എന്താണ് ചിരി? ഓക്സ്ഫോർഡ് ഡിക്ഷണറി അനുസരിച്ച് സന്തോഷം, ആഹ്ലാദം പ്രകടിപ്പിക്കാനായി മുഖ ചലനങ്ങൾ ഉള്ളതും ശബ്ദമുണ്ടാക്കിയുമുള്ള ഒരു പ്രക്രിയ എന്നാണ്.
പക്ഷേ ചിരി എന്നുള്ളത് വെറുതെ ചിരിച്ചു തള്ളാനുള്ള കാര്യമല്ല! ലോകപ്രശസ്ത ഒളിമ്പിക് ചാമ്പ്യൻ ഉസൈൻ ബോൾട്ടിന്‍റെ വിജയമന്ത്രം എന്താണെന്നറിയാമോ… ചിരി അല്ലാതെന്ത്. ഉസൈനിന്‍റെ അമ്മ പറയുന്നു, വീട്ടിൽ ഇരിക്കുമ്പോൾ ഉസൈനിന് ചിരിയുണർത്തുന്ന കാര്യങ്ങളെ അവർ സംസാരിക്കുകയുള്ളൂവെന്ന്. അതിന്‍റെ ഫലം ലോകം ട്രാക്കിലും കണ്ടതാണല്ലോ.
സന്തുഷ്ടി നിറഞ്ഞ ജീവിതത്തെ സംബന്ധിച്ച് ഒരു ടിബറ്റൺ ചൊല്ലുണ്ട്. പകുതി ഭക്ഷണം, ഇരട്ടി നടപ്പ്, മൂന്നിരട്ടി ചിരി, അളവില്ലാത്ത സ്നേഹം എന്നിവയാണത്രേ ദീർഘായുസ്സും സന്തുഷ്ടിയും നിറഞ്ഞ ജീവിതത്തിന്‍റെ രഹസ്യങ്ങൾ.
ഇന്ന് പല നഗരങ്ങളിലും ലാഫ്റ്റർ ക്ലബ്ബുകൾ തന്നെയുണ്ട്. ഒരു പറ്റം ആളുകൾ വട്ടത്തിൽ നിന്ന് ഉച്ചത്തിൽ ദീർഘനേരം ചിരിച്ച് ഉള്ളിലെ പിരിമുറുക്കത്തെ അകറ്റുകയാണ് ഇത്തരം ക്ലബ്ബുകളുടെ മുഖ്യ ലക്ഷ്യം. അതുവഴി സന്തുഷ്ടിയും സമാധാനവും കൈവരിക്കുക.
സ്ട്രസ് ഹോർമോണുകളെ നിയന്ത്രിച്ചും ഹൃദയധമനികളിലെ അസ്വസ്ഥതകളെ കുറച്ചും എച്ച്ഡിഎൽ കൊഴുപ്പിനെ വർദ്ധിപ്പിക്കാൻ ഒരു നല്ല ചിരിക്ക് കഴിയുമെന്നാണ് അമേരിക്കൻ ഹാർട്ട് അസോസിയേഷൻ ചൂണ്ടിക്കാട്ടുന്നത്.
ചിരിക്കുമ്പോൾ ശരീരത്തിലെ എത്ര പേശികൾ അതിൽ പങ്കുകൊള്ളുന്നുണ്ടെന്ന് കൃത്യമായി നിർണയിക്കാൻ കഴിയില്ലെങ്കിലും ഏറെക്കുറെ 43 മസിലുകൾ നെറ്റി ചുളിക്കുമ്പോഴും 17 മസിലുകൾ ചിരിക്കുമ്പോഴും ഉൾപ്പെടുന്നുവെന്നാണ് പൊതുവെ പറയുന്നത്. ദേഷ്യപ്പെടുന്നതിന് 11 മസിലുകളും പുഞ്ചിരിക്കുന്നതിനു 12 മസിലുകളും ആവശ്യമായി വരുമെന്ന മറ്റൊരു വാദഗതിയുമുണ്ട്. പക്ഷേ ഓരോ മസിലുകളും എത്രമാത്രം ഊർജ്‌ജം ഉപയോഗിക്കുന്നുവെന്ന് കണക്കിലെടുക്കാതെയാണ് ഈ വിലയിരുത്തൽ.
ലാഫ്റ്റർ യോഗ
ലാഫ്റ്റർ യോഗയ്ക്ക് പ്രാണയാമ വ്യായാമവുമായിട്ടും ബന്ധമുണ്ട്. ബ്രീത്തിംഗ് എക്സർസൈസും ഇതിനിടയിൽ ഉപയോഗിക്കുന്നുണ്ട്. ദീർഘമായി ചിരിക്കുകയെന്നതാണ് ലാഫ്റ്റർ യോഗ (ഹാസ്യ യോഗ). കൂട്ടം ചേർന്നുള്ള ചിരി പെട്ടെന്നുള്ള ചിരി പോലെ തന്നെ ശാരീരികവും മാനസികവുമായ ഉത്സാഹവും ഉണർവും പകരുന്നു. ഗ്രൂപ്പായാണ് ലാഫ്റ്റർ യോഗ ചെയ്യുക. പരസ്പരം നോക്കി ഹാസ്യാസ്പദമായാണ് അത് ചെയ്യുക. നിർബന്ധപൂർവ്വമുള്ള ചിരി പെട്ടെന്ന് യഥാർത്ഥ്യത്തിലേക്ക് വഴിമാറി ചിരി എല്ലാവരിലേക്കും പടരുകയും ചെയ്യുന്നു.
ലാഫ്റ്റർ മെഡിറ്റേഷനോടു കൂടിയാണ് ഒരു ലാഫ്റ്റർ യോഗ സെഷൻ അവസാനിക്കുന്നത്. ലാഫ്റ്റർ യോഗയുടെ വക്‌താവായ ഡോ.കട്ടാരിയ ലാഫ്റ്റർ യോഗ ഒരു ഭാഗമായോ അല്ലെങ്കിൽ ചുവടെ ചേർത്ത ഒരു പാക്കേജായോ ചെയ്യാമെന്ന് നിർദ്ദേശിക്കുന്നു.
• ഹൃദയം തുറന്നുള്ള ചിരി
• വായ തുറന്നുള്ള നിശബ്ദമായ ചിരി
• മൂളിക്കൊണ്ടുള്ള ചിരി
• സിംഹച്ചിരി
• വാഗ്വാദത്തോടെയുള്ള ചിരി
• ഡാൻസിംഗ് ലാഫ്
• ആരോഹണത്തോടെയുള്ള ചിരി
30-40 സെക്കന്‍റുകൾ നീണ്ടു നിൽക്കുന്നതാണ് ഓരോ ലാഫ്റ്റർ സെഷനുകളും ഓരോ സെഷനുകൾക്കിടയിൽ ശ്വസന വ്യായാമങ്ങളുണ്ടാവും. അതുപോലെ നെക്ക്, ഷോൾഡർ, സ്ട്രെച്ചിംഗ് വ്യായാമങ്ങളും ഉൾപ്പെടും.
ലാഫ്റ്റർ യോഗയ്ക്ക് സമാപ്തി കുറിക്കുന്നതിലുമുണ്ട് പ്രത്യേകത. സംഘത്തിലെ അവതാരകൻ ചൊല്ലുന്ന വാചകത്തിന് മറുപടിയായി അംഗങ്ങൾ അതെയെന്ന് പറയണം.
• ഉദാ: ഞങ്ങൾ ലോകത്തിലെ സന്തുഷ്ടരായ ആളുകളാണ് – അതെ
• ഞങ്ങൾ ലാഫ്റ്റർ ക്ലബ്ബ് അംഗങ്ങളാണ്- അതെ
ചിരിക്കാനും പോസിറ്റീവ് ചിന്തയുണർത്താനും മറ്റ് ചില വഴികളുമുണ്ട്.
തമാശ കവിത
നല്ല കവിത കേൾക്കുക മനസ്സിന് സന്തോഷവും ഉണർവും പകരുന്ന കാര്യമാണ്. അത്തരം കവിതകൾ കേൾക്കുമ്പോൾ പൊട്ടിച്ചിരി ഉണ്ടാക്കണമെന്നില്ല. എന്നാലും ചുണ്ടിൽ പുഞ്ചിരിയുണർത്താം. അത്തരം കവിതകൾ തെരഞ്ഞെടുത്ത് വായിക്കുകയോ കേൾക്കുകയോ ചെയ്യാം.
ചിരി കൊണ്ടുള്ള പ്രയോജനങ്ങൾ
• രോഗപ്രതിരോധ വ്യവസ്ഥ ഊർജ്‌ജസ്വലമാക്കുന്നു.
• ലിംഫോസൈറ്റ്സ് എക്സിന്‍റെ ഉത്പാദനം ഊർജ്‌ജസ്വലമാക്കുന്നു. (അണുബാധ ചെറുക്കുന്ന ബി സെല്ലുകൾ. ഇവ രണ്ടും നമ്മുടെ എല്ലിലുള്ള മജ്‌ജയിൽ നിന്നാണ് രൂപപ്പെടുന്നത്)
• ടെൻഷൻ കുറയ്ക്കുന്നു, മനസ്സിനെ ശാന്തമാക്കുന്നു.
• സ്ട്രസ് കുറയ്ക്കുന്നു
• രക്‌ത സമ്മർദ്ദത്തെ കുറയ്ക്കുന്നു. രക്‌തധമനികളിലെ രക്‌തപ്രവാഹത്തെ ത്വരിതപ്പെടുത്തുന്നു.
• വേദന കുറയ്ക്കുന്നു. ഒരു നല്ല ചിരി ശരീരത്തിൽ എൻഡോർഫിനുകൾ സൃഷ്ടിക്കപ്പെടാൻ സഹായിക്കുന്നു. ഇത് സന്തോഷമുണർത്തുന്ന ഹോർമോണുകളാണ്.
• ഭയത്തേയും ദേഷ്യത്തേയും അകറ്റുന്നു.
• പ്രതിസന്ധികളെ തരണം ചെയ്യാൻ ആത്മധൈര്യം പകരും.
