സൗന്ദര്യവർദ്ധക ഉൽപന്നങ്ങളിൽ ഏറ്റവുമധികം ഉപയോഗിക്കുന്ന ഔഷധമാണ് കറ്റാർവാഴ (അലോ വേര). ഇരുന്നൂറോളം ജൈവ മൂലികകൾ കറ്റാർവാഴയിൽ അടങ്ങിയിരിക്കുന്നു. ഉദാ: വിറ്റാമിനുകൾ, ധാതുക്കൾ, അമിനോ ആസിഡ്, പോളിസൈക്കറായിഡ്‌സ്, എൻസൈം, പ്ലാന്‍റ് സ്‌റ്റീറോയിഡുകൾ, ലിഗ്ന‌ിൻ, സാൽസിലിക് ആസിഡ്. സൗന്ദര്യ പരിചരണത്തിന് മാത്രമല്ല, പരിക്കിനും മുറിവേറ്റുള്ള പാടുകൾ അകറ്റാനുമൊക്കെ കറ്റാർവാഴ ഉത്തമമാണ്. പാടുകളും കുരുക്കളുമുള്ള ചർമ്മത്തിനും പ്രാണി കടിച്ചുണ്ടാവുന്ന അലർജിക്കും കറ്റാർവാഴ ചേർന്ന ഉൽപന്നങ്ങൾ അതിവിശേഷമാണ്.
ചർമ്മത്തിന്‍റെ തിളക്കവും സ്നിഗ്ധതയും വർദ്ധിപ്പിക്കാൻ സഹായിക്കുന്ന പ്രകൃതിജന്യ മൂലികകളാണ് കറ്റാർവാഴയിൽ ഉള്ളത്. വരണ്ട ചർമ്മം, എണ്ണമയമുള്ള ചർമ്മം, സംവേദനക്ഷമത ഏറിയ ചർമ്മം എന്നീ പ്രശ്‌നങ്ങൾക്കും കറ്റാർവാഴ ചേർന്ന സൗന്ദര്യ ഉൽപന്നങ്ങളാണ് ഫലപ്രദം.
മുഖം കഴുകിയശേഷം മാത്രമേ അലോ വേര ഉൽപന്നങ്ങൾ ഉപയോഗിക്കാൻ പാടുള്ളൂ. 20 വയസ്സുതൊട്ടേ ഉപയോഗിച്ചു തുടങ്ങാം. ലോഷൻ, ക്രീം, സോപ്പ്, ജെൽ എന്നീ രൂപങ്ങളിലാണ് അലോ വേര ഉല്പന്നങ്ങൾ ലഭിക്കുന്നത്.
മികച്ച മോയിസ്‌ചറൈസർ
ചർമ്മത്തിൽ ഈർപ്പം നിലനിർത്തുന്നതിന് കറ്റാർവാഴയ്ക്ക് സവിശേഷമായ കഴിവുണ്ട്. ചർമ്മസുഷിരങ്ങളിൽ വരെ ഓക്സിജൻ എത്താൻ അത് സഹായിക്കുന്നു. ചർമ്മത്തെ ആന്തരികമായി ശക്തിപ്പെടുത്തുന്നു. അലോ വേര മൃതചർമ്മം നീക്കം ചെയ്യാൻ ഉത്തമമാണ്.
അലോ വേര, വിറ്റാമിൻ ഇ, കൊളാജൻ എന്നിവ അടങ്ങിയ മോയിസ്‌ചറൈസിംഗ് ഉല്പന്നങ്ങൾ ചർമ്മത്തിന്‍റെ സ്നിഗ്ധതയും മൃദുലതയും നിലനിർത്തും.
ഗുണങ്ങൾ
- എല്ലാത്തരം ചർമ്മങ്ങൾക്കും പ്രകൃതിദത്തമായ സംരക്ഷണ കവചമാണിത്.
- മുഖക്കുരു പോലുള്ള പ്രശ്‌നങ്ങളിൽ നിന്നും ചർമ്മത്തെ പരിരക്ഷിക്കുന്നു.
- ചർമ്മം വിയർക്കുന്നത് തടയുന്നു. കുളിർമ്മ പകരുകയും ചെയ്യും.
- രക്തസഞ്ചാരം വർദ്ധിപ്പിക്കുന്നു.
- ഇതിലടങ്ങിയ ആന്‍റി ഓക്‌സിഡന്‍റുകൾ ചർമ്മത്തിന് മുറുക്കം നൽകുന്നു. അവ ആന്‍റി ഏജിംഗായി പ്രവർത്തിക്കുന്നു.
- കറ്റാർവാഴ ജെൽ ചർമ്മരോഗങ്ങൾക്കും പൊള്ളലിനും മുറിവിനും പരിക്കിനും ചതവിനുമൊക്കെ ഫലവത്താണ്. താല്‌കാലികമായ ആശ്വാസം പകരാൻ അത് സഹായിക്കും.
- മലബന്ധം, അർശസ്സ്, പനി തുടങ്ങിയ രോഗങ്ങൾക്കും ഫലവത്താണിത്.
- ചർമ്മത്തിലുള്ള മെലാനിന്‍റെ (വെളുത്തതോ കറുത്തതോ ആയ ചർമ്മത്തിലെ ഒരു സുപ്രധാന തത്വം) അളവിനെ നിയന്ത്രിക്കുകയും ചർമ്മത്തിന് തിളക്കം പകരുകയും ചെയ്യും.
- പ്രായം ഏറുന്നതിന് അനുസരിച്ച് ചർമ്മത്തിൽ ഉണ്ടാകുന്ന മാറ്റങ്ങൾ തടഞ്ഞ് ചുളിവുകളും മറ്റും നിയന്ത്രിക്കുന്നു.
- വിറ്റാമിൻ ധാതുക്കൾ, മറ്റ് പോഷകങ്ങൾ എന്നിവ ഇതിലുണ്ട്.
- ചർമ്മത്തെ പിഗ്‌മെന്‍റേഷനിൽ (വെയിലേറ്റുള്ള ചർമ്മ സംബന്ധമായ പ്രശ്ന‌ം) നിന്നും സംരക്ഷിക്കുന്നതിൽ അലോ വേര ജെല്ലിന് ശേഷിയുണ്ട്.
- അലോ വേര ഇലയിൽ നിന്നെടുക്കുന്ന ജെൽ മുടിയിഴകളിലും സ്‌കാൽപിലും പുരട്ടുകയാണെങ്കിൽ മുടി കൊഴിച്ചിൽ പോലുള്ള പ്രശ്‌നങ്ങൾ ഉണ്ടാവുകയില്ല.
