ആനയും കടുവയും കാട്ടുപോത്തുകളും വസിക്കുന്ന കൊടും വനങ്ങൾക്കിടയിലാണ് ഇടമലക്കുടി എന്ന ഗോത്രവർഗ്ഗ ഗ്രാമം. കേരളത്തിലെ ഏറ്റവും വിജനമായ ഈ പഞ്ചായത്തിലേക്ക് ഒരു റോഡും അതിൽ ജീപ്പ് സർവീസും വന്നെത്തിയിട്ട് മാസങ്ങളെ ആയിട്ടുള്ളൂ. എന്നാൽ അർദ്ധരാത്രിയിൽ ഇവിടെ വൈദ്യുത ദീപങ്ങൾ മിന്നാമിനുങ്ങുകളായി മിഴി തുറക്കാറുണ്ട്. വൈദ്യുതി പോസ്റ്റുകളും ഇലക്‌ട്രിസിറ്റി ഓഫീസും ഒന്നും ഇല്ലാത്ത ഈ കാട്ടിനുള്ളിൽ ഇതെങ്ങനെ സംഭവിച്ചു എന്നല്ലേ? അതാണ് പെൺശക്‌തി!
ഇടമലക്കുടി ട്രൈബൽ പഞ്ചായത്തിലെ ആദിവാസി സ്ത്രീകൾ തല ചുമടായി കൊണ്ടുവന്നതാണ് ഈ വെളിച്ചം. സ്ത്രീകളുടെ ഇച്‌ഛാശക്‌തിക്കു മുന്നിൽ കാടും പുഴയും കടന്നു ചെന്ന സൗരോർജ്ജ വിളക്കുകളുടെ ഊർജ്‌ജമാണ് ഇപ്പോൾ രാത്രിയിൽ ഈ ഗ്രാമത്തിന് വെളിച്ചം പകരുന്നത്.
പുറം ലോകവുമായി എല്ലാ രീതിയിലും ബന്ധം ഇല്ലാത്ത ട്രൈബൽ പഞ്ചായത്താണ് ഇടമലക്കുടി. ഇവിടെ മൊത്തം 3000 അംഗങ്ങളോളം വരുന്ന 240 കുടുംബങ്ങൾ സാധാരണ ജീവിത സാഹചര്യങ്ങൾ പോലും ഇല്ലാതെയാണ് ജീവിച്ചു കൊണ്ടിരുന്നത്. 28 സെറ്റിൽമെന്‍റുകളിലായാണ് ഇവർ പാർക്കുന്നത്.
നൂറോളം സോളാർ പാനലുകൾ തലച്ചുമടായി ചുമന്നാണ് 60 സ്ത്രീകളുടെ കൂട്ടായ്മ കാട്ടിലേക്ക് എത്തിച്ചത്. 20 കിലോമീറ്ററുകളോളം കാട്ടിലൂടെ അവർ നടന്നു. കാട്ടാനക്കൂട്ടങ്ങളുടെ കടന്നു വരവ് ഏതു സമയവും പ്രതീക്ഷിക്കാവുന്ന കാട്ടു പാതയിലൂടെയാണ് സ്ത്രീകളുടെ സാഹസികയാത്ര.
സൊസൈറ്റിക്കുടി എന്ന ഓമനപ്പേരിൽ അറിയപ്പെടുന്ന ഈ ട്രൈബൽ കോളനിയിലേക്ക് സോളാർ പാനൽ ചുമന്നു കൊണ്ടു പോകാൻ ഇവരുടെ കുടുംബശ്രീ കൂട്ടായ്മ തീരുമാനിക്കുകയായിരുന്നു. സോളാർ വൈദ്യുതിക്ക് പഞ്ചായത്ത് അനുമതി നൽകിയതോടെ ഓരോ പാനലുകളായി ചുമന്ന് എത്തിക്കാൻ തയ്യാറായത് പെൺകൂട്ടമാണ്. ചുമറ്റുകൂട്ടം എന്ന പേരിൽ ആദിവാസി സ്ത്രീകൾ രൂപീകരിച്ച ചുമറ്റിറക്ക് തൊഴിലാളി സംഘം, അതുവരെ ഈ രംഗത്ത് അവിടെ നിലനിന്ന പുരുഷമേൽക്കോയ്മ മനോഹരമായി വെല്ലുവിളിക്കുകയും ചെയ്‌തു.
കേരളത്തിന്‍റെ ആദ്യത്തെ ആദിവാസി പഞ്ചായത്ത് കൂടിയാണ് ഇടുക്കി ജില്ലയിലെ ഇടമലക്കുടി. മൂന്നാറിൽ നിന്ന് 40 കിലോമീറ്റർ അകലത്തിലാണ് ഈ പ്രദേശം. മുതുവൻ എന്ന ആദിവാസി വിഭാഗമാണ് ഇവിടത്തെ താമസക്കാർ.
“ഒരു പകൽ എടുത്താണ് ഞങ്ങൾ അത് ചുമന്നെത്തിച്ചത്.” കുടുംബശ്രീ യൂണിറ്റിന്‍റെ ചെയർപേഴ്സൺ കൂടിയായ രമണി പറയുന്നു. രണ്ടു പാനലിൽ കൂടുതൽ ഒരാൾക്ക് എടുത്ത് തലച്ചുമടായി കാടും മലയും കടന്നു പോവുക എളുപ്പമായിരുന്നില്ല. കരുത്തുള്ളവർ രണ്ട് എണ്ണം ഒരുമിച്ച് ചുമന്നു. മറ്റുള്ളവർ ഓരോന്നും. ഒരു പാനൽ ചുമന്നതിന് ഞങ്ങൾക്ക് 85 രൂപയാണ് കൂലി കിട്ടിയത്. പക്ഷേ ഇക്കാര്യത്തിൽ ഞങ്ങൾ കൂലി നോക്കിയല്ല പണിതത്.”
സോളാർ പാനലുകൾ സ്ഥാപിച്ചതോടെ രാത്രിയിൽ ഊരിൽ വെളിച്ചമുണ്ട്. ആന ശല്യം കുറഞ്ഞു. ഇപ്പോൾ ടെലിവിഷൻ വേണമെങ്കിലും ഈ ഊർജ്‌ജത്തിൽ പ്രവർത്തിപ്പിക്കാൻ കഴിയും. ഊരിനു വെളിച്ചം പകർന്ന ഇത്തരം സംഭവങ്ങൾ ഈ സ്ത്രീ ശക്‌തിക്കു ഇനിയും പറയാനുണ്ട്.
കാട്ടിൽ കൃഷി അനുവദിക്കുന്ന സ്‌ഥലങ്ങളിൽ കൂട്ടുകൃഷിയും, ജൈവകൃഷിയും നടത്തുന്നുണ്ട്. ഇവർ ഒരു മരം പോലും നഷ്‌ടപ്പെടാത്ത രീതിയിലാണ് കൃഷി ചെയ്യുന്നത്.
കാട്ടിൽ വന്യമൃഗങ്ങളുടെ സാന്നിധ്യം ഉള്ളതിനാൽ കൃഷിയിടത്തിലേക്ക് ഇവ പാഞ്ഞെത്തുന്നത് എപ്പോഴാണെന്ന് അറിയില്ല. അതിനെയെല്ലാം മറികടന്നാണ് ഇവരുടെ കൃഷി. റാഗി, നെല്ല്, കപ്പ, വാഴ ഇതൊക്കെയാണ് കൃഷി ചെയ്യുന്നത്. ഭക്ഷ്യവസ്‌തുക്കളാണ് കൂടുതലായും കൃഷി ചെയ്യുന്നത്. ഭക്ഷണത്തിനു വേണ്ടത് ഉൽപാദിപ്പിക്കാമല്ലോ. എന്നാൽ കാട്ടുമൃഗങ്ങൾ 50 ശതമാനവും തിന്നു തീർക്കും. കൂടുതൽ വിളവെടുത്താൽ തന്നെ ഇത് പുറത്തേക്ക് കൊണ്ടു പോയി വിൽക്കാനൊന്നും നിവൃത്തിയില്ല. കാട്ടിലൂടെ 20 കിലോമീറ്റർ നടന്നു ചെന്നാലെ വനത്തിനു വെളിയിലെ ലോക്കൽ മാർക്കറ്റിലെത്തൂ.
ഇടമലക്കുടിയിൽ ഇപ്പോഴും ഉള്ള പ്രധാനപ്രശ്നം യാത്രാമാർഗ്ഗം ഇല്ലാത്തതു തന്നെയാണ്. ഊരിൽ ആർക്കെങ്കിലും അസുഖം വന്നാൽ ഉടനെയൊന്നും ആശുപത്രിയിൽ കൊണ്ടുപോകാൻ കഴിയില്ല. മുളന്തണ്ടിൽ കെട്ടിച്ചുമന്നു കൊണ്ടുപോകണം. കിലോമീറ്ററുകളോളം ദുർഘടമായ കാട്ടുപാതയിലൂടെ ഇങ്ങനെ കൊണ്ടുപോകാനും പ്രയാസമാണ്. ആദിവാസി ഊരുകളിൽ മൃതപ്രായരായി നിരവധി പേരുണ്ട് ഇപ്പോൾ. എന്നാൽ ഇവർക്ക് അങ്ങനെ കഴിയാനാണ് വിധി.
കുത്തനെയുള്ള കാട്ടുവഴികളും ചോലകൾക്കു കുറുകെയുള്ള ഈറ്റകൾ കെട്ടിയൊതുക്കി ഉണ്ടാക്കിയ തൂക്കുപാലങ്ങളും കടന്നെത്തുക നിസ്സാര കാര്യമല്ല. ഇവിടെ തെരഞ്ഞെടുപ്പ് നടന്ന സമയത്ത് 50 വയസ്സിന് മുകളിലുള്ളവരെയും സ്ത്രീകളെയും ഡ്യൂട്ടിയ്ക്ക് നിയോഗിച്ചില്ല.! ഏക ട്രൈബൽ പഞ്ചായത്ത് എന്ന പദവി ഉണ്ടെങ്കിലും പഞ്ചായത്തിന്‍റെ ആസ്ഥാനം ദേവികുളത്താണ്. അതായത് 50 കിലോമീറ്ററുകൾക്കപ്പുറം. ഇവിടത്തെ ആദ്യ വനിതാട്രൈബൽ പഞ്ചായത്ത് പ്രസിഡന്‍റിന് വല്ലപ്പോഴുമൊക്കെ മാത്രമേ ഒഫീസിൽ വരാൻ പറ്റുള്ളൂ.
കുടിയിൽ സോളാർ വെളിച്ചം എത്തിയെങ്കിലും ഗോത്രവർഗ്ഗ ആചാരങ്ങളുടെ പേരിൽ സ്ത്രീകൾക്കുള്ള കഷ്ടപ്പാട് തുടരുകയാണ്. ആർത്തവ കാലത്ത് കാട്ടിലെ ഒറ്റപ്പെട്ട വാലായ്മ പുരയിൽ കഴിയാനുള്ള മടി കൊണ്ട് ആർത്തവം വൈകാനുള്ള ഗുളിക കഴിക്കുന്ന സ്ത്രീകളുണ്ട് ഇവിടെ. തമിഴ്നാട്ടിൽ നിന്നെങ്ങോ ആണ് ചില മരുന്നു കമ്പനികൾ മരുന്ന് എത്തിച്ച് കൊടുക്കുന്നത്!
ആചാരങ്ങൾക്കും കുടുംബ മൂല്യങ്ങൾക്കും വളരെയേറെ പ്രാധാന്യം നൽകുന്ന ഈ ആദിവാസി ഊരിൽ നരബലി നടത്തുന്നുവെന്ന കുപ്രചരണം ഉണ്ടായത് ഇവരെ ഏറെ വിഷമിപ്പിച്ചിരിക്കുകയാണ്.
