പ്രായമാകും മുമ്പേ ചർമ്മം നിർജ്ജീവമാവുകയും, കണ്ണുകൾക്ക് താഴെ കറുത്ത വൃത്തങ്ങൾ, ബലഹീനത, ചുളിവുകൾ, ചർമ്മത്തിന് തിളക്കം നഷ്ടപ്പെടൽ എന്നിങ്ങനെയുള്ള പ്രശ്‌നങ്ങൾ കണ്ട് തുടങ്ങുകയും ചെയ്താൽ ഉടനടിഭക്ഷണ ശീലത്തിൽ മാറ്റം വരുത്തേണ്ടത് പ്രധാനമാണ്. സമീകൃതവും പോഷക സമൃദ്ധവുമായ ഭക്ഷണത്തോടൊപ്പം പഴങ്ങൾ കഴിക്കുന്നത് ദീർഘകാലം ചെറുപ്പം നിലനിർത്താൻ സഹായിക്കുന്നു. അത് നമ്മെ ശാരീരികമായും മാനസികമായും ആരോഗ്യമുള്ളവരാക്കും. ചെറുപ്പ൦ നിലനിർത്താൻ സഹായിക്കുന്ന ചില പഴങ്ങളെയാണ് ഇവിടെ പരിചയപ്പെടുത്തുന്നത്.
മാതള൦
ആന്‍റി ഓക്‌സിഡന്‍റും പോളിഫിനോൾ ഗുണങ്ങളും കൊണ്ട് സമ്പുഷ്ടമാണ് മാതള൦. ഇതിൽ ഉയർന്ന അളവിൽ ആന്തോസയാനിൻ, എലാജിക് ആസിഡ്, പൊട്ടാസ്യം, ഫൈബർ, വിറ്റാമിനുകൾ എന്നിവ അടങ്ങിയിട്ടുണ്ട്. ഇത് ചർമ്മത്തെ വിഷവിമുക്തമാക്കാൻ സഹായിക്കുന്നു. ഇത് ചർമ്മത്തെ മൃദുവും തിളക്കമുള്ളതുമാക്കുന്നു. നമ്മുടെ രോഗപ്രതിരോധ ശേഷിയും രക്തചംക്രമണവും വർദ്ധിപ്പിക്കുന്നതിനൊപ്പം, ഇത് ചീത്ത കൊളസ്ട്രോൾ നിയന്ത്രിക്കുകയും ഹൃദ്രോഗം, ക്യാൻസർ സാധ്യത കുറയ്ക്കുകയും ചെയ്യുന്നു. മാതളത്തിൽ അടങ്ങിയ ഫ്ലോറിക് ആസിഡ് ഗർഭിണികൾക്ക് ഏറെ ഗുണം ചെയ്യും.
വാഴപ്പഴം
നമ്മുടെ ചർമ്മത്തിന് ഗുണം ചെയ്യുന്ന പൊട്ടാസ്യം, കരോട്ടിൻ, വിറ്റാമിൻ ഇ, ബി1, ബി, സി എന്നിവ വാഴപ്പഴത്തിൽ അടങ്ങിയിട്ടുണ്ട്. ഇത് ചർമ്മത്തിലെ പാടുകൾ ഇല്ലാതാക്കി തിളക്കമുള്ളതുമാക്കുന്നു. വാഴപ്പഴം പതിവായി കഴിക്കുന്നത് ചർമ്മത്തിന് തിളക്കം നൽകുമെന്ന് മാത്രമല്ല, ഹൃദ്രോഗം, രക്തസമ്മർദ്ദം, കാൻസർ തുടങ്ങിയ രോഗങ്ങളിൽ നിന്ന് നമ്മെ സംരക്ഷിക്കുകയും ദഹന വ്യവസ്ഥയെ ആരോഗ്യകരമായി നിലനിർത്തുകയും ചെയ്യുന്നു.
ഓറഞ്ച്
ഓറഞ്ചിൽ ധാരാളം ആന്‍റിഓക്‌സിഡന്‍റുകൾ അടങ്ങിയിട്ടുണ്ട്, ഇത് അൾട്രാവയലറ്റ് രശ്മികളിൽ നിന്ന് ചർമ്മത്തെ സംരക്ഷിക്കുന്നു. ഓറഞ്ച് തൊലി പൊടിച്ച് പേസ്റ്റ് രൂപത്തിലാക്കി മുഖത്ത് പതിവായി പുരട്ടുകയാണെങ്കിൽ, ചർമ്മം തിളങ്ങുകയും പാടുകൾ നിശ്ശേഷം മാറുകയും ചുളിവുകളും ടാനിംഗും ഇല്ലാതാകുകയും ചെയ്യും. കൂടാതെ, ഓറഞ്ച്, അൾസർ, പൈൽസ്, കിഡ്നി സ്റ്റോൺ, സന്ധി വേദന, വിഷാദം തുടങ്ങിയ രോഗങ്ങളിൽ നിന്ന് ആശ്വാസം നൽകുകയും ക്യാൻസർ, ഹൃദ്രോഗം, നേത്ര സംബന്ധമായ അസുഖങ്ങൾ എന്നിവയിൽ നിന്ന് നമ്മെ സംരക്ഷിക്കുകയും ചെയ്യു൦.
പപ്പായ
പപ്പായ, ഒരു നാച്ചുറൽ മോയ്സ്ചറൈസിംഗ് ഏജന്‍റാണ്, ബാഹ്യസൗന്ദര്യം പരിപോഷിപ്പിക്കാൻ ഇത് ഫേസ് പായ്ക്കുകളിൽ ഉപയോഗിക്കാറുണ്ട്.
വിറ്റാമിൻ എ, സി, ബി എന്നിവയാൽ സമ്പുഷ്ടമായ ഈ പഴം ചർമ്മത്തിന്‍റെ ആരോഗ്യം നിലനിർത്താൻ ഫലപ്രദമാണെന്ന് തെളിയിക്കപ്പെട്ടിട്ടുണ്ട്. ദഹനവ്യവസ്ഥ മെച്ചപ്പെടുത്താനും മലബന്ധം തടയാനും പപ്പായയ്ക്ക് കഴിയും. ഇത്, ചർമ്മത്തെ വൃത്തിയാക്കാൻ സഹായിക്കുന്നു. മുറിവ് ഉണക്കുന്ന പ്രക്രിയ വേഗത്തിലാക്കാനും ഈ പഴത്തിന് കഴിയുമെന്ന് പഠനങ്ങൾ സൂചിപ്പിക്കുന്നു.
തണ്ണിമത്തൻ
തണ്ണിമത്തൻ പേര് പോലെ തന്നെ ഉന്മേഷദായകമായ ഫലമാണ്. തണ്ണിമത്തൻ നാരുകളാൽ സമ്പുഷ്ടമാണ് ഒപ്പം വെള്ളവും. ഇതിൽ 92 ശതമാനം വെള്ളം അടങ്ങിയിരിക്കുന്നു. ഉന്മേഷ൦ പകരുന്ന ഈ ചുവന്ന ഫലത്തിൽ വിറ്റാമിൻ സി, എ, ബി1, ബി6, ലൈക്കോപീൻ എന്നിവ അടങ്ങിയിട്ടുണ്ട്, ഇത് ചർമ്മത്തിന്‍റെ മൊത്തത്തിലുള്ള ആരോഗ്യവും ഘടനയും മെച്ചപ്പെടുത്തുന്നതിന് അത്യന്താപേക്ഷിതമാണ്.
