കടയിൽ വിൽപ്പനയ്ക്ക് വെച്ചിരിക്കുന്ന മുന്തിരി കണ്ടാൽ നല്ലതാണെന്ന് തോന്നും. പലപ്പോഴും ഈച്ച ഒന്നും ഇല്ലാത്ത തിളക്കമുള്ള മുന്തിരി കാണുമ്പോൾ അങ്ങനെ തന്നെ തിന്നാൻ തോന്നും. മുന്തിരി തോട്ടത്തിൽ നിന്ന് പറിച്ച് കൊണ്ട് വന്ന ഉടനെ ആയാൽ പോലും വൃത്തിയായി കഴുകി യില്ലെങ്കിൽ അവ അപകടകാരിയാണ്. കാരണം അസുഖകരമായ സത്യം എന്താണെന്നു വച്ചാൽ ആ തിളങ്ങുന്ന തൊലികളിൽ പലപ്പോഴും കീടനാശിനി അവശിഷ്ടങ്ങൾ, മെഴുക് ആവരണങ്ങൾ, മറഞ്ഞിരിക്കുന്ന അഴുക്ക് എന്നിവ അടങ്ങിയിരിക്കുന്നു.
മുന്തിരി ഇറുകിയ കൂട്ടങ്ങളായി വളരുന്നതിനാലും നേർത്തതും അതിലോലവുമായ തൊലികൾ ഉള്ളതിനാലും രാസവസ്തുക്കളും പൊടിയും എളുപ്പത്തിൽ കുമിഞ്ഞുകൂടുന്നു. ടാപ്പിനടിയിൽ പെട്ടെന്ന് കഴുകുന്നത് കൊണ്ട് ഒരു കാര്യവുമില്ല. മുന്തിരി കഴുകാൻ ഫാൻസി ഫ്രൂട്ട് വാഷുകളോ വിലകൂടിയ സ്പ്രേകളോ ആവശ്യമില്ല. ലളിതമായ അടുക്കള ചേരുവകൾ ഉപയോഗിച്ച് മുന്തിരി ഫലപ്രദമായും സുരക്ഷിതമായും വൃത്തിയാക്കാൻ കഴിയും. എളുപ്പവും ശാസ്ത്രീയവുമായ വഴികൾ ഉപയോഗിച്ച് മുന്തിരിയിൽ നിന്ന് കീടനാശിനികൾ സ്വാഭാവികമായും എങ്ങനെ നീക്കം ചെയ്യാമെന്ന് നോക്കാം.
മുന്തിരിയിൽ മറ്റ് പഴങ്ങളെ അപേക്ഷിച്ച് കൂടുതൽ കീടനാശിനികൾ അടങ്ങിയിരിക്കുന്നത് എന്തുകൊണ്ട് എന്നറിയാമോ? കൃഷി സമയത്ത് ഏറ്റവും കൂടുതൽ കീടനാശിനികൾ തളിക്കുന്ന പഴങ്ങളിൽ ഒന്നാണ് മുന്തിരി. അവയ്ക്ക് പ്രാണികൾ, ഫംഗസ്, പൂപ്പൽ എന്നിവയ്ക്ക് സാധ്യത കൂടുതലാണ്. അതിനാൽ വിള സംരക്ഷിക്കാൻ കർഷകർ പലപ്പോഴും ഒന്നിലധികം തവണ കീടനാശിനി ഉപയോഗി ക്കുന്നു.
സരസ ഫലങ്ങൾക്ക് ചെറിയ വിള്ളലുകൾ ഉണ്ടാകും. തൊലി നേർത്തതും സുഷിരങ്ങളുള്ളതുമായിരിക്കും. ഇതുമൂലം രാസവസ്തുക്കൾ എളുപ്പത്തിൽ പറ്റിപ്പിടിക്കുന്നു. വെറുതെ വെള്ളത്തിൽ കഴുകിയാൽ ഈ മാലിന്യം നീക്കാൻ കഴിയില്ല. അതുകൊണ്ടാണ് മുന്തിരി കഴിക്കുന്നതിനുമുമ്പ് ശരിയായ രീതിയിൽ വൃത്തിയാക്കേണ്ടത് പ്രധാനമായിരിക്കുന്നത്.
മുന്തിരി എടുത്ത് ഒരു വലിയ പാത്രത്തിൽ വയ്ക്കുക. തണുത്ത ഒഴുകുന്ന വെള്ളത്തിനടിയിൽ 20- 30 സെക്കൻഡ് നേരം കഴുകുക. കൈ കൊണ്ട് സൗമ്യമായി തടവുക. ഇങ്ങനെ ചെയ്യുമ്പോൾ പറ്റിപ്പിടിച്ച പൊടിയും ചില ഉപരിതല അവശിഷ്ടങ്ങളും നീക്കം ചെയ്യാൻ പറ്റും. ഈ കഴുകൽ കീടനാശിനികളെ നീക്കം ചെയ്യില്ലെങ്കിലും അളവ് ഗണ്യമായി കുറയ്ക്കുകയും മുന്തിരിയെ ആഴത്തിലുള്ള വൃത്തിയാക്കലിനായി തയ്യാറാക്കുകയും ചെയ്യുന്നു.
കീടനാശിനി ഇല്ലാതാക്കാൻ മുന്തിരി കുറച്ചുനേരം സോഡ ലായനിയിൽ മുക്കിവയ്ക്കുക. മുന്തിരി വൃത്തിയാക്കുന്നതിനുള്ള ഏറ്റവും ഫലപ്രദവും ശാസ്ത്രീയവുമായ രീതികളിൽ ഒന്നാണിത്. ബേക്കിംഗ് സോഡ (സോഡിയം ബൈകാർബണേറ്റ്) പല സാധാരണ കീടനാശിനി തന്മാത്രകളേയും തകർക്കാൻ സഹായിക്കുന്നുവെന്ന് ഗവേഷണങ്ങൾ കാണിക്കുന്നു. 2 ടീ സ്പൂൺ ബേക്കിംഗ് സോഡ 2 ലിറ്റർ വെള്ളത്തിൽ ചേർക്കുക. നന്നായി ഇളക്കുക മുന്തിരി 10-15 മിനിറ്റ് ഇതിൽ മുക്കി വെയ്ക്കുക. ബേക്കിംഗ് സോഡയുടെ ക്ഷാര സ്വഭാവം കീടനാശിനി അവശിഷ്ടങ്ങളുമായി പ്രതിപ്രവർത്തിച്ച് വിഷത്തിന്റെ പ്രഭാവം ലഘുകരിക്കുന്നു. 15 മിനിറ്റ് കഴിഞ്ഞ് ഈ ലായനി കളഞ്ഞ ശേഷം മുന്തിരി സൗമ്യമായി തടവി ശുദ്ധമായ വെള്ളത്തിൽ ഒന്ന് കൂടെ നന്നായി കഴുകുക.
മുന്തിരി വൃത്തിയാക്കാൻ മറ്റൊരു മാർഗം വിനാഗിരി ഉപയോഗിച്ച് കഴുകുന്നതാണ്. മികച്ച പ്രകൃതിദത്ത ക്ലീനറാണ് വിനാഗിരി. ഇത് കീടനാശിനികളെ മാത്രമല്ല, ബാക്ടീരിയളേയും പൂപ്പലുകളേയും അണുക്കളേയും കൊല്ലുന്നു. വെളുത്ത വിനാഗിരി കുറച്ചു വെള്ളത്തിൽ കലർത്തി മുന്തിരി 5-10 മിനിറ്റ് മുക്കിവയ്ക്കുക. ശേഷം നന്നായി കഴുകുക. നേരിയ ആസിഡിൽ മുന്തിരിയിലെ മാലിന്യങ്ങൾ അലിയിക്കുന്നതിനും അണുവിമുക്തമാക്കുന്നതിനും സഹായിക്കുന്നു. ശരിയായ രീതിയിൽ കഴുകിയാൽ വിനാഗിരിയുടെ ഗന്ധവും പോകും.
സാധാരണ രീതിയിൽ ഇത്രയും ഒക്കെ ചെയ്ത ശേഷം മുന്തിരി കഴിക്കാറാണ് പതിവ് എന്നാൽ കഴുകിയ ശേഷം മുന്തിരി നന്നായി തുടച്ച് ഉണക്കുക. കഴുകൽ കൊണ്ട് മാത്രം വൃത്തിയാക്കൽ പ്രക്രിയ അവസാനിക്കുന്നില്ല. കഴുകിയ ശേഷം ഓരോ മുന്തിരിക്കുലയും വൃത്തിയുള്ള തുണികൊണ്ട് മെല്ലെ തുടയ്ക്കുക. ശേഷിക്കുന്ന അവശിഷ്ടങ്ങൾ ഇങ്ങനെ നീക്കം ചെയ്യപ്പെടുന്നു. ഒരു കിച്ചൻ ടവൽ ഉപയോഗിച്ചാൽ നന്നായി വൃത്തിയാകും. പുറത്തെ ജലാംശം നീക്കിയ മുന്തിരി ഫ്രിഡ്ജിൽ കൂടുതൽ നേരം ഫ്രഷ് ആയിട്ടിരിക്കും. പൂപ്പൽ ഉണ്ടാകാനുള്ള സാധ്യത കുറവാണ്.
വൃത്തിയാക്കിയ മുന്തിരി സുരക്ഷിതമായി സൂക്ഷിക്കുകയും വേണം. ഈർപ്പം ബാക്ടീരിയ വളർച്ചയെ പ്രോത്സാഹിപ്പിക്കുന്നതിനാൽ മുന്തിരി കഴുകുന്നതിന് മണിക്കൂറുകളോളം മുക്കി വെക്കുന്നത് ഒഴിവാക്കുക.
