്ങി എന്നിവയെല്ലാം രേഖപ്പെടുത്തും. ഡീപ്പ് സ്ലീപ്പ്, ലൈറ്റ് സ്ലീപ്പ് സമയം എന്നിവയും അറിയാൻ കഴിയും. ഇതിനായി ഉറങ്ങുമ്പോൾ അണിയണമെന്ന് മാത്രം. ഇതു കൂടാതെ ബ്ലൂടൂത്ത് വഴി ഫോണുമായി കണക്ട് ചെയ്താൽ സോഷ്യൽ മീഡിയ നോട്ടിഫിക്കേഷനും ലഭിക്കും.
