“റോമാ എന്‍റെ ഷർട്ട് എവിടെ?”
“അലമാരയിൽ കാണും നോക്കി എടുക്കൂ”
“എവിടെ.. ഞാൻ കണ്ടില്ല. എനിക്ക് ഇന്ന് ഒരു മീറ്റിംഗ് ഉണ്ട്. ഇവിടെ നല്ല ഷർട്ട് ഒന്നുമില്ല”.
“ഞാൻ ഇപ്പോൾ അങ്ങോട്ട് വന്നാൽ ലഞ്ച് പായ്ക്ക് ചെയ്യാൻ വൈകും.”
“നിന്നോട് എത്ര തവണ പറഞ്ഞിട്ടുണ്ട് എന്‍റെ ജാക്കറ്റ് ഒക്കെ കവറിൽ സൂക്ഷിക്കാൻ. ഒന്നും കേൾക്കില്ല. മുഴുവൻ സമയവും അടുക്കളയിലാ. അതുകൊണ്ടാ മൊത്തം പ്രശ്നം.”
എന്നും രാവിലെ റോമയ്ക്കും ഭർത്താവ് രോഹിത്തിനും ഇടയിൽ ഇത്തരം സംസാരങ്ങൾ നടക്കുന്നത് സാധാരണമാണ്. പലപ്പോഴും ഇതേ ചൊല്ലി ഇരുവർക്കുമിടയിൽ നീണ്ട വാഗ്വാദങ്ങൾ വരെ ഉണ്ടാകാറുണ്ട്. ജോലിത്തിരക്കും മറ്റും മൂലം പിറ്റേന്ന് വൈകി എഴുന്നേൽക്കേണ്ടി വരുന്നതിനാൽ കൃത്യസമയത്ത് ഓഫീസിലെത്താനും വൈകും. ദൈനംദിന ജോലികളിൽ ചില ക്രമീകരണങ്ങൾ കൊണ്ടുവരുന്നതോടെ എല്ലാം സിസ്‌റ്റമാറ്റിക് ആകുന്നതിനൊപ്പം കൃത്യ സമയത്ത് ഓഫീസിൽ എത്തുകയും ചെയ്യാം. ഒപ്പം സമ്മർദ്ദം കുറയുകയും ചെയ്യും.
മോഡേൺ ഗാഡ്ജെറ്റുകൾ ജോലി എളുപ്പമാക്കും
അതിനുള്ള ഒരു പോംവഴിയാണ് 4 ബർണറുകളുള്ള ഗ്യാസ് സൗ. അതിൽ ഒരേസമയം 4 ഭക്ഷണ വിഭവങ്ങൾ പാകം ചെയ്യാം. ഇലക്ട്രിക് ചോപ്പർ ഉണ്ടെങ്കിൽ പച്ചക്കറികൾ 2 മിനിറ്റ് കൊണ്ട് അരിയാം. റൊട്ടി മേക്കറിൽ റൊട്ടി തയ്യാറാക്കുകയും ചെയ്യാം. ഈ രീതിയിൽ മുഴുവൻ ഭക്ഷണവും തയ്യാറാക്കാൻ ഏകദേശം 20-30 മിനിറ്റ് സമയമേ എടുക്കൂ. ബാക്കിയുള്ള സമയം മറ്റു കാര്യങ്ങൾക്കായി വിനിയോഗിക്കുകയും ചെയ്യാം. റൊട്ടി മേക്കർ, ബാറ്റർമേക്കർ, റൈസ് കുക്കർ, ബ്രെഡ് മേക്കർ, വെജിറ്റബിൾ ചോപ്പർ, ഫുഡ് പ്രൊസസർ, സ്പ്രൗട്ട് മേക്കർ, കോഫി മേക്കർ എന്നിങ്ങനെയുള്ള ആധുനിക ഗാഡ്ജെറ്റുകൾ ഇന്ന് വിപണിയിൽ ലഭ്യമാണ്. അവയുടെ സഹായത്തോടെ മണിക്കൂറുകൾ എടുക്കുന്ന ജോലി മിനിറ്റുകൾക്കു ള്ളിൽ ചെയ്ത് തീർക്കാം. ആവശ്യാനുസരണം അവ ഉപയോഗപ്പെടുത്തുന്നതിലൂടെ ജോലി വളരെ എളുപ്പവുമാക്കാം.
സഹായം തേടുക
കൂട്ടുകുടുംബത്തിൽ കഴിയുന്ന സ്‌കൂൾ അധ്യാപികയായ രാജശ്രീക്ക് കൃത്യസമയത്ത് ഭക്ഷണം പാകം ചെയ്യാനും സ്‌കൂളിലെത്താനും ഏറെ ബുദ്ധിമുട്ടുള്ള കാര്യങ്ങളായിരുന്നു. സ്‌കൂളിൽ എത്താൻ വൈകുന്നതിനാൽ അവർക്ക് ശരിയായി ഒരുങ്ങാനോ പ്രാതൽ കഴിക്കാനോ കഴിഞ്ഞിരുന്നില്ല. എന്നാൽ പാചകം ചെയ്യാൻ ഒരു വീട്ടുജോലിക്കാരിയെ നിയോഗിച്ചതോടെ പ്രശ്നം ഒരുവിധം പരിഹരിക്കപ്പെട്ടു. കൃത്യസമയത്ത് ചെയ്തു തീർക്കാൻ പറ്റാത്ത ജോലികൾക്കായി വീട്ടു ജോലിക്കാരിയുടെ സഹായം തേടുന്നതിൽ തെറ്റില്ല. ഇതിനായി കുറച്ച് പണം അധികമായി ചെലവഴിക്കേണ്ടി വന്നാലും പിശുക്ക് കാണിക്കരുത്. കാരണം വീട്ടുജോലികൾ സുഗമമായി നടന്നാൽ മാത്രമേ നിങ്ങൾക്ക് ജോലിയിലും മറ്റ് കുടുംബ കാര്യങ്ങളിലും ശരിയായ ശ്രദ്ധ കേന്ദ്രീകരിക്കാൻ കഴിയൂ.
ഭക്ഷണകാര്യത്തിൽ ആസൂത്രണം ആവശ്യമാണ്
രാവിലെ ഏതൊരു വീട്ടമ്മയുടെയും മനസ്സിൽ ഓടിയെത്തുന്ന ഒരു ചോദ്യമുണ്ട്. “ഇന്ന് എന്താണ് ഭക്ഷണത്തിനായി തയ്യാറാക്കുക?” തലേന്ന് മുൻക്കൂട്ടി ഒന്നും പ്ലാൻ ചെയ്യാത്തവരെ സംബന്ധിച്ചാണ് ഈ കൺഫ്യൂഷൻ കൂടുതൽ പ്രശ്നമാകുക. കൃത്യമായ പ്ലാനിംഗ് ഇല്ലാത്തതുകൊണ്ട് അക്കാരണം കൊണ്ട് ചിലപ്പോൾ സമയ നഷ്ട‌ം വരെ ഉണ്ടാകാം. ഇതൊഴിവാക്കാനുള്ള ഏറ്റവും നല്ല പ്രതിവിധിയാണ് ഭക്ഷണം മുൻക്കൂട്ടി ആസൂത്രണം ചെയ്യുക എന്നുള്ളത്. വരുന്ന ആഴ്ചയിലെ പ്രഭാത ഭക്ഷണം, ഉച്ചഭക്ഷണം, അത്താഴം, മിഡ്-സ്‌നാക്സ് എന്നിവ വാരാന്ത്യങ്ങളിൽ ആസൂത്രണം ചെയ്യാം. ഇത് ബോർഡിൽ എഴുതുകയോ പ്രിന്‍റ് എടുത്ത് ഫ്രിഡ്ജിൽ ഒട്ടിക്കുകയോ ചെയ്യാം. അങ്ങനെ എല്ലാ ദിവസവും വീട്ടുജോലിക്കാരിക്ക് നിർദ്ദേശം കൊടുക്കുന്നത് ഒഴിവാക്കുകയും ചെയ്യാം. മറ്റൊന്ന്, ഫുഡ് മെനു ആസൂത്രണം ചെയ്യുമ്പോൾ കുടുംബാംഗങ്ങളുടെ സഹായവും സ്വീകരിക്കാം. അങ്ങനെയായാൽ എല്ലാവർക്കും ഇഷ്ടമാകുന്ന വിഭവങ്ങൾകൂടി മെനുവിൽ എഴുതിച്ചേർക്കാം.
തയ്യാറെടുപ്പ് മുൻകൂറായി
അഞ്ജലിയും ആരുഷും ഒരു മൾട്ടിനാഷണൽ കമ്പനിയിൽ സോഫ്റ്റ് വെയർ എഞ്ചിനീയർമാരാണ്. അഞ്ജലിക്ക് പാചകം തീരെ ഇഷ്ട‌മല്ല. അതേ സമയം ജോലിക്കാരി തയ്യാറാക്കുന്ന ഭക്ഷണം ആരുഷിന് ഇഷ്ടവുമല്ല. ആരുഷിന് സ്വയം പാചകം ചെയ്യാൻ ആണ് ഇഷ്ട‌ം. “ഓഫീസിൽ നിന്ന് വന്നതിന് ശേഷം ഞങ്ങൾ രണ്ടുപേരും പച്ചക്കറികൾ അരിഞ്ഞ് വയ്ക്കും. മസാലകൾ തയ്യാറാക്കി ഫ്രിഡ്ജിൽ സൂക്ഷിക്കും. രാവിലെ അരിഞ്ഞുവച്ച പച്ചക്കറികൾ കൊണ്ട് എളുപ്പത്തിൽ കറി തയ്യാറാക്കും. ഈ സമയം കൊണ്ട് ഒഴിവുള്ളവർ ചപ്പാത്തിയോ ദോശയോ തയ്യാറാക്കും. അതോടെ ചെറിയ ഒരു അധ്വാനം കൊണ്ട് നമുക്ക് ഇഷ്ടപ്പെട്ട ഭക്ഷണം കഴിക്കാം.” എന്നാണ് താൻ കണ്ടെത്തിയ പ്രതിവിധിയെക്കുറിച്ച് ആരുഷ് പറയുന്നത്.
രാവിലെയുള്ള തിരക്കേറിയ ജോലിക്കിടയിൽ നമുക്ക് പലപ്പോഴും സമയം കിട്ടണമെന്നില്ല. ഈ പ്രശ്നം ഒഴിവാക്കാൻ തലേന്ന് തന്നെ പച്ചക്കറികൾ വ്യത്തിയാക്കി അരിഞ്ഞു ഫ്രിഡ്ജിൽ സൂക്ഷിക്കാം. ആവശ്യമെങ്കിൽ അരപ്പും തയ്യാറാക്കി വയ്ക്കുന്നതും സമയലാഭമുണ്ടാക്കും. അധിക വേവുള്ള പയർ ഇനങ്ങൾ കുതിർത്ത് വേവിച്ചു ഫ്രിഡ്ജിൽ വയ്ക്കുന്നതും ഗുണം ചെയ്യും. പിറ്റേന്ന് അതെടുത്തു അരപ്പോ മസാലയോ ചേർത്ത് കറി തയ്യാറാക്കാം. തേങ്ങ വറുത്തരച്ച കറികൾ തലേന്ന് തന്നെ തയ്യാറാക്കി വയ്ക്കുന്നതും ഉചിതമാണ്. ഇത്തരത്തിൽ സുപരിചിതമായ ചില പൊടിക്കൈ വിദ്യകളിലൂടെ രാവിലെയുള്ള തിരക്കും അലച്ചിലും ഒഴിവാക്കാവുന്നതേയുള്ളൂ. രാവിലെ സമയം ലാഭിക്കാം. സ്വസ്‌ഥമായി ഇരുന്ന് പുസ്‌തകമോ പത്രമോ വായിക്കുകയും പ്രാതൽ കഴിക്കുകയും ചെയ്യാം. അതുപോലെ ആരോഗ്യത്തിന് ഏറ്റവും ആവശ്യമായ ഒന്നാണ് സാലഡുകൾ. വ്യത്യസ്‌ത തരത്തിൽ തയ്യാറാക്കാവുന്ന ഒന്നാണിത്. സാലഡ്. മുൻക്കൂട്ടി പ്ലാൻ ചെയ്ത് തയ്യാറാക്കി കണ്ടെയ്‌നറിൽ സ്‌റ്റോർ ചെയ്‌ ഫ്രിഡ്ജിൽ വയ്ക്കാം. പിറ്റേന്നത് ലഞ്ച് ബോക്സിനൊപ്പം എടുത്ത് വയ്ക്കാം.
അടുക്കളയിൽ വാരാന്ത്യം ആഘോഷിക്കരുത്
വാരാന്ത്യം മിക്കവരെയും സംബ ന്ധിച്ച് ഒരു ആഘോഷം പോലെയാണ്. സെൽഫ് കെയർ, ഗാർഡനിംഗ്, വീടും പരിസരവും വൃത്തിയാക്കൽ, ഗൃഹാലങ്കാര പണികൾ, മറ്റ് ഹോബികൾ അങ്ങനെ നിരവധി കാര്യങ്ങൾക്കായി ഈ ദിവസം ചെലവഴിക്കപ്പെടുന്നു. ഇത്തരം ജോലികൾ ഒറ്റയ്ക്ക് ചെയ്യാതെ കുടുംബാംഗങ്ങളുടെ സഹായവും ഉറപ്പു വരുത്തുക. ഒരുമിച്ചുള്ള പ്രവർത്തനങ്ങൾ കുടുംബാംഗങ്ങൾക്കിടയിൽ ഹൃദ്യമായ ആശയവിനിമയം സാധ്യമാക്കുകയും ബന്ധങ്ങളെ കെട്ടുറപ്പുള്ളതാക്കുകയും ചെയ്യും. ആ ദിവസം മുഴുവനും അടുക്കളയിൽ പാചകത്തിനായി ചെലവഴിക്കുന്നത് ഉചിതമല്ല. വാരാന്ത്യങ്ങളിൽ പുറത്ത് പോയി ഭക്ഷണം കഴിക്കുകയോ പ്ലാൻ അനുസരി ച്ച് ഇഷ്ടപ്പെട്ട ഒന്നോരണ്ടോ വിഭവം കുടുംബാംഗങ്ങൾ ഒരുമിച്ച് തയ്യാറാക്കുകയോ ചെയ്യാവുന്നതാണ്.
