ആരോഗ്യം തരുന്ന ജീവിതശൈലി

ഒരു ഐടി കമ്പനിയിലെ ഉദ്യോഗസ്‌ഥയാണ് 28 കാരിയായ കാവ്യ. അവിവാഹിതയാണ്. ലോക്ക്ഡൗൺ ആയതോടെ കാവ്യയുടെ കമ്പനി വർക്ക് ഫ്രം ഹോം വ്യവസ്ഥയിലേക്ക് മാറി. 2-3 മാസങ്ങൾ പിന്നിടുന്നതോടെ കാര്യങ്ങളൊക്കെ പഴയ അവസ്‌ഥയിലേക്ക് ആകുമെന്ന് എല്ലാവരേയും പോലെ കാവ്യയും പ്രതീക്ഷിച്ചു. പക്ഷേ കൊറോണ വ്യാപനം ഗുരുതരമായതോടെ സ്‌ഥിതി സാധാരണ നിലയിലെത്തുന്നതിന് പകരം വഷളായി മാറുകയാണ് ഉണ്ടായത്. അങ്ങനെ കാവ്യയും വർഷാവസാനം വരെ വർക്ക് ഫ്രം ഹോം രീതിയിൽ ജോലിത്തുടർന്നു.

തുടക്കത്തിൽ വീട്ടിലിരുന്നുള്ള ജോലി കാവ്യ ഏറെ ആസ്വദിച്ചിരുന്നു. ആക്ടീവുമായിരുന്നു. രാവിലെ 6 മണിക്ക് എഴുന്നേറ്റ് പ്രഭാത സവാരിക്ക് പോകുമായിരുന്നു. പ്രഭാത സവാരിയ്ക്ക് പോകാത്ത ദിവസങ്ങളിൽ വീട്ടിൽ അരമണിക്കൂർ നേരം വ്യായാമം ചെയ്യും. ഒപ്പം ഭക്ഷണ കാര്യങ്ങളിലും അതീവ ശ്രദ്ധ പുലർത്തി. എന്നാൽ സമയം കടന്നു പോയതോടെ അനന്തമായി നീണ്ട വീട്ടിലെ വാസം കാവ്യയെ അൽപ്പം മടിച്ചിയാക്കി. ഓഫീസിൽ പോകാത്തതിനാൽ ഉറക്കം രാവിലെ 8-9 മണി വരെ നീണ്ടു. പ്രഭാത സവാരി ഏറെക്കുറെ നിന്നു. ഓഫീസ് ആക്ടീവാകുന്നതിനനുസരിച്ച് 10 മണിക്ക് തന്നെ കാവ്യ ലാപ്ടോപ്പിൽ ജോലിയാരംഭിക്കും. ഇതിനിടയിൽ ഔദ്യോഗിക കോളുകളും അറ്റൻഡ് ചെയ്യണം.

എണ്ണയിൽ വറുത്തു പൊരിച്ചതും റെഡിമെയ്ഡുമായ ഭക്ഷണങ്ങൾ കഴിക്കാൻ താൽപര്യമേറി. സമയനിഷ്ഠയില്ലാതെയായി. അതിനാൽ അനവസരത്തിൽ എന്തെങ്കിലും കൊറിച്ചു കൊണ്ടിരിക്കുന്നതും പതിവായി. മുമ്പ് 9 മണിയോടെ ഡിന്നർ കഴിച്ച് 11 മണിക്ക് ഉറക്കം പിടിച്ചിരുന്ന കാവ്യയ്ക്ക് ഡിന്നറിന് സമയമില്ലാതെയായി. അതുപോലെ ഉറക്കവും നീണ്ടു. രാത്രി ഏറെ വൈകുവോളം വെബ്സീരിസുകൾ കണ്ട് ഉറക്കത്തെ അകറ്റി. അതോടെ രാവിലെ വൈകി എഴുന്നേൽക്കുന്നത് പതിവായി. ഈയൊരു ജീവിതചര്യ അധികം താമസിയാതെ ദഹന സംബന്ധമായ പ്രശ്നങ്ങൾ സൃഷ്ടിച്ചുവെന്ന് പറയാം. എന്തെങ്കിലും അധ്വാനമുള്ള ജോലി ചെയ്‌താൽ ഉടൻ തളർച്ചയനുഭവപ്പെടുന്നത് പതിവായി.

ഒരു ദിവസം രാത്രി കാവ്യയ്ക്ക് കഠിനമായ വയറുവേദന ഉണ്ടായി. വേദന ക്രമാതീതമായി വർദ്ധിച്ചു. എങ്ങനെയൊക്കെയോ രാത്രി കഴിച്ചു കൂട്ടി പിറ്റേന്ന് ഡോക്ടറെ പോയി കണ്ടു. പരിശോധനയിൽ അപ്പെൻഡൈറ്റിസ് ആണെന്ന് കണ്ടെത്തി. പക്ഷേ രോഗം ആരംഭ ദശയിലാണ്. അതിനാൽ സർജറി കഴിഞ്ഞ് പെട്ടെന്ന് തന്നെ കാവ്യ സുഖം പ്രാപിച്ചു.

പക്ഷേ ഇത് എങ്ങനെ ഉണ്ടായി? കാവ്യയുടെ ചോദ്യത്തിന് ഡോക്ടർ നൽകിയ മറുപടി ഇതായിരുന്നു. തെറ്റായ ഭക്ഷണശീലമാണ് ഈ രോഗത്തിലേക്ക് നയിച്ചതെന്നായിരുന്നു. കാവ്യ കഴിഞ്ഞ കുറേ നാളുകളായി ഭക്ഷണ കാര്യത്തിലും ആരോഗ്യ കാര്യത്തിലും വലിയ അലംഭാവം പുലർത്തിയിരുന്നു. ചില രോഗങ്ങളാകട്ടെ സ്വാഭാവികമായും നമ്മളിൽ ഉണ്ടാകും. മറ്റ് ചിലവയെ നമ്മൾ ക്ഷണിച്ച് വരുത്തുകയാണ് ചെയ്യുന്നത്. ഇവിടെ പ്രതിപാദിച്ച കാവ്യയുടെ അനുഭവം തന്നെ അതിന് ഉദാഹരണമാണ്. ഹെൽത്തി ലൈഫ് സ്റ്റൈൽ വേണമെന്ന് ആഗ്രഹിക്കുന്നവർക്കാകട്ടെ അതെങ്ങനെ എവിടെ നിന്ന് തുടങ്ങണമെന്ന ആശങ്കയായിരിക്കും. അതിനായി ചുവടെ കൊടുത്തിരിക്കുന്ന രീതികൾ ഫോളോ ചെയ്യുക.

എക്സർസൈസ് / നടപ്പ്

ഇത്തിരി തണുപ്പ് കാലമായാലും ചൂട് കാലമായാലും ശരി പുറത്തു പോയി വർക്കൗട്ട് ചെയ്യുന്നതും നടക്കുന്നതും ഫിറ്റായിരിക്കാനുള്ള മികച്ച രീതികളാണ്. തണുപ്പ് പ്രദേശത്തുള്ളവർക്ക് ഔട്ട്ഡോർ വർക്കൗട്ട് സാധിക്കാത്തതിനാൽ വീട്ടിൽ ചെയ്യാൻ കഴിയുന്ന ഡാൻസ്, സുംബ, ഹിപ്പ് ഹോപ്പ് പോലുള്ളവ ചെയ്‌ത് ഫിറ്റ്നസ് കൈവരിക്കാം.

ഏത് തരം എക്സർസൈസും ചെയ്യുകയെന്നതാണ് ഫിസിക്കൽ ആക്ടിവിറ്റി. അതുവഴി ശരീരത്തിൽ നിന്നും വിയർപ്പ് വരിക തന്നെ വേണം. നല്ല ഉറച്ച മാംസപേശികൾ ഉണ്ടാകും. രോഗപ്രതിരോധശേഷി വർദ്ധിക്കാനും ഫിസിക്കൽ ആക്ടിവിറ്റി മികച്ചൊരുപാധിയാണെന്ന് ഗവേഷണങ്ങൾ ചൂണ്ടിക്കാട്ടുന്ന കാര്യങ്ങളാണ്. കൂടുതൽ സമയമില്ലെങ്കിലും കുറഞ്ഞത് 30 മിനിറ്റെങ്കിലും വ്യായാമം നിർബന്ധമായും ചെയ്യാം.

പോഷക സമ്പന്നമായ ഡയറ്റ്

നമ്മുടെ ഭക്ഷണരീതി നമ്മുടെ ശരീരത്തെ സ്വാധീനിക്കുന്ന വലിയൊരു ഘടകമാണ്. പോഷക സമ്പന്നമായ ഭക്ഷണം ശരീരത്തിന് എനർജി നൽകും. സിംപിൾ കാർബോ ഹൈഡ്രേറ്റിനായി അവൽ, ഉപ്പുമാവ്, സ്റ്റീമഡ് ഇഡ്ഡലി, ഓട്സ്, റാഗി, പ്രോട്ടീനിനായി മുട്ട, ക്രീമില്ലാത്ത പാൽ എന്നിവ കഴിക്കാം. ഫാറ്റിനായി ബദാം, വാൽനട്ട്, ഫ്ളാക്സീഡ് എന്നിവയും. വൈകുന്നേരം ഏതെങ്കിലും പച്ചക്കറി കൊണ്ടുള്ള സൂപ്പ് അല്ലെങ്കിൽ ഗ്രീൻ ടീ കഴിക്കാം. രാത്രി ഭക്ഷണമായി ഒരു ബൗൾ സലാഡ് അല്ലെങ്കിൽ പുഴുങ്ങിയ പച്ചക്കറി അല്ലെങ്കിൽ പപ്പായ കഴിക്കാം. പച്ചക്കറികളിൽ സവാള, വെളുത്തുള്ളി എന്നിവ ഉൾപ്പെടുത്താം.

ഡയറ്റ് 6-7 ഭാഗങ്ങളായി വിഭജിക്കാം. അഥവാ മൂന്ന് നേരമായി കഴിക്കുകയാണെങ്കിൽ ഇടയ്ക്ക് മുളപ്പിച്ച ധാന്യങ്ങൾ, സീസൺ പഴങ്ങൾ, പച്ചക്കറികൾ എന്നിവയുടെ സലാഡ് കഴിക്കുകയോ ജ്യൂസ് കുടിക്കുകയോ ചെയ്യുന്നത് ശീലമാക്കാം.

ഗോതമ്പ് ചപ്പാത്തിയ്ക്ക് പുറമെ, ചോളം, മില്ലറ്റ് എന്നിവ കൊണ്ടുള്ള വിഭവങ്ങൾ കഴിക്കാം. വെളുത്ത ചോറിന് പകരം ബ്രൗൺ റൈസ് ഉൾപ്പെടുത്തുക. ഇതിലുള്ള പ്രോട്ടീൻ, കാൽസ്യം, മഗ്നീഷ്യം, ഫൈബർ, പൊട്ടാസ്യം എന്നിവ പോലെയുള്ള പോഷകങ്ങൾ ശരീരഭാരം നിയന്ത്രിക്കുന്നതിനൊപ്പം ദഹന പ്രക്രിയ സുഗമമാക്കാനും ബ്ലഡ് ഷുഗർ നില നോർമലാകാനും സഹായിക്കും.

ആവശ്യമായ അളവിൽ വെള്ളം കുടിക്കാം

ദിവസവും 8-10 ഗ്ലാസ് വെള്ളം കുടിക്കുക. രാവിലെ എഴുന്നേറ്റാലുടൻ ഒരു ഗ്ലാസ് വെള്ളം കുടിക്കുന്ന ശീലം വളർത്തുക. ഉദരം ശുചിയാക്കാൻ ഇത് സഹായിക്കും. വെള്ളം കുടിക്കുന്നതു കൊണ്ട് ചർമ്മ വരൾച്ച അകലുകയും ചെയ്യും. മാംസപേശികളുടെ 80 ശതമാനം ഭാഗം വെള്ളത്താൽ നിർമ്മിതമാണ്. അതിനാൽ മാംസപേശികളിലുണ്ടാവുന്ന വലിച്ചിൽ അകലാൻ വെള്ളം സഹായിക്കും.

പഞ്ചസാരയും ഉപ്പും കുറഞ്ഞയളവിൽ മതി

ഭക്ഷണത്തിൽ ഉപ്പ്, പഞ്ചസാര, എണ്ണ എന്നിവയുടെ അളവ് കുറച്ചാൽ അമിതവണ്ണം, ഉയർന്ന രക്‌തസമ്മർദ്ദം, ഡയബറ്റീസ്, ഹൃദ്രോഗം എന്നിവയുണ്ടാകാതെ സൂക്ഷിക്കാം. ഉയർന്ന കലോറി അളവിലുള്ളതാണ് പഞ്ചസാര. മാത്രവുമല്ല പഞ്ചസാരയിൽ യാതൊരുവിധ വിറ്റാമിനുകളോ ധാതുക്കളോ പോഷകങ്ങളോ ഇല്ല. പഞ്ചസാര കേവലം ശരീരത്തിന് ഊർജ്ജം പകരുക മാത്രമാണ് ചെയ്യുന്നത്. ഒരു ദിവസം ആകെ 25 ഗ്രാമിലധികം പഞ്ചസാര ഉപയോഗിക്കാൻ പാടില്ല. അങ്ങനെ തന്നെ ഉപ്പും 6 ഗ്രാം മാത്രമേ കഴിക്കാൻ പാടുള്ളൂ.

പുകവലി, മദ്യപാനം അരുത്

അമിത മദ്യപാനം, പുകവലി എന്നിവ വ്യക്‌തിയുടെ ആരോഗ്യത്തെ നശിപ്പിക്കും. അകാല വാർദ്ധ്യകത്തെ അത് ക്ഷണിച്ചു വരുത്തും. അതുപോലെ രോഗപ്രതിരോധ ശേഷിയേയും അത് സാരമായി ബാധിക്കും.

ഇപ്പോൾ പലതരം രോഗങ്ങൾ വ്യാപിക്കുന്നത് പതിവായിരിക്കുകയാണ്. അവയൊക്കെ കൃത്യസമയത്ത് ചികിത്സിച്ചാൽ ധാരാളം പ്രയോജനങ്ങൾ ഉണ്ടാകും. ഉദാ: ശരീരഭാരം സന്തുലിതമായി നിലനിൽക്കും. ഹൃദ്രോഗം ഉണ്ടാകാനുള്ള സാധ്യത കുറയും. ആയുർദൈർഘ്യം കൂടും. വ്യക്‌തിയ്ക്ക് സ്വയം ഉന്മേഷവും സന്തോഷവും അനുഭവപ്പെടും. അതിനാൽ ഇനി മുതൽ ആരോഗ്യപൂർണ്ണമായ ജീവിതശൈലിയ്ക്ക് തുടക്കമിടാം.