വേനൽക്കാലത്ത് ചർമ്മത്തിൽ ധാരാളം പ്രശ്നങ്ങൾ കണ്ടുവരാറുണ്ട്. വേനൽക്കാലത്തെ കടുത്ത ചൂടേറ്റ് ചർമ്മം കരുവാളിക്കുക, കറുത്തപാടുകളും കുരുക്കളും പ്രത്യക്ഷപ്പെടുക, പിഗ്‍മെന്‍റേഷൻ എന്നിങ്ങനെ ധാരാളം പ്രശ്നങ്ങൾ ഉണ്ടാകാം.
ചർമ്മത്തിന് ശരിയായ പരിചരണം നൽകുകയാണെങ്കിൽ തീർച്ചയായും ഇത്തരം പ്രശ്നങ്ങൾ ഒന്നും ഉണ്ടാകാതെ ചർമ്മം കൂടുതൽ സുന്ദരമാകും. ചർമ്മത്തിൽ ഈർപ്പം നിലനിർത്തുകയെന്നതാണ് പരമപ്രധാനം. ധാരാളം വെള്ളം കുടിക്കുന്നതിനൊപ്പം പഴങ്ങളും പച്ചക്കറികളും കഴിക്കുക. ഒപ്പം ചർമ്മപരിപാലനത്തിന് ഹെൽത്തി ഡോസായി ഈ പായ്ക്കുകളും പരീക്ഷി ക്കുക. തീർച്ചയായും നിങ്ങൾ സുന്ദരിയാകും.
കുക്കുംബർ ഫേസ് പായ്ക്ക്
ഫേസ് പായ്ക്കിനൊപ്പം സ്ക്രബ്ബിംഗിലൂടെ മുഖത്തെ ഡെഡ് സ്കിൻ നീക്കം ചെയ്യാൻ ആഗ്രഹിക്കുന്നുവെങ്കിൽ മുഖത്ത് കുക്കുംബർ ഫേസ് പായ്ക്കിടാം. കുക്കുംബർ മുറിച്ച് കഷണങ്ങളാക്കിയത് മിക്‌സറിൽ തരിതരിയായി അരയ്ക്കുക. അതിൽ അൽപം പഞ്ചസാരയും ചേർത്ത് ഫ്രിഡ്ജിൽ വയ്ക്കുക. ഇനി മുഖത്ത് മുഴുവനായും ഇടുക. ഉണങ്ങിയശേഷം ചെറുതായി നനച്ച് ഉരച്ച് കഴുകുക. ഇതുവഴി ഡെഡ് സ്കിൻ മാറി കിട്ടും.
തൈര് ഫേസ് പായ്ക്ക്
കടുത്ത ചൂടിൽ ചർമ്മത്തിന് തണുപ്പ് പകരാൻ സഹായിക്കാനാണ് തൈര് ഫേസ് പായ്ക്ക്. അതിനായി ഒരു വലിയ സ്പൂൺ തൈരിൽ ഒരു ചെറിയ സ്പൂൺ സാൻഡൽ പൗഡർ ചേർത്ത് മുഖത്ത് പുരട്ടുക. 10 മിനിറ്റിനു ശേഷം തണുത്ത വെള്ളമുപയോഗിച്ച് മുഖം നന്നായി കഴുകുക. മുഖത്ത് നല്ല ഫ്രഷ് ഫീൽ ഉണ്ടാകും.
സാൻഡൽ ഫേസ് പായ്ക്ക്
ചന്ദനത്തിന്‍റെ തണുപ്പ് വേനൽക്കാലത്ത് ചർമ്മത്തിന് നല്ല ആശ്വാസം പകരാറുണ്ട്. ബൗളിൽ ഒരു വലിയ സ്പൂൺ സാൻഡൽ പൗഡറും അൽപം റോസ്‍വാട്ടറും കൂടി മിക്സ് ചെയ്ത് പായ്ക്ക് തയ്യാറാക്കി മുഖത്ത് പുരട്ടുക. ഇത് കഴുത്തിലും പുരട്ടണം. ഉണങ്ങിയ ശേഷം തണുത്ത വെള്ളമൊഴിച്ച് കഴുകി കളയുക.
പൊദിന ഫേസ് പായ്ക്ക്
പൊദിന ചേർന്ന ജ്യൂസ് കഴിക്കുമ്പോൾ ശരീരത്തിന് എപ്രകാരമാണോ ഗുണകരമാവുക അപ്രകാരം തന്നെയാണ് ഇത് പായ്ക്കായി ഉപയോഗിക്കുമ്പോൾ കിട്ടുന്ന ഗുണവും അതുപോലെ തന്നെ ചർമ്മത്തിന് ഈർപ്പവും പകരും. വെയിലു കൊണ്ട് തളർന്ന ചർമ്മത്തിന് ഫലവത്തായ ഒരു പായ്ക്കാണ്. അതിനായി ഒരു വലിയ സ്പൂൺ പൊദിനയില അരച്ചതിൽ 2 സ്പൂൺ റോസ്‍വാട്ടർ ചേർത്ത് മുഖത്തും കഴുത്തിലും പുരട്ടുക. ഉണങ്ങിയ ശേഷം തണുത്ത വെളളമുപയോഗിച്ച് കഴുകാം. ചർമ്മത്തിന് കൂടുതൽ തിളക്കം പകരാൻ അതിൽ ഒരു നുള്ള് മഞ്ഞൾപൊടിയും ചേർക്കാം.
മാംഗോ ഫേസ് പായ്ക്ക്
മാമ്പഴത്തിന്‍റെ തൊലി നീക്കി കഷണങ്ങളാക്കി മിക്‌സറിലിട്ട് പേസ്റ്റ് തയ്യാറാക്കുക. ഇതിൽ ഒരു ചെറിയ സ്പൂൺ സാൻഡൽ പൗഡർ, ഒരു ചെറിയ സ്പൂൺ തൈര്, അര ചെറിയ സ്പൂൺ തേൻ, ഒരു നുള്ള് മഞ്ഞൾ എന്നിവ ചേർത്ത് ലേപനമാക്കി മുഖത്ത് പുരട്ടുക. ഉണങ്ങിയ ശേഷം തണുത്ത വെള്ളമുപയോഗിച്ച് കഴുകാം.
വാട്ടർ മെലൺ ഫേസ് പായ്ക്ക്
വേനൽക്കാലത്ത് ശരീരത്തിലെ വെള്ളത്തിന്‍റെ അഭാവം നികത്തുന്നതിന് തണ്ണിമത്തൻ നല്ലതാണെന്നതു പോലെ അതിന്‍റെ പായ്ക്ക് ചർമ്മത്തിലെ ഈർപ്പവും നിലനിർത്തും. തണ്ണിമത്തൻ ജ്യൂസിൽ അൽപം തൈര് ചേർത്ത് ലേപനമായി മുഖത്തും കഴുത്തിലും പുരട്ടുക. 15 മിനിറ്റിനു ശേഷം കഴുകി കളയുക.
ടൊമാറ്റോ ഫേസ് പായ്ക്ക്
അധികനേരം വെയിലു കൊണ്ട് ചർമ്മം കരുവാളിക്കുകയാണെങ്കിൽ തക്കാളി ഫേസ് പായ്ക്കിടാം. ഒരു വലിയ തക്കാളി പൾപ്പാക്കി അതിൽ രണ്ട് ചെറിയ സ്പൂൺ തേൻ ചേർത്ത് മുഖത്തും കഴുത്തിലും പുരട്ടുക. 10-15 മിനിറ്റ് കഴിഞ്ഞ് ഇത് ഉണങ്ങിയ ശേഷം തണുത്ത വെള്ളമുപയോഗിച്ച് കഴുകുക. സൺ ടാനിംഗ് അകലും, ഒപ്പം ചർമ്മത്തിന് നല്ല തിളക്കവും കിട്ടും.
മത്തങ്ങ ഫേസ് പായ്ക്ക്
മത്തങ്ങ ചെറുതായി അരിഞ്ഞ് അതിൽ അൽപം തൈര് ചേർത്ത് മുഖത്ത് പുരട്ടുക. പായ്ക്ക് ഉണങ്ങിയ ശേഷം തണുത്ത വെള്ളം കൊണ്ട് കഴുകാം. സൺ ടാൻ അകന്നു കിട്ടുന്നതിനൊപ്പം ഇത് മുഖത്തെ ചുളിവുകളും വരകളും അകറ്റും. ഇത് ബ്ലാക്ക് ഹെഡ്സ് കുറയ്ക്കും. ചർമ്മം മൃദുവാകുകയും ചെയ്യും.
നാരങ്ങാ ഫേസ് പായ്ക്ക്
ഒരു സ്പൂൺ നാരങ്ങാ നീരിൽ അൽപം തേൻ ചേർത്ത് മിക്സ് ചെയ്യുക. ഇതിൽ പഞ്ഞിമുക്കി മുഖത്തും കഴുത്തിലും പുരട്ടുക. 20 മിനിറ്റിനു ശേഷം തണുത്ത വെള്ളമുപയോഗിച്ച് മുഖവും കഴുത്തും കഴുകുക. ചർമ്മത്തിന് മുറുക്കവും തിളക്കവും കിട്ടാൻ ഇത് സഹായിക്കും. സൺ ടാൻ അകലാൻ നാരങ്ങാ തൊലി കൊണ്ട് ചർമ്മത്തിലുരസുന്നതും പ്രയോജനപ്രദമായിരിക്കും.
