ചിലരുടെ വസ്ത്രം കണ്ടാൽ എപ്പോഴും പുത്തനാണെന്ന് തോന്നാറില്ലേ… തുണി അലക്കലും ഒരു കലയാണ് ചങ്ങാതി. വസ്ത്രത്തിന്‍റെ തിളക്കവും മേന്മയും നിലനിർത്താൻ സഹായിക്കുന്നത് യഥോചിതമായ അലക്കൽ തന്നെയാണ്. ഇനി മുതൽ ഭംഗിയായി വാഷിംഗ് മെഷീനിൽ അലക്കാൻ നിങ്ങളെ പ്രാപ്തമാക്കും ഈ ടിപ്സ്.
• വസ്‌ത്രങ്ങൾ അലക്കുന്നതിനു മുമ്പ് അവയെ വേർതിരിച്ചെടുക്കണം. കൂടുതൽ മുഷിഞ്ഞത്, കുറച്ചു മുഷിഞ്ഞത്, വെറും വാഷ് മാത്രം വേണ്ടത് ഇങ്ങനെ മാറ്റി വയ്‌ക്കൂ. അതിൽ തന്നെ തുണിയുടെ മെറ്റീരിയൽ അനുസരിച്ചും വേർതിരിക്കുക.
• മെഷീനിൽ വസ്‌ത്രങ്ങൾ ഇടുന്നതിനും ഒരു രീതിയുണ്ട്. ആദ്യം വലുപ്പം കൂടിയ വസ്ത്രം, അതിനു ശേഷം അതിലും ചെറുത് ഇങ്ങനെ ഇടുക. ചുളിവുകൾ നന്നായി കുടഞ്ഞു വിടർത്തി വേണം ഇടാൻ.
• പുതിയ വസ്ത്രം ഇടുന്നതിനു മുമ്പ് അതിന്‍റെ നിറം ഇളക്കുന്നതാണോ എന്ന് പരിശോധിച്ച ശേഷം മാത്രം അലക്കുക.
• ഡിറ്റർജന്‍റ് ഉപയോഗിക്കുമ്പോഴും വേണം ശ്രദ്ധ. കോട്ടൺ, സിൽക്ക് വസ്‌ത്രങ്ങൾ കഴുകുമ്പോൾ കുറച്ച അളവ് ഡിറ്റർജന്‍റ് മതി. കൂടിയാൽ വസ്‌ത്രങ്ങളുടെ ഗുണമേന്മ നഷ്‌ടമാകും.
• ഓരോ മെഷീനും നിശ്ചിത അളവ് ഡിറ്റർജന്‍റ് വേണം ഉപയോഗിക്കാൻ. അതിൽ പറഞ്ഞിരിക്കുന്ന അളവിൽ മാത്രം ഇടുക.
• ചില മെഷീൻ ബുക്ക് ലെറ്റുകളിൽ ഇങ്ങനെ എഴുതിയിട്ടുണ്ടാകും. സാധാരണ വാഷിംഗ് പൗഡറിനൊപ്പം പകുതി അളവിൽ വാഷിംഗ് മെഷീനു വേണ്ടിയുള്ള പ്രത്യേക ഡിറ്റർജന്‍റ് ഉപയോഗിക്കുക എന്ന്. ഡിറ്റർജന്‍റ് കൂടി ഉപയോഗിച്ചാൽ മാത്രമേ വസ്ത്രം കൂടുതൽ വൃത്തിയാകൂ.
• ഡിറ്റർജന്‍റ് തെരഞ്ഞെടുക്കുമ്പോഴും ശ്രദ്ധിക്കാം. പൗഡർ വേണോ ലിക്വിഡ് വേണോ എന്നാണ് തീരുമാനിക്കേണ്ടത്. ലിക്വിഡ് ഡിറ്റർജന്‍റിന് വില കൂടും. പൗഡർ ആണ് ഉപയോഗിക്കുന്നതെങ്കിൽ തണുത്ത വെള്ളത്തിൽ അലിയാൻ സമയം എടുക്കും. വില കൂടിയ വസ്‌ത്രങ്ങൾക്ക് ലിക്വിഡ് ഡിറ്റർജന്‍റ് ഉപയോഗിക്കുന്നതാണ് ഉത്തമം.
• ഫാബ്രിക്ക് അനുസരിച്ച് വേണം ഡിറ്റർജന്‍റ് തെരഞ്ഞെടുക്കാൻ സിൽക്ക്, കോട്ടൺ ഇവയ്ക്ക് ലിക്വിഡ് ഡിറ്റർജന്‍റ് ആണ് നല്ലത്.
• കുട്ടികളുടെ വസ്ത്രം അലക്കുമ്പോൾ വേറെ അലക്കാം. അവയ്‌ക്ക് വീര്യം കുറഞ്ഞ ഡിറ്റർജന്‍റ് മതി. കുഞ്ഞുങ്ങളുടെ ചർമ്മം വളരെ മൃദുലമാണ്.
• വെളുത്ത വസ്‌ത്രങ്ങൾ വാഷ് ചെയ്യാൻ ബ്ലീച്ച് അടങ്ങിയ വാഷിംഗ് പൗഡർ ഉപയോഗിക്കാം. ബ്രൈറ്റ് കളർ വസ്‌ത്രങ്ങൾക്കും ഇത് നല്ലതാണ്.
• സെമി ഓട്ടോമാറ്റിക് മെഷീനിൽ വസ്ത്രം ഇടുന്നതിനു മുമ്പ് ഡിറ്റർജന്‍റ് ഇട്ട് നന്നായി പതപ്പിച്ച ശേഷം വസ്ത്രം ഇടാവൂ. വസ്‌ത്രങ്ങൾക്കു മേൽ നേരിട്ട് ഡിറ്റർജന്‍റ് വീണാൽ നിറം മങ്ങും.
• വസ്‌ത്രങ്ങളിൽ കറയോ മറ്റോ ഉണ്ടെങ്കിൽ അവ ആദ്യം കൈകൊണ്ട് കഴുകിയ ശേഷം വാഷിംഗ് മെഷീനിൽ ഇടണം.
• സെമി ഓട്ടോമാറ്റിക് മെഷീനിൽ വസ്ത്രം ഉണങ്ങാൻ ഡ്രയർ ഓൺ ആക്കും മുമ്പ് 10 മിനിട്ട് വയ്ക്കുക. വെള്ളം കുറെ വാർന്നു പോയ ശേഷം ഉണക്കിയാൽ കൂടുതൽ ഉണങ്ങിക്കിട്ടും.
• വസ്ത്രം കഴുകിയ ശേഷം വാഷിംഗ് മെഷീന്‍റെ ഡിറ്റർജന്‍റ് ബോക്സ് കൂടി വൃത്തിയാക്കുക. ബോക്സ് പുറത്തെടുക്കാവുന്ന തരം ആണെങ്കിൽ പുറത്തെടുത്ത് ടൂത്ത് ബ്രഷ് ഉപയോഗിച്ച് കഴുകാം.
• വാഷിംഗ് മെഷീന്‍റെ അകത്തെ ഡ്രം കൂടി കഴുകി വൃത്തിയാക്കണം. ചെറിയ പൊടികളും മറ്റും പറ്റിപ്പിടിച്ചിരിക്കും. കീടാണുക്കളും ഉണ്ടാകും. ഓരോ മാസവും വെള്ളവും സോപ്പും ഉപയോഗിച്ച് വെറുതെ വാഷിംഗ് മെഷീൻ കഴുകിക്കളയണം. ഇതിന് ചെറു ചൂടു വെള്ളം ഉപയോഗിക്കാവുന്നതാണ്.
