ചോ: എന്‍റെ മുടി ചുരുണ്ടിട്ടാണ്‌. മുടി അമിതമായി ചുരുണ്ടിരിക്കുന്നത് കൊണ്ടു മുടി മാനേജ് ചെയ്യാൻ വളരെ ബുദ്ധിമുട്ടാണ്. മാത്രവുമല്ല മുടി നിർജ്ജീവവും വരണ്ടതുമായി മാറിയിരിക്കുന്നു. കൂടാതെ മുടി പൊഴിയുകയും ചെയ്യുന്നുണ്ട്. ദയവായി എന്തെങ്കിലും പരിഹാരം നിർദ്ദേശിക്കാമോ?
ഉ: ചുരുണ്ട മുടിയിൽ ചെറു ചൂടുള്ള എണ്ണ കൊണ്ട് മസാജ് ചെയ്യുന്നത് മുടിക്ക് ഗുണം ചെയ്യും. ഇത് സ്ഥിരമായി ആഴ്‌ച്ചയിൽ ഒരിക്കൽ ചെയ്യൂന്നതിലൂടെ ഏത് തരം ചുരുണ്ട മുടിയും വളരെ മനോഹരമാകും. വെളിച്ചെണ്ണ, ഒലിവ് അല്ലെങ്കിൽ ബദാം എണ്ണ എന്നിവയിൽ ഏതെങ്കിലും ഒന്ന് ഉപയോഗിച്ച് മുടി മസാജ് ചെയ്യാം. ദിവസവും മുടി ഷാംപൂ ചെയ്യുന്നത് മുടിക്ക് ദോഷം ചെയ്യും. ഇതുമൂലം മുടി കൊഴിയാനും മുടിയ്ക്ക് നിർജ്ജലീകരണം സംഭവിക്കാനും തുടങ്ങുന്നു. അതുകൊണ്ട് മുടി അധികം കഴുകാതിരിക്കുന്നതാണ് നല്ലത്.
ചുരുണ്ട മുടി വളരെ മുറുക്കി കെട്ടുന്നത് ഒഴിവാക്കണം. ഇങ്ങനെ ചെയ്യുന്നതിലൂടെ മുടി വേരുകൾ ദുർബലമാവുകയും പൊട്ടാൻ തുടങ്ങുകയും ചെയ്യു൦. മുടി നല്ലവണ്ണം ചുരുണ്ടത് ആണെങ്കിൽ ചെറുതായി നനവുള്ളപ്പോൾ ചീകി ഹെയർ സെറ്റ് ചെയ്യാം. ഇത് മുടിയുടെ വലിച്ചിൽ കുറയ്ക്കും. ചുരുണ്ട മുടിയിൽ ഡ്രയറിന്‍റെ ഉപയോഗം കുറയ്ക്കുക, കാരണം ഇതിന്‍റെ അമിത ഉപയോഗം മുടിയെ ദുർബലമാക്കു൦.
ചുരുണ്ട മുടിയുടെ മൃദുത്വം നിലനിർത്താൻ ആഗ്രഹിക്കുന്നുവെങ്കിൽ, കെമിക്കൽ കളറുകൾ ഉപയോഗിക്കുന്നത് പൂർണ്ണമായും ഒഴിവാക്കുക. അവയിൽ കൂടുതൽ പരീക്ഷണങ്ങൾ നടത്തരുത്. ഉചിതമായ രീതിയിൽ ശ്രദ്ധിച്ചാൽ മുടി മൃദുവും തിളക്കവുമുള്ളതുമായി മാറും. അതിനുള്ള ചില ഹെയർ പായ്ക്കുകൾ പരിചയപ്പെടാം.
- 3 -4 ടേബിൾ സ്പൂൺ കട്ടി തൈര്, 2 ടേബിൾ സ്പൂൺ തേൻ, ഒരു വാഴപ്പഴം നന്നായി സ്മാഷ് ചെയ്തത്, 3 ടേബിൾ സ്പൂൺ നാരങ്ങാ നീര് എന്നിവ യോജിപ്പിച്ച് തലയിൽ പുരട്ടുക. മുടിയുടെ കട്ടി അനുസരിച്ച് ചേരുവകളുടെ അളവിൽ മാറ്റം വരുത്താം. 20 മിനിറ്റിനു ശേഷം മുടി നന്നായി കഴുകുക.
- 2 ടേബിൾ സ്പൂൺ തേങ്ങ പാൽ, ഒരു മുട്ടയുടെ മഞ്ഞക്കരു, 2 ടേബിൾ സ്പൂൺ തേൻ, 2 ടേബിൾ സ്പൂൺ ഒലിവ് ഓയിൽ/ ആൽമണ്ട് ഓയിൽ എന്നിവ ഒരു ബൗളിൽ നന്നായി അടിച്ച് യോജിപ്പിച്ച് തലയിൽ പുരട്ടുക.15- 20 മിനിട്ടിനു ശേഷം തല കഴുകാം.
- ഒരു വാഴപ്പഴം, ഒരു അവോക്കാഡോ പഴം എന്നിവ സ്മാഷ് ചെയ്ത് അതിൽ ഒലിവ് ഓയിൽ ചേർത്ത് തലയിൽ പുരട്ടി 30 മിനിട്ടിനു ശേഷം കഴുകുക.
- അലോവേര ജെല്ലും വെളിച്ചെണ്ണയും യോജിപ്പിച്ച് തലയിൽ പുരട്ടി 30 മിനിറ്റിന് ശേഷം കഴുകി കളയുക.
- പപ്പായയുടെ പൾപ്പും വെളിച്ചെണ്ണയും യോജിപ്പിച്ച് തലയിൽ പുരട്ടി 20- 30 മിനിറ്റിന് ശേഷം തല കഴുകുക.
മേൽ വിവരിച്ച മാസ്കുകൾ രണ്ട് അഴ്ചയിൽ ഒരിക്കൽ ചെയ്യുക. അനുയോജ്യമായ മാറ്റങ്ങൾ നൽകുന്ന ഹെയർ മാസ്‌ക് ഉപയോഗിച്ച് നോക്കി കണ്ടെത്താം. ശരിയായ കേശ പരിചരണത്തിലൂടെ മുടിയ്ക്ക് നല്ല ആരോഗ്യവും തിളക്കവും ലഭിക്കും. ഒപ്പം ഭക്ഷണ കാര്യത്തിൽ കൂടി ശ്രദ്ധ നൽകാം. പ്രോട്ടീനിന്‍റെ അളവ് വർദ്ധിപ്പിക്കുക. പയർ വർഗ്ഗങ്ങൾ, മൽസ്യം, ഇലക്കറികൾ പ്രത്യേകിച്ചും ചീര, മുരിങ്ങയില എന്നിവ ആഴ്ചയിൽ ഒന്ന് രണ്ടു തവണ എങ്കലും ഡയറ്റിൽ നിർബന്ധമായും ഉൾപ്പെടുത്തണം. മാനസിക സമ്മർദ്ദം കുറയ്ക്കുക. നോർമൽ മുടിയുള്ളവർക്കും മേൽ വിവരിച്ച ഹെയർ മാസ്കുകൾ ഉപയോഗിക്കാവുന്നതാണ്.
