ലോട്ടസ് സ്റ്റെം പെറ്റൽസ്
ചേരുവകൾ
ചോളമാവ് അര കപ്പ്
കടലപ്പൊടി അര കപ്പ്
ഒറിഗാനോ ഒരു ടീസ്പൂൺ
ചാട്ട് മസാല അര ടീസ്പൂൺ
1 ഇഞ്ചി അരച്ചത് ഒരു ടീസ്പൂൺ
വെളുത്തുള്ളി-പച്ചമുളക് അരച്ചത് ഒരു ടീസ്പൂൺ
ഉപ്പ് ആവശ്യത്തിന്
റവ ഒരു ടേബിൾ സ്പൂൺ
താമരത്തണ്ട് ഒന്നോരണ്ടോയെണ്ണം
എണ്ണ ആവശ്യത്തിന്
തയ്യാറാക്കുന്ന വിധം
റവ, കടലപ്പൊടി, ചോളപ്പൊടി, ഉപ്പ്, ഇഞ്ചി പേസ്റ്റ് എന്നിവ നന്നായി യോജിപ്പിച്ച് അല്പം വെള്ളം ചേർത്ത് കട്ടിയുള്ള മിശ്രിതം തയ്യാറാക്കുക. താമരത്തണ്ട് കഴുകി തൊലി കളഞ്ഞ് ഇതളുകൾ പോലെ മുറിച്ചെടുക്കണം. ഇത് ആവിയിൽ വേവിക്കുക. കടലമാവിൽ മുക്കിയ താമരത്തണ്ട് ഇതളുകൾ എണ്ണയിൽ വറുത്തെടു ക്കണം. ഒറിഗാനോ/ചാട്ട് മസാല തൂവി തിരിച്ചും മറിച്ചുമിട്ട് ലോട്ടസ് സ്റ്റെം പെറ്റൽസ് തയ്യാറാക്കാം.
ഓട്സ് ഡോക്കല
ചേരുവകൾ
ഓട്സ് ഒരു കപ്പ്
റവ ഒരു കപ്പ്
പുളിച്ച തൈര് രണ്ടു കപ്പ്
സവാള കനം കുറച്ച് ചതുരാകൃതിൽ അരിഞ്ഞത് ഒരെണ്ണം
ഉപ്പ് അര ടീസ്പൂൺ
മുളകുപൊടി അര ടീസ്പൂൺ
സോഡ കാൽ ടീസ്പൂൺ
തയ്യാറാക്കുന്ന വിധം
പുളിച്ച തൈരിലേക്ക് ഉപ്പ്, മുളകുപൊടി, റവ, ഓട്സ് എന്നിവ ചേർത്ത് നന്നായി ഇളക്കി 10 മിനിറ്റോളം മാറ്റി വയ്ക്കുക. ഡോക്കല തയ്യാറാക്കുന്ന ഇഡ്‌ഡലിതട്ട് എണ്ണ, നെയ്യ്, വെണ്ണ എന്നിവയിലേതെങ്കിലും പുരട്ടി മയം വരുത്തണം. മിശ്രിതത്തിൽ സോഡാപ്പൊടി ചേർത്ത് ഇഡ്‌ഡലി തട്ടിൽ മാവ് ഒഴിച്ച് ആവിയിൽ വേവിക്കുക. കത്തി കൊണ്ട് ഡോക്കലയിൽ കുത്തി നോക്കി പാകമായോയെന്നു പരിശോധിക്കാം. ഇത് സോസ് കൂട്ടി കഴിക്കാം.
കാപ്സിക്കം സുപ്രീം
ചേരുവകൾ
കാപ്സിക്കം രണ്ടെണ്ണം
ചോളമലരുകൾ വേവിച്ചത് അര കപ്പ്
കടലമാവ് ഒരു കപ്പ്
ഉപ്പ് ആവശ്യത്തിന്
മുളകുപൊടി അര ടീസ്പൂൺ
ചാട്ട് മസാല അര ടീസ്പൂൺ
വെളുത്തുള്ളി-ഇഞ്ചി അരച്ചത് അര ടീസ്പൂൺ
എണ്ണ ആവശ്യത്തിന്
തയ്യാറാക്കുന്ന വിധം
കാപ്സിക്കം നന്നായി കഴുകി വട്ടത്തിൽ മുറിക്കുക. മസാല, കടലമാവ് എന്നിവയിലേക്ക് അല്പം വെള്ളം ചേർത്ത് കട്ടിയുള്ള മിശ്രിതം തയ്യാറാക്കണം. ഒരു ഫ്രൈയിംഗ് പാനിൽ എണ്ണ ചൂടാക്കുക. കാപ്സിക്കം കടലമാവിൽ മുക്കി പാനിൽ വയ്ക്കണം. ഇതിനു മുകളിൽ കടലമാവും ചോള അല്ലികളും നിറച്ച് ഒരു വശം മൊരിയുമ്പോൾ മറിച്ചിടുക. വറുത്തെടുത്ത കാപ്സിക്കം സൂപ്രീം ചട്‌നി, സോസ് എന്നിവയ്ക്കൊപ്പം കഴിക്കാം.
ചിക്കൻ കേക്ക്
ചേരുവകൾ
ചിക്കൻ വേവിച്ചത് ഒരു കപ്പ്
മുട്ട നാലെണ്ണം
വെണ്ണ ഒരു ടേബിൾ സ്പൂൺ
എണ്ണ ഒരു ടേബിൾ സ്പൂൺ
സവാള വഴറ്റിയത് ഒരു ടേബിൾ സ്പൂൺ
വെളുത്തുള്ളി-ഇഞ്ചി ഒരു ടേബിൾ സ്പൂൺ
ഉപ്പ് ഒന്നര ടീസ്പൂൺ
മുളകുപൊടി കാൽ ടീസ്പൂൺ
ഗരം മസാലപ്പൊടി കാൽ ടീസ്പൂൺ
ബ്രഡ് സ്ലൈസ് നാലഞ്ചെണ്ണം
ചില്ലി ഒരു ടേബിൾ സ്പൂൺ
ടൊമാറ്റോ സോസ് ഒരു ടേബിൾ സ്പൂൺ
മല്ലിയില അരിഞ്ഞത് ഒരു ടേബിൾ സ്പൂൺ
തയ്യാറാക്കുന്ന വിധം
ഒരു പാനിൽ എണ്ണ ചൂടാക്കുക. സവാള, മസാല, ഉപ്പ് എന്നിവ ചിക്കനിൽ ചേർത്ത് നന്നയി ഇളക്കുക. ഇത് തണുക്കാൻ വയ്ക്കണം. ഒരു ബേക്കിംഗ് ട്രേയിൽ അല്പം വെണ്ണ പുരട്ടുക. ഇതിനു മീതെ മൂന്നു ബ്രഡ് സ്ളൈസ് വയ്ക്കുക. വെണ്ണ, മുട്ട പതപ്പിച്ചത്, രണ്ടുതരം സോസ്, മല്ലിയില, ചിക്കൻ, രണ്ട് ബ്രഡ് സ്ളെസ്സ് പൊടിച്ചതും ഒരു മിക്സറിലി ട്ട് തരിതരിയായി പൊടിച്ചെടുക്കുക. ഈ മിശ്രിതം ബേക്കിംഗ് ട്രേയിലുള്ള ബ്രഡ് സ്‌ലൈസിൽ പരത്തണം. തുടർന്ന് 200 ഡിഗ്രി സെന്‍റിഗ്രേഡിൽ നേരത്തെ ചൂടാക്കി വച്ചിരിക്കുന്ന ഓവനിൽ വച്ച് ബേക്ക് ചെയ്യണം. ഈവനിംഗ് സ്‌നാക്സായി ചിക്കൻ കേക്ക് കഴിക്കാം.
സൂപ്പർ ചീലാ
ചേരുവകൾ
കടലമാവ് കാൽ കപ്പ്
ചെറുപയർപൊടി കാൽ കപ്പ്
റവ കാൽ കപ്പ്
ഓട്സ് മാവ് കാൽ കപ്പ്
ഉപ്പ് ഒരു ടീസ്പൂൺ
മുളകുപൊടി അര ടീസ്പൂൺ
ചാട്ട് മസാല ഒരു ടീസ്പൂൺ
മുളപ്പിച്ച വൻപയർ അര കപ്പ്
പനീർ അര കപ്പ്
മല്ലിയില അരിഞ്ഞത് കാൽ കപ്പ്
പച്ചമുളക് കാൽ കപ്പ്
എണ്ണ ആവശ്യത്തിന്
തയ്യാറാക്കുന്ന വിധം
ചെറുപയർ പൊടിയിലേയ്ക്ക് കടലമാവ്, റവ, ഓട്സ് മാവ്, അര ടീസ്പൂൺ ഉപ്പ്, അര ടീസ്‌സ്പൂൺ മസാല എന്നിവ ചേർത്ത് ചീല (ദോശ)യ്ക്ക് വേണ്ട മാവ് തയ്യാറാക്കുക. മുളപ്പിച്ച വൻപയർ ആവിയിൽ വേവിച്ചെടുത്തതിലേക്ക് ബാക്കി മസാല, പനീർ, മല്ലിയില, പച്ചമുളക് എന്നിവ ചേർത്ത് ഇളക്കണം. ചൂടാക്കിയ തവയിൽ എണ്ണ പുരട്ടി ചീല ചുട്ടെടുക്കണം. ഇതിനു മുകളിൽ മുളപ്പിച്ച ധാന്യം വിതറി സർവ്വ് ചെയ്യാം. ചട്‌നി, സോസ് എന്നിവയ്ക്കൊപ്പം കഴിക്കാം.
മലായ് ടിക്കി
ചേരുവകൾ
ചേമ്പ് വേവിച്ചത് 500 ഗ്രാം
ക്രീം ഒരു ടീസ്പൂൺ
സവാള ചെറുത് ഒന്ന്
ഒരു നുള്ള് അയമോദകം
ഉപ്പ് ആവശ്യത്തിന്
മുളകുപൊടി അര ടീസ്പൂൺ
മാങ്ങാപ്പൊടി അര ടീസ്പൂൺ
പച്ചമുളക് അരിഞ്ഞത് നാലെണ്ണം
മല്ലിയില അരിഞ്ഞത്
റവ, എണ്ണ ആവശ്യത്തിന്
തയ്യാറാക്കുന്ന വിധം
ക്രീമിലേക്ക് സവാള പൊടിപൊടിയായി അരിഞ്ഞതു ചേർത്ത് തിരിച്ചും മറിച്ചുമിട്ട് വഴറ്റിയ ശേഷം തീയിൽ നിന്നും താഴെയിറക്കാം. ചേമ്പ് തരിതരിയായി പൊടിച്ചെടുക്കുക. ഒന്നര ടീസ്പൂൺ എണ്ണ ചൂടാക്കി അയമോദകവുമിട്ട് കടുകുവറുക്കണം. ഇതിലേക്ക് ചേമ്പ്, ഉപ്പ്, മുളകുപൊടി, മാങ്ങാപ്പൊടി, പച്ചമുളക്, മല്ലിയില എന്നിവ ചേർത്ത് വഴറ്റുക. തണുക്കുമ്പോൾ ഉടച്ച് പേട തയ്യാറാക്കി ഓരോന്നും വഴറ്റിയ സവാളയിൽ മുക്കിയെടുക്കുക. ഇത് കൈ കൊണ്ട് അമർത്തി റവയിൽ മുക്കി ചൂടാക്കിയ എണ്ണയിലിട്ടു വറുത്തെടുക്കാം.
ഹാൻറി ബൈറ്റ്
ചേരുവകൾ
ഓട്സ് ഒരു കപ്പ്
റവ അര കപ്പ്
കടലമാവ് അര കപ്പ്
ചോള മലരുകൾ അര കപ്പ്
മുളപ്പിച്ച കടല അര കപ്പ്
ഉപ്പ് അര ടീസ്പൂൺ
മുളകുപൊടി അര ടീസ്പൂൺ
മല്ലിയില അരിഞ്ഞത് ഒരു ടീസ്പൂൺ
പച്ചമുളക് അരിഞ്ഞത് രണ്ടോ മുന്നോയെണ്ണം
എണ്ണ, സവാള, തക്കാളി ആവശ്യത്തിന്
തയ്യാറാക്കുന്ന വിധം
ഓട്സ്, റവ, കടലമാവ് എന്നിവ നന്നായി യോജിപ്പിക്കുക. ഉപ്പ്, മുളകുപൊടി, മല്ലിപ്പൊടി, പച്ചമുളക്, മുളപ്പിച്ച കടല, ചോള മലരുകൾ എന്നിവ ചേർത്ത് അല്പം വെള്ളവുമൊഴി ച്ച് കട്ടിയുള്ള മിശ്രിതം തയ്യാറാക്കി പത്തുമിനിറ്റ് വയ്ക്കണം. ഒരു ഫ്രൈയിംഗ് പാനിൽ അല്പം എണ്ണയെടുത്ത് മിശ്രിതം അല്‌പാല്‌പമിട്ട് പരത്തുക. അടച്ചു വച്ച് പാകമാകുമ്പോൾ തിരിച്ചിട്ട് വീണ്ടും വേവിക്കണം. തയ്യാറാവുമ്പോൾ ഇതൊരു പ്ലേയ്റ്റിലേക്ക് പകർത്തി സോസ്, തക്കാളി ചട്നിക്കുമൊപ്പം കഴിക്കാം.
