മഷ്റൂം ഓംലെറ്റ്
ചേരുവകൾ
മുട്ട- 4 എണ്ണം
സവാള- 5 എണ്ണം
കൂൺ- 4-5 എണ്ണം
വെണ്ണ- 2 ടേബിൾസ്‌പൂൺ
ഉപ്പ്, കുരുമുളക് ആവശ്യത്തിന്
തയ്യാറാക്കുന്ന വിധം
ഒരു പാത്രത്തിൽ മുട്ട പൊട്ടിച്ച് അതിൽ ഉപ്പ്, കുരുമുളക് പൊടി, ചെറുതായി അരിഞ്ഞ സവാള എന്നിവ ചേർക്കുക. ഒരു പാനിൽ ഒരു ടീസ്പൂൺ ബട്ടർ ചൂടാക്കി അരിഞ്ഞ കൂൺ ചേർത്ത് വഴറ്റുക. പാനിൽ നിന്ന് കൂൺ മാറ്റി വയ്ക്കുക. ശേഷം ബാക്കിയുള്ള ബട്ടർ നോൺ-സ്റ്റിക്ക് പാനിൽ മീഡിയം തീയിൽ ഉരുക്കുക. ഇതിലേക്ക് അടിച്ചു വച്ചിരിക്കുന്ന മുട്ട ചേരുവ പതുക്കെ ഒഴിക്കുക. തുടർന്ന് അതിനു മുകളിൽ തയ്യാറാക്കി വച്ച കൂൺ ചേർക്കാം. ഓംലെറ്റിന്‍റെ ഒരു വശം മൊരിഞ്ഞു കഴിയുമ്പോൾ സ്‌പൂൺ ഉപയോഗിച്ച് ഓംലെറ്റ് രണ്ടായി മടക്കുക. പാനിൽ നിന്നെടുത്തു ചൂടോടെ വിളമ്പാം. ആവശ്യമെങ്കിൽ മല്ലിയില വിതറി അലങ്കരിച്ചും സെർവ് ചെയ്യാം.
തക്കാളി ഓംലെറ്റ്
ചേരുവകൾ
തക്കാളി- 2 എണ്ണം
റിഫൈൻഡ് ഓയിൽ- 1 ടേബിൾ
മുളകുപൊടി- അര ടീസ്പൂൺ
മുട്ട -4 എണ്ണം
കുരുമുളക് പൊടി- അര ടീസ്പൂൺ
ഉപ്പ് ആവശ്യത്തിന്
തയ്യാറാക്കുന്ന വിധം
രുചികരമായ ഈ വിഭവം തയ്യാറാക്കാൻ തക്കാളി തണുത്ത വെള്ളത്തിൽ കഴുകി ചെറുതായി അരിഞ്ഞു വഴറ്റണം. തുടർന്ന് ഒരു നോൺ സ്റ്റിക്ക് പാനിൽ മീഡിയം ഫ്ളെയിമിൽ കുറച്ച് എണ്ണ ഒഴിച്ച് ചൂടാക്കുക. ഒരു പാത്രത്തിൽ മുട്ട, ഉപ്പ്, മുളകുപൊടി, കുരുമുളക് എന്നിവ ചേർത്ത് അടിക്കുക. ഇത് പാനിൽ ഒഴിച്ച് പരത്തി സ്വർണ്ണ തവിട്ട് നിറമാകുന്നതുവരെ മൊരിക്കുക. തുടർന്ന് ഓംലെറ്റ് മറിച്ചിടുക. മറുവശവും മൊരിച്ചെടുക്കുക. പാനിൽ നിന്ന് എടുത്തശേഷം വഴറ്റിയ തക്കാളി ഓംലെറ്റിന് മീതെ നിരത്തി സെർവ് ചെയ്യാം.
മസാല ഓംലെറ്റ്
ചേരുവകൾ
മുട്ട- 3 എണ്ണം
പച്ചമുളക് ചെറുതായി അരിഞ്ഞത്- 2 എണ്ണം
കാപ്സിക്കം അരിഞ്ഞത്- 2 ടീസ്പൂൺ
മഞ്ഞൾപ്പൊടി- 1 ടീസ്പൂൺ
ഒലിവ് ഓയിൽ- 2 ടേബിൾ സ്‌പൂൺ
സവാള ചെറുതായി അരിഞ്ഞത്- 4 എണ്ണം
പാൽ- 2 ടേബിൾ സ്‌പൂൺ
തക്കാളി ചെറുതായി അരിഞ്ഞത്- 2 എണ്ണം
കുരുമുളക് പൊടി- 1 ടീസ്പൂൺ
മല്ലിയില അരിഞ്ഞത്- അൽപം
ഉപ്പ്- ആവശ്യത്തിന്
തയ്യാറാക്കുന്ന വിധം
മുട്ട പൊട്ടിച്ച് എണ്ണ ഒഴികെയുള്ള എല്ലാ ചേരുവകളും ചേർത്ത് നന്നായി അടിക്കുക. പാൻ ചൂടാക്കി എണ്ണ ഒഴിക്കുക. തുടർന്ന് മുട്ട ചേരുവ ഒഴിച്ച് പാൻ വട്ടത്തിൽ ചലിപ്പിച്ച് റൗണ്ട് ഷേപ്പിലാക്കുക. അരികുകൾ വെന്ത് അടിഭാഗം ഇളം തവിട്ടുനിറമാകുന്നതുവരെ ഇടത്തരം തീയിൽ വേവിക്കുക. തുടർന്ന് മറിച്ചിട്ട് മറുവശം പാകം ചെയ്യുക. മസാല ഓംലെറ്റ് തയ്യാർ.
ഓട്സ് മസാല ഓംലെറ്റ്
ചേരുവകൾ
ഓട്സ് പൊടിച്ചത്- കാൽ കപ്പ്
മുട്ട- 3 എണ്ണം
കുരുമുളക് പൊടി- 1 ടീസ്പൂൺ
ഒറിഗാനോ- 1 ടീസ്പൂൺ
മല്ലിയില- അൽപം
പച്ചമുളക്, സവാള, തക്കാളി എല്ലാം ഓരോന്ന് വീതം (ചെറുതായി അരിഞ്ഞത്)
എണ്ണ, ഉപ്പ് ആവശ്യത്തിന്
തയ്യാറാക്കുന്ന വിധം
ഓട്സ് ഒരു മിക്സർ ജാറിൽ ഇട്ട് പൊടിച്ചെടുക്കുക. മുട്ട ഒരു പാത്രത്തിൽ പൊട്ടിച്ച് ഒഴിച്ച് നന്നായി അടിക്കുക. ഇതിലേക്ക് ഓട്സ് പൊടി ചേർത്ത് മിക്സ‌് ചെയ്യാം. തുടർന്ന് കുരുമുളക്, മുളകുപൊടി, ഒറിഗാനോ, കാപ്സിക്കം, സവാള, പച്ചമുളക്, മല്ലിയില എന്നിവ ചേർക്കുക. മാവ് കട്ടിയുള്ളതായി തോന്നുന്നുവെങ്കിൽ അൽപം വെള്ളം ചേർക്കാം. പാനിൽ എണ്ണ ഒഴിച്ച് ചൂടാക്കുക. തയ്യാറാക്കിയ മുട്ടമാവ് ഒഴിച്ച് പരത്തി ഇടത്തരം തീയിൽ ഏതാനും മിനിറ്റ് വേവിക്കുക. മറുവശവും നന്നായി ബേക്ക് ചെയ്തശേഷം ഒരു സെർവിംഗ് പ്ലേറ്റിൽ എടുത്ത് കഴിക്കാം.
