കെമിക്കൽ പീലിംഗിലൂടെ ചർമ്മത്തിന് നിറവും തിളക്കവും കൈവരും. ആരോഗ്യമുള്ള പുതിയ സ്‌കിൻ പാളി രൂപപ്പെടുത്തുന്നതിന് ഈ രീതി സഹായകരമാണ്. ചർമ്മത്തിലെ നിറ വ്യത്യാസമകറ്റി ഒരുപോലെ നിറം നൽകുന്നു. ചർമ്മത്തിനു മൃദുത്വവും മുറുക്കവും പകരും. സൂര്യാഘാതം മൂലം ഉണ്ടാകുന്ന കരിവാളിപ്പും അകറ്റും. റഫ്, ഡ്രൈ സ്‌കിന്നിനു മൃദുത്വം പകരുന്നതിനും പീലിംഗ് സുപ്രധാന പങ്ക് വഹിക്കുന്നു.
വിദഗ്‌ദ്ധ ഡർമ്മറ്റോളജിസ്‌റ്റിന്‍റെ സഹായത്തോടെ വേണം പീലിംഗ് ചെയ്യാൻ. അല്ലാത്ത പക്ഷം പൊള്ളലേൽക്കാനും ഹൈപ്പർ പിഗ്‌മെന്‍റേഷൻ പോലുള്ള പ്രശ്നങ്ങൾ ഉടലെടുക്കാനും സാദ്ധ്യതയേറെയാണ്. പീലിംഗ് ചെയ്യുന്നുവെങ്കിൽ തുടക്കത്തിൽ ലോ സ്‌ട്രെങ്‌ത് ബി.എച്ച്.എ./എ.എച്ച്.എ. എക്‌സ്‌ഫോളിയേറ്ററോടു കൂടിയ ഗ്ലൈക്കോളിക്ക് / ലാക്ടിക് പീലിംഗ് ചെയ്യുന്നത് ഹിതകരമായിരിക്കും. മൂന്ന് ആഴ്‌ചയ്‌ക്കു ശേഷം രണ്ടാമത്തെ സിറ്റിംഗ് ആവാം. മൂന്ന് ആഴ്‌ചയോളം മുഖത്ത് അധികം മേക്കപ്പ് അപ്ലൈ ചെയ്യരുത്. മേക്കപ്പ് ചെയ്യേണ്ടി വരുന്നുവെങ്കിൽ ആദ്യം മുഖത്ത് മോയ്‌സ്‌ചുറൈസർ പുരട്ടുക. മേക്കപ്പ് പ്രൊഡക്‌റ്റിലെ കെമിക്കലുകൾ അലർജിക്ക് കാരണമായെന്നു വരാം.
ലാക്‌ടിക്ക് പീലിംഗ്
പാൽ ഉപയോഗിച്ച് പീലിംഗ് ചെയ്യുന്ന രീതിയാണിത്. പാൽ അലർജിയുള്ളവർ ഈ രീതി അവലംബിക്കാതിരിക്കുന്നതാണ് അഭികാമ്യം. സ്‌കിന്നിൽ ഡീപ്പ് ക്ലെൻസിംഗ് സാധ്യമാകുന്നതിനു പുറമേ സ്‌കിൻ ഹൈഡ്രേഷനും ലാക്ടിക് പീലിംഗിലൂടെ സാധ്യമാവും. ലാക്ടിക് പീൽ അപ്ലൈ ചെയ്യുന്നതിനു മുമ്പ് ചർമ്മത്തിൽ എവിടെയെങ്കിലും പുരട്ടി ടെസ്‌റ്റ് ചെയ്യുന്നത് ഗുണകരമായിരിക്കും. പി.എച്ച് ലെവൽ കൂടുകയോ കുറയുകയോ ചെയ്യുമ്പോഴാണ് ചൊറിച്ചിലും മറ്റുതരത്തിലുള്ള അസ്വസ്‌ഥതകളും ഉണ്ടാവുന്നത്.
ഗ്ലൈക്കോളിക്ക് പീൽ
വീര്യം കുറഞ്ഞ നാച്വറൽ പീൽ ആണിത്. കരിമ്പ് ഉപയോഗിച്ചാണിത് തയ്യാറാക്കുന്നത്. അൽപം പുളിയടങ്ങിയ നെല്ലിക്ക, മുന്തിരി എന്നിവയും ഉപയോഗിക്കുന്നു. മുഖക്കുരുവിനും ഏറ്റവും അനുയോജ്യമായ പീലിംഗ് രീതിയാണിത്.
പീലിംഗ് ചെയ്യേണ്ട വിധം.
മുഖം വൃത്തിയാക്കിയ ശേഷം മെഷീനിന്‍റെ സഹായത്തോടെ അലൂമിനിയം ഓക്‌സൈഡ് ക്രിസ്‌റ്റലും ഡയമണ്ടും അപ്ലൈ ചെയ്യുന്നു. ഇതുവഴി ചർമ്മത്തിനു തിളക്കം കൈവരും. ഇതിനു ശേഷം സ്‌കിൻ സ്‌ട്രെച്ച് ചെയ്യിച്ച് വാക്വം കൺട്രോൾ ചെയ്‌ത് ചുവട്ടിൽ നിന്നും മുകളിലേയ്‌ക്കെന്ന വിധത്തിലാണ് അപ്ലൈ ചെയ്യുന്നത്. ഈ പ്രക്രിയയ്‌ക്ക് ഇരുപത് മിനിറ്റ് വേണ്ടി വരും.
മീഡിയം സ്‌ട്രോക്ക് നൽകിയാൽ മതിയാവും. ശേഷം പഞ്ഞിയിൽ ഐസ് ക്യൂബെടുത്ത് മുഖത്തു ചുറ്റിക്കുക. ടിഷ്യൂ ഉപയോഗിച്ച് സാവകാശം തുടച്ച് മുഖത്തെ ഈർപ്പം കളയുക. ഇനി ഹൈ ഡ്രോ പായ്‌ക്ക്, അലോവെര ജെൽ പുരട്ടാം. അഞ്ച് മിനിറ്റിനു ശേഷം ഇത് തുടച്ചു നീക്കുക.
ശ്രദ്ധിക്കാം
കെമിക്കൽ പീൽ ട്രീറ്റ്‌മെന്‍റിനു കുറഞ്ഞത് അഞ്ച് ദിവസം മുമ്പ് ഷേവിംഗ്, വാക്‌സിംഗ്, ബ്ലീച്ചിംഗ് മറ്റു ഹെയർ റിമൂവർ ടെക്‌നിക്കുകളൊന്നും ചെയ്യരുത്. സ്‌കിന്നിൽ സ്‌ക്രബിംഗ് പാടില്ല. കെമിക്കൽ പീൽ ട്രീറ്റ്‌മെന്‍റിനു ശേഷം അണുബാധ അലട്ടാതെ നോക്കുക.
